أوبل أسترا 1996 - التكيف

[3bd0]

اخر التطورات

الميكانيكي قالك الكمبروسور اللي انتا جايبه ده وسخ جدا من جوة ومش هاينفع يشتغل كده
ودينا العربية عند واحد متخصص مكيفات وكنا اتعاملنا معاه قبل كده وهوا محترم جدا
انا مفهمتش اللي حصل بالظبط، بس اللي وصلني انو فك الكمبروسور ونضفه مرتين (وغير الزيت بتاعه!) وفك وحدة التكيف ونضفها برضو وطلب مننا نجيب حاجة زي العلبة كده (بتشتغل زي فلتر) وطبعا برضو لفينا عليها لما طلع عينا، بس الحمدلله جت
الحمدلله بعد التعب ده كلو، استلمت منو التكيف ولا الياباني ما شاء الله، حاجة كده تخليك تحس ان تعبك وفلوسك جابو نتيجة

والف شكر ليكم جميعا للمساعدة او حتى المرور

[احمد على 1999]

مين بقى بتاع التكييف ده ؟
يا ريت حضرتك تقولنا عليه

[3bd0]

انا لو اعرف اني ممكن افيد الناس، كنت قولت عليه من الاول والله من غير ما تقول يا استاذ احمد
بس بتاع التكيف ده هنا مش في مصر، وبصراحة انا متعملتش معاه مباشرة،
هوا في واحد من صحابي عرفو بالصدفة وكانت عندو مشكلة كبيرة في المكيف بتاعه، الراجل كان ممكن يعمل عليه حوار وينضف ومش عارف ايه عشان يشغل المكيف، لكن الاخ ده راح مغيرلو حتة خرطوم وربط مسمار مش عارف فين كده على السريع والمكيف رجع زي الفل، فحسينا بصراحة انو راجل فاهم شغله وفي نفس الوقت محترم ومش هاينصب
فلما حصلت المشكلة عندي اتصلت بزميلي وهوا خد العربية مني وراح اتعامل مع الشخص ده ورجعهالي مية فل وعشرة

وعلى العموم لو اي حد حواليا هنا محتاج اني ادلو عليه، يقولي بس وانا هاجيبلك قراره

[3bd0]

اخر التطورات



العربية كملت صيف 2012 بسلام ودخلنا في الشتا وعلى طول البطارية بدأت تكح معانا
كنت في الاول بضطر اديها شحنة كل يوم الصبح، مجرد ما الدينمو يشتغل بيقوم شاحن
البطارية وتبقى تمام بقيت اليوم

بعد كده البطارية ماتت خالص وبقا مستحيل تشغل العربية من غير وصلة كهربا من عربية تانية
اشترينا بطارية جديدة والحال اتعدل كام اسبوع الحمدلله

بعد كده اجي ادور العربية الصبح الاقي البطارية مبتنطقش خالص، اديها وصلة كهربا الدينامو يشحنها وتبقى زي الفل، زي اللي كان بيحصل مع البطارية القديمة بالظبط.
طبعا روحت لكذا كهربائي عشان اتاكد ان مفيش تسريب كهربا من العربية والدينامو شغال كويس، وكلهم اجمعوا ان المشكلة في البطارية (الجديدة!)
دوخت لغاية ما لاقيت التوكيل بتاع البطارية، وبعد مناقاشات وخناقات قدرت اخد منهم بطارية تانية على الضمان.

بعديها بحوالي 3 او 4 اسابيع (اخر الشتا) جيت بحاول اشغل المكيف، كان ناقص يطلعلي رسالة مكتوب فيها (... في العشة ولا طارت!)
ساعتها انا كنت كرهتها خلاص وقررت ان العربية دي مغضوب عليها وانها ملهاش حل الا انها تتركن لغاية ما انزل مصر في اجازة الصيف واجيبلها قطع غيار من هناك

بعد حوالي شهر احتاجتها في مشوار ضروري، قضيت المشوار وتاني يوم بدور على المفتاح ملاقيتهوش
قلبت عليه البلد كلها، كان مفتاح وحيد ومكنتش عملت عليه نسخ، مسيبتش شبر مدورتش فيه
طبعا ملاقيتهوش واضطريت ادفع فلوس عشان اجيب واحد يفتحها ويعملي مفتاح جديد
المفتاح الجديد اتعمل على القفل بتاع باب السواق، ولسبب او لاخر ( مش بقولوكم مغضوب عليها) المفتاح طلع مبيشغلش العربية

الموضوع ده ادى الى فك الكونتاكت وتظبيطه عشان يشتغل بأي حديدة تدخل فيه مهما كان شكلها
الكهربائي اللي فك الكونتاكت وركبه قالك العربية عاوزة دينامو
فكلي الدينامو وخدتو معايا وانا نازل مصر عشا اجيب زيو

حصلت لخبطة كده قبل السفر والعربية اتسابت في مكان غير امن شوية، لمدة 3 شهور بتوع الصيف

اشتريتلها دينامو مستعمل من مصر من واحد ثقة، وراجع للعربية قلقان، اول ما لقيتها سليمة فرحت اوي، فتحت الكبوت ملقتش البطارية الجديدة
عادي عادي، انا خدت على كده خلاص

اتصرفنا في بطارية مستعملة وركبنا الدينامو، وبقت بتمشي الحمدلله


من كام يوم كده لقيتلها بيعة حلوة جدا، بخلص ورقها في الوقت الحالي، ادعولنا انها تتم على خير

[احمد على 1999]

ههههههههههههههههههههه
يا رب خير ان شاء الله