اللانوس و الافيو و اللوجان .. عن تجربة شخصية..

[azzat 55]

الله عليك يا دكتور

[HAMOUD]

الله ينور وانا حبى زاد للانوس
انا معايا لانوس 99
شكلها كدة تحس انها بتضحك لك اول ماتشوفها
تعصب بقى
وربنا يقى كل المصريين من شرور الطريق
وبارك الله فيك

[فادي مكرم]

الله ينور بجد
مقارنة جامدة جدا واسلوب حضرتك متميز ^^
متابع.....

[محمد ابراهيم الغزالى]

متميز اشكرك

[dr.wael7yran]

يا جماعة كتر الف خيركم ..
و ده بعضا مما عندكم ..
نيجي بقى للمقارنة النهائية ...
اللانوس و اللوجان ...
اللوجان اوروبي .. كتلة شرقية اه بس فيها احساس الاوروبي .. اللي ركب اوروبي يا اخوانا هو اللي هيفهمني ..له طعم كده .. و اللوجان فرنساوي .. هتقولي مغربي و لا روماني و لا ايه هقولك لأ فرنساوي .. احساس السواقة فرنساوي .. عارف لما تكون خيال و بتعرف تفرق بين ركوب فرسة اصيلة هادية و ركوب فرس اصيل جامح .. هو كده .. الفرنساوي عامة هو الفرسة الاصيلة و الالماني عامة هو الفرس الدكر الجامح .. في احساس كده موش هعرف اقوله ..
اللانوس كوري ... و يعني ايه بتسوق عربية كوري .. يعني عربية خفيفة و ناعمة و عملية و متصممة بذكاء ... بس بلاستيك .. متعرفش في ايه ؟؟.. الخامات.. الصاج .. الموتور .. اكيد وحوش المنتدى هنا ممكن يفسرولنا ليه لما بتسوق عربية كوري ( و نضم اليها العربيات الصيني) تحس انك بتسوق عربية خفيفيييييييية و متورها قوي جدا فعلا عليها ..
السحب اللانوس جراية و سحبها جميل .. موش فيرنا .. بس جراية ..
اللوجان لا تجري .. راسية في الارض و ماسكة نفسها ... بس سحبها بطئ و تجميعها بطئ..
موش ضايعة اوي يعني .. بس فعلا اقل من اللانوس ..
انا حاسس و الله اعلم انه تكنولوجيا الموتور في اللوجان قديمة شويتيين ..
احساس السواقة اللوجان اجمل بكتييير .. انا فعلا بستمتع و انا بسوق العربية دي ..
اللانوس موش وحش ابدا .. بس اللوجان احلى ..
العفشة اللوجان هنا تتفوق تماما ..
بجد يا جماعة عفشة العربية دي مفاجأة..
العربية زي ما اعلانها بيقول فعلا بتعشق المطبات ..
و العربية عالية جدا .. اعلى من الافيو ..
و ده مناسب طبعا لطرقنا الجميلة ..
و ان كانت الضريبة انك هتحس جامد بالطريق .. بكل زلطة و نقرة و حفرة و دحيدرة
و لو - و دي نصيحة لكل اللوجانية - لما ظبطت الكاوتشات صح و حطيت النيتروجين الدنيا اتظبطت جامد ..
اللانوس عفشتها عادية ..
و موش حمالة اسية ..
و العربية ناعمة بس موش زي اللوجان ..
و احساسك بالطريق اقل بكتييير .. بس العربية واطية جدا .. و قلبك هيوجعك عليها كل ما هتشوف مطب قدامك ..
التكييف اللوجان هنا برده تتفوق ..
التكييف بتاعها تلاجة ما شاء الله .. يعني لو عملته على 3 او 4 هتسقع بجد و 2 هتقوم بالواجب و زيادة و بسرعة ..
و لا يوجد تأثير يذكر على سحب العربية ..
بس في تأثير يذكر اوي على صوت العربية .. و هزة العربية ..
تكييف اللانوس هادي .. بيبسط بس ميسقعش ..
و بيأثر سنة بسيطة على سحب العربية .. بس في العادي يعني .. موش افيو يعني مثلا ..
و فتحات التكييف في اللوجان تحفة .. و فكرتها جميلة و بتوزع الهوا في كل حتة ..
اللانوس عادية ..
صوت الموتور و العزل
