رابطة مالكي الكيا سيفيا فيد واستفد ( صداقة - نقل خبرات )

[shams8275]

السلام عليكم يا أحلى ملاك للسيفيا زميل جديد لكم ينضم اليكم حيث اشتريت سيفيا 2002 من حوالي شهرين.... عندي شويه اسئله يا ريت اجد اجابه عنها و هابدأ في كل فقره بسؤال........
السؤال الأول السياره بتنتش و ساعات لا تقبل الغيار في الأول و التاني بعد ما أمشي مسافه بيها و لا تستجيب الا بعد الضغط على الدبرياش اكثر من مرة و ساعات لا تستجيب اضطر اطلع على التالت.... بس موضوع التنتيش ممكن يبدأ من الأول و ساعات بيكون النقل سهل...ناس قالوا اسطوانه و ديسك و ناس قالوا الكبشه اللي تحت الفتيس ..... هل من سابق خبره في الموضوع ده و جزاكم الله خيرا

[shams8275]

تاني سؤال التكييف بيوقف السياره مع التهدئه في المطبات اما على لالسريع فيمشي تمام و كان ايضا يعمل و السياره واقفه لكني لاحظت اخيرا أنه بيبطل السياره....... فما رأيكم دام فضلكم

[medo_chemist]

السلام عليكم ورحمة الله وبركاتة
انا فى غاية السعادة انى الاقي منتدي بيتكلم فى الكيا سيفيا بالاهتمام دة
انا لسة مشتري سيفيا موديل 2000 مانويال واتمني انكم تقبلونى صديق للرابطة

[shams8275]

مشكله تانيه حصلت اليوم العاده السخيفه ان المروحه ما تشتغلشي فوجئت العربيه حرارتها قربت من الربع النهائي للمؤشر و بخار بيطلع طبعا بطلت و بعد ما بردت راجعت على الفيشتين بتوع المراوح و زودت ميه و أكدت عالفيوزات....... جيت اجرب و اسخن العربيه و هي واقفه لقيت المروحه الشمال بس هي اللي شغاله و مش عارف ده الطبيعي والا لأ..... يا ريت حد يدلني

[Senior2007]

السلام عليكم جميعا اولا الحكاية باختصار انا اشتريت عربية كيا سيفيا 2001 اوتوماتيك من فترة و بعد يومين من الشرا ظهرت معايا المشكلة دى كالأتى :.

تيجى تدور العربية ماتدورش علشان البطارية نايمة تدى البطارية وصلة كهربا و تدور و تمشى مشوار طويل من غير اى انوار ولا اى حاجة البطارية تشحن و فل الفل و تيجى تنزل تانى تدور عادى العربية تدور انما لو ركنت العربية يومين مثلا و جيت ادور العربية ماتدورش و ارجع اعيد نفس الكره تانى من الأول المهم رحت لكهربائى الناس كلها بتشكر فيه فى الدقى قالى العربية مافيهاش ماس و كشف و عمل كل حاجة ممكن تتعمل قالى هيا هتلاقى البطارية وحشة رحت جبت بطارية جديدة مشيت معايا اسبوعين زى الفل و بعد كده رجعت نفس المشكلة تانى رحت له تانى قالى بص بقى احنا هانجرب نفصل حاجة حاجة يمكن الكاسيت يمكن الأنذار اللى بيعمل المشكلة دى قلت ماشى شال الكاسيت و قالى جرب كده يومين و تعالى لى رحت انا فى نفس اليوم مغير الأنذار و جبت انذار جديد و بعد كده مشيت كويس كام يوم و نفس المشكلة حصلت تانى رحت له تانى قلته له اكشف على الدينمو كشف عليه قالى سليم و شحنه زى الفل مش عارف بقى المشكلة فين انا خلاص بصراحة جبت اخرى معا العربية دى لو حد يعرف الحل ياريت مايبخلش عليا بيه و شكرا .