اسف انى خدعتكم فى توكيل ابوالفتوح بعد ماخدعونى بقلة ضميرهم !!!!

[BASSEM BESO]

اولا انا اسف لكل من قرأ كل كلمة شكر كتبتها او اى موضوع اتكتب عن توكيل اسبرانزا ابو الفتوح اللى فى ميدان الجيش واسف اكتر لكل من اتخدع نفس خدعتى فى هذا التوكيل المنعدم الضمير بكل ماتحملة الكلمة نعم فقد اتخدعت كما قال لى الأستاذ احمد Coursir عندما قال لى عند شكرى فى التوكيل انهم ينيمون الناس بكلامهم ومعاملاتهم التى ينخدع بها اى انسان طيب وطبعا تريدون ان تعرفوا ما سبب الهجوم القوى على التوكيل والحكاية اية ؟؟ وتبتدى الحكاية لما كان عندى شوية مشاكل فى العربية ( اسبرانزا A516 ) رحتلهم قولت العربية فيها كذا كذا كذا وطبعا قابلونى بكل ابتسامة وترحيب وطبعا دخلت على العبيط اللى هو انا ووعدونى انهم حيحلو المشاكل دى كلها ومن المشاكل دى على سبيل الذكر وليس الحصر :
1- صوت الموتور عالى الصبح
2- ماكينة الزجاج الأيمن لاترفع للأخر ( اقسم بالله روحتلهم بسببها 7 مرات )
3- صفارة فى الفرامل
4- المساعد الخلفى يمين (وركزوا اوى على يمين دى ) ناشف جدا
الى هنا تبدو مشاكل عادية وصغيرة لكن انتظروا المفاجأة بعد ذلك!!!!!!!!!

المهم سيبتلهم العربية الساعة 8 الصبح ورجعت لقيتها خلصت الساعة 1 الظهر
قولت الحمدلله توكيل اكثر من رائع نجح فى ان يخلص العربية بدرى نجرب بأة ونشوف لقيت كاتبين فى امر التشغيل الأتى :

1- صوت الموتور عالى الصبح : تم عمل اللازم
2- ماكينة الزجاج الأيمن لاترفع للأخر : تم عمل اللازم
3- صفارة فى الفرامل : تم عمل اللازم
4- المساعد الخلفى يمين (وركزوا اوى على يمين دى ) ناشف جدا : يحتاج المساعد الخلفى الأيسر الى تغيير ولا يوجد مساعدين فى المخازن
بالذمة دة كلام اقولة اليمين يقول الشمال لأ ومفيش كمان ...............لاتعليق بجد !!!

قولت اجرب اللى مكتوب فى امر التشغيل قالولى بعد ماتخرج قولت ماشى ياسيدى بس اجى امتى عشان المساعد قالى انا حكلمك بس متتعشمش انة يكون بعد يومين وامشى عادى مافيهاش حاجة !!!!!!!!!!!!!!!!!!!!!!!!! !!!!!!!!!!!!!!!!!!!!!!!!

خرجت وانا فرحان ان اغلب الحاجات اتعملت الأزاز بيرفع ومفيش صوت مع الفرامل والدنيا جنة بالنسبة قالى وروحت ركنت العربية نزلت بعديومين واذن بالمفاجأة :
1- الماتور بعد ماكان صوتى عالى وبعد كدة يهدى بأة صوتة عالى وبس يعنى خربوها اكتر .
2- الأزاز رجع ازبل من الأول وسامحونى على اللفظ بس مش قادر اقول غير كدة مع انى جربت الأزاز 100 مرة وكان زى الفل بس اعمل اية .
3- صفارة مع الفرامل قولت اجرب لقيت ولا صفارة اتوبيس نقل عام قديم مش جديد كمان .

