شيزوفرينيا - 1- الفانوس بالفانوس والبادى اظلم

[AbOnOrA]

عادة لما بخبط حد بنزل اعتذرله وبعرض اصلاح العربيه على حسابى
عادة لما حد بيخبطنى بسامح واقبل الاعتذار وبقول اهيه كده كده هتتشد سمكرة مرة واحدة
عادة بقول المسامح كريم واللى عند ربنا مبيروحش ولما اسامح حد هلاقى اللى يسامحنى
وده كله كان بيحصل فعلاً

لكن امبارح كانت قصة تانية

واحد من اعز اصدقائى ودع العزوبيه واصبح فى عداد المتزوجين
وكالعادة اتجمعنا كلنا لتأبينه و كما هى الاعراف السارية ومشينا كلنا وراه فى زفه مهيبة امتدت من جامع النور فى العباسية لكوبرى قصر النيل

اليوم كان جميل وكله تمام التمام ولم ينغص علي الا شعورى بتأنيب الضمير من احتلالنا عرض الطريق والجرى والحركات الاستعراضية اللى عمالين نعملها فى وسط الطريق والطريق اصلاً زحمة ومش ناقص

بس ارجع واقول لنفسى ياسيدى وفيها ايه يعنى ما كل الناس بتعمل كده وكل الناس بتفرح بالطريقة المهببة ديه وعادى يعنى ومعلش وكل مفردات الطناش والسلبيه والتواكل اياها

بس بجد بجد الطريق اصلا مكانش ناقص

يوووووه اهى ليله وخلاص يارب بس تعدى على خير والعيال اللى طالعين من ازاز المرسيدس معانا فى الزفة دول ميقعوش من العربيه وينزلو تحت عجل عربيتى !!!

بييييييييييييب بييييييييييييييب بيب بيب بيييييييييييييييب

فى المقدمة 3 عربيات لانسر بومة على الميمنة مرسيدس عيون فى قلب الهجوم وشهاب تلاتة فى الميسرة

عربيه شاهين تاكسى عمالة تقلبلى نور وتزمر بهسترية

فى الاول كنت فاكرة بيجاملنا بس فهمت بعد كده انه عايز يعدى

الكوبرى واسع جداً ويعديه من على شمالى عادى مالة الراجل ده

بييييييييييييب بييييييييييييييب بيب بيب بيييييييييييييييب

شاورت للراجل يعدى من على شمالى
تقريباً الراجل فهم وبداء يعدى بمنتهى السلاسه من على شمالى فعلاً

وهووووووووووووووب اول ما عدى وقبل ما الرفرف الورانى اليمين بتاعة يبعد عن الرفرف القدامى شمال بتاعى لقيته بينحرف بدون اى داعى وبمنتهى القوة ليصفع شهاب تلاته على خدها الايسر قصدى الرفرف الشمال بشكل يؤكد تماماً انه قاصد

مش بس كده شتم وجرى !!!!

ايه اللى حصل ده ..... صدمة بجد وتصرف غريب والحمد لله ان الاستجابه العضلية العصبيه الطولية العرضيه العملية المعملية اشتغلت وكلبشت فى الدريكسيون ومنحرفتش مع الخبطة للحد اللى يخلينى اخبط فى العربيه اللى جمبى والا كانت بقت كارثة وخبطنا كلنا فى بعض واللى ورانا جه اخدنا بالحضن كمان والفضل يرجع لالهام ربنا سبحانة اولاً واخيراً ثم التعود على الخبطات باعتبارنا انا وشهاب 3 سوابق درجة اولى حوادث

كل ده دار فى عقلى فى اجزاء من الثانية ومبقتش عارف اعمل ايه وفى باقى الاجزاء اللى فاضله من نفس الثانية قررت اجرى وراه وقد كان

مطاردة بوليسيه مميته بين شهاب 3 والشاهين على كوبرى قصر النيل فى اوقات كتير كنت هلبس فيه بالعند من ورا من كتر غيظى لحد ما لقيت الموتور بيدخن (موتور الشاهين) فعرفت ان لسه فيه امل (المشكلة كمان ان لمبة البنزين كانت منورة وطلبمة البنزين بتبقى بعافيه حبتين والتانيك شبه فاضى كده وطبعاً مع الشد بيبان ده اوى )

وقبل النازلة كنت جبته وقفلت عليه على يمين الكوبرى ووقفته

هوب صاحبى اللى جنبى نزل للراجل وانا اكدب عليكم لو قولتلكم انى عارف انا كنت بفكر فى ايه

فى الوقت ده برنامج الغضب الاعمى بشتغل اوتو رن ولقيت نفسى بقفل العربيه وبسحب مفتاح العجل من تحت الدواسة وبقفل العربيه (وديه كلها خطوات هاااااااامة جداً علشان متتسرقش العربيه وانت رايح تتخانق ) وجرى جرى على السواق اللى عمال يجعجع مع صاحبى وبالبوكس فى وشه
دب دب طاخ طاخ جريو صحابى يحوشو فلت منهم وهاتك تكسير فى العربيه وكل اللى سامعة الراجل عمال يصرخ انضربنى انا بلاش العربيه

اصحابى وكل اللى كانو فى الزفة اتلمو عليا وبعدونى وحاولو يهدونى سيبتهم وركبت العربيه ومشيت
العريس جة ورايا وده راخر وحش كاسر الحمد لله انه ملحقش المعمعمة طمنته وخلاص خلاص ومشينا كلنا متعكنين وبس

النتيجة عربيتى اتخبط فيها الرفرف واختفى فانوس الاشارة وعربيه الراجل ادقدقت على البارد (خبط بالمفتاح اللى كان فى ايدى ) ادى للخبطات متفرقة فى انحاء العربيه بس مفيش حاجة فيهم خطيرة لانه كله كان خبط عشوائى

