احنا الطلبة ؟ عايزين نعرف عمرة الموتور بالتفصيل والخطوات والصور

[mr_astra]

الكرنك وكراسى التحميل والهلايل
طبعا احنا بنعمل عمرة كاملة واتفقنا ان الموتور بتعنا بيرزع
وزى ما انت مودى البلوك للخراط راكب فية الكرنك
بيتم فك الكرنك وعمل تجليخ ودة الاسم الصح للكرنك مش خراطة بيتم عمل تجليخ لاماكن البيلات وتجليخ لاماكن الكراسي طب السبيكة اللى راكبة ستاندر يبقى هانجلخ ونجيب سبيكة زيرو عشرة او على حسب التاكل الحادث فى ركب الكرنك ممكن الخراط يؤلك زيرو عشرة مش هاتنفع لان الكرنك فى تاكل كبير هاتلى زيرو عشرين ومالة ساعتها هاجيب طقم سبيكة بالمقاس المطلوب من الخراط لانى هاستلم شغلى منة واحسن سبايك موجودة هى سبايك المصانع الحربية اسمها سبيكة مصانع هاشتريهم واوديها للخراط وهو بيقوم بتجليخ الكرنك وبيركب الكراسي وبيقرط عليها انما ما يمنعش انك تعيد رباط على كراسي الكرنك للتاكد
وبتستلم منة الكرنك بيدور بمنتهى السلاسة على كراسية وما فيش اى خلوص بين الكرنك وبين الكراسي لان الهلايل راكبة فى مكانها بالمظبوط ومتريحة كل ما عليك تلف الكرنك لازم يكون زى الملبن حاجة كدة تستمتع بيها وبعد كدة هافك بايدى الكراسى تانى عشان انضف مجارى الزيت حد عارف مش يمكن فى مجارى مسدودة او شبة مسدودة مش بتوصل زيت للكراسي لا يا عم انا انضفها بالهواء بايدى احسن هو انا وراى حاجة

متهيالى كدة خلصنا جميع اعمال الخراطة للمكنة

[mr_astra]

التقفيل
اولا لازم كل مسمار فى الموتور يتغسل بالجاز غسلة محترمة اوى واى مسمار المخ بتاعة متاكل لازم يتغير واى مسمار السن بتاعة مفوت لازم يتغير وخلى جنبك علبة شحم ومزيتة
وعاوز اكرر تانى على النضافة لانها نقطة غاية فى الاهمية وتخلى فى ايدك فوطة صفرا نضيفة واى حاجة تشوفها تمسحها بالفوطة الصفرة اكنك موسوس بالظبط ولازم تشتغل على تزجة نضيفة اوى واوعى من التراب حتى اللى فى الجو

اول حاجة بتتقفل هى الكرنك بتجيب الكرنك وتركب الكراسى بتعتة واكيد حضرتك بالمسدس نضفت كل مجارى الزيت الموجودة فى البلوك وخصوصا مجارى الزيت المغذية لكراسي الكرنك بما اننا شغالين فيها دلوقتى

وطبعا وانت بتركب الكراسي لازم تديها زيت قبل التقفيل وانا بصراحة مش فاكر عددهم اما انهم 3 كراسي او 4 مش فاكر بصراحة وعاوزك بقى تربطهم رباط من نار طبعا بمفتاح لقمة وماسورة وتحرق عليهم بضمير اوى اوى

ركبنا كدة كراسي الكرنك والهلايل ولازم نختبر لف الكرنك بسهولة وسلاسة

تعالى بقى نركب البستم رقم 1 اللى اتفقنا انة من ناحية وش التقسيمة

طبعا البستم راكب فى ذراع البيل ونص السبيكة العلوى بالبيل راكبة وانا حاطط زيت على جدار الشميز وفى واحد معاك بيساعدك

هنركب شنبر الزيت وحلقتين الضغط وخلى بالك من اتجاة شنبر الضغط اما ان فى حرف بيكون لفوق او بايدك تشوف تجويف الشنبر هتلاقية لفوق عشان يضغط ولكن معظم الشنبر بيكون فى حرف هجائى ودة الدليل بتاعك انة لفوق

طب اتجاة فتحات الشنابر ازاى؟؟؟؟؟؟؟؟؟ دى نقطة غاية فى الاهمية والاجابة انها لازم تكون على شكل نجمة مرسيدس وبعيدة عن بنوز البيلات ،،،،،، حذارى انك تركب فتحة الشنبر اعلى بنز البيل ادامك محيط البستم كولة اختار اى مكان لكن يكون بعيد عن بنز البيل وتعمل نجمة علية بالشنبر اللى بعدة وشنبر الزيت