اللوجان صوتها عالي بجد .. و لما العربية بتبقى شغالة و التكييف و المروحة بتبقى ( كراكة )
و صوتها عالي على السلانسيه ..
اللانوس صوتها هادي و له زنة مميزة
بس العزل في اللانوس مالوش لازمة ..
يعني موش هتسمع صوت العربية اه .. بس هتسمع صوت كل حاجة بره ..
انما العزل في اللوجان موش بطال ..اه هتسمع صوت العربية بس هتفصلك عن الدوشة بره ..
تقفيل الموتور اللوجان جميييييييييييييييييل و منظم و كل حجاة سهلة و بسيطة و في مكانها ..
و كفاية غطا الموتور .. حكاية ..( اوروبي يا جدعان)
اللانوس نكش فراخ ..
بس اللوجان كل حاجة بتحصل في الموتور بتحس بيها عندك جوه في دواسة البنزين و عصاية الفتيس و صوت العربية ..
القعدة اللانوس هنا تتفوق بجدارة ..
قعدة اللانوس مريحة للظهر فعلا و الكراسي مريحة ..
اللوجان .. زيها زي الافيو .. كراسيها غير مريحة و متعبة خصوصا للسائق.. الكومباكت كده .. الكراسي ( مطرطأة لفوق ) كده ..
بس طبعا ..
اللوجان اوسع بكتيييييييييييييييييييييي ييييييييييييييييييييير ...
اللوجان ما شاء الله واسعة بجد ..
و خصوصا من ورا ..
و الله يا جماعة الكنبة الورانية للوجان اوسع من اللانسر و الالنترا و السيراتو ..
و تنجيد الكراسي اشيك في اللوجان ..
كما انه تمتاز اللوجان بضبط ارتفاع كرسي السائق ..
و البكرة بتاعة الضهر .. سمة مميزة للاوروبي و انا عن نفسي باحبها ..
التابلوه و الخامات الداخلية
عيب اللوجان الاساسي ..
ضايعة من ناحية الترتيب ..
و ليست من ناحية الخامة او التقفيل ..
كل حاجة موش في مكانها ..
لا الزراير ..و لا الكلاكس ..و لا الفتحة الهايفة بتاعة الايرباج الفاضية.. و لا اماكن الكوبيات .. و لا مساند اليد ..
ملخبطين كل حاجة ..
بس الخامة نضيفة .. و التقفيل مظبوط و احسن من اللانوس ..
اللانوس تابلوها جميل .. بس بقاله 13 سنة بالكمال و التمام زي ما هو
بس على الاقل .. الزارير في اماكنها الطبيعية ..
و الخامة جيدة جدا بس اللوجان بجد خامتها انضف ..
Display
رائع في اللوجان .. و بيفكرني بالابيزا الحب القديم ..
و لونه اورانج جميل .. و اي لون بعيد عن الاخضر او الابيض يبقى جميل الصراحة ..
و انا بيعجبني الحركات دي اوي في العربيات ..
نور لمبة الشبورة .. و لمبة الشبورة اللي ورا .. و لمبة الهيتر ..
و لمبة النور الواطي اللي بتطفي لما بتشغل النور العالي ..
و العداد الديجيتال اللي علطول منور ..
بس مفيش لمبة حزام ..
و اصوات الاشارة و الانذارات جميلة ..
بس نظرا لارتفاع صوت العربية .. ساعات ممكن متسمعهاش ..
و طبعا اغتت حاجة سهمين الاشارة اللي بينوروا مع بعض دول ..
بيفكروني ب ال 128 الله يرحم ايامها ( اول عربية في حياتي )
من الاخر تصميمه اوروبي .. و مديك احساس بالاوروبي ..
اللانوس .. كان حلو اوي سنة 98 لما عملوه .. و كان سابق سنه و الله ..
بس بعد 13 سنة ..
تقليدي جدا و ممل لاقصى درجة ..
الاضاءة اللوجان برده بتتفوق ..
من ناحية الاضاءة الخارجية .. اللوجان فوانيسها قوية جدا و كاشفة الطريق ..
و نور الشبورة جميل جدا .. و قوي
و طبعا اللوجان تمتاز بنور شبورة خلفي ( اوروبي يا جدعان ) و ضبط ارتفاع الفوانيس ( اوروبي و الله )
اللانوس اضائتها شغالة بس موش في نفس قوة اللوجان ..
