عايز تروح اى محافظة او مكا ن داخل مصر

[احمد عبد الغفار]

المشاركة الأصلية كتبت بواسطة خالدخليفة ماشى ياطبيب ومبروك التخرج ونبتدى بطنطا هتمسك الدائرى لحد م توصل عند نقطة مكتوب عليها يافطة اسكندرية الزراعى او المهندسين او محور 26 يوليو ادخل يمين وكمل على طول حتى منزل شبرا الخيمة هيقابلك منازل المهندسين ثم روض الفرج او امبابة ثم الوراق ثم باسوس ثم شبرا الخيمة امسك اليمين بعد منزل باسوس ب حوالى 2 كيلو ستجد لافتات ارشادية على سور الدائرى على اليمين باللون الاصفر تقول / شبرا الخيمة الزم اليمين 1500 متر ثم اخرى تقول 500 متر ثم اخرى تقول 300 متر انزل يمين وانت نازل احترس متكملش ولكن ادخل شمال فى النفق وكمل على طوووووووول (متدخلش شمال تانى لانك هتركب الدائرى مرة تانية )لحد م تخرج من النفق ثم امشى على طول مع الطريق ستمر على مدن قها / طوخ / بنها / قويسنا / بركة السبع ثم اخيرا طنطا وبعد بركة السبع مباشرة ستجد بوابة كبيرة بعرض الطريق مكتوب عليها (محافظة الغربية ترحب بكم ) انت الأن فى طنطا هتنزل النفق بعدها وتمشى حتى يقابلك مطب صناعى اطلعه وانت نازل من المطب ادى اشارة شمال لكى تدخل طنطا انتظر حتى يفتح لك الطريق ثم ادخل فى الشارع المواجه لك وكمل فيه على طول حتى تعبر تحت القطار المتجه للمنصورة وهو نفق صغير بعد النفق ان دخلت شمال فانت متجه الى مناطق الحلو والجلاء والمحطة (محطة القطار ) والسيد البدوى وسيجر والجملة ووسط المدينة بصفة عامة وان كملت على طول فانت ذاهب الى مناطق شارع البحر وشارع سعيد وسوق الفسيخ والجامعة وشارع سعد الدين وهو صرة المدينة تقريبا (فـفيه وحوله يتركزمعظم تجارة الجملة فى كافة المجالات ) والمحافظة وسبرباى والمسافة تقريبا من عندك حتى طنطا حوالى 102 كيلو تقريبا ميت غمر اعتـقـد انها المقصودة لانى لا اعتقد انك تعرف ميت عنتر وهى قرية بعد المنصورة فى طريق شربين /كفر سعد / دمياط ستسير نفس الطريق حتى شبرا الخيمة ثم تنزل يمينا منزل شبرا الخيمة ثم يسارا داخل النفق وعلى طووووول حتى بنها ستجد ككوبرى صغير مكتوب قبله يافطة كوبرى الشموت بعد م تنزل من عليه هتلاقى الطريق لافـف يمينا فيسارا على شكل حرف s وستجد امامك كوبرى بنها العلوى اطلع عليه وكمل مع الطريق مسافة حوالى 5 كيلو تقريبا او اقل ستجد يافطة على اليمين مرسوم عليها سهم يشير اتجاه اليمين ومكتوب عليها المنصورة / دمياط اول يمين بعدها انزل فيه وخد الملف على واسع لان اليمين والوسط مكسر او بمعنى أدق مضعضع ستجد السيارة ترقص ستجد امامك طريق طوله حوالى 300 متر تقريبا امشى فيه حتى أخره وادخل شمال فى الأخر مع الحرص من القادم من اليسار اولا ثم من اليمين ثانيا بعد عبورك للطريق لان الطريق طريقهم ولايوجد هناك اى حد لتنظيم المرور الا قليلا ستمشى حتى يقابلك كمين ادخل عليه وانت رابط الحزام وميهمكش وكمل على طول حتى تعبر شريط السكة الحديد وخلى بالك من العلامة دى لانه لن يقابلك على هذا الطريق اى سكة حديد غير دى وبعد عبورك لشريط القطار ستجد امامك كوبرى عربيات كبير بعرض الطريق عدى من تحته واول يوتيرن لف وارجع تانى وادخل ثم امشى مسافة حوالى 200 متر واعبر شريط السكة الحديد مرة اخرى وادخل يمينا بعد عبورك لشريط القطار مباشرة وامشى مسافة حوالى 2 كيلو ستجد نفسك داخل مدينة ميت غمر المسافة من عندك حتى ميت غمر تقريبا حوالى 85 كيلو بمرورا بمدنتى بنها وكفر شكر ثم ميت غمر الأسماعيلية نفس الطريق حتى شبرا الخيمة ولكنك هتكمل على الطريق الدائرى على طول بعد منزل شبرا الخيمة (متنزلش كمل على طول ) ستمر طبعا عالى منازل ميت نما وبهيتم ومسطرد والخصوص والمرج ومؤسسة الزكاة ثم يقابلك مخرج مدينة السلام عند هذا المخرج تحديدا ستجد أمامك نفـق ادخله واخرج منه واخرج من مخرج الاسماعيلية وهو يمينا ثم تلف من تحت الدائرى وارجع ثم ادخل يمينا انت الأن فى اول طريق الاسماعيلية أو يمكنك الخروج من مخرج السلام يمينا ثم تمشى حتى يقابلك كوبرى متطلعوش لف من تحته وارجع لتكون فى اول طريق الاسماعيلية ستمشى حتى تقابلك بوابة رسوم وهى قبل الاسماعيلية بحوالى 30 كيلو تقريبا ثم فى نهاية الطريق ادخل يمين وكمل على طول ستمشى حوالى 3 كيلو لتجد نفسك فى الاسماعيلية ولتما م الفائدة فى آخر الطريق لو دخلت يمين ولفيت مع الصينية ورجعت ودخلت