طبعا انت حطيت قليل من الزيت على جسم البستم وعلى البنز ،،،،، نجيب زرجينة البساتم ونركب فيها البستم ونخلى بالنا اوى من اتجاة البستم لو تفتكر السهم او اتجاة تجويف الصبابات وبضهر الشاكوش ندق دق مكتوم على سطح البستم لغاية اما يبقى فى النقطة الميتة العليا وزميلك اللى معاك يقابس مكان البيل على الكرنك وبعدها تربط سبيكة الكرنك وتقرط عليها من نار بالماسورة وباكد عليك الرباط يكون من نااااااااااااااار اوعى تتهاون او تخاف ان المسمار يفوت انا عندى يفوت احسن ما يهوى من الشغل وعادة بيكون فية وردة تحت المسمار بتعمل عمل التيلة عشان المسمار ما يفكش من اثر الشغل وبعد اتمام عملية الرباط نلف الكرنك لفتين تلاتة عشان نعرف ونضمن ان البست شغال فى الشميز بتاعة زى السكينة فى الحلاوة ،،،،،تذكر زى السكينة فى الحلاوة يعنى بدون مجهود فى الدوران وبدون صوت البستم لازم يطلع وينزل سلسل وبتناغم وتحس بية وانت بتلفة كدة وبنفس الطريقة هانسقط الـ 3 بساتم الباقيين
نفسي ربنا يبارك فى الوقت ونكمل تقفيل المكنة

[mr_astra]

نسيت بس فى الفقرة اللى فاتت احزرك من حاجة مهمة
وهى اى مكان قلاووظ لازم تنفخة بالهواء عشان تطلع جاز الغسيل منة وحذارى انك تربط مسمار القلاووظ بتاعة فى جاز لانة هايطق والبلوك ممكن يتشرخ

[mr_astra]

دلوقتى ممكن نركب طلمبة الزيت عشان نقفل الكرتيرة لحسن رمل او تراب يدخل جوة المكنة

هاتقولى المكنة مش متزنة وعمالة تروح يمين وشمال منى ومش عارف امسكها اؤلك ومالة اتعب انت شوية وحاول تحطلها قرمة خشب من هنا ولا من هنا عشان تتزن انما اسيب المكنة معرضة للهوا لا!!!

تعالى بقى نركب وش السلندر

طبعا احنا جيبين طقم جوانات بس بصراحة مش تمام انا هاشترى جوان وش سلندر لوحدة عشان اللى بيجى فى الطقم مش برتحلة بصراحة

وعشان نقفل الجوان تمام لازم نديلة جوملكة عشان المياة ومش عاوز افكرك ان سطح البلوك من فوق بيبرق وما فيش اى رواسب لجوان وش السلندر القديم يعنى معمول بصنفرة ناعمة

خلاص ادينا جوملكة للجوان وللبلوك واتاكدنا ان جميع قلاووظات المسماير مفهاش جاز ومتنفضة بالهواء تعالى نحرر الـ 4 بساتم يعنى نخليهم مش فى النقطة الميتة العليا ونركب الوش بتعنا ونربط المسامير رباط خفيف ولما نبدا نقرط نقرط من المنتصف وللخارج بشكل حرف اكس

ممكن نركب الفولام على الكرنك بعد لما نركب اويل سيل الكرنك الخلفى ومش لازم تديلة جملكة بس تركبة صح اوعى يكون مش راكب كويس لحسن يجيب زيت ولو عاوز تديلة جوملكة يبقى من على المحيط الخارجى بتاعة طبعا هتحط الخابور مكانة وتركب الفولام وتربط مسامير الكرنك برباط من نااااااااااااااار بنفس طريق الفك اللى هى نص السبيكة القديمه وممنوع منعا باتا تلف الكرنك الا لما نركب سير الكاتينة

حط الاسطوانة وبعدين الدسك وبنظبط مركزية الاسطوانة بعامود دركت معرفش بقى هاتجيبة عندك ازاى

ونتقابل فى الفقرة الجاية بتقفيل الكاتينة

[mr_astra]

نبدا بتركيب طنبورة الكرنك الامامى بعد تركيب اويل سيل الكرنك الامامى هانحط الخابور مكانة ونركب الطنبورة ونربط المسمار بتعها ونربط بلية الشداد بس منحرقش عليها

هانظبط العلامة بتاعة الطنبورة على جسم البلوك عبارة عن شرط ببدن الطنبورة تقابل شرط على البلوك ونفس الطريقة زنبة ترس الكامة تقابل زنبة معدنية على الصاجة الخلفية لوش التقسيمة مدببة لاسفل نركب السير ونشدة عن طريق بلية الشداد ونختبر شد سير الكاتينة بالايد يكون عامل سوستة ولا مشدود اوى ولا مرخى اوى وممكن نقفل الوش البلاستيك الاصفر ،،،،، طب ما تيجى نسقط الاسبراتير بالمرة طالما احنا محررين البستم رقم 1 والطريقة سهلة اوى
نركب ترس الاسبراتير او اسمة ترس طلمبة الزيت والترس دة بيستمد حركتة الخارجية من عامود الكامات ومن الداخل يوجد مشرشر بيلفف طلمبة الزيت وعامود الاسبراتير
نجيب وش الاسبراتير ونحدد سلكة البوجية رقم واحد هتلاقيها مكتوبة على وش الاسبراتير (1 ) ونسقط الاسبراتير على الوضع دة واتجاة الشاكوش على سلكة البوجية رقم 1 ونربط المسمار المثبت للاسبراتير بس رباط بالايد مش بالمفتاح