فيلم" النار"قصة وسيناريو وحوار د0تامر محمد

[د0تامر محمد]

-11-
خارجى/ليل
-------------
نيران كثيفة تشتعل فى كل مكان وتتصاعد الادخنه كثيفة وتحلق فى السماء00
أصوات مدوية كالطلقات00
ناس تجرى بسرعة فائقة(تبدو كظلال وأشباح)
كانها تطير00
يصطدمون ببعضهم البعض00
صرخات عميقة ومرعبة00
أصوات تذوم بانفاس طويلة تثير القشعريرة00

(الكاميرا على نور وهو يقف على ربوة عالية)
تقترب من عينيه المتقدتين جمرا ثم يصرخ صرخة مدوية فيها زئير الاسود00
يختفى ليظهر على الارض والاشباح التى تعدو تقترب منه وتلتف حوله

-12-
خارجى /نهار
---------------
عماد يسير جنبا الى جنب مع منى يدخلون الى كازينو00
تجلس منى ثم يجلس عماد فى مواجهتها00
ينظر عماد الى عينيها مباشرة ويقول مبتسما:
-تعبتينى عشان توافقى اننا نتقابل
قالت بتعجب:
-المفروض ان ده الطبيعى
قال وهو يطرق برأسه:
-أنا كنت محتاج انى اتكلم معاكى جدا
-وأنا سمعاك
نظر فى عينيها:
-الصراحة كده وبدون مقدمات أنا معجب بيكى
ابتسمت فى شحوب:
-لكن أنت متعرفش عنى حاجة
قال يحاول ان يكون حكيما:
-ونفس الشىء بالنسبة لى
لكن انا ميهمنيش أعرف غير ان انتى كنت السبب فى تحريكى
قالت بتعجب:
-مش فاهمة!
-بصى أنا أخدت صدمة جامدة ف حياتى00
أنا كنت معيد بكلية الهندسة وحصل مشاكل بينى وبين رئيس القسم بسبب اختراع كنت عملته وحاول سرقته منى ولما فشل ضيّق علىّ لما استقلت
-بس دى سلبيه
-أنا عارف كده00
وعارف انى استسلمت وهربت 00 لكن كان فيه صدمة تانية كانت هيه السبب الحقيقى
ابتسمت:
-دا أنت حكاية بقى
تنهد بعمق ثم قال:
-أنا كنت بحب زميلتى وكان الطبيعى انى اتقدم لها ولما حصل أبوها رفضنى لفرق المستوى الاجتماعى !
انا ابويا راجل ميكانيكى ومن اسرة بسيطة وهوه كان وكيل وزارة 00
الغريب ان البنت اتخلت عنى واتصدمت وحسيت انى كنت عايش فى وهم كبير 00
بعدها بأيام مات والدى اللى ربانى بعد موت امى لمدة خمستاشر سنه وانا ابنه الوحيد
قالت فى تعاطف:
-ياه دا أنت أكيد كنت ف عذاب وقتها00كذا صدمة الله يكون فى عونك
قال فى تهكم:
-المشكلة ان السلبية بقت من بعدها عادة واستسلمت
قالت بفضول:
-واختراعك راح فين
قال بحماس:
-بعد ما شفتك ولقيت انى معجب بيكى00
لاقيت انى انسان مش مميز ومش مغرى ليكى او لاى واحدة وكان لازم انى أفوق م الغيبوبة واتحرك
قالت مبتسمة:
-واتحركت
قال بحماس:
-اشتريت امبارح عربية وح نفذ عليها اختراعى ان شاء الله وبكرة ح أفتح ورشة الحاج واشغلها تانى
-جميل أنا مكنتش عارفة انى ممكن اكون كده

صمت وهو ينظر الى عينيها
أطرقت برأسها فقال:
-أنتى ملهمتى
قبضت على ابتسامتها وقالت:
-يعنى يا سلبية يا استعجال
-مش استعجال ده فوقان م الغيبوبة

وألتقت عيونهم وابتسامة

تتبع

[هيامى]

كمل يا دكتور
الله عليك موهوب بجد

[د0تامر محمد]

