ال 126 كلت دماغى بتعديلاتها

[eslamafify]

بسم الله

منورين يا رجالة بالمنتدى الفظيع ده انا للاسف لسه عارفه امبارح :

بس يلا ملحوقة

انا كان عندى كمية استفسارات مبالغ فيها عن ال 126 ونفسى الاقى اجابات عنه

انا عندى ريتمو وكنت مسقطلها موتور ريجاتا 1500

بس حاليا حصل فيها كسر فى القنطرة وشرخ فى الكرتيرة الشمال والعربية بقت ملاهى كاملة مش بتعوم بس
دريم بارك


هى الصراحة العربية حلوة جدا واعدتها مريحة وشكلها حلو بس انا شيلت منها ومش ناوى اركبها تانى هصلحها وارخصها وابيعها

حتى هى حست انى استندلت معاها بعد العشرة الطويلة وراحت لابسه فى بلاعة وكسرة بلوك الفتيس والعصاية بتاعته عقابا ليا وانا رديت عليها وقولتلها مش مصلحك اترمى تحت البيت بقا

انا شوفت فديوهات كتير وصور لل 126 كلت دماغى بس انا مستحيل اعرف اركبها بموترها ده مستحييييييييييييييييل

انا اول عربية ليا كانت bmw الشرك 1800 سى سى
والريتمو بعدها مستحملتهاش فغيرتلها الموتور وبردو كنت بحس انى هطلع الموتور من الشكمان فكون انى اركب ال 126 بموترها ده ابقى بنتحر نفسيا

انا عايز اظبط الريتمو وابيعها وبتمنها اجيب 126 واظبتها صح اوى وارتاح من القرف حتى لو صغيرة

انا شوفت تعديلات كتير ومواتير كتير وتلت تربعها مش عارف دى مواتير ايه اصلا

وياترى ايه الى يركب عليها استاندرد او بتعديل بسيط؟
ولو مفيش او الى موجود تعبان زى الفيات ال 500 والكلام ده
يبقى ايه الى ممكن يركب حتى لو هيتعدل جامد؟

وشوفت ناس مركبة مكن امامى بجر امامى او مكن امامى بدفع خلفى
معمول فيها كل حاجة المفعوصة دى

وايه امكانية التكيف فيها عشان اكيد السربنتينة هتبقى قدام لو الموتور ورا وبالتالى هيبقى فى لعب مواسير كتير والكلام ده انا مش عارف خطورته ايه مع المطبات وكده يعنى؟

وشوفت ناس لاغيه الكنبة الى ورا

وفى منها موديل 3 باب وموديل الشنطة زى السيات 2 باب عايز اعرف ده موديلات سنة كام وده سنة كام

ومين فيهم ال bis ومين ال p ؟ هل الى يركب على دى يركب على التانية ولا كل واحدة ليها تعديلتها عشان مشتريش واحدة والبسها ومعرفش اعدل لانى مش هعرف اركبها الا لما اعدل على طول

وبالنسبة لتعديلات ممكن تتكلف كام ولو فى صنايعة محترمة ترشحوهالى خاصة سمكرى وميكانيكى بيفهم

انا معنديش مانع لو غباء الصنايعية هيقرفنى فى حاجات اعملها بايدى طالما هقدر وكمان هبقى حابب كده
انا من القاهرة - جسر السويس

ويا ترى التنك بتاعها كام لتر؟؟؟ وهو فين تحت الكنبة ولا فين

معلش انا طولت عليكم بالاسئلة بس العربية كلت دماغى الصراحة ومش عارف حاجة عنها او تعديلاتها
اتنمى مكنش تقلت رغم انى حاسس انى ناسى حاجات كمان
: CONGRA~238::C ONGRA~238:

[AbOnOrA]

اهلا بيك وبشباب عين شمس وجسر السويس

بص انا عامل موضوع عن تعديلات الفيات مش عارف شوفته ولا لاء بس هو تعديلات شكليه اكتر وطبعاً الفيات براند جامد وكل حاجة بس فى التعديل فكك منها واشترى دماغك وفلوسك وارجع للشارك تانى او ممكن تفكر فى جولف 2 رابيت

[fourseasons]

العربيه ال 126 عربيه جميله لليحافظ عليها هى معانا من الزيرو سنة 93 كنا جيبينها ب 10300 جنيه من شركة النصر.عربيه عباره عن حتة زلطه و الله هى مركونة دلوقتى شويه بس مش عاوزين نفرط فيها لحد دلوقت مع اننا معانا اكسيل و سبيرانزا هى 600 سى سى و تبريد هواء مش مياه يعنى مفيهاش ريدياتير.وهى ديه مشكلتها السخونيه بس جمبله فى الزحمه قوى و فى الركنه مبتشغلش بالك فى الركنه خالص+ البنزين قليل قوى و الله لو مستثمر يعرف يشترى خط الأنتاج بتاعها ال متكهن من 15 سنه ده لو كان موجود و يحطلها موتور جامد شويه و الله العربيه ديه حتكسر الدنيا و يا سلام لو نزلت ب 18 ولا 20 الف حتبقى قنبله

