سيتروين AX كلوب

[aymangalal]

المشاركة الأصلية كتبت بواسطة sherif sadeek السلام عليكم اشكرك على هذا الكلوب ولى استفسار املك عربيه سيتروين ليس لها قربه ماءوهى مكونه ولما ادورها كل فتره اكشف على الميه للراديتير لا اجد فازيد الميه مع فتح البلف وهى تغيب فى الدواره وليس لها عداد حراره لمبه فقط فيترى ايه سبب النقص الهيب فى المياه ولكم جزيل الشكر.

اهلا بيك يا شيرى ونورت الكلوب
السيتروين ax مالهاش قربة مياه للرادياتير وبتزود من الغطاء اللى موجود فى القربة اللى لازقة فى الرادياتير (حتة واحدة)
البلف اللى حضرتك اشارت اليه ده عشان تسحب هواء من دورة التبريد وزى ماحضرتك قولت كده تزود الميه والبلف مفتوح لغاية ما الميه تخرج منه بدون فقاقيع ده معناه ان الدورة اتفرغت من الهواء تماما
طبعا مع ركنة العربية هاتحتاج تكارك كام مره قبل الدوارة عشان تضخ شوية بنزين للكربراتير يساعد على الاشتعال وغياب الدوارة اسبابه كتير شوف البوجيهات واسلاكها او البطارية وعامة الصبح بدرى او بعد الركن لفترة طويلة لازم تغيب لغاية ماتجمع دورة البنزين زى ماقولتلك
موضوع ان الميه بتنقص او بتخلص ده مالوش غير تفسير واحد ( الرادياتير) فيه خرم او الخراطيم فيها تسريب
املأ الرادياتير تمام ودور العربية وخليك باصص تحت العربية عشان تعرف مكان التسريب فين بالتحديد سوء من الراداتير نفسه او الوصلات وبرضه شيك على احكام الغطاء لانه ممكن يكون سبب فى نقص الميه لو مش محكم
الغريب جدا فى كلامك ازاى العربية مافيهاش عداد حرارة !!!؟؟؟؟؟؟؟؟

لو امكن تصور لى صورة العدادات فى عربيتك
وتحت امرك فى اى استفسار

[sherif sadeek]

السلام عليكم
اشكر لك ردك واحب ان اؤكد ان العربيه لايوجد بها عداد للحراره ولكن لمبه تعمل فقط عند علو الحراره لونها احمر وبلنسبه للميه هل ممكن يكون سبب نقص المياه وش السلندر وشكرا.

[thesniperman]

انا عايز ابقي معاكوووووووووووو في الكلوب

[aymangalal]

المشاركة الأصلية كتبت بواسطة sherif sadeek السلام عليكم اشكر لك ردك واحب ان اؤكد ان العربيه لايوجد بها عداد للحراره ولكن لمبه تعمل فقط عند علو الحراره لونها احمر وبلنسبه للميه هل ممكن يكون سبب نقص المياه وش السلندر وشكرا.

تحت امرك يا بوب بس يا ريت ترفع صورة لشكل لوحة العدادات عندك عشان اول مرة اسمع ن Ax مافيهاش مؤشر حرارة وما اعتقدش ان وش السلندر له علاقة بنقص المياه نهائى لان نقص الميه فى دورة التبريد فقط (خراطيم-رادياتير-غطاء الراديتير)

المشاركة الأصلية كتبت بواسطة thesniperman انا عايز ابقي معاكوووووووووووو في الكلوب

ده انت تاخد المفتاح يا باشا واحنا نبقى ضيوف عندك
اهلا وسهلا بيك وتحت امرك دايما يا عم سنايبر

[m.bolbol]

يسعدنى الإنضمام إلى هذا الكلوب الرائع...........
وموضوع الرداتير عجبنى جدا......عشان عندى مشكلة كبيييييييرة فيه لدرجة إنه كل يوم بل كل مشوار لازم أزود على الأقل لتر مياه وطبعا فى تسريب واضح تحتة كل مرة باشوفة......الميكانيكى بيقولى ده الفايز والمياه بتتبخر وانا هاقللك الترمستات عشان العربية ما تسخنش أوى والمياه ما تنقصش وانا مش مقتنع بكلامة............
أنا عايز أعمل اللى إنت كتبتة كله بس طبعا محتاج بتاع رداتير متخصص وشاطر يقوم بالموضوع فى أى مكان........انا عندى الترمستات الأصلية من 92-90
......
محتاج كمان عفشجكى ستروين كويس وحنين....برضه أنا بتعذب عشان أدور العربية كل يوم الصبح بالأخص لو باردة .......وعايز أصلح عداد السرعة ....يعنى من الأخر عاوز كونسلتو للعربية يكونو محترمين وعندهم أمانة والمهم ألاقى نتايج................عشان بصراحة قربت أعرضها للبيع بالذات قبل الصيف.....وشكرا