اذا كان التأمين حرام من يعوض الغارمين

[AbOnOrA]

بما ان موضوع الساحة اليومين دول هو التامين فانا حبيت افكر معاكو بصوت عالى بعيد عن فتاوى التحريم واقتصاد دول ولحوم العلماء وما الى ذلك من مواضيع بجد كبيرة علي ادراكي الفقهي فخلونى افكر معاكم واحدة واحدة







الصور ديه لعربية لانسر سبور تقريبا زيرو فوجئت بيها وانا ماشي في الشارع عند واحد سمكرى وللوهلة الاولى افتكرت انها ميتسوبيشي هاتش باك مخبوطة وانا بحب الهاتش باك اوى فنزلت اشوفها لافاجاء انها ميتسوبشي سيدان بس الخبطة دمرتها خالص من ورا ومن قدام كمان ولما سئلت السمكرى عنها قالي ان صاحبها كان لسه جايبها من المعرض ونزل يجيب حاجة فرجع لاقى تنين من اياهم راكب فوقيها وملبسها من الوش في عربية تانية طيب ديه يتعمل فيها ايه ديه ؟ قالي هنغير لها نص وراني وسقف ومايلزم طبعا فسئلت الراجل هو صاحبها مش مامن عليها قالي لاء

ربنا يبعد عنكوا جميعا كل شر او ابتلاء بس حط نفسك مكان صاحبها وانت تعرف مدى ابتلائه ومدى ما تعرض له من خسارة وربنا يعلم هو جايبها ليه وازاي والفولس ديه تعب فيها اد ايه ويمكن يكون كان جايبها ياكول بيها عيش ياجرها مثلا او يجرى بيها علي اكل عيشة

السؤال ببساطة لو كان التامين حرام ايه الحل لواحد زي ده وايه الحل لاي واحد فينا لو لاقدر الله حصل معاه كده اذا كان التأمين حرام

في سورة التوبة يقول الله عز وجل

" إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ فَرِيضَةً مِنَ اللَّهِ وَاللَّهُ عَلِيمٌ حَكِيمٌ "

يعنى الصدقات اللي بتروح بيت المال (ايام ما كان فيه بيت مال) وانا بكرر الصدقات يجب صرفها علي الغارم وده الشخص اللي بيخسر جامد في تجارتة او مالة

واحد يقولى انت عايز تعوض علي واحد شارى عربية بالشيء الفلانى ومنين كمان من بيت المال ومال الصدقات ايه يا عم الشيخ ؟؟؟

اقولة ارجع لحديث رواه أبو داود وابن ماجه من حديث معمر عن زيد بن أسلم عن عطاء بن يسار عن أبي سعيد رضي الله عنه قال : قال رسول الله صلى الله عليه وسلم لا تحل الصدقة لغني إلا لخمسة : العامل عليها أو رجل اشتراها بماله أو غارم أو غاز في سبيل الله أو مسكين تصدق عليه منها فأهدى لغني

واخدين بالكوا يا جماعة من سماحة دين الله يعني مال الصدقة اللي هو اخص اموال الله سبحانة يجوز صرفها علي غني في سبيل رفع الغرامة عنة

فما بالك بنظام تكافلي هو صورة مستقاة من نظام الصدقات والزكاة يقوم بنفس الغرض

واحد يقولى بس فكره التامين حاجة وفكره الزكاة والصدقات حاجة عشان اللي بيامن ده كافر بقضاء الله

اقولة يبقي اللي بيلبس حزام الامان كافر بقضاء الله واللي بيشيل ارشين لوقت عوزة كافر بقضاء الله وهكذا دواليك

واحد تالت يقولى ياعم ديه كلها شركات نصابة وربا وبنوك ومش المقصود منها التكافل الاجتماعي

اقولة اختلاف الحال عن الاصل لا يحرم الاصل لاكن يجب علينا اننا ندور علي شركات التامين القائمة علي اصل فكره التكافل لا فكره استثمار اموال المؤمنين (من يقومون بالتامين علي ممتلكاتهم) وبالتالي من الاجحاف اننا نقول بتحرم التامين عموما لاكن الاصح اننا نحرم ممارسات بعينها مع توضيح الطرق والمناهج الصحيحة لانشاء نظام تكافلي اجتماعي يحقق الغرض في ظل غياب المؤسسات الاسلامية الاقتصادية زي بيت المال او البنوك الاسلامية والقروض الحسنة

