تغيير الكاتينة باكثر من 3000 جنيه

[نسر عربي]

المشاركة الأصلية كتبت بواسطة AbOnOrA منصحكش توفر فى حاجة تخص الالات الجر ده لو عفشه حتى كنت يمكن اقولك ماشى بس سير الكاتينه اللى الناس بتستهيفه ممكن يدمر العربيه كلها لا قدر الله واحد زميلنا هنا فى المنتدى ضرب معاه السير فى نص الطريق لبست فيه عربيه من ورا طيرت نص العربيه وطبعاً الموتور كان ادغدغ فمبقتش نافعة خالص وكل ده بسبب سير كاتينه فمتستهونش بيه

يا باشا انا عمري ماحاسيب سير كاتينة من غير تغيير لبعد ميعاده، انا عمري ماعملت كدة و لا حاعمل كدة، بس في نفس الوقت مش حاخلي التوكيل يستغلني و حاجيبه من برة و حاغيره قبل ميعاده كمان.انا عندي كل حاجة في العربية ليها logbook زي الطيارات و كله بالعداد

[نسر عربي]

طيب لو اشتريت كاتينة رينو لاجونا 2000 سي سي تمشي مع موتور الماهيندرا البنزين ؟

[mr_astra]

اى سير تقسيمة (كاتينة ) بيتباع بالمقاس
والمقاس هو عدد السنون × عرض السير
ادى قصة السير وموجود فى التوفيقية كتير عند الهوارى متخصص سيور ولا تقول نوع العربية ولا بتاع اية
وهاتجيبة من 50 جنية وانت طالع
اما البكر والشدادات عمرها ما بتبوظ فى يوم وليلة ولكن بيكون فى مؤشرات قبل التلف مثل صوت نحرة او بلية هاتقدر تسمعة وتحددة كويس اوى

اما التروس (بتاعة الكامة ) اعتقد ان عمرها طويل جدااااااااااااااا وطالما السير على طول جديد يبقى تروس الكامة هاتفضل سليمة طول الوقت
بالنسبة للتركيب
ممكن تتعرف على اى حد من اللى فى التوكيل وكلهم عندهم ورش برة التوكيل وتتفق معاه تروحلة عشان تركب السير
ولما اجيب السير من برة التوكيل يبقى اغيرة قبل ميعادة نقول بنصف عدد الكيلو مترات

[Hisham.Elgazzar]

المشاركة الأصلية كتبت بواسطة نسر عربي شكرا يا استاذ هشام، سؤال اللي بيبيعوا في التوفيقية دول بيبيعوا البكر و السيور و الشدادات بتاعة الماهيندرا؟ و الا هي كلها مقاساتها قياسية و بيبيعوا بالمقاس؟ والا بيبيعوا حاجات الرينو لاغونا 2000 سي سي؟ و اذا كانوا بيبعوا الحاجات دي بالمقاس اجيب المقاسات ازاي؟ لازم افك الموتور مرة قبل الشراء؟ والا هم عارفين؟

العفو يا كومندا
انا أقصد حضرتك تفك الحاجات اللى عاوزة تتغير ومن التوفيقية هتجيب نفس السير وتسأل هناك كمان منين تجيب نفس التروس بتاعت الكامة
هتقف اوفر بكتير من حاجتها الأصليه والخامات أكيد هتبقى احسن لو من متخصص سيور زى ما أفادنا الباشمهندس محمد فى المشاركة السابقة

[نسر عربي]

انا اكتشفت ان سير الكاتينة هو هو سير كاتينة اللاجونا و موجود عند بتوع الرينو اللي شغالين في اللاجونا مفيش أي مشكلة و السير ب120 تقريبا و البكر تقريبا ب 300 يمكن، و كمان اكتشفت عندهم نفس فلتر الزيت بتاع الماهيندرا هو هو الرينو، و كمان اكتشفت حاجة تانية لذيذة ان عندهم نفس تيل الفرامل بتاعها من الماركة الفرنسية الشهيرة جدا Bendix وده بيبيعوه للعربية الرينو بس كل الحكاية بتحتاج تشيل منه حتتين صغيرين بالمكنة من الجنبين و بعد كدة بيركب عادي جدا في الماهيندرا.