معايا توكيل و عايز انقل رخصة العربية باسمي

[Ahmed AlGamal]

انا من سنة اشتريت عربية لانوس 99 و كانت الرخصة 3 سنين و فيها سنة خلصت في شهر 3 اللي فات يعني من شهرين و شوية و انا كنت مكسل صراحة و كمان الامتحانات و كده

انا ماشتريتش العربية من صاحبها انا اشتريتها من تاجر اشتراها و كان معاه توكيل من صاحب العربية يعني انا دلوقتي معايا التوكيل بتاع التاجر ( التوكيل من المالك اللي الرخصة باسمه للتاجر) و معايا توكيل بتاعي ( توكيل من التاجر ليا )

العربية مرور السلام و انا عايز انقل الرخصة مرور المنيا و انقلها باسمي

ايه هي الخطوات و الاجراءات القانونية

ارجوكم اللي عنده معلومة ما يبخلش بيها و لكم جزيل الشكر و الدعاء

[Hisham.Elgazzar]

المشاركة الأصلية كتبت بواسطة Ahmed AlGamal انا من سنة اشتريت عربية لانوس 99 و كانت الرخصة 3 سنين و فيها سنة خلصت في شهر 3 اللي فات يعني من شهرين و شوية و انا كنت مكسل صراحة و كمان الامتحانات و كده انا ماشتريتش العربية من صاحبها انا اشتريتها من تاجر اشتراها و كان معاه توكيل من صاحب العربية يعني انا دلوقتي معايا التوكيل بتاع التاجر ( التوكيل من المالك اللي الرخصة باسمه للتاجر) و معايا توكيل بتاعي ( توكيل من التاجر ليا ) العربية مرور السلام و انا عايز انقل الرخصة مرور المنيا و انقلها باسمي ايه هي الخطوات و الاجراءات القانونية ارجوكم اللي عنده معلومة ما يبخلش بيها و لكم جزيل الشكر و الدعاء

معلش قدر الله وماشاء فعل هتتعب شوية لأنك انتظرت لما الرخصة انتهت من 3 شهور والحل :


هتروح تطلع شهادة بيانات موجهة للشهر العقارى

تبيع العربية لنفسك بعقد مسجل فى الشهر العقارى

تروح ع المرور اللى انت تابع ليه تفحص هناك وتاخد ورقة الفحص ع المرور التابع له عربيتك تطابق البصمة ومتنساش تجيب من هناك شهادة مخالفات وبراءة الزمة

ترجع ع المرور بتاعك تكمل الفحص وتدفع الضرايب وبقية الحاجات وتقعد تنتظر الرخصة

[Hisham.Elgazzar]

حاول تطلع شهادة البيانات من اى مرور قريب ليك عشان تعرف تسجل لنفسك بدل ما تروح مرور السلام 3 مرات
مكانش لازم تنتظر أبدا لما الرخصة تخلص كدا كدا مدفوعه كانت 3 سنين مش هيروحوا عليك بس مع الأسف محدش بيتعلم ببلاش

[ramy safwt]

بص بقى عشان انا اتعاملت مع مرور السلام و طلع عينى قبل كده

1- هتعمل الخطوة بتاعة شهادة البيانات من المرور اللى جمبك و تروح تبيع العربية لنفسك

2- هتدخل على بوابة الحكومة الالكتروينة و تجيب مخالفات العربية كلها
http://www.egypt.gov.eg/Services/NTP.../PayFines.aspx

طبعا عربيتك مرور قاهرة فهتلاقى ليها الخدمة متوفرة هتطبع الصفحة بتاعة المخالفات و لو معاك فيزا ادفعها من على النت و اخلص

3- تطلع على مرور السلام بالعربية و متسمعش كلام اى سمسار او اى حد واقف بره يقولك ترخص اساعدك اركن هنا تروح تركن فى موقف الأنتظر بتاع الفحص الفنى و اوعى تتأخر على المهندس و اوعى تدى المهندس بتاع الفحص رشوة هو هيخلص على طول بالدور

4-خلصت الفحص بقى تروح مصور البطاقة و جايب ملف و ورق و تصور عقد البيع و تطلع على الدور التانى تلحق بتوع النيابة تجيب كشف امنى على البطاقة بتاعتك و يمضى و يختملك على صورة البطاقة

5- تنزل على الشباك اللى فى الوش من ناحية اليمين و تسلمه الورق و الرخصة القديمة و شهادة البيانات هو مهمته يطلعلك ارقام اللوح القديمة كلها و هيقولك اطلع بره فى الاستراحة عشان تستلم الرخصة ببيان اللوحات القديمة و المخالفات المهم هتنتظر تستلم البيان و لما تستلمه ترجع تانى للصالة على ايدك الشمال تلحق الظابط يمضيلك على الوصل و يختملك عليه

6- هتروح على كل مرور خارج منه لوحه قديمة تجيب المخالفات بتاعته و يكتبلك رقمك القديم و يصدق عليه فى الاخر خالص هيقولك ادفع فى الخزنة و نصيحة تدفع فى الخزنة بتاعة اى مرور تانى غير السلام ارحم طالما مرور تبع محافظة القاهرة تمام

7- ترجع على نيابة السلام تسلم الورق و هيبعتك على شباك تستلم الرخصة و شهادة براءة زمة


بعد ما تخلص ده كله ارجع بقى على بلدك و اعمل اجراءات الترخيص عادى تأمين و ضرائب و لوحات و ملف و فى الاخر هيسلموك رخصة مؤقتة 3 شهور على ما الملف يجى من السلام و غالبا هيجى بعد 6 شهور


انت هتتعذب فى مرور السلام ده بس بعد ما تخلص منه هتلاقى الموضوع بيمشى هوا ان شاء الله و صح لو مرور عندك قالك ارجع طابق بصمة على مرور السلام ارزع الفنى 10 ج ده غير المهندس ملكش دعوه بيه هيعملك المطابقة و نصيحة اشترى اورنيك مطابقة بصمة من السلام احطياتى

[aymangalal]

ماتنساش برضه شهادة بيانات موجهه لمرور المنيا " لانك بتنقل من مرور لمرور" مهمه جدا دى اوعى تنساها يعنى هتعمل شهادتين بيانات مع بعض من نفس الشباك " واحدة للشهر العقارى" و "واحدة لمرور المنيا"
وبالتوفيق ان شاء الله