بس لكى لا ننسى .. مجال الرؤية في اللانوس اوسع .. سواء في الزجاج الامامي او الزجاج الخلفي ..
الكومباكت مجاله اضيق فعلا ..
و الاضاءة الداخلية ..
اللوجان طبعا تتفوق .. علشان لمبة الريدنج اللي جنب لمبة السواق من ناحية ..
و علشان الخفوت التدريجي للمبة لحد لما تطفي ..
الاوبشن لوجان ثم لوجان ثم لوجان ثم لوجان ..
بلمسات بسيطة و ذكية العربية دي فيها كل حاجة ..
يعني حاجات موش موجودة في الاربي ام 96 الف جنيه ..
و كمبيوتر الرحلات ده حكاية ..
و التارة الملتي فنكشن و صباح الدلع .. تحسسك انك راكب ميجان مثلا ..
اللانوس الفول اوبشن .. موش فول اوبشن .. اذا اتقارنت باللوجان ..
طبعا باستثناء حكاية التنك و الشنطة بتاعة اللوجان دي ..
غلسة بجد ..
الامان
كطبيب الموضوع ده مهم عندي ..
لان الحزام و الايرباج و توزيع الفولاذ في العربية حاجات بتفرق بجد ..
و الله بتفرق ..
و انا ان شاء الله هعمل موضوع هنا انه احنا لازم نجبر الحكومة الرشيدة بتاعتنا تفرض مواصفات الامان على كل توكيلات العربيات الحرامية بتوعنا ..لأنه ببساطة مصر مصنفة الدولة التالتة عالميا من حيث ارتفاع حوادث الطرق ..و ربنا يستر طريق الجميع ..
و طبعا اللوجان كسيارة اوروبية لازم تعدي مقاييس محددة للامان ..
و الناس دي مبتهرجش ..
اللوجان تتفوق هنا فنيا جدا ..
فراملها اقوى ..
ثباتها احسن .. اللانوس ثباتها ضايع ..
صاجها اضعف فعلا من اللانوس .. بس انا متأكد انه توزيع الفولاذ فيه مدروس بدقة ..
الشكل الخارجي
و دي مسألة اذواق .. انا شايف اللانوس اجمل .. و اكثر انسيابية ..
انا عمري ما حبيت شكل اللوجان من قدام ابدا ..
يعني من الجنب او من ورا كويسة ..انما قدام
بس برده اللانوس حفظناها يا عم الحاج .. التجديد كويس برده ..
التوكيل
اسأل اي حد ماشي في الشارع ..
و قوله مين احسن .. منصور و لا رينو ..
و هتلاقيه بيصرخ باعلى صوته .. رينوووووووووووووووووووووو ووووو
انا لسه مرحتش هناك باللوجي ..
بس انا اتعاملت معاه قبل كده كان في واحد صاحبي عنده ميجان و كنت بروح معاه ..
ناس فاهمة و منظمة و بجد بيفلوا العربية ..
و بجد خدمة ما بعد البيع رائعة ..
و لو ركزت معاهم و الله ما هتفتح كبوت العربية دي لغاية 100 الف او 150 الف كيلو ..
اه هما دباحين و جزارين و قتالين قتلة بس منصور برده موش
بس انت في مقابل فلوسك بتاخد خدمة بجد ..
و بتحجز بالتليفون ( زي منصور ) و عربيتك بتتنجز هناك ( موش زي منصور ) و بتخرج ليك نضيفة و مغسولة ( موش زي منصور خالص) ..
و الاهم من كده طبعا .. انه لو انت دخلت بالعربية و هي فيها حاجة موش مظبوطة.. هتخرج بيها و ياللعجب و هي مظبوطة ..
طبعا اللانوس انتشرت جدا على اللوجان .. و الشغل فيها بره التوكيل احسن و قطع الغيار متوفرة و بكثرة ..
بس انا توكيلاوي .. و ربنا يغنينا و يبعدنا على الصنايعة يا عمي ..
اعادة البيع
لانوس طبعا ..
عربية شكلها متغيرش من 11 سنة .. و لا هيتغير ..
بتتباع في ثواني ..
اللوجان .. بدأت تنتشر جامد و اكيد الطلب عليها زاد ..
بس رينو ..
و موش كده و بس
في 3 سنين غيروا شكلها مرتين ..
و ادي السنة دي نزلوا البلاك لاين .. و قريبا الاوتوماتيك نازل ..
و كل ده بيوقف حالها اكتر و اكتر ..