قولت والله لرحلوهم واطلع .................. !!!!!
قولت استنى متجرب كدة وتعمل حاجة من دول برة التوكيل روحت لواحد بتاع ابواب وكوالين سيارات صاحبى من ايام ماكان معايا ال132 الله يمسيها بالخير بأقت بتاعة اخويا المهم قولتلو ياسيد ممكن تقوللى الأزاز دة فى اية عفربت ولاجن ولااية بالظبط قولى واروح اعملة فى التوكيل عشان الضمان بصلى بصة غريبة وقالى انت روحتلهم كذا مرة صح قولتلوا اة قالى طب اسمع انا حفك الفرش بتاع الباب واشوف فى اية واركبهولك زى مكان قولتلو بلاش وحياة ابوك قالى برهان انى حعملهولك فى دقيقة !!!!!!!!!!!!!!!!!!!!
وفعلا بدأ وفك واول مفك قالى شوفت اللى معندهومش ذمة ولا ضمير ولاامانة سايبين 4 مسامير من اصل 6 فى ماكينة الرفع مش مربوطين خالص اة والله ركبهم ورجع كل حاجة زى ماكانت وبنجرب الأزاز اشتغل اسرع من الأول واحسن وبكفاءة عالية جدا وتصوروا رفض ياخد اى فلوس خالص وحلف قالى كفاية العصابة اللى انت بترحلوهم (شكلى صعبت علية )

بس والأزاز شغال لحد الأن زى الفل ولا فى اى حاجة وتمام ورايح بكرة التوكيل واشوف حعمل معاهم اية عشان المساعد ؟؟؟

فى الأخر ليا كام ملاحظة استأذنكم فيها :
1- العربية جميلة جدا جدا لكن التوكيل ............ جدا جدا جدا جدا لحد بعد بكرة
2- انا جربت التوكيل اللى فى ابورواش واللى فى الصحراوى وبردة ....... نفس ميدان الجيش بالظبط .

اسف للأطالة عليكم بس كان لازم ابين لكم الحقيقة عشان محدش يقع فى الكلام الحلو وشغل التنويم بتاعهم دة وعلى فكرة نفس الكلا ينطبق على غبور اللى اتنين عايزين :::::::::::::::: ولا تعليق !!!!!!!

بس فى النهاية عايزكم تترحموا على الضمير و الأمانة والذمة لأننا خلاص مش بنلقيهم غير بالصدفة .

واسف على الأطالة

[Injection]

أنا قعدت أقرا وأضحك وأعيط فى نفس الوقت, للأسف اللى حصل مع حضرتك ده بيحصل مع ناس كتير جدا, وبدرجة أسوأ سواء مع أبو الفتوح أو أى توكيل سيارات تانى, فاكر حضرتك النكتة بتاعت "بطاريتك تحتاج الى سيارة جديدة", حصلت مع واحد قريبى بالظبط فى عربيته الرينو فى توكيل eim, وأدوله لستة بأعطال خيالية مسابتش حاجة سليمة فى العربية.

للأسف التوكيلات الرقابة عليها شبه منعدمة, ومافيش غير جهاز حماية المستهلك اللى بدأ يتحول للنظام البيروقراطى العقيم, والتوكيل مش هامه السمعة طالما الناس بتشترى وبتصلح.

أسف على الأطالة, وشكرا لحضرتك على سرد تجربتك.

[BASSEM BESO]

المشاركة الأصلية كتبت بواسطة Injection أنا قعدت أقرا وأضحك وأعيط فى نفس الوقت, للأسف اللى حصل مع حضرتك ده بيحصل مع ناس كتير جدا, وبدرجة أسوأ سواء مع أبو الفتوح أو أى توكيل سيارات تانى, فاكر حضرتك النكتة بتاعت "بطاريتك تحتاج الى سيارة جديدة", حصلت مع واحد قريبى بالظبط فى عربيته الرينو فى توكيل eim, وأدوله لستة بأعطال خيالية مسابتش حاجة سليمة فى العربية. للأسف التوكيلات الرقابة عليها شبه منعدمة, ومافيش غير جهاز حماية المستهلك اللى بدأ يتحول للنظام البيروقراطى العقيم, والتوكيل مش هامه السمعة طالما الناس بتشترى وبتصلح. أسف على الأطالة, وشكرا لحضرتك على سرد تجربتك.

شكرا على ردك انت ياانجكشن وانا بتابع مواضيعك بس عايز اضيفلك كمان اننا كنت على وشك الرفد من شغلى بسبب هذا التوكيل ومن قبلة غبور وحماية المستهلك لا بيحل ولابيربط نعمل اية بس كل اللى نقدر نقولة حسبى الله ونعم الوكيل

[luckyman]

وده هو الطبيعى من ابو الفتوح وغبور ومنصور ....والخ فى جمهورية مصر العربية وقيس على ذلك معظم التعملات والمعاملات وربنا يستر عليك وعلينا وتستمر المهازل وشكرا

[مادا]

عاوز تاخذ ايه من واحد حرامى واخذ فلوس البلد وكان ايهج بيها بره