[fourseasons]

اه و صحيح عندنا فى اسكندريه مش كل الميكايكيا بيحبو يشتغلوا فيها مش عارف فى منطقتك الميكايكيا بيدلعوا بردوا ولا ايه؟

[eslamafify]

المشاركة الأصلية كتبت بواسطة AboNoRa اهلا بيك وبشباب عين شمس وجسر السويس بص انا عامل موضوع عن تعديلات الفيات مش عارف شوفته ولا لاء بس هو تعديلات شكليه اكتر وطبعاً الفيات براند جامد وكل حاجة بس فى التعديل فكك منها واشترى دماغك وفلوسك وارجع للشارك تانى او ممكن تفكر فى جولف 2 رابيت

اهلا بيك يا ابو نورا وتسلم على ردك شكلك جارنا

والله انا زى ما قولتلك امكانياتى هى العربية الى معايا بس مقدرش ازود عليها جنيه دلوقتى ومش بمزاجى

انا لو عليا هجيب حته E30 ولا m40 واعيش اللحظة وانسى اى عربية تانية اتخلقت

بس ده مش متاح حاليا ومقدرش امشى من غير عربية انا نسيت المواصلات بتتركب منين يا جدع كده بقالى بتاع 12 سنة مبركبهاش فصعب اوى تصرفش بسرعة

ومعنديش استعداد ابيع واشترى حاجة فى حدود امكانياتى زى ال 127 ولا 128 والعك ده لان كلو عايز مصاريف وقرف شبعنا منه

انا فكرت فى ال 126 عشان رخيصة وبقيت تمن الريتمو ممكن اصرف عليها تمنها مرة ولا مرتين مش مشكلة بس اركب عربية تريح دماغى من القرف المستمر ده

لكن لازم تتظبط طبعا ومعنديش مشكلة تسحب كل تمن الريتمو بس ارتاح طالما هتقضى الغرض

فعشان كده محتاس فى حوار التعديلات ده جدا بتاع الموتور والفتيس اما الشكل الخارجى والكلام ده مقدور عليه

انا اصلا مهندس جرافيكس 3d والدنيا واقفة اليومين دول خاللللللللللص غهطلع الكبت التصميمى عليها بقى صايع يعنى

المشاركة الأصلية كتبت بواسطة fourseasons العربيه ال 126 عربيه جميله لليحافظ عليها هى معانا من الزيرو سنة 93 كنا جيبينها ب 10300 جنيه من شركة النصر.عربيه عباره عن حتة زلطه و الله هى مركونة دلوقتى شويه بس مش عاوزين نفرط فيها لحد دلوقت مع اننا معانا اكسيل و سبيرانزا هى 600 سى سى و تبريد هواء مش مياه يعنى مفيهاش ريدياتير.وهى ديه مشكلتها السخونيه بس جمبله فى الزحمه قوى و فى الركنه مبتشغلش بالك فى الركنه خالص+ البنزين قليل قوى و الله لو مستثمر يعرف يشترى خط الأنتاج بتاعها ال متكهن من 15 سنه ده لو كان موجود و يحطلها موتور جامد شويه و الله العربيه ديه حتكسر الدنيا و يا سلام لو نزلت ب 18 ولا 20 الف حتبقى قنبله

تسلم يا باشا وربنا يباركلوكو فيها وزفى اخواتها الكبار

انا على فكرة عاشق للعربيات القديمة ومبقتنعش بالزيو خاللللللللللللللللللللللل ص
فحاسس بيكو بص بردو لو فكرتو تبيعوها قولى

طيب طالما العربية معاك متقولى هى بشنطة ورا باب تالت يعنى ولا الشنطة نص زى السيات ودى مودلات كام ودى كام؟

المشاركة الأصلية كتبت بواسطة fourseasons اه و صحيح عندنا فى اسكندريه مش كل الميكايكيا بيحبو يشتغلوا فيها مش عارف فى منطقتك الميكايكيا بيدلعوا بردوا ولا ايه؟

لا احنا عندنا هنا فى القاهرة الصنيعة كتير والى يتنك هنشوف غيره
والصراحة انت لو فاهم بتعمل ايه تروح لصنايعى نص نص وتقف على ايده وتشغله انت ده احسن حل انا وصلتو فى الاخر
او لو واحد فاهم طبعا هيريحك جدا حتى لو حراق شوية
بس يكون فاهم بجد مش فاهم كلام عشان دول كتير وتحس انه هو صاحب شركة بى ام دبليو وبيتواضع ويشتغلك فى عربيتك وتبقى هتعيط من كتر التواضع والخبرة الى هو فيها
واول ما يشتغل تلاقى نفسك تلقائى بتشيل عصاية الفتيس وتجرى وراه بيها

طيب مفيش اى اقتراحات للتعديل او حد جرب معاها قبل كده؟