اخيرا,,,,,,,,,,,, هل ده الحل لتقسيط اسلامي شرعييييي ؟؟؟؟؟؟؟؟؟؟؟؟

[ahmed mustafa]

الموضوع ده شغل ناس كتير و أنا منهم , إزاي الاقي تقسيط شرعي من غير أي شبهة حرام و ما أنساش أحد الإخوة الأفاضل اللي قال إنه جاب سيارة تبع بنك و كانت بتتخبط و هيه واقفه لحد ما استلف و كمل قسطها مع البنك و باعها بعد حتى ما دفع تمنها و أصبحت ملكه , افتكرت ساعتها الصحابي اللي نهاه الحبيب صلى الله عليه و سلم عن لبس الخاتم الذهب و ألقاه من يده و لما ذهب النبي صلى الله عليه و سلم قال له الناس خذه و انتفع بثمنه فقال فقال :- ما كنت لآخذه و قد طرحه رسول الله صلى الله عليه و سلم فلربنا يباركله و لكل من يتحرى الحلال , مش موضوعنا لكن تعالوا نشوف الموضوع ليه حرام مع البنك (أي بنك حتى لو مسمي نفسه بنك إسلامي):-
1- عشان البنك يبيع مالا يملك
2- عدم إنتقال السيارة لحيازة البنك.
3- إشتراط بعض البنوك ( كونتاكت كار بالذات بتعمل كده برضه) عمل توكيل من سيادتك لهم بالبيع و ده يجعل البيع مشروط بشرط باطل يفسد البيع.
4- التأمين التجاري الإجباري.
5- زيادة أقساط عند تأخير قسط فيصبح الأمر بيعتين في بيعة وهذا منهي عنه كما هو معروف.
إذن عندنا خمسة مشاكل أظن هي لب الموضوع و بتلاقي المسألة تتفاوت فتجد المشاكل كلها أو بعضها من بنك لآخر و من مكان لآخر . إيه الحل قبل ما حد يمل مني بدون ما اطول عليكم وأنا بقالي مدة ببحث و بسأل مشايخ أثق في دينهم من العلماء و طلبة العلم الرباني بقول إن ممكن حضر تك باختصار تتعامل مع بنكين اتنين هما البركة و أبو ظبي الإسلامي أولا انت بتدفع الفلوس ليهم من أول التعامل لآخره و بتروح تجيب عرض أسعار و تديه لهم و تجيب وصل النور و المية و البطاقة و مفردات المرتب و برنت التأمين بعد استعلام اسبوع تقريبا يردوا عليك و يدوك جواب للمعرض تستلم بيه العربية ,طب كده حلال و لا إيه تعالوا نشوف؛-
أولا:- البنك بيمتلك العربية و يبيعها لك على مسئوليته و الموضوع زي ما تروح تشتري حاجة من محل و يقولك مش موجودة اجيبهالك بكرة مثلا- و ده مظنش حد من أهل العلم حرمه - فالبنك اصبح معروف بتعامله في السيارات و بيجيبهالك من مكان وهي مش عنده وأتمنى أكون على صواب في النقطة دي .
2- عدم إنتقال السيارة لحيازة البنك و دي الإثم فيها زي ما الشيخ قاللي( و هو من طلبة الشيخ مصطفى العدوي) على البنك مش العميل.
3- البنك مبيطلبش توكيل بالبيع منك.
4- التأمين ممكن تعمله تكافلي و ده حلال و يبقى خلصنا من النقطة دي.
5- البنك مبيزودش إقساط و النقطة دي لازم تتأكد منها من البنك بنفسك أنا مش ضامن إذا كان البنك هليتزم بكده و لا لأه و لو حصل و التزم يبقى البيع جائز إن شاء الله.
و في الآخر أنا بحاول أدور على الحلال برضه لو حد شايف إني أخطأت يرد فورا والرد حق مشروع و الهدف هو النفع للجميع و اللي خلاني أكتب في الموضوع ده إني وجدت كتير كتبوا لكن تقريبا مفيش حل مطروح يحل المشكلة.
أخيرا الفايدة سنويا 7%.أو 7.5% لو دفعت نص التمن مقدم و على 5 سنين لأن أكيد الناس هتقول ما تقسط مباشر مع معرض و تخلص لكن طبعا المعرض بيأمن و ممكن ما يرضاش بالتأمين التكافلي و تاني حاجة الفايدة عالية و المدة قصيرة و القسط كبير. أخيرا أنا إن أريد إلا الخير و الله الموفق و صدري يتسع لكل الآراء خاصة من جهابذة المنتدى و أساتذته الذين أشرف بهم جميعاRO SE4U

[اميركول]

اخي العزيز الي انت بتقوله ده ونظام احسن في بنك ناصر الي انا جبت منه وبيديلك 6% ومفيش تامين روح واسأل وانت هتلاقي كلامي صح

[ahmed mustafa]

المشاركة الأصلية كتبت بواسطة اميركول اخي العزيز الي انت بتقوله ده ونظام احسن في بنك ناصر الي انا جبت منه وبيديلك 6% ومفيش تامين روح واسأل وانت هتلاقي كلامي صح

جزاك الله خيرا طب باقي الأمور ياريت توضحها لنا و تدينا تجربتك و ايه أخبار القسط و فيه ضامن ولا لأ و ايه الشروط

[ahmed mustafa]

أقصد هل بيزود القسط عند التأخير و لا لأه

[tifa_1979]

انا لا احلال المبالغ اى بيتزيد على قسط عند التاخير بس
لان فى بعض الحالات فى تعاملاتنا العادية بيتم دفع غرامة عند عدم السداد فى الميعاد
مثل رسوم الجمركية ( السماح الموقت) ( ضريبة المبيعات ) فيوجد غرامة
هل هذه الغرامة يمكن اعتبارها ربا والله اعلم