اشتريت عربية فيات 128 والميكانيكى قاللى

[ahmed344]

ياجماعة الخير انا خلاص الحمد لله اشتريت عربية فيات 128موديل 77 عربية الشعب الغلبان و ب 11000 الف ومن ناحية انى اركب وامشى ركبت ومشيت ولا اخدت حتى صنايعى ولا يحزنون بس اخدت ابن اختى معايا ليه فى العربيات كدا على خفيف صاحبها كان عارضها ب 13500 بس بعد كلام ومداولات خلصناها على 11000 المهم بئا بعد يومين واحد قاللى روح لميكانيكى يغيرلك طقم البوجيهات وسير الكاتينة ويشدلك الدبرياج ويشوف الجنوط اللى قدام بتسخن ليه فروحت للميكانيكى طبعا هو فضل يقوللى مقولتليش ليه اشوفهالك قبل ما تجيبها وكدا المهم فكها قالى ترس التقسيم اللى فيها بتاع شاهين روح هتللى بتاع الفيت عشان نعرف نقسم المهم انه عقدنى منها وقالى قول لصاحبها ان الموتور لازم ينزل علشان عامود الكرنك فيه لئه بيروح وييجى بسيط قوى وانه لازم يروح مخرطة ودا اللى بيسخن الجنوط وانه مش هيعرف يظبط الدبرياج طبعا ولا انا فاهم اى حاجة من اللى بيقوله دا المهم انى جبتها وخلاص بس لو فعلا المكنة بايظة هتتكلف عليا كاام لو هظبطها او حتى هركبها جديدة ؟؟؟ الميكانيكى عقدنى من العربية قبل ما حتى افرح بيها
صور المحروسة اهى

[zing0]

أولاً الف مبروك على العربية, ربنا يديك خيرها و يحميك من شرها و يبارك لك فيها.

و آسف إن الرد متأخر شوية, لسه شايف الموضوع دلوقتى

مبدئياً غير الميكانيكى ده
إسأل جيرانك (و يفضل لو حد فيهم سواق تاكسى) فين الصنايعية اللى بيتعامل معاهم و يكون عندهم أمانه و بيفهموا فى الشغل صح و أسعارهم فى الحنين.
الميكانيكى اللى إنت رحتله عاوز يعمل عليك شغل بنسبة 9999% و عاوز يفتح المكنه علشان يلهف له مبلغ و قدرة بدون أى لازمه.

حضرتك ممكن توضح سكن حضرتك فين, و الناس هنا هتدلك على أفضل صنايعية قريبين ليك.

تغيير سير التقسيمة و الفلاتر و .... كلام فاضى بالنسباله, آخرة هياخد 50 ج و يبقى مروشلك العربية تماااااام
بس هو عاوز يفتح شغل و خلاص و موقف ضبط العربية كلها على فتح الموتور. طبعاً فتح الموتور مش عبط, لازم يكون فيه مشكله كبيرة لاقدر الله علشان يتفتح. مش علشان أغير سير تقسيمة و لا بوش كرنك (زى ما الباشا بيقول) - أدام العربية ماشية تمام ولا تيجى جنب الموتور نهاااااائى.

أعانك الله

[crime]

افرح بعربيتك يا باشا الف مبرووك ربنا يكفيك شرها ويديك خيرها
لو عايز ميكانيكى كويس فى واحد ف مدينه نصر قدام شركه ايبكو اسمو الاسطى محمد حلمى روحلوا وقولوا ان انت من طرف المهندس ايمن مدحت وخليه يبصلك ع العربيه

تقبل تحياتى

[sayed maher]

ياباشا مبروك العربية بس عاوز أقول لسعدتك على حاجة أنا الـ128 قاعدت معايا 5 سنين حاجتها رخيصة ومفيهاش شغل التعقيد إلى هو وصلهولك ده لو عربية مافيهاش حاجة سليمة 3000 بترجعها عروسة بالرش كمان فغير الميكانيكى ده وحاول تدور على ميكانيكى كويس

[Marlborooo]

روح للاسطي حمدي هيظبطلك العملية ومحترف وعنده ضمير من كلام كل الاعضاء