طيب كده انا خلصت المقارنة بين العربيتين ..
و حاولت اكون محايد على اد ما اقدر ..
طب يا ترى مين اللي كسب ..
الصراحة .. انا مقدرش احلف على واحدة فيهم انها احسن من التانية ..
الاتنين موش خسارة فيهم ال 70 الف خااااااالص
بعكس الافيو اللي فعلا خسارة فيها الفلوس ..
لكن اقدر اقولك ..
لو انت راجل ركيب .. ركبت عربيات كتير قبل كده .. و الزمن لسعك و علمك انه لا يعلى على الاوروبي و الياباني .. و عايز احساس معين في السواقة لن تجده الا في الاوروبي ..و بتحب الاوبشن و الحركات و اللمسات و المتعة بجد في السواقة .. و بتشتري العربية و نفسك انها تعمر معاك و انك هتحترمها و موش هتهينها و هتديها حقها ..
لو انت كده ..فانت اكيد موش هيفرق معاك سعر قطع الغيار و لا غلو التوكيل و لا اعادة البيع .. لانه من الاخر يا اخوانا اللي بيشتري اوروبي عمره ما بيفكر في الحاجات دي ..
و اللوجان اوروبي .. بكل معاني الكلمة اوروبي .. و موش علشان هي ب 70 الف تبقى موش اوروبي ..لأ .. كل حاجة فيها بتحسسك انك راكب عربية فرنساوي ..ايوه فرنساوي حتى لو كانت متجمعة في رومانيا و لا المغرب و لا حتى بلاد الواق الواق ( اللي هي اليمن على فكره )...
انما لو انت عايز عربية واسعة و جديدة و ناعمة ..و سواقتها حلوة جدا بس عادية يعني..يعني اول مرة تسوق او كنت نازل من عربية قديمة مثلا .. مشاويرك كتيرة و فلوسك قليلة و موش هتقدر على التوكيل طول الوقت .. و كام سنة كده و هتقلبها و هتغير لاحسن .. يعني من الاخر عايز عربية عملية و جديدة و تقضي الغرض و خلاص .. وموش فارقة معاك بقى اللمبة دي نورها ايه و الكمبيوتر ده بيعمل ايه .. يبقى عليك و على اللانوس ..
عربية كوري متجمعة في مصر و بقالها 13 سنة ماشية وسطنا .. خدت علينا و خدنا عليها ..
128 القرن الواحد و العشرين ..

لو عايز عربية علشان عيلتك كبيرة تبقى اللوجان ..
و لو عايز عربية عالية علشان انت ساكن في حتة مكسرة و مدشدشة تبقى اللوجان ..
و لو بتحب تجري تبقى اللانوس ..
و لو بتخبط في العربية كتير تبقى اللانوس ..

شوف انت عايز ايه و قرر انت مين فيهم اللي تستحق الجايزة الاولي ..
و انا الصراحة ..
و عن تجربة شخصية..
ما بين اللانوس و الافيو و اللوجان
اعطي المركز الاول للوجان ..
و عن جدارة ..
بس لكل واحد محتار بين اللانوس و اللوجان مقدرش اقول غير شوف انت مرتاح لمين و روح اركبه ..
و مش هتندم على اختيارك ايا كان ..
و يارب اكون افدتكم ..
و مستني اسمع رأيكم ..
و تقبلوا سلامي جميعا ..