لولا البعض من المهتمين لفقدت الامل فى أن هناك من يلتفت الى الاعمال الجادة والابداعية فى زمن الطيارى والاستهلاك التيك آواى
شكرا لمرورك الدائم

[د0تامر محمد]

-13-
خارجى/نهار
--------------
السيارة اليابانية القديمة داخل ورشة متواضعة تحت شقة عماد
غطاء المحرك مفتوح وعماد ينكفىء عليها وهو يحل جزءا من موتورها00
العرق يتصبب من جبينه وهو يفرد ظهره ويمسحه بظهر يده
يجلس على كرسى قريب فى تعب واضح وارهاق على وجهه
يدخل صبى القهوة بصينية عليها قهوة
يقول:
-أحلى قهوة لاحلى باشمهندس
يقول فى تنهد:
-شكرا يا مسعد
يقول مسعد فى فرح:
-ايوة كدة نورت الحتة يا با شمهندس00
والله قفلت الورشة دى حرام
-ربنا يقدرنا يا مسعد
-بالاذن 00اى خدمة 00أنت تأمر
-شكرا
يسترخى عماد على مقعده
(قطع)
(فلاش باك)
حجرة فخمة ورجل بملابس أنيقة يجلس خلف مكتبه00
يدخل عماد وهو يحمل دوسيه به أوراق ورسومات
يقبل على الرجل منشرحا:
-صباح الخير يا دكتور
يقول الرجل فى صلف:
-أهلا يا عماد00
أقعد
يجلس عماد فى ترقب بينما يقول الرجل:
-ها 00عملت ايه فى مشروعك؟
-حضرتك أنا توصلت للتعديل نظريا ومع التطبيق العملى موتور العربية ح يوفر حوالى70% من الاستهلاك
هز الرجل رأسه:
-جميل
أنت محتاج اشراف معاونة كاملة منى00
لكن بصراحة لازم اسمى يكون قبل اسمك فى الاختراع ده
قال فى دهشة:
-سعادتك انا أنهيته ومش محتاج تعديلات عليه
قال فى غضب:
-اللى انت عملته ده كلام فارغ وخيال شباب غير علمى 00
لازم يتعدل بطريقة علميه00أنت فاكر نفسك عبقرى
قال عماد بانكسار:
-العفو سعادتك00 لكن000
قاطعه الرجل وقال بغضب:
-مفيش غير اللى قلته يا أما تنسى الموضوع
قام عماد من مجلسه وهو يطرق برأسه
قال الرجل بقرف:
-اتفضل
وماكاد عماد يتخطى الباب حتى قال الرجل:
-مكانك معانا مش ح يبقى مضمون
ونزلت الكلمة عليه كالصاعقة وجمدته فى مكانه

(قطع)
قام عماد من على كرسيه وهو يشرب قهوته دفعة واحدة ثم انكب على موتور السيارة

[د0تامر محمد]

-14-
داخلى/ليل
------------
عماد جالس فى شقته يتابع التلفاز
يسمع طرقات على باب شقته00
يتجه الى الباب ليفتحه ليطالعه وجه نور مبتسما
يقول نور:
-مساء الخير أخويا وحبيبى
يصرخ فيه عماد وهو يتراجع للخلف فى خوف ظاهر على وجهه:
-يا جدع أنت حل عنى
وبنفس الابتسامة:
-مقدرش أنت حبيبى
قال عماد بضيق:
-يا عم انت وانا لا يمكن نتفق ولا يمكن نكون اصحاب 00أرحل للعالم بتاعك وابعد عنى
تنهد نور ثم قال:
-أنت مش فاهم حاجة00 لكن لو أديتنى الفرصة ح أفهمك يمكن تقتنع
زاد ضيقه وهو يقول:
-مش عايز افهم00
ممكن ترحل عنى00ياأخى ربيت لى الرعب00
أنا مش ناقصك
(الكاميرا على وجه نور)
تضيق عيناه ويتجهم وجهه ويزفر فى خوار مرعب
قبل ان يستدير ويسير بضع خطوات ويختفى فجأة!

يتبع