يمين تانى انت الأن متجه الى بورسعيد فى طريقك الى الاسماعيلية ستمر بمدن العبور ثم الشروق ثم العاشر من رمضان والمسافة من عندك حتى االاسماعيلية تقريبا 120 كيلو متر دمياط هو نفس الطريق حتى ميت غمر مع الفارق البسيط انك هتكمل مع الطريق حتى تصل الى مدينة المنصورة الطريق يلف يمين تلف معاه / يلف شمال تلف معاه وبعد كمين المنصورة وهو امام محطة كهرباء المنصورة ستجد امامك كوبرى امشى من تحته ثم ادخل يمين لتطلع فوق الكوبرى وامشى على طول حتى تجد يافطة تقول طلخا او دمياط انزل بعدها يمين وعلى طووووووووووووووول حتى مدينة دمياط فى مدخل مدينة دمياط ستجد تمثال كبير لشخص لايعرف الكثيرون من هو لكنه ان لم تخننى الذاكرة تمثال عبد المنعم رياض قائد الجيش المصرى فى حرب الاستنزاف او تمثال مصطفى مشرفة العالم النووى المصرى الكبير لا اتذكر بالضبط المهم بعد هذا التمثال وهو فى مدينة كفر البطيخ مسقط رأس عصام الحضرى ستجد مزلقان للقطار على اليمين والشارع العمومى ينقسم قسمين قسم يدخل مع شريط القطار والأخر يدخل يسارا ادخل يسارا لتجد نفسك فى منطقة السنانية على بعد كيلو تقريبا سيقابلك كوبرى اطلعه وانزل من عليه ان كملت على طول ستصل الى مناطق باب الحرس وعزبة البرج وان دخلت يسارا ستجد نفسك متجها الى مناطق سوق السمك والتجارى والشرباصى والكباس وميدان سرور وان عملت يوتيرن بعد الكوبرى ورجعت ودخلت تحت الكوبرى يمينا فانت متجه الى المعهد الأزهرى وامن الدولة (سلم قولا من رب رحيم ) وان عملت يوتيرن من امام أمن الدولة ورجعت تحت الكوبرى فانت متجه الى مناطق عمر افندى والتجارى وجامع البحر وميدان سرور والمطافى ثم طريق بورسعيد وفارسكور والزرقا ايضا لو كملت على طول البحيرة انت مقلتش رايح فين فى البحيرة لان بلاد الفلاحين ماعدا المحافظات الساحلية اسم على غير مسمى فلايوجد مكان محدد اسمه الشرقية او مكان اسمه البحيرة او المنوفية او مكان اسمه الدقهلية او مكان اسمه الغربية وهكذا والبحيرة عبارة عن مراكز /التوفيقية وهو مركز صغير بعد كفر الزيات وايتاى البارود وابو المطامير ودمنهور وحوش عيسى وابو حمص وكفر الدوار والدلنجات وشبراخيت (بلد الشيخ كشك رحمة الله عليه ) وكوم حمادة /رشيد / ادكو / الرحمانية (فى موقعة مشهور فى التاريخ بأسمها ) /النوبارية / وادى النطرون /المحمودية وأخيرا مركز بدر وكلهم مداخلهم من على طريق اسكندرية الزراعى ماعد النوبارية ووادى النطرون ومركز بدر فمداخلهم من على طريق اسكندرية الصحراوى وأبو المطامير لها مدخلان احدهما من الزراعى ولكنه يبعد عن الزراعى حوالى 50 كيلو والثانى من الطريق الصحراوى وهو الأقرب ويبعد عن الصحراوى حوالى 30 كيلو وحوش عيسى لها مدخلان الاول من الزراعى وهو الاقرب ستمشى مساافة 25 كيلو تقريبا والثانى من الصحراوى ستمشى بمسافة 50 كيلو عموما هنشرح لك الطريق على اساس انك رايح دمنهور عاصمة المحافظة وهو نفس طريق طنطا ولكن حتى بركة السبع فقط (منوفية ) أو مدينة دفرة تحديدا وهناك ستجد قبلها يافطة تقول المتجه الى الاسكندرية يلزم اليمين وفعلا اول يمين تطلع كوبرى مدينة دفرة لتمشة مسافة حوالى 50 كيلو لتد نفسك عند مدينة كفر الزيات سيقابلك فى وسط ها الطريق بوابة رسوم ستدفع فيها 3 جنيه وكمل بعد كمين كفر الزيات فى الطريق الزراعى ودمنهور لها مدخلان الاول ستجد قبله يافطة تقول المدخل الجنوبى لمدينة دمنهور والثانى بعد هذه المدخل مباشرة بحوالى 2 كيلو و هنقول لك على علامة مميزة له الطريق الزراعى من كفر الزيات ضيق فهو حارتان فقط وحين يتسع الى 4 حارات وتجد على يمينك سور ابيض فأنت داخل على مدينة دمنهور وستقابلك اشارة وتقاطع مرورى عند هذا التقاطع وهذه الاشارة ادخل يمينا ستجد امامك كوبرى لو طلعته فانت ستعبر شريط السكة الحديد ثم يسارا الى منطقة المحافظة وهى منطقة راقية وليس بها محلات كثيرة او يمينا منطقة مقام الدمنهورى وخلف السكة الحديد والحى التجارى هناك وان نزلت من تحته ستذهب الى محطة السكة الحديد وشركة السجاد والموقف والمسافة من عندك حتى دمنهور حوالى 165 كيلو تقريبا وستمر بمدن قها / طوخ / بنها / قويسنا / بركة السبع / كفر الزيات / ايتاى البارودى ثم دمنهور ومبروك التخرج وعقبال م نشوفك احد علماء مصر الكبار مثل مجدى يعقوب وزويل ومصطفى السيد وعصام حجى ومشرفة وغيرهم

