يوميات سيترونتى........ الـ AX

[mazda323]

أولاً ألف مبروك على تجديد سيارتك والله يديك خيرها ويكفيك شر طريقها وفعلاً اتغيرت خالص بس ليا ملاحظة لو تتقبلها بصدر رحب مكنش فى داعى للزق أى شيء على صاج السيارة اللى على الكبوت اللى هى علامة الستروين واللى على الأبواب وكل لزقة على صاج العربية لإن البوية لسه جديدة فحرام تحط لزق عليها لإن ممكن أى عيل بيلعب يشدها يخرب شكل اللزقة أولاً وتسيب علامة على الصاج ثانياً فتضطر إلى تنضيفها وبالتالى ممكن لاقدر الله البوية تتأثر وأرجو عدم الزعل لإن والله شكلها اتغير بعد التجديد والله يباركلك فيها وتقبل مرورى تامر عاشق المازدا

[aymangalal]

المشاركة الأصلية كتبت بواسطة mazda323 أولاً ألف مبروك على تجديد سيارتك والله يديك خيرها ويكفيك شر طريقها وفعلاً اتغيرت خالص بس ليا ملاحظة لو تتقبلها بصدر رحب مكنش فى داعى للزق أى شيء على صاج السيارة اللى على الكبوت اللى هى علامة الستروين واللى على الأبواب وكل لزقة على صاج العربية لإن البوية لسه جديدة فحرام تحط لزق عليها لإن ممكن أى عيل بيلعب يشدها يخرب شكل اللزقة أولاً وتسيب علامة على الصاج ثانياً فتضطر إلى تنضيفها وبالتالى ممكن لاقدر الله البوية تتأثر وأرجو عدم الزعل لإن والله شكلها اتغير بعد التجديد والله يباركلك فيها وتقبل مرورى تامر عاشق المازدا

اهلا بيك يا تمورة يا عاشق المازدا
اتشرفت جدا بمرورك ومشاركتك
طبعا رأيك جدير بكل الاحترام والتقدير لانه للصالح قبل مايكون للذوق يعنى فكر عملى 100%
والحمد لله انا ما اغفلتش الجانب ده اثناء اتخاذى القرارت فى كل خطوه واحب اطمنك انى دايما بغطى العربية تجنبا لاى تجريح ممكن يحصل وثانيا ولله الحمد دايما برضه عينى ع العربية وماباسيبش فيها اى هفوه ممكن تؤدى الى ضرر ولو تلاحظ حضرتك ان الاستيكر لونه اسود والعربية زيتى يعنى الاستيكر مش باين قوى وملحوظ الا لو حد دقق وبص كويس زى حضرتك وبصراحة دى كانت رغبة منى فى الاعلان عن هوية العربية لان قبل التجديد ماكانش فيها سم واحد يدل على سيتروينيتها عشان كده حرصت على اضفاء الطابع الستروينى بالاسم والعلامة على العربية وخصوصا العلامات النيكل ع الشنطة والكبوت
زانا عارف ان الحجات دى ليها فترة وتروح زهوتها وان شاء الله لم احب اشيها هاخد بالى جدا وهافتكر كلام حضرتك عشان البوية ما تتبهدلش
والف الف شكر على مشاركتك ودعوتك لى بالخير

[aymangalal]

يوم جديد فى يوميات سيتروينتى
وانا ماشى على الدائرى والدنيا زحمة الرادياتير عملها عليا احم احم (قصدى عملها معايا)هههههه
اللحام اللى فيه فك والمية كلها نزلت ع الارض وطبعا ركنت فورا
استدعيت احد المعارف قطرنى لغاية ميكانيكى (انا عارف انه مش تخصصه) بس برضه من معارفنا فكيت له الرادياتير وعمل اللحام المطلوب بـ R&D وبقى تمام وركبته تانى لقيت التيرموستات طار (باظ ولدع) من الحرارة طبعا فكيت تانى وركبت واحد جديد وما اشتغلش كان بايظ (التيرموستاتات حظوووووظ لان كتير بيطلع بايظ) امهم على ما خلصت لقيت ايدى اتبهدلت ايشى تعاوير وايشى لسعات من سخونة الفرن
وصلت المروحة direct لغاية ما اغير التيرموستات التانى اللى طلع بايظ
المهم تانى يوم روحت بتاع الرادياتير عشان يركب لى التيرموستات اللى جبته من عند واحد بتاع قطع غيار قالى هوه عليه ومهم جدا يا جماعة ان التيرموستات لما نشترية اولا يكون من حد نثق فيه عشان يبقى شغال وفى نفس الوقت نتفق معاه لو مش شغال نرجعه وناخد بداله
لان فى ناس مابيرضوش يرجعوا الحاجه وبيقولك وانت بتشترى (خده على ضمانتك) وطبعا المقابل انه بيكون بسعر اقل يعنى مثلا لو هايرضى يرجعهولك يبقى سعرة 17 او 18 جنية وهوه بتاع فيات سواء واطى 68/82 او عالى 80/90 والارقام دى اللى بتشتغل وتفصل المروحة خلالهم
الرقم الكبير بتاع بدء المروحة فى الدوران والرقم الصغير توقف المروحة بعد التبريد المطلوب
توماتيكى توماتيكى .....ههههههه
المهم بتاع الرادياتير جنب بتاع قطع الغيار اشتريت وخليته يركبه
لاحظت انه ركب من غير ما يطلع الرادياتير من مكانه (على الرغم من ضيق الحوض) لكن اللى ساعدة على كده ان الدنيا كانت بالنهار وكل شىء واضح اما انا فا كنت شغال بالليل وطبعا اتخربشت لما شبعت
غيرنا التيرموستات وكان معايا ازازة ميه خضراء اللى هى صغير لتر تقريبا (كنت جايبها من ساعة التجديد ولما فكيت الرادياتير اول مره عند السمكرى)قولت اكيد هحتاجها لما املاه تانى وسيبتها لغاية ما جه وقتها حط 3/4 الازازة والباقى قالى زود احطه بعد اسبوع كده يعنى دورة غسيل سريع ..... كله تمام والمروحة اشتغلت وفصلت اى نعم مش عند الارقام اللى مكتوبة ع التيرموستات 68/82 بس برضه اشتغلت فى الرينج ده
ورزعته الـ 3 شلن 15جنية من نفسى هوه ماطلبش
مشيت وبعدها بشوية الحرارة وصلت 80 والمروحة مش عايزة تشتغل طب اعمل ايه وقفت ونزلت فتحت الكبوت وابص من هنا لهنا مافيش فايدة الحرارة عالية وداخله ع الـ 90 وبرضه المروحة واقفة فكيت الفيش ولمست سلوك المروحة ببعض اشتغلت يعنى المروحة سليمة قولت فى نفسى ايه حكاية التيرموستات؟؟؟؟ يمكن يكون طلع بايظ برضه؟؟؟ بس ده لسه كان شغال من دقيقتين بالظبط...!!!!!!! حاجه تحير
وصلت سلوك المروحة تانى(الطرفين الارضى والكهرباء) اول ما بلّمس السلك باسمع صوت تكة فضلت وراها غاية ما لقيت الفيشة اللى خارجه من المروحة وداخله على الكتاوات (مفحّمة) وناشفى والسلك كان داخل فى الكليبس على شعرة (يمكن يكون من اثر الميه اللى طلعت من الرادياتير اول مره لما اللحام طق) لانى لاحظت بخار الميه الساخن جدا جدا جدا طالع من تحت الكبوت من الناحية اللى فيها الكتاوت دى
المهم كان معايا كليبس احتياطى شيلت المتفحم القديم ووصلت السليم ووووو هوبه
المروحة اشتغلت هييه هييييه هييييه
الحمد لله المشكلة كانت فى الكليبس
(المروحة تمام الرادياتير تمام التيرموستات تمام) دورة التبريد الحمد لله تمام التمام
واركب وامشى يا معلم

