موضوع كبير مع تيجو عامله 600 كيلو و تجربه مع مركز الكيلو 32

[amnpop]

السلام عليكم و رحمه الله و بركاته
الساده اعضاء المنتدي الكرام
اليوم هانقلكم تجربه واقعيه و مهمه جدا جدا مع شركه اسبرانزا ابو الفتوح
والدي اشتري تيجو يوم 2/1/2013 و كان سعرها 92250
و العربيه عمل بيها حوالي 640 كيلو
و من اول والدي ما استلم العربيه و هو بيشتكي من الدبرياج انه واطي قوي و المسافه قصيره جدا للبدال
و كمان عضه في الفتيس و الفرامل واطيه علي الارض بشكل كبير
انا قولتلو ان شاء الله عند صيانه الالف نقولهم علي كل المشاكل اللي بتواجهك و اكيد تتعمل
المهم يوم الاثنين الموافق 12/2/2013 يعني من يومين هو كان مسافر العمره (كتبها الله لنا و لكم ) وقالي هتوادينا بالتيجو علشان اخودها اركنها في الجراج اللي تحت بيتي و ارجع بكره اخد عربيتي
نزلت ركنت عربيتي و ركبت التيجو و دورت العربيه و بعد حوالي دقيقه ....(المفاجئه).....:red_f ace10:
بدال الدبرياج نازل علي الارض و لازم ارفعه برجلي و العربيه مش بتاخد اي غيار
بصراحه صدمه كبيره جدا جدا ليا و لوالدي كمان
انا حسيت انه زعل فحاولت اداري الموضوع و ابين انه بسيط و بكره ان شاء الله هاعمله علشان اخليه يسافر و هو مش متضايق
و الحمد لله روحت انا وصلتي بعربيتي و عربيه اخويا
بس بصراحه طول الطريق قاعد افكر ازاي يحصل حاجه زي كده و بستحلف للتوكيل اللي المفروض اني اول ما اصحي ان شاء الله اكلمه و مش عارف في الحاله دي المفروض ايه اللي يحصل
هل التوكيل هايبعت فني يصلح العربيه او يغير واير الدبرياج اللي غالبا اتقطع (اللي مطلعش واير و طلع ماستر)
و لا هايبعت ونش يرفع العربيه و ياخده مركز الصيانه يصلحها
و لا هايقولي اتصرف و اجيب العربيه لغايه عندهم
مع العلم ان العربيه لسه ما عملتش صيانه الالف كيلو
تم الاتصال ب19227 و بصراحه دخلت شمال بكل ادب طبعا علشان محدش يغلطني واخدت رقم مهندس الطوارئ و كلمته و قالي ان فني الانقاذ السريع هايكلمني ياخد العنوان والتفاصيل و فعلا كلمني الفني و قالي ان العربيه لازم تتنقل مركز الصيانه و اني ارفعها علي ونش و اوديها قلتله طبعا ده مش هايحصل انتم ملزمين ترفعو العربيه و تودوها مركز الصيانه و ترجعوها احسن من الاول و بصراحه كلمته بشكل عصبي جدا قالي كلم المهندس قلتله حاضر من عنيا قالي لا خلاص انا هاكلمه
كلمني المهندس تاني و اول كلمه قالها انه بيعتذر عن اسلوب الفني اللي عارف انه نرفزني و انه عارف كمان ان الفني مكسل يجيي المشوار
و خلاص الفني جاي في الطريق و قالي انت عارف ان العمال و الفنيين قلبهم مش علي الشغل يعني عايزين مرتبات و بس من غير حتي ما يشتغلو المهم الفني وصل و اسلوبه اتغير تماما و انا كنت ناوي علي شده جامده بس لاقيتو جايب ورا المهم قالي دي حاجه بسيطه (بعد ما قالي انها مشكله كبيره و لازم العربيه اجيبها علي ونش للتوكيل) و قعد شغال دوس سيب كارك ساعه
و فك حاجات كتير و كلم ناس كتير و توصل بعد المباحثات الي ان العيب في الماستر اللي خلف الدبرياج و ده كمان مأثر علي الفرامل لانهم وحده مرتبطه ببعض(الفرامل و الدبرياج) و انه هايجيبه بكره و يركبه ان شاء الله و في اثناء ما الفني شغال لاقيت اكتر من تليفون من مهندس خدمه العملاء و مهندس اعطال الطوارئ و بالمناسبه راجل في منتهي الاحترام و قالي ان بكره ان شاء الله القطعه تجيلك و كله يبقي تمام