انا عايز ارخح النوباري و انا في بنها موصلات

[خالدخليفة]

المشاركة الأصلية كتبت بواسطة احمد عبد الغفار انا عايز ارخح النوباري و انا في بنها موصلات

اعتقد انك تقصد النوبارية
هتركب القطار حتى رمسيس وهناك امام باب محطة مصر ستجد ميكروباسات اسكندرية
تركب وتقول له نزلنى النوبارية
بس طبعا هتدفع اجرة اسكندرية
اما لو عايز تدفع اقل شوية هتركب الميكروباس من بنها حتى شبرا الخيمة وهتاخد ميكروباس الى خلوصى ثم تنزل عند موقف اتوبيس السادات
هتركب اتوبيس للسادات ب 6 جنيه او ب8 جنيه على حسب اللى طالع
ومدينة السادات لها كل نص ساعة اتوبيس ثم من قبل ان يدخل مدينة السادات ستنزل او اسأل السائق ان كان من الموقف توجد مواصلات للنوبارية
هذه الطريقة ستكلفك كام
3 جنيه من بنها لشبرا
75 قرش من شبرا حتى موقف السادات ( مطار المنوفية )
6 جنيه من القاهرة للسادات
2 جنيه من السادات للنوبارية (تقريبا )
الاجمالى / حوالى 12 جنيه
وستكلفك من الوقت حوالى 6 ساعات
واما الطريقة الأولى ستكلفك الأتى
3.5 جنيه حتى محطة القاهرة
25 جنيه اجرة اسكندرية بالميكروباس من امام محطة القاهرة
وستكلفك من الوقت حوالى 4 ساعات
واحسبها انت اما توفير الوقت او توفير الفلوس

[tabeb]

