مشكلة في فرامل أوبل كورسا 2000

[IRaghib]

سلام عليكم يا أوبلاوية

أنا لسه جايب عربية أوبل كورسا من تلت شهور ونص تقريبًا، ومن ساعة ما جت وأنا عمال آخدها من عند الميكانيكي أوديها للسمكري، وبعدين للميكانيكي، وبعدين لبتاع الرش إلى آخره.

هي العربية لما جبتها كانت عايزه تتظبط شوية، بس كانت دواخل فابربكة وموتور كويس وشاسيه تمام، المهم، الصنايعية طلعوا عيني، فقررت إني استشير في كل حاجة (قدر الإمكان)، أو على الأقل لازم أكون مقتنع ميه في الميه بأي وجهة نظر ميكانيكي عايز يسحب مني فلوس وخلاص من غير ما يظبطلي العطل.

المهم، ندخل في الموضوع علطول.

العربية قعدت عند الميكانيكي أكتر من شهرين، عشان كام حاجة هايفه كده، منها تغيير التيل والطنابير، بس هو تقريبًا كان متفائل بيها في الورشة، فقعدها عنده الفتره دي كلها وحسبي الله ونعم الوكيل.

وبعد ما ظبت الكهربا، إذ بي أفوجأ بحاجتين في العربية ما كانوش فيها قبل كده، (غريبه جدًا مسألة العربيات إللي تدخلها الورشة تطلع تقريبًا بنفس الأعطال وأعطال زياده كمان، بعد ما تدفع الشيء "الفولازي"، ولكن أدينا بنتعلم)

الحاجة الأولى، العربية بتنتش، وبتتأخر في الدواره، غيرتلها بوجيهات، بقت تنتش برضه لما أديلها بنزين زياده شوية، فقلت يمكن دورة البنزين فيه حاجة، خصوصًا إني في الفترة دي كنت بعاني من مشكله مشابهه في الحب الأول الـ 128 إللى شالتني في الشهور دي. المهم قولت اتكل على الله وأروح مدينة الشروق عند قرايبي هناك واضغط على العربية في السكة، يمكن دورة البنزين تفك. وقد كان، ضغطت حبه على العربية وجبت بيها 150 و160 على طريق مصر السويس.
وأنا في الطريق الأوسط بتاع الشروق، وده طريق مفتوح على الآخر ومفيش فيه عربيات كتير ولا مطبات وصلت تاني لـ 150 وعادي، مرة واحدة حصلت

الحاجة التانية: العربية بطلت من غير إحم ولا دستور، جيت أركنها على جنب وبفرمل، لقيت الفرامل بقت خفيفه عن الأول بكتير وشميت ريحة حاجة كده زي التيل، وبرفع فرامل اليد، لقيتها بقت بتترفع لفوق جامد عن الأول، ما كانتش كده خالص. المهم شغلانة كده ميكانيكي جه، واتضح إن المشكلة في سيادة البطارية، مع إني كنت شاكك فيها وحاولت معاها بس راسها وألف كورسا متشتغلش. المهم الميكانيكي عدل الكابلات سنة، والعربية مشيت، الفرامل في ذلك الحين كانت لا بأس بها أخف من الأول بشويتين بس ما زالت كويسه ومستقره، ومشيت بيها تمام في الشروق، جيت وأنا مروح بعد ما مشيت على سرعة 60 80 لمدة 5 دقايق وفرملات قليلة (مدينة الشروق بقه) قولت أما أشوف الطنبورة كده، ونزلت لقيت الطنبورة سخنه نااااااار. قولت أيوه، الفرامل با معلم، إمشى على راحتك خالص في الطريق وجد يمين وربنا يستر. وقد كان.

أنا قولت يمكن تيل الفرامل عشان جديد بيحك شوية وأول مل يوصل لمرحلة معينة هايطبع ويبقى تمام، ولكن مع المشوار التالي القصير، لاحظت إن الفرامل بقت أخف أكتر، وديتها لواحد في صقر قريش، خدها ساقها شوية قاللي عايزه ماستر فرامل عمومي (وهو ماعندهوش خلفيه عن إن الطنبورة والتيل لسه راكبين، وواحد معندوش دين ولا ضمير ولا فاهم حاجة هو إللي مركبهم).

المهم هو لما جرب العربية، ركب وبقى يدوس على الفرامل جامد قوي كذا مرة، لما أنا ركبت بعده كانت الفرامل وصلت للآخر، وبقت بتعمل صوت في إشارة إلى إن الأخ تيل بعد ركوبتين عايز يتغير.

جبت الماستر من حمادة أوبل في صقر قريش بـ 350 جنيه، وقولت أما أشوف حد يركبه أو أركبه أنا، فالسؤال دلوقتي:

- هل العيب ده في ماستر الفرامل العمومي، وللا ده هوا وزيت مغشوش من صاحبنا الميكانيكي الأولاني؟ عشان قريت إن ممكن خراطيم الفرامل كان فيها هوا، ومع الحرارة إللي بتتولد مع السرعة الجامده الهوا بيتمدد وبيخلي التيل يقفش في الطنبورة ويدوب بسرعة ويولد حرارة أكتر، وبالتالي الفرامل تضعف أكتر. أنا أقرب للاحتمال التاني ده، لإن تيل الفرامل متاكل فعلًا، والفرامل وإن كانت ضعيفة جدًا فهي مستقرة يعني مش بتروح وتيجي لا بتجمع وتهرب، ومش بكاركلهاش ولا حاجة زي كده، بس هيه ضعيفة على الآخر.

والمرة الجاية نبقى نسأل مسألة التنتيش، عشان الأسباب كتير.

في انتظار آراء الأوبلاوية