جراند بونتو 77 حصان .. بس؟

[فــيــروز]

السلام عليكم و رحمة الله و بركاته

كل عام و أنتم بخير و رمضان كريم عليكم و علينا

من فتره و أنا أفكّر فى شراء عربيه فيات جراند بونتو .. أوّل عربيه هاشتريها فى حياتى .. بصراحه شكلها عاجبنى جدّا و هى اللىّ فى حدود الميزانيه اللىّ مقرراها و هى 100 ألف .. كمان هاتشباك و أنا عاوزه عربيه هاتشباك

لكن فيه شيئين أنا قلقه منهم و أرجو منكم المشوره فيهم ..

الأوّل أنّها 77 حصان بس و فيه ناس قالوا لى ده رقم قليل جدّا على عربيه بهذا السعر !! ولم أفهم طبعا العلاقه لكن أريد أن أفهم هل 77 حصان رقم يؤثر على أداء العربيه؟

الثانى هو أنّى أعرف أن من السيّاره موديل أتوماتيك لكنّى قرأت فى إعلان عنها فى ملحق السيارات فى "الأهرام" أنّها متوفّره بفتيس يدوى و لم يذكروا شيئا عن الموديل الأتوماتيك فهل هذا هو الوحيد المتوافر

و بشكل عام ما هو تقييمكم للسياره؟ أنا عاوزه عربيه أروح بيها من البيت للشغل و سكنى فى المهندسين و عملى فى مصر الجديده .. مش بافكر اسافر بيها لانى اصلا متعلمه السواقه جديد بس نفسى جدّا فى يوم من الأيام أروح بيها الفيوم .. دى أقصى طموحاتى بصراحه بس مش عاوزاها تبقى عربيه بتموت منّى لو ركّبت فيها كل عدد الأفراد المتاح أو حطيت معايا شنطة سفر مثلا ..

و شكرا جزيلا

[sam ram]

حضرتك الهورس باور بتاع العربيه ده بيعبر عن القوه القصوى للموتور .. وده بيتحقق غالبا على عدد دورات كبيره RPM
يعني مثلا يقولك عربيه قوتها 100 حصان على 6500 دد
وده معناه ان علشان الموتور يطلع ال 100 حصان دول المفروض ندوس بنزين على نفس النقله او الغيار لحد ما عداد ال RPM يوصل ل 6500
طبعا السواقه في وسط البلد مبتديش فرصه لأي حد يعلي الار بي ام للموتور ل 6500 دد .. و بالتالي محدش حيوصل لل 100 حصان دول .. الا اذا كان بيشد مع عربيه تانيه او طريق مفتوح قدامه و عايز يزود سرعه جامد ... او عايز يحقق التسارع الاقصى للعربيه
لكن الغالب بينقل النقلات بدري على عدد دورات متوسطه ... فبالتالي بيوصل الموتور لاخراج قوه متوسطه بس علشان يحرك العربيه بسلاسه ...
العربيات اللي قوتها عاليه بتخرج قوتها دي على عدد دورات عاليه ..
لكن البونتو حتلاقيها بتخرج ال 77 حصان دول على عدد دورات منخفضه .. وبالتالي حضرتك مش حتحسي بأي فرق بينها و بين اي عربيه اقوى منها .. الا اذا كنتي ناويه تشدي بيها على طريق المطار او المحور
بالنسبه ان العربيه يكون راكب فيها ناس كتير والشنطه مليانه فدي بيتدخل فيها عزم الموتور
والجراند بونتو بتحقق 115 نيوتن.م / 3000 دد .. يعني بتحقق العزم الاقصى بتاعها على عدد دورات متوسطه ... يعني مش حتموت منك و لا حاجه

حاجه تانيه .. العربيات الصغيره بيبقى غالبا وزنها صغير و بالتالي مش محتاجه تكون مواتيرها قويه و كبيره ... عكس العربيات الكبيره اللي بتكون تقيله و بالتالي محتاجه موتور قوي علشان يحرك وزن العربيه الكبير
اتمنى اكون وضحت وجهه نظري
بالنسبه للسعر فافتكر ان المانيوال ب 90 و الاوتو ب 100 الف

من اجمل العربيات الهاتشباك ... توكلي على الله ومتقلقيش

[فادى]

الجراند بونتو سيارة مصممة خصيصا للمدينة, و محركها مصمم لاعطاء العزم مرتفع عند سرعات قليلة 115 نيوتن-متر عند 3000 لفة/دقيقة (السرعات التى غالبا ما نستخدمها وسط المدينة و الانتقال من حالة الثبات الى الحركة),
هذا النوع من المحركات يكون أكثر تجاوبا و أفضل فى حالات التحميل, كما أنه أطول عمرا و أمتع فى القيادة,
و هو تصميم أوروبى ليناسب طبيعة البلاد المزدحمة و الطرق الجبلية هناك.
عكس المحركات الأسيوية و الأمريكية التى تعطى عزمها عند عدد لفات مرتفعة لتناسب طبيعة الولايات المتحدة حيث الطرق السريعة الممتدة على الصحراء المستوية.
حكاية ال77 حصان لا تخيف أبدا لأن القوة الحصانية ليست المعيار الوحيد لقياس قوة المحرك و لا تسارعه, انما تتحدد هذه العوامل بواسطة منحنى العزم, و القوة الحصانية تعطينا فكرة عن شكل منحنى العزم التقريبى لذا يتم ذكرها.
العيب الوحيد لهذا النوع من المحركات يظهر على الطرق السريعة, حيث تقل السرعة القصوى و يصبح التسارع أبطأ على السرعات العالية (ما بعد 120-140 مثلا),
كما أن تسارعها العام يقل(بمعنى فى حالة القيادة القصوى أى الوصول بالمحرك الى أقصى عدد لفات ممكنة على كل نسبة, و بالطبع لا احد يقود بهذه الطريقة)
فى السفر غالبا العربية سوف تؤدى بشكل جيد و لن تتأثر بالأوزان أو التحميل, لكنها لن تصل الى سرعات مرتفعة (180-200 كم/ساعة مثلا), و فى المدينة سوف تؤدى بشكل ممتع و متجاوب و عموما فيات مشهورة بمحركاتها النشطة و المتجاوبة, لذا لا داعى للقلق من هذه النقطة.
و هناك موديل مزود بشاحن هواء 120 حصان مصمم للأداء الرياضى و سعره لا يزيد كثيرا عن الموديل السابق.
بالنسبة للموديل الأوتوماتيك فهو متوفر على ما أعتقد و سعره 100 الف, و الموديل العادة سعره 90 الف.

[AbOnOrA]

استاذه فيروز اهلاً بيكى فى المنتدى وزى ما استاذ سامح واستاذ فادى شرحو إداء الجراند بونتو لا يفتقد الى القوه اطلاقاً بل بالعكس هتلاقى اداء ممتع فى القيادة داخل المدينة مع توفير فى الوقود افضل من المحركات ال 1600 سى سى الاخرى

[فــيــروز]

شكرا جزيلا لمشاركاتكم ..
بجد ريّحتونى جدّا و ساعدوتنى على اتخاذ قرار نهائى بإذن الله
بس لو مفيهاش رذاله فيه سؤال عام .. هل شراء العربيه من التوكيل افضل ام من معرض سيارات مثلا او موزع معتمد؟ ايه الفرق؟