سخونه المحرك ... الاسباب و العلاج !!!

[pro mada]

المشاركة الأصلية كتبت بواسطة بوالينو موضوع جميل / بس ايه معني خشونه في طلمبه الميه

و الله ما اعرف كل اللي اعرفه انها بتسبب سخونيه في المكنه و بتدي فرصه للمبه الحراره انها تنور اصل طلمبه الميه بتاعت عربيتي كان فيها خشونه ولما سألت يعني ايه خشونه ؟؟؟؟؟؟؟؟ قعد يشرح و انا مش فاهم حاجه المهم انها لازم تتغير

[pro mada]

المشاركة الأصلية كتبت بواسطة Dr. Bolbolan أحب أضيف التالى لسخونة المحرك :- 1- عطل فى ثرموستات المروحه أو فيوزاتها ! لو كانت المروحه غير متصله بالمحرك بسير وتعمل فقط عند درجة حراره معينه ! 2- تآكل الشنابر أو جسم السلندر مما يسبب دخول الزيت الى غرفة الاحتراق واحتراقه مع البنزين فينقص الزيت بصوره سريعه وتحدث السخونه بسبب نقص تزييت القطع المتحركه فتزيد الحراره لزيادة الاحتكاك ! 3- انسداد مجارى مياه التبريد فى جسم الموتور نفسه ( حول و بين السلندرات ) ! 4-تشغيل الموتور على سرعات عاليه لمده طويله بدون حمل ( السياره واقفه ) لعدم وجود هواء مندفع للتبريد من الشبكه الآماميه ! 5- طلمبة الزيت أو فلتر الزيت بهم عطل ولا تتم دورة الزيت جيدآ ! 6- عدم تصريف العادم بصوره جيده ( لعيب فى الشكمان ) يسبب ارتداد حرارى للموتور ! 7- طريقة قياده سيئه ( كالسير لمده طويله ب RPM عالى على نقله صغيره ( الثانى مثلا) وشكرآآآآآآآآآآآآآآ ملحوظه : اللون الطحينى ممكن أن تجده فى الرادياتير أيضآ ! Dr. Bolbolan ptmnlo123per122

ردودك دايما في الجون مفيش رد اوفسايد هههههههه
تسلم ايدك يا دكتور و ربنا يخليك لينا

[m_o_sakr]

المشاركة الأصلية كتبت بواسطة بوالينو موضوع جميل / بس ايه معني خشونه في طلمبه الميه

خشونه فى طلمبه المياه بتكون نتيجه صوت من رولمان بلى الطلمبه نتيجه التآكل الزائد و بالتالى بتعمل صوت احتكاك زياده و هو ده الى بيعمل صوت الخشونه

[Dr. Bolbolan]

المشاركة الأصلية كتبت بواسطة pro mada و الله ما اعرف كل اللي اعرفه انها بتسبب سخونيه في المكنه و بتدي فرصه للمبه الحراره انها تنور اصل طلمبه الميه بتاعت عربيتي كان فيها خشونه ولما سألت يعني ايه خشونه ؟؟؟؟؟؟؟؟ قعد يشرح و انا مش فاهم حاجه المهم انها لازم تتغير

خشونه فى الطرمبه ! زى لما تروح كده عند الدكتور ويكون عندك حاله عويصه مثلا فى

الكلى أو الرئتين ! وانت تقول له عندى ايه يا دكتور وده من ايه و جت ازاى ! وعلشان

طبعآ مش ح يقعد يشرح لك طب وحاجات معقده مش ح تفهمها ! يقولك " شوية برد " !

يعنى المختصر المفيد بالنسبه للدكتور وللعيان ! الطرمبه ( فى الحقيقه اسمها طلمبه )

بتخسر نتيجة انتهاء عمرها الافتراضى من كثرة الاستعمال و من ترسب الآملاح وتأثير

الكلور الموجود فى مياه الحنفيه و ده بيسبب تآكل ريش الطلمبه اللى بتحرك الماء أساسآ

و بتدفعه فى اتجاه واحد ! و كمان الترسبات دى بتعمل زى الجير أو الاسمنت حول الآجزاء

المتحركه مثل عامود المروحه وبتأثر على رولمان البلى فتؤدى الى تباطىء حركة العامود

أو حتى توقفه نهائيآ عن العمل !

عمومآ ما تحاولش تسأل الميكانيكى هى البتاعه دى ايه و بتشتغل ازاى و دى غاليه ولا رخيصه

بعدين يقول لك العربيه تعبانه أوى والكاربوراتير وقع فى الكارتير ! وياكل عليك عيش !