مهندس الطوارئ كلمني الساعه 10 الصبح تاني يوم و قالي انه من الافضل نقل العربيه للتوكيل علشان يكون الشغل افضل و لو في عيب تاني يتعمل علي طول انا وافقت و اكدت اني مش هاتحمل ولا جنيه واحد مقابل اي حاجه و الراجل اكدلي ده طبعا قولتلو امتي قالي بالفعل الونش جايلك في الطريق خليت اخويا يقابلهم و ظبطت مع سواق الونش انه يستناني بعد الكارته علي طول و بالفعل اتقابلنا و مشيت وراه بعربيتي لحد باب التوكيل و دخلنا و استلمو العربيه و انا في الاستراحه لاقيت سواق الونش جاي يقولي عايز 250 جنيه ثمن الونش و 10 جنيه الكارته قولتلو روح للي بعتك و قولو العميل بيقولي مش هادفع و لا جنيه للونش و لا حتي ليك الراجل اتخض و راح ماشي و جالي مهندس علشان يشوف العربيه يستلمها روحت معاه للعربيه و سألني علي الضمان و انا كنت ناسيه قولتلو ان العربيه عامله 600 كيلو و اكيد في الضمان و لو عايزه اروح اجيبهولك و اجي قالي لا انا كنت عايزه علشان يوريني انه مكتوب فيه ان الونش يتحمله العميل قولتله ريح نفسك انا مش هادفع و لا جنيه ده كان اتفاقي و لو مكنتش متفق بردو مش هادفع و لا جنيه و استلم العربيه و هو زعلان في الاول لكن موقفه اتغير فيما بعد و قالي طيب حضرتك تدفع دلوفتي و تسترد الفلوس بعد كده قولتلو انسي
و انا بتكلم مع المهندس الزعلان اللي موقفه اتغير بعد كده لاقيتهم بينادو علي اسمي في الاستقبال و روحت لاقيت مهندس تاني مستنيني و قالي حضرتك فلوس الونش قبل ما يكمل قولتلو انسي قالي طيب 5 دقايق و اجي و فعلا 5 دقايق بقو 3 مهندسين و بصراحه شرشحتلهم بكل ادب و ذوق من غير غلط و قولتلهم انا مش عايز اصعد الموضوع انتو في كارثه و انا صابر عليكم لغايه دلوقتي قالولي الموضوع فعلا اتصعد و وصل الاداره و حضرتك مش هاتدفع حاجه و ان شاء الله هانكلمك بكره علشان تيجي تستلم العربيه و تكون تمام .....
و مشيت بس قبل ما امشي لاقيت اتنين منهم بيقولولي انت عندك حق في كل اللي قولتو و حقك تعمل اي حاجه و الموضوع فعلا كبر قوي قوي و الاداره كلها عرفت بي و انه عامل قلق كبير هناك و ان شاء الله العربيه ترجع احسن من الاول ماتقلقش اكدتلهم اني مش قلقان و اني اعرف اجيب حقي كويس جدا و ان شاء الله بكره نشوف ايه الجديد....
اتصلت بالمهندس اليوم الساعه 11 بطمئن قالي العربيه اتعملت تعالي بسرعه علشان عندي اوردر اجرب معاك العربيه 100 كيلو ....عربيتك دي هاتمشينا كلنا من الشغل
الحمد لله روحت انا و اخويا بعربيته و تم استلام العربيه و كل اللي كان فيها لاكور مش متقرط عليه كان بيسرب الهواء(ده كان كلام المهندس عمر ) و قالي ان العربيه خلصت من امبارح لكن هما قعدو يجربو فيها علشان ما يلقوش مشكله تاني تظهر لدرجه اني روحت لاقيت العربيه عامله حوالي 35 كم بس الحمد لله كله تمام و م.عمر طلع جرب معايا العربيه مسافه كبيره ما يقرب من 50 كيلو علي الصحراوي و اصر اني اجربها و اخويا كمان يجربها ..... وكمان العربيه اتغسلت غسله محترمه من بره و جوه
و المهندس عمر قالي معاك لصيانه ال1000 كيلو جرب كل حاجه براحتك
اللي عرفته ان الموضوع وصل لاعلي المستويات و كمان وصل للصين و كلمو المهندسين في الصين اللي كانو نايمين علشان فرق التوقيت و الحقيقه مهندس عمر قالي انه جالو تليفون من احد قيادات الشركه اللي لو كلم حد يبقي علشان يترفد (ده كلام المهندس عمر) اعتقد اسمه مهندس احمد العدل و تخطي 4 مديرين فوق المهندس عمر و اتصل بيه بشكل مباشر امبارح و النهارده الصبح كمان علشان يطمن و قالي كمان ان 3 ادارات في المصنع هايتجازو بسبب المشكله دي .....
لدرجه ان الفنيين كانو خايفين يشتغلو في العربيه و اشتغل عليها 2 مهندسين و 3 عمال
طبعا انا مش قصدي اذيه حد لكن كل واحد يشوف شغله بضمير ياخد حقه و بالتالي اللي مش بيشوف شغله يتجازه
شكر المهندسين اللي ساعدوني و كانو في صفي نظرا للحدث الكبير الموجود ......
و اخص بالذكر المهندس مجدي رئيس قسم صيانات الطوارئي :018A1D ~146: بصراحه شخص في غايه الاحترام
و المهندس عمر مسئول الصيانات بمركز الكيلو 32:c lapW15: ايضا شخص في غايه الاحترام
انا حبيت انقل التجربه كامله بالتفصيل الممل (و عارف ان في ناس هاتكسل تقرا الموضوع علشان في رغي كتير )بس كان قصدي ان كل واحد من الاعضاء يستفيد و كل طرف ياخد حقه سواء كان العميل او الشركه المصنعه و كمان علشان الاعضاء الكرام ياخدو خبره التجربه من اولها لأخرها و اللي ليه حق لا يتنازل عنه مهما حصل و تحت اي ظرف ....و شكرا لكم

