أوبل أسترا 1996 - التكيف

[3bd0]

السلام عليكم ورحمة الله وبركاته

المشكلة ببساطة شديدة ان بشغل التكيف في يوم من الايام لقيته دفاية مش تكييف
المروحة شغالة زي الفل بس مفيش تبريد خالص، الهوا اللي بياخده بيطلعه زي ما هوا
ودينا العربية عند واحد بتاع تكيف عربيات قالك الغاز مفهوش مشكلة، ممكن يكون الكمبروسور

لما سألنا عن الكمبروسور جديد مالقيتش، لقيت واحد مستعمل وماعجبنيش السعر
فضربت فمخي فكرة، ليه ماجبش كمبروسور بتاع تكييف عربية ياباني واركبو، انا كنت سمعت زمان ان في واحد عمل حركة زي كده على مرسيدس c200 ونفعت
حاولت ادور على النت عشان اعرف ايه اللي ممكن يركب على الاسترا، معرفتش اوصل لحاجة
بس لاحظت ان الكمبروسور في الاسترا والكورولا متشابه جدا، بس طبعا معرفش المقاسات، ده غير انهم ممكن يكون كلهم نفس الشكل والاختلاف من جوة

ياريت اي حد عندو ولو نص معلومة ميبخلش عليا، انتو عارفين الحر بيعمل ايه مش محتاج اقولكم
اسئلتي كالتالي:
- هل المشكلة فعلا في الكمبروسور؟
- ايه الموديل الياباني اللي ممكن يركب عندي؟
- هل الفكرة كلها كويسة، ولا اجيب القطعة بتاعة العربية نفسها احسن؟


معلومات العربية:
أوبل استرا - 1996 - اربعة سلندر 1.4 - مانيوال - هاتش باك - ماشية فوق ال 200 الف بكتير
لونها احمر


وألف شكر مقدما

[3bd0]

اخر التطورات

بعد اللف كعب داير وسؤال الصنايعية
الكمبروسور الوحيد اللي ممكن يركب عليها هوا بتاع حاجة اسمها دايو "ريسر" لأن الماتورين زي بعض بالظبط
امبارح كنت بلف على المستعمل والحمدلله ولا واحد كان سليم،
وبالنسبة للجديد برضو الحمدلله لا التوكيل ولا محلات قطع الغيار فيها، عندي النهاردة 3 محلات عاوز اروح اسأل فيهم وان شاء الله في امل الاقي فيهم
واحد منهم اشترى كل قطع غيار الدايو قبل ما يقفل، والتانيين متخصصين في قطع غيار مكيفات العربيات
لو لاقدر الله ملقيتش، يبقى ان شاء الله العربية هاتتركن لحد الشتا

[moca_moca]

ربنا يعينك ويوفقك .... دايما بلغنا بالتفاصيل

[حسام البورسعيدى]

خليك فى الكمبريسور بتاعها افضل .. ده لو اصلا العيب منه ..

وعلى فكره لو مش موجود كده ممكن يتعمله طقم اصلاح ويشتغل ..

انت شكله مش محتاج تغير الكمبريسور قد ما انت محتاج تغير الورشه اللى انت رحتلها .. شوف حد بيفهم ومعروف ومتخصص تكييف واعرض العربية عليه تانى وشوف هيقولك ايه .......

[3bd0]

رحت والله لكذا واحد وكلهم بيحطو الجهاز اللي بيقيسو بيه ده وعلى طول يروحو قايلين الكمبروسور لازم يتغير

انا على العموم لاقيت واحد مستعمل في اخر محل خالص بعد ما كنت فقدت الامل، وطبعا عشان صاحبه عارف انو مفيش غيره، اضطريت اخدو بالغالي
ربنا يسهل، بكرة العربية تجهز ونشوف اضحك علينا ولا كلو في السليم