Dr. Bolbolan ptmnlo123per122

[AbOnOrA]

ايه يا جماعة الحلاوة ديه فشر الرشيدى الميزان ptmnlo123per1147

موضوع جميل منك يا مادا واضافات وتصحيحات اكثر من رائعة من صقر باشا ثم افادة واجادة وتتمة من الحكيم الرائع دائماً دكتور بلبلان بشكل خلى الموضوع اصبح موسوعة فى اسباب وطرق علاج مشاكل سخونة المحرك خاصة ان سخونة المحرك عامل زى الصداع اللى ممكن ميت حاجة تكون السبب فيه ويجب مراجعة اداء وفعالية اكثر من نظام للتاكد من سبب المشكلة الحقيقى والا هتخش فى دومات الميكانيكة زى ما قال الدكتور بلبلان

فالهدف ان القارىء يعرف الاحتمالات ويحاول يضيق نطاقها لاحتمال او اتنين ويحاول يتاكد منهم علشان يروح للحرفى يقولة غير كذا او اكشف على كذا بدل ما يبهدله

اتفضلو بقى شوفو الموسوعة الجميلة اللى عملتوها بمشاركتكم واضافتكم واللى بجد تعتبر افضل موسوعة شوفتها حتى الان عن مشاكل التبريد

اسباب سخونه المحرك :

اولاً اسباب ترجع لمشاكل المحرك الداخلية
1 - وش السليندر :
لما وش السليندر بيتكسر او بيحصل فيه شرخ بيدخل زيت العربيه علي البنزين (مياه التبريد) و بيعملوا لون طحيني في مقياس الزيت
( الحل : تخرط وش السليندر او تجيب وش سليندر جديد )
وده من اهم اسبابه الشائعه انك تزود ميه للموتور و العربيه سخنه

2 - جوان وش السليندر :
غالبا لما وش السليندر بيحصل فيه مشكله الجوان بيسيح او بيحصل فيه شروخ و برضه بيبقي مقياس الزيت لونه طحيني للاسباب السابق ذكرها
( الحل : (الجوان لازم يتغير, مينفعش يتخرط) او تجيب جوان جديد )

3- تآكل الشنابر أو جسم السلندر مما يسبب دخول الزيت الى غرفة الاحتراق واحتراقه مع البنزين فينقص الزيت بصوره سريعه وتحدث السخونه بسبب نقص تزييت القطع المتحركه فتزيد الحراره لزيادة الاحتكاك !
(الحل : تعمير الموتور) مع مراعاه ان الاضافات المستخدمة لحل المشاكل ديه ماهى الا مسكنات فقط كزيت الريسورس ولا تغنى عن ضرورة عمل العمرة او استبدال المحرك

4- انسداد مجارى مياه التبريد فى جسم الموتور نفسه ( حول و بين السلندرات ) !
(الحل : عمل غسيل كامل لدورة التبريد باستخدام الاجهزة والمواد الخاصة بذلك وبواسطة المختصين)
!! اكرر غسيل الدورة بالكامل مش غسيل الريداتير ولا الموتور فلاش

5- اعطال ومشاكل ميكانيزم ادارة الصمامات (التاكيهات)
فظبط التاكيهات بشكل غير سليم او تلف الكامات او يايات التحكم كلها يمكن ان تؤثر سلباً عن اداء المحرك وحرارتة



ثانياً اسباب ترجع لمشاكل منظومة التبريد):
1 - الريدياتير :
الريدياتير هو اساس عمليه تبريد المحرك و طبعا مع الحوادث الريدياتير بيتخرم فميه التبريد بتتسرب و بتسبب سخونه في المحرك نتيجه التسريب
( الحل : تغير الردياتير بأكمله او تلحمه لكنه حل مؤقت )
او ان ريش التبريد (الفينز) فى الردياتير بتكون اتنت فبتسد مجرى الهواء اللازم لتبريد الرديلتير

2 - غطا الريدياتير :
الغطا ده لما بيتكسر (او السيل بتاعه ينشف او يتقطع و ده بيكون عمر افتراضى او جوده قليله للمنتج او تعرض المحرك لسخونه عاليه فى وقت سابق) بيسبب خلل في عمليه التبريد فتزداد حراره المحرك نتيجه كسر الغطا
( الحل : تجيب واحد جديد و يفضل يكون اصلي )

3 - طلمبه الميه :
لما بيحصل خشونه في طلمبه الميه بيحصل خلل في عمليه التبريد نتيجه الخشونه اللي حصلت
( الحل : تغير طلمبه الميه )
تتلف مضخه المياه نتيجه عدم استعمال مانع صدأ مع مياه التبريد (يعنى استخدام مياه من الحنفيه مش ميه زرقاء او خضراْ او اياً كان لونها) او بسبب العمر الإفتراضى فهى جزئ ميكانيكى به احتكاك و يستهلك و يجب تغييره دورياً طبقاً لعمره الإفتراضى