[محمد فيصل]

الحمدلله تمت قضاء حاجتك على خير
اللهم يسر لنا جميعاً الحوائج وقنا شر الطريق واى مصاعب واعطال

[سامح منصور]

الحمد لله إنها اتظبطتت

اتصل و طمن الحاج بقي عشان ما يكونش شايل هم

وموقف بطولي منك بجد

هي دي المعاملة ولا بلاش

حمشنه حمشنه يعني

[Hosam Hegazy]

الحمدلله و مبروك أن العربية أتظبطت ، لو كل الناس اللي في مصر زيك كدة مش بيسيبوا حقهم كان زمان مصر بقت من أعظم الدول بس نقول إيه ؟ و عجبي

[amnpop]

المشاركة الأصلية كتبت بواسطة محمد فيصل الحمدلله تمت قضاء حاجتك على خير اللهم يسر لنا جميعاً الحوائج وقنا شر الطريق واى مصاعب واعطال

اللهم امين

المشاركة الأصلية كتبت بواسطة سامح منصور الحمد لله إنها اتظبطتت اتصل و طمن الحاج بقي عشان ما يكونش شايل هم وموقف بطولي منك بجد هي دي المعاملة ولا بلاش حمشنه حمشنه يعني

الحمد لله كلمته اول ما استلمت العربيه و قولتله ان كله تمام الحمد لله بس هو بصراحه في وادي تاني خالص (اللهم تقبل منه و ارزقنا العمره ان شاء الله)

المشاركة الأصلية كتبت بواسطة Hosam Hegazy الحمدلله و مبروك أن العربية أتظبطت ، لو كل الناس اللي في مصر زيك كدة مش بيسيبوا حقهم كان زمان مصر بقت من أعظم الدول بس نقول إيه ؟ و عجبي

و الله الموضوع بسيط جدا جدا بس عايز شويه صبر و هدوء اعصاب
من ضمن الكلام اللي اتقالي و انا بستلم العربيه من أحد المهندسين(يشكل ودي طبعا) ان العميل اللي بيجي يزعق و يعمل هوليله بيبقي كده جاب اخره لكن الساكت و الهادي بنبقي قلقانين منه ما نعرفش وراه ايه فا الموضوع كله يخلص بهدوء و اصرار عكس ما الناس فاهمه اني اروح اي توكيل ازعق و اعمل شوشره علشان ينفذولي طلباتي و الحمد لله ان الموضوع خلص علي خير.