واحد رابع يقولي بس فيه شيوخ حرمت التامين

اقولة وفيه شيوخ اباحتة وقالت انة مستحب كمان واقولة كمان ان التحريم قياسا علي النص دون الاخذ بواقع الامور لايصح والشاهد حديث رسول الله صلى الله عليه وسلم الموجود في صحيح مسلم ومسند الامام احمد ومسند الامام مالك

حدثنا ‏ ‏أبو بكر بن أبي شيبة ‏ ‏وعمرو الناقد ‏ ‏كلاهما ‏ ‏عن ‏ ‏الأسود بن عامر ‏ ‏قال ‏ ‏أبو بكر ‏ ‏حدثنا ‏ ‏أسود بن عامر ‏ ‏حدثنا ‏ ‏حماد بن سلمة ‏ ‏عن ‏ ‏هشام بن عروة ‏ ‏عن ‏ ‏أبيه ‏ ‏عن ‏ ‏عائشة ‏ ‏وعن ‏ ‏ثابت ‏ ‏عن ‏ ‏أنس ‏
أن النبي ‏ ‏صلى الله عليه وسلم ‏ ‏مر بقوم يلقحون فقال ‏ ‏لو لم تفعلوا لصلح قال فخرج شيصا فمر بهم فقال ما لنخلكم قالوا قلت كذا وكذا قال أنتم أعلم بأمر دنياكم ‏

وفيه روايه المسانيد

حدثنا ‏ ‏عبد الصمد ‏ ‏حدثنا ‏ ‏حماد ‏ ‏عن ‏ ‏ثابت ‏ ‏عن ‏ ‏أنس ‏ ‏قال ‏
سمع رسول الله ‏ ‏صلى الله عليه وسلم ‏ ‏أصواتا فقال ما هذا قالوا يلقحون النخل فقال لو تركوه فلم يلقحوه لصلح فتركوه فلم يلقحوه فخرج ‏ ‏شيصا ‏ ‏فقال النبي ‏ ‏صلى الله عليه وسلم ‏ ‏ما لكم قالوا تركوه لما قلت فقال رسول الله ‏ ‏صلى الله عليه وسلم ‏ ‏إذا كان شيء من أمر دنياكم فأنتم أعلم به فإذا كان من أمر دينكم فإلي ‏


طب اذا كان ده رسول الله مشرع وفقيه الامه الاول والاخير قال انتم اعلم بامور دنياكم وفي الرواية التانية إذا كان شيء من أمر دنياكم فأنتم أعلم به فإذا كان من أمر دينكم فإلي

فما بالكم بشيوخ لا تفتاء تحرم وتحلل كل كبيرة وصغيرة في حياتنا لدرجة ان الواحد خايف تطلع فتوى بتحريم الجنوط الاسبور !!!

قد يستهجن كلامي البعض بس كثرة الفتاوى المتضاربة والغريبة وكثرة اللبس بين الحق والباطل سمة لاتنكر لعصر نعيشة الان وفى الحديث

حدثنا ‏ ‏محمد بن المثنى ‏ ‏حدثنا ‏ ‏الوليد بن مسلم ‏ ‏حدثنا ‏ ‏ابن جابر ‏ ‏حدثني ‏ ‏بسر بن عبيد الله الحضرمي ‏ ‏أنه سمع ‏ ‏أبا إدريس الخولاني ‏ ‏أنه سمع ‏ ‏حذيفة بن اليمان ‏ ‏يقول ‏
كان الناس يسألون رسول الله ‏ ‏صلى الله عليه وسلم ‏ ‏عن الخير وكنت أسأله عن الشر مخافة أن يدركني فقلت يا رسول الله إنا كنا في جاهلية وشر فجاءنا الله بهذا الخير فهل بعد هذا الخير من شر قال نعم قلت وهل بعد ذلك الشر من خير قال نعم وفيه ‏ ‏ دخن ‏ ‏قلت وما دخنه قال ‏ ‏قوم يهدون بغير هديي تعرف منهم وتنكر قلت فهل بعد ذلك الخير من شر قال نعم دعاة على أبواب جهنم من أجابهم إليها قذفوه فيها قلت يا رسول الله صفهم لنا قال هم من جلدتنا ويتكلمون بألسنتنا قلت فما تأمرني إن أدركني ذلك قال تلزم جماعة المسلمين وإمامهم قلت فإن لم يكن لهم جماعة ولا إمام قال فاعتزل تلك الفرق كلها ولو أن تعض بأصل شجرة حتى يدركك الموت وأنت على ذلك "

