اين تذهب الاموال المحصله من الجمارك والمخالفات ورسوم التجديد والنماذج

[emad habib700]

اين تذهب الاموال المحصله من الجمارك والمخالفات ورسوم التجديد والنماذج و خلافه وماهو الاسلوب المتطور المطلوب تنفيذه فى المرحله الحاليه وما تسعى اليه الدوله لاءيجاد البدائل لهذه المليارات التى لن تحصل بعد عده سنوات من جمارك السيارات فقط وكم ستكون تكلفه تجديد السياره السنويه
وهل ستظل الاساليب العقيمه للترخيص والفحص الفنى للسياره فى ادارات المرور التى تسعى للرقى احيانا
كما متى سنجد نفسنا ملزمين بتنفيذ القوانين دون واسطه او محسوبيه ولا انت متعرفش انا مين؟

الموضوع كبير اوى واستنزاف موارد افراد المجتمع المصرى بكل طبقاته المختلفه لتصب فى خزائن الدوله لتنفيذ العديد من المشروعات القوميه الفاشله مثال:
السد العالى = قالوا ان كيلو الكهرباء هايكون بمليم ولا ينسى ذلك واصبح كيلو الكهرباء باكثر من جنيه احيانا ومضاعف فى المشروعات التجاريه
الاصلاح الزراعى= واصبح كيلو الطماطم بخمسه عشر جنيه و الفاصوليه بسبعه عشر جنيه
الجمارك = لحمايه الصناعه الوطنيه صناعه السيارات تحديدا وطبعا زى ما انتم شايفيين كل العربيات فى مصر صناعه مصريه نتيجه للجمارك اللى بتحمى الصناعه المصريه ولا يوجد اى منتج اجنبى

الموضوع ليس اكثر من جبايه طول اليوم وكل يوم جبايه فى التعليم ( المجانى) والصحه ( التامين الصحى لكل مواطن) والاكل والشرب وحتى المياه وباقى الهواء وبرضه الهواء فسد ولا يصلح للتنفس
البقيه فى حياتكم
طبعا دى نظره تشائوميه عاليه التركيز هل يوجد لديكم نظره تفائوليه عاليه التركيز؟

[zaraki]

والله عندك حق يا استاذ عماد الواحد بقى بيتقرف فى عيشتو كل ما يشوف حال البلد ال تقريبا اصبحت ملك لاصحاب المناصب فقط والشعب بيشتغل ويدفع 80% من المرتب للحكومة عشان تزود المطبات فى الشارع وتدفع مرتبات اصحاب المناصب ال وكلنها ولعة .

[emad habib700]

وقامت الثوره بعد كده بكام يوم ولسه البلد زى ما هى ولم يحدث تغيير ملموس حتى اليوم

[تامر ديزل]

والله انت جيت على الجرح كنت دايما بسأل اين يصب نهر الفلوس اللي بينبع من الشعب طيب نهر النيل وعرفنا مصبه نهر فلوس الشعب بيروح فين
رد الحكومه :
في الحقيقه وفي الواقع وفي واقع الامر واذا نظرنا الى الامور هذه موارد الدوله ولا دخل لاحد فيها وهي غير كافيه بالاساس للصرف على طلبات الشعب بدليل ان الحكومه تحاول جاهدة السلف من كل من هب ودب وبنك وصندوق
ومازال الكلام للحكومه : هذه الاموال تذهب الى الدعم الحكومي للوقود بمشتقاته وتحسن الطرق وانشاء الجديد منها ودعم المستشفيات الحكومية والتعليم المجاني وانشاء المرافق ( يا سيدي على المرافق) والبنيه التحتيه وتنفيذ الخوطة (خطة) الخمسية بما يحقق المصالح الضرورية و....و...و......حيوية ....مستقبل افضل ....و.....و....
الترجمه العربية لرد الحكومه سواء بعد اوقبل الثورة مافيش فرق :
الفلوس اللي بتلمها الحكومه يادوب تسد بق موظفين الحكومه الي بيشتكوا دايما من قلة المرتبات وف الحقيقه هما بطاله مقنعه وفي منتهى البلاده واللصوصية والابتزاز للمواطنين وكل موظف صغير او كبير بيحاول بشتى الطرق والكباري انه يقفز جوا جيبك ويلهف منه اللي فيه القسمه ومرتشين وبيعطلوا مصالح الشعب وبيجيبوا الضغط والسكر وفوران الدم للشعب والحكومه بتديلهم مرتبات عشان يزودوا الامراض عند الناس والناس تتلبخ ف العلاج وتسيب الحكومه تنهب من نهر الفلوس في صورة بدلات سفر وبدلات طبيعة عمل وغلاء معيشه وبدل مجهود غير عادي
دا غير السرقه والاختلاسات وسلم لي على الحريقه قبل الجرد السنوي بيومين
كان فيه كاريكاتير زمان للفنان طوغان بعد زلزال اكتوبر 92 وكانت فيه نبره ف الصحافه والاعلام ان الناس هاتتغير بعد ما شافوا قدرة ربنا كان طوغان راسم اتنين قاعدين ع القهوة وواحد بيقول للتاني وشرفك ولا ميت زلزال هايعملوا حاجه
ولا ميت زلزال ولا خمسميت ثورة هايعملوا حاجه الا لما الحكومه من الصغير المرتشي للكبير الحرامي يتسرحوا وييجي غيرهم