11000 ك قيادة الجزء 2

[ehab62]

الحمد لله صحيت جارى اللى ساكن جنبى ونطيت من البلكونة ونمت فى بيتنا المهم اول ما صحيت الصبح رحت ظبط الكاوتش ولقيت فعلا كل فردة بمقاس مختلف والمفروض حسب كتالوج السيارة انها تكون مظبوطة على 32 ومشيت بيها وكان انطباعى الاول عنها انها مش بتجرى ومبتسحبش وسامع صوت الطريق بطريقة ملحوظة ومش عارف اشغل سينسور البارك لغايه ما لقيت واحد معاه سيراتو جايبها من شهرين وقفت وسالته وعرفنى ازاى عمل السينسور بارك ولقيتها مفيده جداا فى الركنة بس اشتكالى من انها برضه مش بتجرى وان بيحس بكل همسه على الاسفلت مع ان قناعتى الداخليه انى ما فيش حاجه اسمها عربية مش بتجرى وكنت بس مستنى لغايه ما اخلص اول 1000 ك واغير الزيت واشوف موضوع السحب والجرى بتاع العربيه المهم رحت عشان ارخص السيارة لقيتها برضه بتحدف منى لو سيبت الدركسيون فرحت جرى على محطة ظبط زوايا وترصيص وقولت اشوف العربيه من تحت احسن تكون مخبوطه فى مقص ولا ركبه وكشفت عليها زوايا ولقيتها تمام وكنت متضايق من ان العربية مش متصفحة من تحت الموتور بس لما نزلت تحتيها لقيتها متصفحة فى الاماكن المهمة تحت الموتور وده ريحنى ورحت شايل الهوا اللى فى الكاوتش وحاطط مكانه نيتروجين عشان ما اشغلش دماغى بموضوع زيادة او نقصان الضغط فى الكاوتش ورخصت العربيه الحمد لله وقلبى اتقطع والواد بتاع المرور بيخرم شنطة العربيه بمسمار صلب خرمين عشان يركب النمرة اللى ورا وكانوا عايزين يعملوا كده برضه فى الاكصدام اللى قدام بس صممت يركب الفيبرا بتاعة النمرة الاول ورفض لانها اصغر من مقاس النمرة والاخرام مش مظبوطة عليها وصممت انى انا الى هاركبها ومش هايلمس العربية تانى وحصل وركبتهم بنفسى ومتهيالى دى طريقة متخلفة من المرور انه يدق صاج العربية بمسمار وشاكوش المهم نرجع لموضوعنا اكتر حاجه كانت بتضايقنى وانا راكب العربيه فعلا ان الناس كلها كانت بتبحلق فى العربيه لدرجه انهم كتير جداا كانو بيحدفو عليا وانا كان جوايا احساس انها هاتتخبط شر ولا بد منه المهم الخص ملاحظتى للعربيه
اولا المميزات :
1- سيارة فخمة من الداخل وشيك من الخارج
2- بها كل المميزات التى تتمناها فى اى سيارة
3- واسعة جدااا حتى الكنبة كبيرة
4- كمبيوتر رحلات ممتاز
5- وانت قاعد فى السيارة بتحس ان اى حاجة قدامك قريبة جداا منك (مثلا سيارة فى اشارة) ولكن لو بصيت من بره بتلاقى فى تقريبا مسافه متر ونصف زيادة عن توقعك ودى ممتازة لمنعك من عمل حوادث او احتكاكات اثناء الركن مالهاش لزمة
6- لو شغلت التكييف مش هاتحس باى فرق فى سحب العربية
7- الاستجابة للضغط على البنزين عاليه جدااا وده هاشرحه بعدين
8- السحب بتاعها مجرم خاصة لو حولت الفتيس لمانيوال موود
ثانيا العيوب
1- احساسك بكل همسه على الاسفلت بسبب ان الكاوتش واطى جدااا(low profile)
2- بتستهلك بنزين زيادة شويتين يعنى لو فى وسط البلد ومشاويرك كلها فى اماكن زحمه هاتعمل تقريبا 12 لتر فى 100 ك من غير تكييف
3- استحاله انك تركن من غير السينسور بارك لان العربيه من ورا عاليه جدا ومش بتشوف اى حاجة
4- صوت الموتور اعلى شويه من اليابانى