"حدثنا ‏ ‏شيبان بن فروخ ‏ ‏حدثنا ‏ ‏عبد الوارث ‏ ‏حدثنا ‏ ‏أبو التياح ‏ ‏حدثنى ‏ ‏أنس بن مالك ‏
قال قال رسول الله ‏ ‏صلى الله عليه وسلم ‏ ‏من ‏ ‏أشراط ‏ ‏الساعة أن يرفع العلم ويثبت الجهل ويشرب الخمر ويظهر الزنا ‏"

مش هو ده العصر اللي احنا فيه شيوخ عمالة تفتي بحق وبغير حق واحنا ساد بينا الجهل بالدين والشرع والعلماء اللي بحق بقوا عملة نادرة وافواههم مكممة واصوات علماء السطة هي المسموعة
والمفروض اننا نبقي مسلمين عقيدة ومنهاج في ظل هذا الدخن وفي ظل غياب نظام اقتصادى اسلامى يمكن التامين يكون حرام في عصر تاني بس في ايامنا الهباب ديه معتقدش

اخيرا فيه كلمتين المفروض الواحد يحطهم قدامة وهو بياخد اي قرار في موضوع عليه اختلاف زي اللي بنتكلم فيه

الاولى حديث رسول الله " من ترك شيئا لله ابدله الله خيرا منة " وده للي يقدر يستغني عن التامين وهو غير ضروري بالنسبة ليه وخايف من الشبهات فالافضل تركة لله فان كان حراما برئ لذمتة منه وان كان حلالا فالله سيرد عليه ثواب تركة لهذا الشيء لله وسيبدله خيرا منه بركة او صحة او مال

الثانية : حديث رسول لله " ان الله يحب ان تؤتى رخصة كما يحب ان تؤتى عزائمة "

فدينا سمح وربنا ادانا رخص لتجاوز ما امرنا به في حالات الضرورة وربنا بيحب اننا ننفذ رخصة زي ما بيحب سبحانة اننا نعمل عزائم الامور

والله تعالي اعلى واعلم

الموضوع الاصلى
اذا كان التأمين حرام من يعوض الغارمين

[Ahmed Anwer]

كلام كتير عايز اقوله

و لكن افضل الصمت

حتي لا آخذ وزر سواء تحليل او تحريم

الله اعلم

[AbOnOrA]

انا بس عايز ااكد على الاتى

الموضوع ليس فتوى او اقرار لتحريم شىء او اباحتة
المنتدى بالاساس منتدى سيارات متخصص مش منتدى اسلامى
انا شخصيا مش اهل للفتوى ولا صاحب علم حتى

انا انسان باخد دينى بفهم وتدبر بدون اتباع او تقليد وبفكر معاكو بصوت عالى زى ما فكرت قبل كده واجتهدت لتحليل دعوات وفتاوى تحريم التامين وانا عندى يقين ان مفيش حاجة حرام على الاطلاق انما الفعل بيكتسب صفة التحريم او الاباحة بالهدف منة وطريقة ادئه

فانا مقتنع ان فيه اساليب تامين حرام واساليب حلال ومقتنع ان فيه واحد بيأمن بنية صحيحة واحد لاء بس متقوليش التامين اصلا حرام واللى بيأمن كافر بقضاء الله

[تامين سيارات]

السلام عليكم اخوانى انا ما اقدرش انى افتى فى هذا الموضوع لاكن احب انى اقولكم حاجة بسيطة ان موضوعالتامين هوة عبارة عن صندوق تكافلى بين المشتركين فىالشركة مثال:
لو فى شركة و فيها صندوق و كل يضع فى هذا الصندوق حسب قدراتة المالية و توفى احد الزملاء و كان الى يضعة فى الصندوق قليل و صرف نقود اكثر بكثير مما وضعة فىالصندوق هل يكون هذا حرام ام تكافل بين افراد الشركة اذا حلت على احداهم مصيبة سواء وفاة او علاج مكلف او عملية جراحية عالية التكاليف
و فائدة التامين انة يحافظ على مال المشتركين فى حال حدوث مصيبة لا قدر الله لاحدهم من حيث المنشات التى يامن عليها و ان العقد شريعة المتعاقدين و شركة التامين تقوم بدور مهم فى الحفاظ على المال الخاص للمشتركين

[humhum]

والله يا ابونورا
كلامك منطقي
بس اللي اعرفه ان فيه فتاوي كتير بتحرم التأمين وبأدله شرعيه

الواحد الحقيقه تايه
ومش عايز يعمل حاجه تغضب ربنا
بس لو حلال فعلا يبقى حاجه كويسه
ولو حرام
يبقى ملوش لازمه ، لأن القضاء والقدر بيد الله