ارجو الدخول من اهل الخبره ((طرمبه البنزين اتجننت))

[احمد سويلم]

اصدقائى اعضاء المنتدى المحترمين
السلام عليكم ورحمه الله تعالى وبركاته

رجعت يوم الجمعه الساعه 10 بالليل من برا وركنت العربيه عادى جدا ومفيش اى مشكله خالص فى المشى بيها طوال اليوم تقريبا لانها أجره
صباح السبت بشيك على العجل لقيت الفرده مريحه شوى فجيب الكومبريسر الصغير بتاعى ابو 45 جنيه وقولت ازودها شويه لغايه مكشف عليها عند بتاع كاوتش واكتشفت ان الكومبريسر مش شغال وعامل صوت ع الفاضى ولا بينفخ ولا اى حاجه فحاولت معاه كذا مره ومفيش اى استجابه للكاوتش

طيب المشكله فين ياعم انت داخل ترغى ؟؟؟؟

جيت ادور العربيه فوجئت مش عاوز تدور وقعدت احاول معاها لمين او شمال مفيش
اتجننت خصوصا ان ديه اول مره تعملها معايا من اول مجيبتها فى 9-2009

فتحت الكابوت فلقيت زنه كده طالعه من شمال الكابوت لكن مش عرفت احدد هى فين بالظبط لكن هيا فى مجموعه الغاز

روحت جيبت ميكانيكى قالى لا كهرباء العربيه سليمه وديه مش مشكلتى انا ..ديه مشكله كهربائى

روحت جيبت كهربائى فتح الكابوت وفتح علبه الفيوزات اللى جمب البطاريه وكشف عليهم فيوز فيوز
فتح علبه الفيوزات اللى تحت الدرج على الشمال وكشف عليها فيوز فيوز
فتح الكنبه اللى ورا وقعد يلعب فى طرمبه البنزين ويركب فيها لمبه وافشخنات ويقولى لما اللمبه الحمرا تنور قولى ..قولتله ياعم العربيه ديه شريفه واللمبه مش هتنور انا عارف

فتح السلوك اللى ماشيه فى جمب العتب على شمال العربيه وقعد يقلب فى السلوك لغايه ما اللمبه نورت
ساعتها قالى كده يامعلم الطرمبه المفروض شغاله وبناء عليه ممكن يكون العيب فى السلوك اللى موصله للطرمبه

قولتله ازاى يادكتور ؟؟؟ قالى ممكن يكون فى قفله فى السلك بتاع الطرمبه

المهم بعد التفحيص والتمحيص لمده نصف ساعه

توصل للعيب

العيب :: قفله فى مفتاح الغاز

قولتله اهااااااااااااااا اتارى انا حاولت ادورها غاز مش رديت تدور

المهم فك مفتاح الغاز وكان فعلا فيه ريحه شياط
صنفره وشغله واللى ميعرفش مفتاح الغاز ..لونه اسود وليه 4 او 5 سوكيتات من تحت عاملين زى ريش البطاريه بتاعه العده 3310
ياااااااااااااااااااااااا ااااااااااااااااااااااا انت لسه فاكر ياعم

معلش بس هوه ده وصفه بالظبط لغايه ماارفع صوره فى تقرير كبير جدا هعمله لعيون الاعضاء الحلوين


المشكله اللى ظهرت بعديها
انتو طبعا عارفين لما تيجى تحط المفتاح عشان تدور العربيه المفروض تفتح الكونتاكت وتستنى كده 10 ثوانى عشان الطرمبه تتهيا وفى الوقت ده المفروض تسمعوا صوت لمده 4 ثوانى كده عباره عن ززييييييييييييييييييييييي ييييييييييييييييييييييييي يييييييييز
وبعد كده الصوت يتوقف وتدور عربيتك وتمشى

دلوقتى بقى
احط المفتاح وافتح الكوانتاكت اسمع صوت ششششششششششششششششششششششششش بصوره مستمره ولا يتوقف

ايه ده بقى
ياريت ياجماعه الرد فى الحته ديه ضورورى لان انا حاسس كده ان ا لطرمبه شغاله عمال على بطال لان حسب معلوماتى اعتقد ان لما امشى غاز طرمبه البنزين تتوقف عن العمل
ياريت الافاده فىا لموضوع ده


العربيه موديل 2010 هاف اوبشن عامله 90000
شكرااا ليكو كلكوا وكل سنه وانتو طيبين بمناسبه مولد اشرف الخلق سيدنا محمد صلى الله عليه وسلم

[samirayad]

فيه مشكله عندك يا أستاذ : أحمد

ومشتركه بين مفتاح الغاز وضفيرة الطلمبه

--------------------------

فيه واحد كهربائى عند الموقف الجديد ( إسمه أشرف تقريبا )

خليه يكشف على المنطقه دى

فتح السلوك اللى ماشيه فى جمب العتب على شمال العربيه وقعد يقلب فى السلوك لغايه ما اللمبه نورت ساعتها قالى كده يامعلم الطرمبه المفروض شغاله وبناء عليه ممكن يكون العيب فى السلوك اللى موصله للطرمبه

لأن السلوك إللى كان بيقلب فيها الكهربائى فيها منطقه ملمسه للموجب والسالب الخاص بالطلمبه

[M.TONSY]

تصدق انى نمت ايه يا عم الرغى ده
اوعى تكون زعلت ارغى براحتك يا ابو حميد وعموما اتأكد ان سلوك المفتاح بعد مالكهربائى فكهم راكبة كويس يعنى الكهربائى ميكونش عكسهم ولا حاجة وكنت روحت لمحطة الغاز ركبولك المفتاح الجديد بمعرفتهم افضل و خليك مع شركة الغاز ويحطولك العربية على الكمبيوتر ممكن يكون الكتاوت بتاع مجموعة الغاز بيعلق ولا حاجة .. عموما كل ده فتى روح الشركة وخلاص

[tamer.koko]

المشكله متعلقه بمفتاح الغاز