[sawy22]

المشاركة الأصلية كتبت بواسطة aymangalal شكرا على المشاركة يا صاوى باشا بالنسبة لقربة الميه حضرتك تقصد اى قربه؟؟ وهل عربتك AX برضه ؟؟؟؟ على حد علمى مافيش قربة ميه فى الحوض غير قربة ميه المساحة ؟؟؟؟ هى دى اللى تقصدها؟؟؟ لان الرادياتير مالوش قربه!!!! الا لو حضرتك بقى تقصد موديل تانى فى ستروين انا كل تجربتى فى الـ AX فقط الف شكر يا حماده بيه على طيب كلامك وامنياتك الغاليه بس احب اطمنك انى دفعت الضريبة بدرى بدرى هههههههههه وحياتك اول ما خلصت الاساسيات ولسه وماخلصتش الفينيشش (يعنى لسه ماقفلتش 100 100) وبعد ماركبت المراية الجانبية الجديدة (واقف عند بتاع الابواب وراكن العربية قدامى جنب الرصيف المقابل خلصت كلام مع بتاع الابواب ) رجعت اركب لقيت المرايه الجديدة هه الجديدة ملووحه والسوسته اللى جواها ضئرة لا بتصد ولا بترد والله اعلم الظاهر ان واحد ابن حلال خبطها وهوه ماشى وعشان المرايه ما اتكسرتش وماوقعتش على الارض قال سليمة ومشى لكن طبعا اضطريت اشيلها واركب القديمة تانى ههههههههههههه القديمة تحلى بقى والف شكر لمشاركتك

ايوا يا باشا هيا السترويني حبيبتي ال AX بس ادعيلي تخلص علي خير لاني لسه جايبها من اسبوع وموضوعك حبيبني في العربيه اكتر وعلي انا نفس الظروف تقريبا اللي خلتني افكر فيها والله يا جماعه الموديل دا مش واحد حقه و قطع الغيار موجوده بس طبعا بما ان العربيه مش كتير في البلد التجار الشريفه جدا بتاعتنا بتظبطنا في الاسعار لانك مش عارف السعر الحقيقي كام اصلا يعني يا شباب لو روحت مثلا تجيب باغه فانوس بتاع 128 والتاجر قالك 100 جنيه هتعمل في ايه لاكن لو قالها في السترويين ااقل حاجه هيقولك اصله مش موجود اخرك هتفاصل شويه وفي الاخر هترضي بالامر الواقع

[aymangalal]

اهلا بيك يا بوب فى عالم الـ ax
العربة دى فعلا زى ماحضرتك قولت مش واخده حقها لان الناس دايما بتفكر فى ارخص واوفر قطع غيار بغض النظر عن تكرار مرات الصيانه والتغيير
بالنسبة للاسعار فهى طبعا بتتفاوت من تاجر للتانى لكن برضه فى نفس الرينج
لان اللى بيشترى فى الاول بيفضل كام مره يتعلم ومره من هنا ومره من هنا لغاية ما يثبت نفسه فى قطع معينة من عند تجار معينه
وربنا يقدر على خدمة العربية دى بجد لانها محتاجه اللى ياخد باله منها ويديها حقها
والنتيجه بقى اتفرج على رد الجميل من العربية دى هاتشيلك من الارض شيل ومش هاتكسفك ابدا
بالتوفيق وتحت امرك دايما