السلام عليكم
ازيكم يا جماعة
يا ريت تشرحولي الطريق الي طامية في الفيوم وقليوب
انا من العمرانية وجنب الدائري
يا ريت تنصحوني اختار ايه فيهم اخد تكليفي فيهم من حيث الاقرب

[خالدخليفة]

اولا طامية بعد المنيب بحاجة بسيطة وممكن تركب لها ميكروباس من امام محطة الجيزة وهى اقرب لك من قليوب لانك من العمرانية هتخرم على ساقية مكى وتخلى قطار الصعيد على شمالك وتمشى جنب قطار الصعيد حوالى تلت ساعة او نص ساعة بالكتير
أم قليوب فمن عندك مشوارها عويص وطويلوخصوصا ان الدايرى اللى جنبك هو محور المريوطية يعنى لسه هتطلع منه على الدائرى القديم وهات ياطحن لحد مخرج شبرا الخيمة وهى مسافة حوالى 45 كيلو وحدها واهم من طولها الزحام الرهيب عند كمين امبابة ثم كمين الوراق ثم مخرج شبرا واقل واجب لو انت واخد بكالوريوس ميكروباس زى حالاتى وقلبك جامد وسايب الاكسدام مدلدل زى حالاتى لاقناع الباقيين انهم يوسعولك لخوفهم منك فهتاخد لك فيها ساعة الا ربع
اما لو سواقتك سواقة طبيب يبقى فيها ساعتين وشوية
ثم من الدائرى الى قليوب وهى مسافة 4 كيلو تاخد وقت الذروة تلت ساعة
لكن من عندك مشوار طامية أخره نص ساعة بسبب زحمة المنيب لانك مفروض تخرم من ترعة الزمر وتركب الكوبرى فوق محطة ساقية مكى ثم تصل المنيب وفى المنيب ستتأخر بسبب الفوضى حوالى ربع ساعة بالكتير
وباقى مشوارك من ترعة الزمر حتى المنيب ومن بعد المنيب الى طامية كبيره 45 دقيقة ساعة الذروة وخصوصا ان ترعة الزمر كله مسالك
وهسألك سؤال سألته لك قبل كده
ومرديتش عليه
انت اسمك ايه ؟؟؟؟

[tabeb]

المشاركة الأصلية كتبت بواسطة خالدخليفة اولا طامية بعد المنيب بحاجة بسيطة وممكن تركب لها ميكروباس من امام محطة الجيزة وهى اقرب لك من قليوب لانك من العمرانية هتخرم على ساقية مكى وتخلى قطار الصعيد على شمالك وتمشى جنب قطار الصعيد حوالى تلت ساعة او نص ساعة بالكتير أم قليوب فمن عندك مشوارها عويص وطويلوخصوصا ان الدايرى اللى جنبك هو محور المريوطية يعنى لسه هتطلع منه على الدائرى القديم وهات ياطحن لحد مخرج شبرا الخيمة وهى مسافة حوالى 45 كيلو وحدها واهم من طولها الزحام الرهيب عند كمين امبابة ثم كمين الوراق ثم مخرج شبرا واقل واجب لو انت واخد بكالوريوس ميكروباس زى حالاتى وقلبك جامد وسايب الاكسدام مدلدل زى حالاتى لاقناع الباقيين انهم يوسعولك لخوفهم منك فهتاخد لك فيها ساعة الا ربع اما لو سواقتك سواقة طبيب يبقى فيها ساعتين وشوية ثم من الدائرى الى قليوب وهى مسافة 4 كيلو تاخد وقت الذروة تلت ساعة لكن من عندك مشوار طامية أخره نص ساعة بسبب زحمة المنيب لانك مفروض تخرم من ترعة الزمر وتركب الكوبرى فوق محطة ساقية مكى ثم تصل المنيب وفى المنيب ستتأخر بسبب الفوضى حوالى ربع ساعة بالكتير وباقى مشوارك من ترعة الزمر حتى المنيب ومن بعد المنيب الى طامية كبيره 45 دقيقة ساعة الذروة وخصوصا ان ترعة الزمر كله مسالك وهسألك سؤال سألته لك قبل كده ومرديتش عليه انت اسمك ايه ؟؟؟؟

بجد سألتني قبل كده؟
اخوك محمد
يا فندم عاجزين عن الشكر علي التوضيح الجامد ده
بس معلش اخوك ميح حبتين
لو نزلت نزلة المنيب من الدائري اخده لاخره وبعدين؟
فيه ناس اقترحت عليا طريق الرماية ؟
اي الطريقين اسرع؟