ما هى حقيقه رينو ميجان ؟

[ahmed_kamel]

ياسيدي إنت منورنا بوجودك وسطنا ..... والله العظيم أنا ماأقصد حاجه ولاغيره ولا شد ولا جذب ولا أي حاجه خالص ... تشريفك لينا كفايه وعلى عينا وراسنا

أما بالنسبه لإختيارك لسياره .... فكر في الأوكتافيا .... بتستحمل وإعتماديه وسعر إعادة بيعها جيد وماتقلقش من أعطالها ولا أي حاجه

قولنا بس على الميزانيه وحندلك بإذن الله

[chato_eg]

يا أخ محمد إسماعيل...
أنا مش فاهم بصراحة إنت زعلان منى و لا لأ
على كل لو زعلان وضح لى بس سبب زعلك علشان أنا مش فاهم إنت زعلان منى ليه
مافيش حد بيفهم كل حاجة فى كل حاجة..علشان كده المنتدى عبارة عن تجميع لخبرات و تخزين هذا الموروث لكى يصبح محفوظا و متاحا للجميع و لو بعد زمن من الآن
كون إنى جبت سيرة Range Rover علشان إنت حسستنى بتعبير "جيب عمالقة الدفع الرباعى" إنهم أحسن ناس....جايز من وجهة نظرك الكلام ده صحيح...بس كنت قول الأسباب إللى خليتك تطلق التعبير الجزل ده عليهم
و برضه مسألة فخامة الأمريكى و على رأسهم كاديلاك....حسستنى إنها أفخم عربيات الدنيا....فحبيت أقول إنها مش أفخم و لا حاجة
ده لا يعنى إنك غلطان فى أى حاجة و لا يعنى إن السيارات الأمريكى سيئة
أنا بس جائز أكون بأدقق فى درجة التعبير عن الرأى...فمثل ما إنت قلت إنهم عمالقة أنا بدورى وضحت ليه هما مش عمالقة....
قد أكون أنا مخطىء و إنت مصيب...لكن الله أعلم.....عموما الأمور فى الحياة بتكون نسبية...مش قيم مطلقة...يعنى مافيش حاجة اسمها أحسن عربية فى الدنيا....الكمال لله وحده

بالنسبة لسؤالك الأساسى بتاع ليه فى رأيين بخصوص الميجان
اسمح لى أرد عليك بسؤال آخر....فى إيه فى الدنيا الناس كلها اتفقت و أجمعت على رأى واحد بشأنه ؟؟
الميجان زيها زى أى حاجة فى الدنيا....ليها مزاياها و ليها عيوبها....إللى أنا مش بأحبه بس هو تضخيم العيوب..و إنت علشان ما تعرفهاش كويس فمش مدرك حجم اللغط و الشائعات و الأقاويل إللى طلعت عليها...فبتلاقى ملاكها المحبين ليها بيدافعوا بقلب حبتين عنها...مش أكتر من كده

لكن هى عربية عملها رجال زيك و زى...مش مخلوقات أكثر تقدما و لا حاجة...بس هى برضه الشهادة لله مبذول فيها جهد أحسن من خليفتها الميجان III مثلا...و الجيل الثانى أثار الجدل لما خرج للنور.....لإنها فعلا متميزة...لكن أرجع و أقول....دى وجهات نظر...فى ناس ما يأكلش معاها الشغل الفرنساوى....هما بتوع الألمانى و بس
فللأسف الشديد...لن تحصل على إجابة مؤكدة على سؤال بهذا الشكل....الحل الوحيد هو إنت تستخرج النقاط الهامة و الجوانب التى تهمك فى السيارة من الحوار الذى دار لكى تعرف أنت بنفسك...هل الميجان هى ضالتك التى تبحث عنها أم خيرها فى غيرها.....
و لو فى أسئلة محددة عنها...الناس هنا كلها خدومة و هترد عليك قدر المستطاع...
و كل سنة و إنت طيب

[xxx2007]

السلام عليكم
اسف لانقاعى طوال هذه المده عن المنتدى وعدم السرعه فى الرد على الاخوه الاعضاء نظراً لغيابى
طبعا فى البدايه احب احييك يا حضره المشرف الف الف شكر يا احمد باشا دا حضرتك و الله اللى كلك ذوق الله يكرمك دا نورك والشرف ليا حضرتك انا وانا عارف طبعا ان حضرتك مش قصدك اى حاجه لا سمح الله و العفو حضرتك صادق من غير حلفان وكلنا هنا اخوه و اصدقاء و مفيش بينا اى زعل لا سمح الله مهما اختلفت اراءنا و الف شكر مره تانيه
بارك الله فيك

[xxx2007]

