تجديد بيجو 505

[mercedes]

السلام عليكم و رحمة الله و بركاته

انا كان عندى سؤال و أرجو أن يتسع صدركم لى :

أنا اللى كنت قولتلكم قبل كده أن العربية البيجو ال 505 مو 1980 بتاعتنا , الزيت بينقص من الموتور بمقدار نص لتر لكل غيار/ كل 1000 كم يعنى .

المشكلة أن أنا لاحظت فى خلال السنة الأخيرة دى أن العربية بتسخن و على فكرة الموضوع ده جديد عليها تماما لأن أنا متعود أن العربية دى لو ماشى فى ميدان التحرير فى شهر أغسطس الساعة 2 الظهر و المرور واقف, مستحيل تسخن, يعنى المؤشر بيكون على الأزرق , آه و الله العظيم, ماهى عربيتنا من حوالى 30 سنة بقه و أنا عارفها, لحد ما لقيتها فى الفترة الأخيرة اللى هى الصيف ده و اللى فات بدأت تسخن, نظفت الرادياتير و اتأكدت أن الميه مابتنقص و أن الرادياتير مش مخروم و أن طلمبة الميه شغالة و بتقلب كويس و كله تمام وكمان غيرت المروحة و جبت واحدة أكبر و بعد كل ده بتسخن برضه.

لدرجة أن أنا كنت هسمع كلام بتاع الرادياتيرات و أغير الرايدياتير بواحد أطول شويه .

بس و أنا واقف مرة مع واحد بتاع دوكو اللى أنا بتعامل معاه و قولتله أن العربية بتاكل زيت و ان العربية بتسخن, يعنى المؤشر بتاع الحرارة ممكن يوصل لنص المسافة بين الأزرق و الأحمر رغم أن العادى أنه طول عمره بيكون على الأزرق و عمره ما يعلى عن كده الا ادا كان فى عيب فى دورة التبريد, قام بتاع الدوكو قاللى حاجة أنا مش عارف ادا كانت صح ولا لأ, هى أن أدام المكنة خفيفة و بتاكل زيت, فالعادى أنها تسخن و تمسك حرارة, فأنا عاوز أعرف, ده صحيح؟؟؟ , عشان لو كان صحيح , أروح للميكانيكى عشان يحل المكنة و يشوف هى بتاكل زيت ليه, على أساس أن يمكن لما أعالج موضوع الزيت اللى بينقص ده, تقوم مشكلة الحرارة تتحل و خصوصا أن أنا عندى احساس داخلى أن موضوع المكنة ده لو اتصلح, السخونية دى هتروح, يمكن يكون الكلام ده مجرد احساس و ممكن يكون بجد, بس ده اللى أنا حاسس بيه لأنها عربيتنا و أنا عارفها كويس و العربية هى نفس العربية و الرادياتير هو نفسه, بس موضوع السخونيه دى اللى جديد.

أنا بصراحة المشكلة عندى مش فى الزيت اللى بينقص لأن مش مشكله عندى أن أنا أزودها نص و لا حتى كيلو زيت كل غيار 1000 كم , بس المشكلة اللى بتتعبنى بالدات لو مسافر مشوار طويل و بالدات فى الصيف يعنى, هى الحرارة.

فأرجو من الأخوة الأفاضل اللى فى المنتدى هنا أنهم يشاركونى الرأى و يدلونى على الخير ان شاء الله

شكرا و جزاكم الله كل خير

MERCEDES S430

[mahmoudnada80]

بص يا استاذ مرسيدس
ممكن تكون العربيه مش مظبوطه يعني السحب كويس ولا لآ
وممكن حاجه تانيه
في طبه مياه خلف طلمبه المياه ممكن تكون مكسوره ودي ممكن تقلل من ضغط الطلمبه
اتاكد من السحب والطلمبه واكيد المشكله هتتحل

[HaMaDa-ToUBaR]

لو العربية بتال زيت كدة وديها للميكانيكى بتاعك
وبعدين فى حاجة كل صيف الحرارة بتختلف عن الى قبلة
الراديتير بتاع ال 505 الاصلى بيبقى صف واحد انا كنت غيرت بتاعى بواحد 3 صفوف
بس لو المكنة مش مضبوطة مش هيفرق فى موضوع الحرارة والافضل انك تروح للميكانيكى طالما انك متأكد ان دورة التبريد عندك سليمة

[mercedes]

السلام عليكم و رحمة الله و بركاته

بالنسبة لسحب العربية, أنا شايف أنه كويس, يعنى أنا بنقل من التانى للتالت على 60 و من التالت للرابع على 90 و العربية كسرعة قصوى ممكن تجيب معايا 140, خلى بالكوا العربية دى معانا من 1980 و اتعملها عمرة كاملة فى 1994 , غير كده مفيش حاجة اتعملت تانى الا يمكن غيرت جوان وش السلندر فى 2005 لما العربية جابت جوان وش سلندر لما سخنت لأن الرادياتير كان مخروم و أنا ما أخدتش بالى ptmnlo123per144

أنا مفيش مشكلة أنى أغير الرادياتير لو ده هيحل مشكلة الحرارة بشكل نهائى, بس أنا خايف أغير الرادياتير و تفضل العربية تسخن برضه, ساعتها هبقى ماعملتش حاجة !!!!!!

شكرا لكل اللى كلفوا نفسهم و ردوا على و خصوصا الأستاد حماده طوبار

MERCEDES S430

[mercedes]

السلام عليكم و رحمة الله و بركاته

معلش يا أستاد حماده, أنا كنت عاوز أعرف ايه موضوع الرادياتير ال 3 صفوف ده لأن اللى أنا أعرفه الرادياتير العادى, زى اللى راكب عندى فى العربيه اللى هو عبارة عن سربنتينة و راكب عليها علب و خلاص, اللى أنا أعرفه و سمعته من الصنايعية هو الرادياتير ال 3 ماسورة, و السؤال بقه دلوقتى, هو حضرتك لما غيرت الرادياتير و جبت الرادياتير ال 3 صفوف ده, فرقت مع العربية فى التبريد و لا الفرق ما كانش أوى؟؟؟؟

آه , بالمناسبة , أنا كان عندى سؤال تانى:

أنا سمعت عن حاجة اسمها زيت شنبر, فأنا عاوز أعرف ايه فايدة الزيت ده بالظبط و بيتحط ازاى فى المكنة, يعنى بيتحط عادى مع الزيت ساعة ما آجى أغير الزيت و لا بيتحط امتى , و هل بأضيفه لزيت الموتور, يعنى بأضيفه فوق ال 4 لتر اللى بيتحطوا أصلا ساعة ما آجى أغير الزيت و لا بيتحط و بعدين أكمل فوقه لحد ما أوصل للمقاس المطلوب و خلاص ؟؟؟؟

ياريت أى حد يعرف معلومات عن الحاجات دى مايبخلش على و جزاكم الله كل خير .

MERCEDES S430