احترت مع الليجانزا

[ahmedjumpo]

السلام عليكم و رحمة الله و بركاته
كان سبق و طرحت موضوع بخصوص الليجانزا http://www.masrmotors.com/vb/showthread.php?t=26681
و كانت العربية ظبطت شوية و لكن الان رجعت الى الاسواء و مش لاقى تفسير لدلوقتى.
العربية سحبها بيبقى بطىء جدا فى السرعات المنخفضة و لو فى وزن فى العربية السحب بيبقى وحش بدرجة فظيعة و كنت مرة عملت تجربة الوصول الى سرعة 100 من الثبات و اخدت وقت حوالى 23 ثانية مع انه فى المفترض تاخد من 11 الى 12 ثانية وديه عربية 2000 سى سى يعنى المفروض يكون عزمها كويس و لكنى حاسس ان عزمها ضايع

الحاجة التانية ان استهلاك البنزين رجع ادهور تانى و ديه من اكتر الاشياء اللى مجنينانى لان الاستهلاك عندى متغير بطريقة بشعة و ليس متقارب بمعنى فى مرة تعمل فى اللتر 15 كم و فى مرة 10 كم وفى مرة 5 كم وذلك تحت نفس ظروف القيادة و السرعة و مش عارف ليه التفاوت الرهيب ده يعنى يفترض ان لو مشكلة فى اى حاجة داخل منظومة الوقود و الاحتراق ان يكون ثابت بمعنى ان لو مثلا الرشاشات فيها مشكلة يبقى المفروض ان الاستهلاك عالطول يكون زيادة مش يزيد اقوى مرة واحدة و يقل قوى مرة واحدة و بعدين يزيد قوى ثانى و لو افترضنا ان فى تسريب فى دورة الوقود يبقى المفروض برده ان الاستهلاك يكون عالى عالطول مش كده برده

الحاجة الثالثة لما تكون العربية باردة و تيجى تدور بدور عالطول بس اصبح فى صوت خشونة غريبة لما بتدور و كمان مفيش خمس دقائق و تروح مبطلة و لو زودت شوية بنزين مفيش فايدة و تلاقى عداد ال rpm يتهاوى و تروح مبطلة لغاية لما مؤشر حرارة العربية يبداء يجيب الربع و يعدى تبداء العربية تتعدل و لكن و انت ماشى فى حتة زحمة شوية تلاقى العربية وكان الكهرباء بتلعب و تحس انها بتعلى و توطى
طبعا حطيتها على السكانر يجى 5 مرات عند كذا كهربائى و كلهم قالوا ان العربية نتائجها كويسة و انا محتار ازاى النتائج كويسة و العربية مش كويسة
معلش انا تاعب حضراتكم معايا و باحاول افكر معاكم بصوت عالى لحسن العربية ديه هتجننى فعلا و ياريت نفكر مع بعض فى نقطة نقطة راجيا من المولى سبحانه و تعالى انه يهدينا الى الحلول
فى حاجة برده ملاحظها من فترة قريبة و اتاكدت منها يوجد تسريب زيت بسيط جدا بيظهر من مقدمة اعلى الموتور هل ده بسبب جوان غطاء التاكيهات و هل التسريب ده ممكن يوصل للبوجيهات و هل لو وصل الزيت للبوجيهات ممكن يؤثر فى الاحتراق و يؤدى الى ضعف العربية فى الصباح و ضعف السحب و استهلاك بنزين زيادة
الملاحظ ان كل ده من بعد قطع سير الكاتينة و تغيير الصبابات فهل من الممكن ان يكون فيه مشكلة مثلا فى الصبابات او فى تقفيل الموتور ممكن تؤدى لاءى مشكلة من المشاكل السابقة حيث فى مرة ميكانيكى قالى ان العربية متلتة و ده لما دور العربية و كانت لسه باردة
مش عارف ليه برده انا حاسس ان فيه مشكلة فى كهربة العربية و كنت عايز استفسر هل من الممكن ان لو فيه مشكلة كهرباء تؤدى الى تفاوت فى استهلاك البنزين و لو نعم ازاى ادور وراء الكهرباء وهل لازم افك الضفيرة و اكشف عليها مع ان الكهربائى من الكشف الخارجى عليها قالى كويسة بس فى التوكيل قالولى ان الضفيرة حالتها سيئة جدا و طلبوا فكها و الكشف عليها ولكن التكلفة عالية جدا وكمان ممكن بعد كده ما يطلعش العيب منها
سامحونى يا جماعة على الاطالة بس زى ماقولت قبل كده انا باحاول افكر معاكم بصوت عالى