زميلى العضو هانى محمد
اهلا بك و مرحبا من جديد و اسف على الغياب وعدم سرعه الرد
وانت طيب وبعوده الايام ان شاء الله ( ولو انها متأخره)
حلو انك كتبتلى باسمى الحقيقى دا نادر لما بيحصل فى المنتديات (ولو نى مش عارف السبب لانك لو قولتلى يا اكس كنت هاأرد برضه) وخلانى احس اننا معرفه شخصيه عشان كدا عملت زيك .
اولا انا مش زعلان منك ولا من اى حد الحمد لله و ربنا مايجيب زعل
ثانيا (وخلى بالك عشان نانيا دى هاطول شويه !!)
ايه اللى خلاك تتصور انى زعلان منك بس؟ ازعل منك ليه ؟ دا انا بعد اول مره دخلت وشاركت فيها دخلت صفحتك و كتبت لك رساله زائر وانت رديت عليا هزرت معايا و دعتلى ، فاكر؟
انا ازعم انى متفهم جيد لطبيعه البشر ، واتعاملت مع ناس ياما من كل صنف تقريبا ًوعارف ان فيه ناس لما يحبو حاجه او يؤمنوا بيها بيدافعو عنها بمنتهى القوه حتى لو وصلت لانهم يضحو يحياتهم فى سبيلها .
و دا فى حد ذاته شئ جميل ( اقصد طبعا الثبات على المبدأ والتضحيه فى سبيله ) لكنى احبذ دوما لغه الانحياز الحيادى بمعنى ان ادافع عما اؤيد دون ان اهاجم او احتد او اسخر او اقلل من شأن الاخر مهما كانت قوه معارضته لى و اختلافه معى فى الرأى ، فمن حق الجميع التعبير عن افكاره و ابداء اراءه مهما كانت دون ان يكون من حق احد ان يصادر على اراءه و هذه من حقوق اى انسان ( حق التعبير عن الرأى و حق عرض الافكار ) والتى تقع فى اطاره الحريات الشخصيه (حريه التعبير وحريه الفكر)
ارجو انك تاخد كلامى بصدر رحب فانا طبعا لم اتهمك بحده الطبع او الهجوميه ما شابه و كذلك لم اتهمك بالمصادره على اراء الاخرين ولكنى فقط اوضح لك بعض مما شعرت به و مما قد يشعر به اى شخص من خلال كلماتك برغم انك قد تكون لا تقصد و ربما يكون هذا هو اسلوبك وهذه هى طباعك الذى نحترمه جميعا ( اسلوبك) ولكن هذا الامرقد يتسبب فى الزعل لدى بعض ممن ( اختلفت )معهم مما يؤدى الى انخفاض الود بننا جميعا كزملاء واعضاء فى منتدى واحد.
و لقد وافقتك فى الرأى بالفعل فى بعض النقاط واذا راجعت كلامى هتلاقى دا واضح .
بالنسبه للاند روفر و جاجوار فهما شركتان بريطانيتان عريقتان ولهما اثر كبير و بصمه غائره فى مجال صناعه السيارات و هذا الاهر لا يختلف اثنان ولكنى لم اشاء عندما ذكرت لاند روفر واد ايه هيه قويه وجباره واتصدت للازمات عبر الزمن انى اقولك ان لاند روفر بمجرد حدوث الازمه الماليه العالميه انهارت وكانت هاتفلس هى وجاجوار لولا تاتا احقتهم واشترتهم و دا شراء نهائى مش مجرد مساهمه لا رجعه فيه لدرجه انهم اتفقوا مع تاتا على انشاء صندوق تأمينات للعاملين عشان حقوقهم ماتضيعش و طبعا وافقت تاتا على الصقفه واشترت الشركتين الجبارتين ، يعنى لاند روفر لا طلعت قويه و لا بتتصدى للازمات ولا ولا حاجه وحصلها نفس اللى حصل لكريسلر وحنرال موتوز ولو راجعت اخبار الاقتصاد السنه اللى فاتت وتحديدا فى بدايه الازمه الماليه العالميه اللى ابتدت تقريبا شهر تمانيه السنه اللى فاتت (بالمناسبه تاتا دى شركه صناعه سيارات هنديه صاحبها الملياردير الهندى الشهير راحيف تاتا ) لحسن تقول دا داخل يتفذلك علينا و لا حاجه . ( اصل دا جزء من دراستى وانا عملت السنه اللى فاتت بحث كامل عن الازمه واثارها وسبل مواجهتها )
