حل مشكلة فيشة الكونتاك 128

[yasser.omar]

السلام عليكم
بصراحة انا حبيت اكتب الموضوع ده بسبب فيشة الكونتاك بتاعة 128
للأسف الفيشة دى بتعطل بسرعة بسبب الكهرباء والتدوير وطبعا لان مفيش منها اصلى "كلــه صينـــى"
ولما تيجى تروح لكهربائى يقولك عاوزة فيشة جديدة أو غير الكونتاك علشان يريح دماغه وبعد كده مع كتر الشغل ترجع تانى المشكلة
هنا ان شاء الله هنحافظ عليها وفى نفس الوقت هنعمل حاجة جديدة فى العربية وهاقولكم ازاى
الاول احنا لازم نعرف هى الفيشة دى بتفسد ليه "بسبب المارش" لان المارش بيسحب امبير عالى جدا وطبعا الامبير ده بيعدى على نقط تلامس الفيشة وده بيسبب حاجة من الاتنين
1- بيدمر نقط التلامس
2- السخونة العالية للامبير بتسيح البلاستيك اللى مثبت نقط التلامس وبالتالى بتتحرك من مكانها
طيب ازاى انا احافظ عليها ...... هقولك ازاى احنا هنخلى المارش يدور بس عن طريق مفتاح PUSH زى اللى فى التويوتا بالظبط لو حد فيكم شافه........ بسم الله نبتدى الخطوات
A - الادوات
1- مفتاح PUSH وده من عند الكهربائى العادى بس قوله عاوز بتاع دوائر التحكم لانه بيستحمل التيار العالى من 300 فولت الى 2000 فولت وهتلاقيه بحوالى 15 جم مش اكتر من كده
2- سلك توصيل 2 مم
3- كاوية لحام
4- شريط لحام "يفضل نوعية جيدة
5- كلبسات توصيل بالغطاء
B- الخطوات
1- فك غطاء الكونتاك هتلاقى 4 سلوك خارجين من الفيشة الخاصة بالكونتاك اساسى وممكن تلاقيهم خمسة "فى سلك مشترك"
2- الاسلاك الاساسية للفيشة هى
سلك ----> دخل الكهرباء
سلك-----> خرج الموبينة
سلك ----> خرج ترموستات الحرارة
سلك----->ساعة الزيت
سلك----> المارش وهو ده المطلوب
3- الاسلاك الاخرى "سلك الضفيرة"
سلك----> الكهرباء
سلك----> الموبينة
سلك-----> ترموستات الحرارة
سلك----->ساعة الزيت
سلك-----> المارش وده ايضا هو المطلوب
طيب ازاى اعرف الاسلاك دى بسيطة افتح الكونتاك وبص على التابلوه وابتدى فك السلك من عند علبة الكلبسات مرة هتلاقى لمبة الزيت انطفت كده انت عرفت الزيت ......طيب والحرارة افتح الكبوت وفك سلك ترموستات الحرارة من مكانه ولمسه بأرضى العربية وارجع للتابلوه هتلاقى مؤشر الحرارة فى اقصى ارتفاع له فك سلك من علبة الكلبسات بتاعة الفيشة لحد ماتلاقى المؤشر نزل عند فك سلكة معينة وهو ده بتاع الحرارة ...... انت كده عرفت اتنين باقى تلاتة واحد منهم هيفصل لمبة الزيت والحرارة مرة واحدة وده الكهرباء هيتبقى اتنين افصل منهم واحد وارجع للكبوت واسحب سلك الموببنة الداخل واعمله تيست " لمسه بارضى او لمبة "وشوف لو طلع شرز او اللمبة نورت يبقى المفصول هو المارش ولو محصلش حاجة يبقى المفصول هو الموبينة وطبعا السلك الاخير هيكون هو المارش
" ملحوظة1 هامة اذا لقيت سلكتين مربوطتين ببعض يبقى دول الزيت والحرارة مع بعض"
"ملحوظة 2 معرفة الاسلاك دى فى حالة فيشة الكونتاك مش سلمية لكن لو سليمة يبقى كل اللى عليك انك تجرب تفك طرف وتدى سنة مارش لحد ما توصل لسلكة متلاقيش لحظتها المارش بيدور سهلة يعنى انك تتعرف عليه"
4- قم بفك سلك الموبينة الخارج من فيشة الكونتاك من عند علبة الكلبسات والحم بها سلك خارجى وثبته بالكاوية
5- قم بفك سلك المارش الاخر"اسلاك الضفيرة" والحمه بسلك خارجى وثبته بالكاوية
6- قم بارجاع الكلبسات الى مكانها
7- قيس مسافة السلك المطلوب حتى مكان تثبيت المفتاح PUSH وفى نهاية كل سلكة ركب كلبس بالغطاء لسهولة تركيبهم فى مفتاح الــPUSH
8- الأن قم بتركيب طرفى السلك الى مفتاح الــ PUSH بواسطة الكلبسات
9- ثبت المفتاح فى المكان اللى انت تحبه واعد غلق علبة الكونتاك
10- رجع كلبس الحرارة الى الترموستات وكذلك الموبينة مرة اخرى واغلق الكبوت
11- قم بتغطية اى سلك ظاهر بشريط اللحام
12- الان قم بفتح الكونتاك فقط واضغط على مفتاح PUSH وسوف تدور العربية ان شاء الله
" مميزات هذه الطريقة"
1- الحفاظ على فيشة الكونتاك
2- اعطاء منظر جميل للعربية
3- قلة التكاليف تمن مفتاح ال PUSH ارخص من تمن الفيشة او الكونتاك كامل 15جم ارخص من 25جم
" ملحوظة"
وجود مفتاح العربية الاصلى ضرورى لفتح الكونتاك ومسوجر الدركسيون وعموما فان مفتاح الــPUSH لا يعمل بدون مفتاح العربية
العربية ممكن تدور ايضا عن طريق مفتاح العربية بس احنا عملنا الموضوع ده علشان نخفف حمل التيار عن الفيشة
وبالتوفيق ان شاء الله

[yasser.omar]

على فكرة يا جماعة انا نفسى ارفع لكم الصور علشان تظهر قدامكم بس مش عارف ازاى
ياريت لو يعرف يبقى يقولى وانا تحت امركم فى اى استفسار