مساعدة مبتدئ فى كيا العصفورة

[المناور]

الاخوة الكرام اخوكم حديث عهد بالقيادة والسيارات اشتريت حديثا عربية وانا ماعرفش فى العربيات أى حاجة هما يادوب شوية معلومات قرأتها هنا وشوية اسماء حاجات فى العربيات بس كله كلام نظرى .

العربية كيا برايد هاتش باك موديل 96 - 1100 cc عاملة 136000 كيلو صاحبها كان ممشيها على بنزين 80 . بوجه عام حالة العربية كويسة ولله الحمد .

- كنت محتاج اعرف منكم ايه الخطوة التانية بعد شراء العربية ؟
- يعنى سمعت انى لازم اكشف على الزيت واغيره هل فيه زيت معين امشى عليه ؟
- بالنسبة للبنزين 80 هل ده كويس للعربية ولا اغير ل 90 احسن ؟ وفى حالة التغيير فيه أى اسلوب معين متبع ؟
- أنا ماعرفش أى ميكانيكية اروحلهم فمين يعرف حد فى معروف أو الحرفيين اتابع معاه وبيفهم فى البرايد كويس ؟ ياريت الناس تركز على اسماء فى معروف لانى متواجد بالقرب منهم أكثر .
- وفيه عندى وش فانوس مكسور عايز اغيره فمين شغال فى قطع غيار البرايد كويس فى التوفيقية واسعاره معقولة ؟

الموضوع انا فتحته علشان كل ما حاتقابلنى حاجة حارجعلكم استفسر منكم وحايبقى مرجع بالنسبة ليا .. فياريت ماكونش متقل عليكم فى الاسئلة ولو فيه روابط مواضيع ممكن تفيدنى فياريت تدلونى عليها علشان ماتعبكمش فى الاسئلة كتير .

[hazem_khidr]

الف مبروك العربيه الجديده و ربنا يديك خيرها و يكفيك شرها يا رب
بالنسبه للعربيه اول حاجه تعملها
تغير الزيت و الفلتر و طقم الوبجيهات و فلتر البنزين و فلتر الهوا و مجموعه السيور و بالاخص سير الكاتينه
علشان تبتدي من اول و جديد و علي نضافه
بالنسبه للبنزين لو هيا ماشيه علي 80 مشيها 80 و خلاص بلاش فرق فلوس علي الفاضي

[AbOnOrA]

الف مبروك يا باشا واسائل براحتك بالنسبة لقطع الغيار فى التوفيقية هتلاقى كتير بس مش حافظ حد منهم تحديداً لانى بتعامل مع الجندى من زمان وفيه واحد قدامة على الناصية فى شارع دمشق برضو اسعارة حلوة جداً خاصة فى المستهلكات تيل بوجيهات فلاتر فوانيس حتى كل ده هتلاقية فى كل حتة وبس حاجة العفشة بحب اجيبها من الجندى تحديداً علشان مبيجبش غير الكورى ولو مش الاصلى بيقولك
وبالنسبة للميكانيكية برضو متشيلش هم شغلها سهل جدا مع اى ميكانيكى شاطر وايده ماشيه فى اليابانى والكورى عامة ولو فيه حاجة محتاجة حد حافظ البرايد فيه ميكانيكى فى جسر السويس ممكن ابقى اوصفهولك حافظها زى اسمة وفيه عبر البلاد اللى ورا سوق القنال الدولى وانت رايح على الحرفيين حافظينها صم برضو من ايام التوكيل القديم (وليد توفيق ) كانو مركز خدمة معتمد ودلوقتى شغالين على الانذارات الولف والكيا القديم عموماً

بالنسبة لبنزين 80 مفيهوش مشكلة انا بستخدمة فى عربية الحاجة من سنه 96 لحد دلوقتى مفيش مشاكل بس اهتم بتغيير الزيت والصيانات وحاول تجيب قطع الغيار الاصلية بلاش الاستيراد او الصينى لان العربية بقى لها قطع غيار كتير صينى مش قد كده فحاول تلاقى الكورى او لو حاجة زى المساعدين - كبالن بلى جيب اليابانى اما الفوانيس والاكسسوارات جيبها صينى زى الفل الفانوس كله هتلاقية بستين سبعين جنية بالمضة
وعامة العربية اعتمادية جداً واعطالها مش كتير اصلاً فمتقلقش من حاجة ان شاء الله

[المناور]

ربنا يبارك فيكم اخوانى حازم وأبو نورا ان شاء الله اعمل بنصائحكم

عندى سؤال

أنا زى ما قلتلكم ان صاحب العربية القديم كان ممشيها على 80 .. فى اليوم اللى اشتريت فيه العربية كان البنزين بيخلص وماكنتش حاتكمل المشوار بالشوية اللى فى التنك فدورت على بنزينه 80 ملقيتش خالص المهم واحد صاحبى كان معايا قالى انى ممكن احطلها 90 اكمل بيهم المشوار ولما ارجع ابقى احط 80 عادى ، وأنا كنت مضطر اعمل كده علشان العربية تكمل المشوار ، فهل ياترى الكلام ده صح ولا ممكن تحصل مشكلة من التغيير ده ؟

[AbOnOrA]

زيادة الاوكتين متعملش مشاكل متقلقش حتى لو عربية مصممة لعمل باوكتين عالى وحطيتلها اوكتين اقل على فترات متقطعة متعملش مشكلة من مرتين تلاتة ولا حتى اكتر فمبالك انك حاطط اوكتين اعلى