عايز تعرف ليه مفيش كوتش صيني في مصر (made in china)

[Badr Salah]

بسم الله

حبيت اختم 2010 بموضوع خفيف وممكن يكون جديد

الحكاية بدأت لما فكرت اغير كوتش العربية ونويت انزل الف شوية علشان اعرف افضل نوع ممكن يدفع فيه فلوس

اول صدمة كانت في سعر إطارات بريلي Pirelli الإيطالية
وطبعاً ميشلان الفرنسي مش موجود وموجود منه إندونيسي
والبريدجستون الياباني مش بيعمل المقاس اللي انا عايزه

المهم اتجهت ناحية الشركات الكورية نيكسن Nexen كومهو Kumho هانكوك Hankook ( على فكرة كانكوك يعني كوريا في اللغة الكورية)
ولقيت اسعار تفرح وكمان الماركة الإندونيسي الشهيرة جي تي GT كمان سعرها معقول

بس ظهر قدامي فجأة نوع اسمه شيات CEAT إيطالي بس المفاجأة كانت في الفرق الكبير في اسعاره من محل لمحل يعني لقيته ب 480 الفرده وبعدين 450 واخيراً 380 جنيه وهنا بقه وقفت وقلت افكر شوية ايه اللي بيحصل وليه الفرق الكبير ده يعني الفرده البيرللي ب 700 جنيه وإيطالي والشيات ب 380 وبرضة إيطالي يبقه اكيد في حاجة غلط
لآزم افهم....ايوه لازم افهم

وبدأت اخش على النت واعمل search وادور عن الشركات ومصانعها وتاريخها
ونط في دماغي سؤال طب هو ليه مفيش كوتش صناعة صينية ومكتوب عليه made in china يعني هي الصين عملت عربيات ومتوسيكلات وموبايلات واوض نوم وطيرات لعبه ومش عارفه تعمل كوتش ولا يمكن عملت بس المستوردين شايفين انه غالي ومش ها يمشي في مصر(ههههههه)

المهم بعد شوية ساعات متعبه ومرهقه على النت اكتشفت ان كل الشركات الكورية المذكورة اعلاه عندها مصانع في الصين يعني الكوتش بيتصنع في الصين وفي مصانع في كوريه بتصنع برضه , تفتكروا اللي بينزل مصر انهي واحد؟؟؟ طبعاً مش عايزه فزلكة اكيد الكوري

احلى اكتشاف موتني من الضحك ان الكوتش الشيات اللي التجار بيقولوا للزبون انه ايطالي طلع هندي وسيريلنكي والله العظيم هندي لان شركة شيات CEAT فعلاً ايطالية لأنها اتأسست في ايطاليا بس المصنع بتعها موجود في الهند وسيريلانكا ومعندهاش مصنع في ايطاليا

وطبعاً عرفت ليه البيرلي Pirelli غالي لنه فعلاً بيتصنع في ايطاليا يعني الشركة ايطالية ومصانعها في ايطاليا
اما بقة الماركة الشهيرة جود يير Good Year طلع ليها مصانع في امريكا وكندا وفي الأتحاد الأوروبي وفي افريقيا والشرق الأوسط. والتجار في مصر بيقولوا انه كوتش الماني (ممكن ليه لا)

اجمل اكتشاف ان الشركات اللي بتصنع في الصين مبتكتبش انه صُنع في الصين
بتكتب عبارة حلوة قوي مثلاً ( produced by CEAT Tyres -Napoli Italy) وترجمتها بالعربية ( انتاج شركة شيات ومقرها نابولي - ايطالية) يعني بيكتبوا عنوان مقر الشركة المنتجه مش عنوان المصنع اللي موجود في الهند والحركة دي بتتعمل في منتجات وشركات تانيه كتير يعني اللي بيتصنع في الصين برضة بيتكتب عليه كوريا

علشان كده مفيش كوتش في مصر مكتوب عليه Made in China

وهنا بيحضرني المثل التونسي الشهير ( تحب تفهم تدوخ)

عاشت الصين حره مستقله
وكل سنه وانتم طيبين ويارب تكون 2011 احسن من 2010 ( كل سنه بنقول كده ومبيحصلش المهم خليك متفائل)

[MASalex]

شكرا
استاذ بدر معلومات جيدة ( تحب تفهم تدوخ)
وكل سنة وانت طيب

موضوعك شيق وجميل ولو اني ليا تحفظ على البيريللي
اللي موجود في السوق مش ايطالي
ليه ...انا من فترة اشتريت جوز بريللي من عند الروماني اللي في جسر السويس
طلع ارجنتيني...تخيل
بس ملاحظة حبيت اوضحها

[Badr Salah]

المشاركة الأصلية كتبت بواسطة MASalex شكرا استاذ بدر معلومات جيدة ( تحب تفهم تدوخ) وكل سنة وانت طيب

وانت طيب وبخير وصحة وسعادة ومتنساش (تحب تفهم تدوخ)

المشاركة الأصلية كتبت بواسطة walidelwahsh موضوعك شيق وجميل ولو اني ليا تحفظ على البيريللي اللي موجود في السوق مش ايطالي ليه ...انا من فترة اشتريت جوز بريللي من عند الروماني اللي في جسر السويس طلع ارجنتيني...تخيل بس ملاحظة حبيت اوضحها

اوالله يا وليد باشا اكيد بيرللي ليها مصانع في دول تانيه بس لسه مصنعتش في الصين
وعلى فكرة انا مش قصدي خالص ان الصناعة الصينية وحشه انا كل قصدي ان الشركات بتلف وتدور علي المستهلك علشان عرفين عقدة الصيني
بس لو دخلت محلات رَاديو شاك Radio Shack اللي هي سلسلة محلات إلكترونيات امريكية هاتلاقي كل حاجة صناعة صينية بمواصفات امريكية
يا راجل دا انا دخلت مرة هابيتات بتاع الإساس المنزلي لقيت اوضة نوم صيني ب 26 الف جنيه وقلي الشركة امريكية بس بتصنع في الصين

[hazem_khidr]

شكرا علي الموضوع يا باشا
اي كاوتش مكتوب عليه مكان صناعته علي الجنب
و لازم تلاقيه مكتوب
انا معايا جوددير تايلاندي و مكتوب عليه كده فعلا
اهم حاجه في الكاوتش الاسم و مش مهم مكان الصناعه
لان اي صانع كبير بيلتزم بمعايير مشدده علشان يحافظ علي سمعته