4 - المروحه :
لما رفرف من المروحه يتكسر او المروحه تتعطل بأكملها بتزداد درجه حراره ميه التبريد فيزيد درجه حراره المحرك نتيجه لذلك
( الحل : تغيير المروحه )

5 - القربه :
عند حدوث الحوادث القربه بتتخرم و بتسرب ميه التبريد فبيحصل سخونه في درجه حراره المحرك نتيجه للتسريب
( الحل : تغيير القربه او لحامها و لكنه حل مؤقت )
او عند زياده درجه الحراره بشكل ملحوظ لمده او مدد طويله فإن قربه المياه يحدث بها تشققات

6 -انابيب ميه التبريد :
في بعض الاحيان الانابيب دي بتتسد فبيحصل خلل في عمليه التبريد فبتزيد حراره المحرك نتيجه لانسداد تلك الانابيب
( الحل : تنظيف الانابيب او استبدالها)

7- ترموستات الكوع (صمام) رفع الحرارة :
غالباً ما تجهز بعض السيارات بصمام يقوم بغلق دائرة التبريد على حيز اقل من المياة لتسريع عملية تسخين السيارة فى الصباح خاصة فى السيارات التى تجهز للعمل فى الاجواء الباردة وتلف الصمام ده بيؤدى لسخونة العربية بشكل وسرعة رهيبة ويفضل تغيير الصمام او الغائه من الاساس حيث انه ملوش لازمة حقيقية فى جو مصر ومن اشهر العربيات اللى بيحصل فيها تلف للصمام ده الادا القديم وكان بيسمى ترموستات الكوع

ثالثاً اسباب تتعلق بمنظومة التزييت :
تعتبر منظومة تزييت المحرك عاملاً اساسياً للمحافظة على درجة حرارة مناسبة للتشغيل وبالتالى اى قصور فى منظومة تزييت المحرك تؤدى الى احتكاك اكبر بين مكوناتة وبالتالى حرارة اكبر تفوق استطاعة منظومة التبريد

1- عطل فى طلمبة الزيت او انسداد فلتر الزيت وبالتالى قصور دورة التزييت
الحل استبدال القطع التالفة واعادة تعبئة زيت المحرك باخر جديد

2- انقضاء فترة صلاحية الزيت بالاستخدام الشاق او بطول مدة استخدامة بما يفقدة خواصة
الحل : اعادة تعبئة زيت المحرك مع تغيير الفلتر

3- استخدام زيت بمواصفات غير مناسبة مع السيارة خاصة من حيث درجات اللزوجة وتحمل الحرارة

رابعاً اسباب تتعلق باسلوب القيادة :
1- السير لماسافات طويلة على غيارات منخفضة او ما يسمى بالحرق على الغيارات او ما يسمى بتفصيل الغيارات مع اختلاف التطبيق والاضرار الا ان كل هذه الاساليب مع التكرار والاستمرارية او تأديتها بشكل مبالغ فيه او غير مدروس يؤدى الى ارتفاع حرارة المحرك وناقل الحركة ايضاً واحتمالية تلف مكوناتهم الداخلية او على الاقل تناقص كفائتها بشكل كبير

2- تشغيل السيارة لفترات طويلة على الحمل الخالى (العربية دايرة بس بدون حركة) حيث تعتمد السيارات الحديثة على حركتها التى تعزز من اندفاع الهواء الى مقدمتها بشكل يحقق الهواء الكافى لتبريد المياة فى انابيب الريداتير وتشغيل السيارة بدون حركة يجعل عبء تبريد المحرك ينصب بالكامل على المروحة فقط

خامساً اسباب تتعلق بمنظومة العادم :
تعتبر منظومة العادم من اهم الوسائل التى تعمل على اخراج الحرارة الناتجة عن الاحراق وطردها خارج المحرك والسيارة عموماً واى انسداد فى ماسورة العادم يؤدى الى التقليل من كفائة عملية طرد هذه الغازات الحارة وبالتالى زيادة فى حرارة المحرك

سادساً اسباب تتعلق بكهرباء السيارة :
1- تلف الثرموستات لإنه مبيخليش مروحه التبريد تشتغل و بالتالى الميه بتسخن و مبتبردش الموتور
و كمان فى معظم السيارات الحديثه المروحه بتكون كهرباء و بالتالى اى مشكله فى كهرباء السياره او الفيوزات قد تؤثر على اداء دوره التبريد

2- تلف محرك تدوير المروحة او احد وصلاتة

3- تلف حساس قراءه الحرارة او مؤشر بيان الحرارة


لو حد تانى لى اضافات يذكرها وبإذن الله نجمع كل الاضافات ونحطها فى مقدمة الموضوع بعد اذن مادا طبعاً بالاضافة لوضعها فى قائمة افضل موضوعات المنتدى