لما جبت انا سيره جيب و هامر قولت عليهم جبابره لكن مقولتش فين ؟ لانى شايف ان دول جبابره فى امريكا و روفر فى اوروبا و فى النهايه الاتنين ليهم جمهور عريض هنا وهنا يعنى جيب وهامره بيبيعوا حلو فى اوروبا وروفر شرحه فى امريكا ولولا اختلاف الاذواق لبارت السلعه و انا ماقولتش ولا عمرى هاقول ان دول احسن ناس ولا دى احسن عربيات فى الدنيا ولا هاقول كدا ابدا حتى من وجه نظرى لانى اعتقد ان دا ممكن بيقى فيه شبه تعصب وانحياز و ضرب باراء الاخرين عرض الحائط دا اللى لا يمكن اعمله ابدا ، و التعبير مش جذل ولا حاجه دى مجرد استعاره ( على ما اظن اصلى ماكنتش ادبى ) و دا مش معناه انهم لوحدهم اللى الدنيا ما عنك فورد اهه بتعمل فور باى فور زى الفل وشغاله فى كل حته محدش قال عليها وحشه و بى ام ومرسيدس كمان وانفنتى و ميتسوبيشى وحت هيونداى و شغالين ولهم زبونهم و ميه ميه واهم مش متخصصيين دفع رباعى ولا حاجه اهم اما اسبابى انى بستظرفهم يعنى بيعجبونى كاشكال وتصميمات و كلام بقراه عنهم لكن اداء مخبيش عليك عمرى ما جربت اى وحده منهم !! بس
و نفس الكلام بالنسبه لكاديلاك ولعلمك انا من معجبى جاجوار وبنتلى الكبار big fan ، شوفت الكونتننتال ؟ حته تحفه !!
يعنى من الاخر انا لا منحاز لامريكان وضد اوروبيين لا دول و لا عمى ولا دول ولا خالى انا مع الصناعه الحلوه وبس
اما اعتراضى فكان على ان الحكايه راحت بعيد وخدت منحنى تانى ، منحنى مقارنه بين الامريكى والاوروبى ومين حلو ومين وحش ودفاع وهجوم فخشيت اننا نخش فى قصص تانيه ملهاش لازمه و ملهاش علاقه بالموضوع من اصله
عشان كدا قولت الكلام دا عشان نرجع للموضوع الاصلى .
الكمال لله وحده دى مش مجتاجه تعليق .
كل عربيه و ليها مميزات وليا عيوب و فعلا مفيش حاجه ولا حد فى الدنيا اجتمعت عليها او عليه الاراء سواء بالسلب او بالايجاب دا شئ طبيعى اوافقك الرأى عليه ومش محتاج تعليق ، لكن لما تختلف الاراء بالحده دى وبالشكل دا حولين عربيه يعنى ناس تقول عليها اسوء عربيه عبر العصور وناس تانيه تقول عليها اعظم عربيه فى الدنيا بيقى لازم اسال عشان افهم ايه الحكايه، ادينى رديت على سؤالك برغم انك مرديتش على سؤالى وجاوبتنى بسؤال تانى .
انا بس ضد الانحياز والتعتصب مش اكتر . وعلى فكره انا لما كتبت الكلام دا ماكنش موجه ليك تحديدا لكن و لا موجه لحد لكن كان مجرد تعبير عن رأى المتواضع غير الخبير فى الموضوع و اعتقد ان احساسك بأنى لا سمح الله عاوز اشكك فى كلامك ولا اطلعك غلطان او حتى انى احسسك ان العربيات الامريكانى احسن عربيات فى الدنيا اسمح لى ماكنش فى محله وانا عمرى ماقولت ولا هاقول كدا .
وفعلا محدش بيفهم فى كل حاجه و المنتدى مرجع رائع فعلا يا رب يفضل كدا على طول باعضاءه الكرام ومجهوداتهم المشكوره.
وانا معاك معاك ان المغالاه و المبالغه فى اظهار عيوب شئ او مميزاته كذلك خطأ ولا ينبغى ان تحدث و ينبغى على كل انسان توخى الدقه والحياده عند اباء الرأى يعنى زى ماتقول الحو قول الوحش والعكس صحيح طبعا
اشكرك على تدقيقك فى مدى دقه تعبيراتى واتمنى انى مكونش طلعت ببالغ و اسف اذا كان دا عن غير قصد .
و فى النهايه انت لا غلطان ولا حاجه يا سيدى العفو ومعاك حق لو انا عايز فعلا اجابه شافيه مع احترامى لاراء كل الزملاء الاعضاء واراءهم كلهم على راسى من فوق اللى وحشه واللى قال حلوه لازم اجرب الميجان بنفسى واحكم
شكرا لمرورك .
و.....
اوعى تزعل ............. فاهم ولا لأ ؟ LOL

و شكرا

[Payoo]

المشاركة الأصلية كتبت بواسطة xxx2007 (بالمناسبه تاتا دى شركه صناعه سيارات هنديه صاحبها الملياردير الهندى الشهير راحيف تاتا ) لحسن تقول دا داخل يتفذلك علينا و لا حاجه . ( اصل دا جزء من دراستى وانا عملت السنه اللى فاتت بحث كامل عن الازمه واثارها وسبل مواجهتها )

أستاذ محمد طالما أن مجال دراستك يشمل مجال كهذا يبقى أكيد كلام حضرتك له قيمه علميه و يجب ان تحترم
و وجهات نظرك واسلوب عرضك لها أراه جدير بالاحترام والتقدير

شكرا لك أسلوبك العلمي المهذب