[AbOnOrA]

سبق ورديت على حضرتك بالاتى

يعنى اللى حضرتك بتوصفه ده صعب يبقى له تخمين واحد غير انها زى ما بيقولو بالبلدى فاتحه بقها وده بيحصل لما العربيه تكون مع حد مهم فى صيانتها (المستخدم السابق) ومش ايده فيها ولما بتبوظ حاجة مش بيجيب قطع اصليه العربيه فى الحالة ديه اما تخلص منها او تشدها كلها فى مركز خدمة محترم يستبدل كل القطع المنتهيه الصلاحيه سواء كانت شغاله نص نص او عطلت خالص لان نظم العربيه متكاملة بشكل كبير وممكن حاجات كتير تؤدى نفس المشاكل مثلا زى ما اتقال لحضرتك ممكن تكون مشاكل كهرباء مش مظبوطة وممكن توقيت الاشعال او منظومة الاشعال والحقن وممكن تغذيه الوقود طلمبة وخراطيم معلش هى محتاجه صبر شويه والاهم تكون بتعمل الصيانة فى مركز كويس

طبعاً مازلت عند رائى ان العربيه عايزة زيارة لمركز خدمة محترم وعايزة مصاريف لاستبدال كل ماهو فى نطاق الشك وصدقنى انت كدة بتشترى العربيه وبتشترى وقتك وراحة بالك دلوقتى ومستقبلاً

اما بالنسبة للاحتمالات فلو الزيت اللى بيتبخر من جوان غطاء التاكيهات وصل للبوجيهات وده احتمال صعب جداً هيبان اثرة لو فكيت البوجيهات وبصيت عليها

لو العربيه متلته او فيه مشكلة فى منظومة الاشعال والاحتراق لازم يبان ده من العادم ويبان كمان من قراية السكانر وخد بالك فيه كتير مبيعرفوش قرايه السكانر صح وبدام السكانر مش مدى ايرور كده كله تمام فى حين ان المفروض تقارن القرايات بتاعة كل الحساسات بالقيم الافتراضيه اللى فى مانيوال اصلاح العربيه كمان فيه بعض الحساسات والقرايات عامة متتجابش الا بالسكانر الاصلى بتاع العربيه الحاجات اليونيفرسال متقرهاش
وده برضو يخلينى اقولك لازم مركز محترم مش شرط التوكيل ممكن تجرب مركز صيانة معتمد هيكون عندة السكانر الاصلى وفنيين مدربين وخبراء فى العربيه وفى نفس الوقت هيكونو ارخص من التوكيل

[ahmedjumpo]

طب ياريت يا استاذ AboNoRa تدلنى على مركز صيانة محترم انت شخصيا بتثق فيه و لك الشكر

[titanic_see]

اعتقد و الله اعلم انا سحب و عزم العربيه ليه علاقه بالديسك و اسطوانه العربيه ممكن يكونوا تعبنين اوى بالاضافه انا اكلان النزين ممكن يؤكد الكلام ده ... اعتقد ان فى مشكله عندك فى حساس TPSوده اللى عامل خشونه للماتور فى الصبح تبطيل العربيه تنطيطها و رعشه الكهربا لاما الكويل بتاع الكهربا او حساس الكرنك عايز يتغير الزيت غالبا جوان التكيهات وده مفهوش قلق و ان شاء الله خير

[abodonia99]

سيدى الفاضلا كل المشاكل ال فى سيارتك بعد قطع سيرر الكاتينه صح 00000 اذن الشك كله يروح الى تقسيم الكاتينه لو فيها اى خلف بسيط يخلى المتور فى السرنسيه غير منتظم وتاكل بنزين وتقل جهد المتور 000000ارجومن الله ان يوفقك