اللى حكيته ده منكد على من امبارح ومش عارف انام بسببه انا حاسس ان الراجل يتساهل وانه فعلاً كان هيتسبب بغباوته وعن عمد فى انه يموتنا كلنا
بس اللى عملته ده برضو مكانش صح

انا عارف انى لو كنت قعدت اتكلم معاه سنتين مكانش هيعترف بغلطة ولا كان هيعتذر لانه بجد كان قاصد

بس برضو اللى عملته كان تصرف همجى وكان ممكن اموت الراجل او اعمله ارتجاج فى المخ او اى مصيبة تانية اندم عليها طول عمرى

انا عارف اننا بقينا فى بلد كله همجية وبلطجة والضعيف بياخد بالجزمة
بس بعد اللى عملته ده افرق ايه انا عن اى بلطجى او همجى تانى فى الشارع

ياترى لو مكنتش عملت كده كان ضميرى هيبقى مرتاح عملاً بمبداء جدتى " يابخت من بات مظلوم ولا باتش ظالم"

ولا ال"الرفرف بالرفرف والفانوس بالفانوس والبادى اظلم "

ياترى انتو مع انهى رأى فى الاتنين ولا انتو كمان عندكو شيزوفرينيا

[سيف الدين سعيد]

أخى الفاضل . مع كل تحياتى واحترامى لك على نظافتك الداخليه والتى أصبح من النادر وجودها فى ابناء شعبنا ( العريق ) ولكن يبدو من كلامك ان لسه حقن البنج والتناحه لم تؤثر فيك بالكامل وان ضميرك لسه بينقح عليك لما بتعمل غلط . وانا نفسى مش عارف ارد عليك اقوللك ايه . بس صعب جدا ان ضميرك يكون بينقح ومحتاج بنج وان ضمير اللى حواليك فى نفس الوقت يكاد يكون فى النزع الأخير ومحتاج انعاش قوى عشان يفوقه ... آسف على الإطاله ولكن نفس الحيره دى عندى وخصوصا كل ما بانظر لإبنى الوحيد الصغير وبافكر فى طريقة تربيته . هل اربيه على ما تربيت عليه ؟ والا أربيه على انه يعرف يعيش المستقبل وسط التغييرات اللى اصبحنا بنعيشها . اما رايى الخاص فى موضوعك : انك تحاول تنسى ما حدث . لأنه خلاص حدث وانتهى . لا تأنيب ضميرك حايفيد ولا حايغير حاجه . ولا اللى عملته حايصلح لك العربيه تانى .
مع خالص حبى واحترامى

[mr_astra]

السلام عليكم ورحمة الله
بامانة لى الشرف انى ارد على مشاركة ليك انا متابع كتير من مواضيعك وصدقنى والله هى قلوب تتالف
اسمحلى اقولك انت غلطان اولا وسواق التاكس غلط بس رد الغلط بغلط ما يبقاش غلط احنا نفرح فى فندق او نادى او الشارع حتى بس يكون يسمح بكدة بيتعمل حركات فى الافراح جميلة وبتكون مبهجة لكن مش على حساب اناس ......صدقنى يا واان بقرا موضوعك افتكرت نفس الحالة اللى انا كنت فيها ابنى ومراتى وامى كلهم فى حالة خطر على طريق مصر اسماعيلية نتيجة انقلاب اتوبيس الرحلة وراحو مستشفى الزقازيق ( احالات الخطرة بس) امى وابنى ...... رحتلهم زى المجنون مش عارف هلاقى مين ومش هلاقى مين شعور اعوذ بالله ربنا ما يورية لحد وانا ماشي كان فى زفة وموتسيكلات بقى وحركات من دى صدقنى ما قدرتش امسك نفسي اكتر من نص دقيقة واحلى رفرف للموتسيكل رميتة على جنب وفعلا لو كان طول كان ممكن اعدى علية بالعربية .... ما تعرفش ظروف الناس اية كل واحد فية اللى مكفية وانا ممكن اؤلك شعور سواق التاكسي افتراضيا ........ انة طول النهار عند الميكانيكى ويا دوب لسة مصلح العربية وواخدها من صاحبها وطلع يشتغل اى سعتين تلاتة عشان يرجع لعيالة اخر النهار جايبلهم اللبن والفينو بتاع المدارس فلما لقة انة مش هايعرف يعدى والوقت هايضيع ولازم يودى العربية لصاحبها باليل طبعا كان لازم يعمل كدة من الغيظ ....طبعا الكلام دة افتراضي وهاسيبك لخيالك ممكن يتخيل السواق اللى عمل معاك كدة دة لية عمل كدة وعارف انه ممكن ياخد علقة موت منك ومع ذلك عملها اكيد السبب قوى
السلام عليكم

[أحمد فاروق سيد]

AboNoRa
أنا مُقدر صراعك النفسى
ما بين ... العين بالعين ،،، والمسامح كريم
ولكن
الذى فعلته كان يجب عليك فعله
لأن الشخصيات المريضة أمثال الراجل ده بتاع الشاهين
حتماً ولابد ولزاماً عليك أنك تربيه
وتحسسه بعقد النقص اللى عنده
أنا تقريباً بقابل كل يوم أمثال المريض ده
وصدقنى بحاول بشتى الطرق أقهره نفسياً

وأخيراً
تخيل لو اللى حصل معاك ده
كان حصل فى مقابلة من مقابلات مصر موتورز
كانت نهاية الشاهين باللى جواها أيه ؟
تخيل

[tarek elbadry]

مساء الفل
الحمد لله انها جت سليمة