طبعا انا كنت بشتكى من صوت الكاوتش على الاسفلت مقارنة بعربيتى القديمة بس لما ركبتها تانى عرفت ليه انا ما كنتش بسمع صوت الكاوتش على الاسفلت لانى كنت بسمع خمسين صوت تانى من صوت الموتور لصوت الهوا لصوت تزييق فكان استحاله هاسمع صوت الكاوتش على الاسفلت ولكن فى السيراتو درجه العزل فيها جيد نوع ما فعشان كده بسمع صوت الكاوتش على الاسفلت وده طبعا لانى بالبلدى كنت مركز معاها قوى وتانى حاجه موضوع الحدفه متهيالى بيرجع لان الكاوتش عريض وكبير وبيكون حساس لاى تغيير فى الاسفلت وكنت لما باخد مطب فى الشارع بس يكون صغير زى مثلا عيون القط كنت بحس ان العربية بتنط يمين او شمال من ورا بس من غير تعويم وده مش عارف سببه لحد دلوقتى بس كل ده مش مهم لانى لما جربت العربيه فعلا على سرعات عاليه بعد ما عملت صيانة الالف ك فى التوكيل قبل المنع كنت ماشى بسرعة 140/150 تقريبا والعربية راكب فيها 3 افراد غيرى والشنطة على اخرها من الشيل وفوجئت باربع مطبات صناعيه ورا بعض من اللى قلبك يحبهم المطب الواحد عبارة عن مطبين زوجى وبيتدرجو من الصغير للاكبر لغايه المطب الرابع لازم بجد تاخده براحة ويمين فى شمال عشان ما تحكش وده امام مدخل الجونة بطريق الغردقة لو حد يعرفوا فمسكت الدركسيون جيد جداا وزودت بنزين لانى مكانش ينفع ادوس فرامل وفوجئت ان العربيه عدت من عليهم من غير ما اتهز انا او اى حد من اللى قاعدين معايا سنتيمتر كانى كنت بادوس على اسطوانة كرتون مش مطب يقسم العربية ومن ساعتها وانا مقتنع ان عفشة العربية جيدههه جدااا بس فيها عيب واحد انها بتعمل مشكلة كبيرة جدااا للى قاعدين على الكنبه فى مطبات الهوا اللى موجوده فى اى طريق سريع العفشه حساسه جدااا لمطبات الهوا دى كانك قاعد فى ملاهى دريم بارك والمشكله انك وانت قاعد ورا كانك بتنط لفوق وبتنزل على دكه خشب لان صدادات المساعدين ناشفة جدا واليايات اللى ورا روحها قصيرة مش طويلة والمشكله التانية انى القاعدة جوا السيراتو لمسافات طويلة متعبه لان الكراسى ناشفه جداا بس مش هاتلاحظها الا لو سوقت اكتر من ساعتين وبالنسبة للراكب الخلفى ظهر الكنبه واقف والقاعده ناشفة بس فى المسافات الطويله وانا ما كنتش عارف احكم على سحب العربيه اول 1000 ك لكن بعد كده بدأت اشد بيها ولاقيت الموتور بتاعها مفترى وما كنتش فى الاول بحس بالسحب بتاعها وانت جالس داخل السيارة بسبب احكامها ولكن نظرة واحده بس لعداد الكيلومترات وهو بيطله بسرعة عاليه جدا من سرعة 20 ك : 130 هاتفرح قلبك خاصه ان ده تقريبا نهايه الغيار الثالث ولسه قدامك الرابع كله بس بيكون السحب فيه اقل بس لو rbm عدا 4000 لفة بتلاقى السحب زاد تانى العربيى بتوصل لعدد اللفات دى لو انت ماشى على سرعة 155ك من غير ما تقرص على البنزين وبتحس بسرعه استجابة السيارة لضغط رجلك فورا بس سحبها بيكون بطىء لو انت اقل من 2000 لفة بس ممكن فى ثانية توصل 3500 بضغطة بسيطة من رجلك طبعا كل ده وانا سايق اتوماتيك اما المانيوال بقى ده قصه تانية فانا الفتيس اللى عندى ستيب ترونيك هاكمل بعدين

[ahmed_201091]

شكرا على مجهودك الرائع و الجبار و ربنا يبعد عنك عيون الناس
وموضوع العفشة دا ناس كتير اشتكت منه بس دا راجع للجنط ال17 و تقريبا بعد كدا العفشة بتلين صح ولا ايه؟
و بعدين انت عندك جنط 17 بيديك ثبات جامد و دا كويس عشان سفرك

والله يا استاذ ايهاب اسلوب هايل في الشرح وربنا يديك خيرها ويكفيك شرها وتقبل تحياتي

[lol64]

تقريرك عن العربيه ممتاز وحيادى جدا مبروك عليك
تقبل تحياتى

[tarek elbadry]

مبروك العربية تقريرحيادى
ربنا يديك خرها ويكفيك شرها