ملاحظاتى الشخصية كمبتدئ فى (سواقة عربية مانيوال)

[Ahmed Kabil]

ملاحظاتى الشخصية

سواقة عربية مانيوال

ا) بنزين - فرامل - دبرياج

يمين - وسط - يسار ((دا الترتيب لو انت قاعد و سايق))

ب) لتغيير الغيار أثناء السواقة :- دبرياج على الآخر + الغيار المطلوب

ج) للتوقف :- دبرياج على الآخر + فرامل على الاخر

د) للتهدئة :- دبرياج على الآخر + فرامل على الراحة ((واحدة واحدة))

هـ) بالنسبة ليا كمبتدئ سواقة :-

يفضل السواقة على الغيار ((2)) التانى ..... اقصى سرعه ليه ((30-40))

و) السواقة فى منطقة سكنية :-

اسواق على الراحة و بشويش على الغيار ((2)) التانى.

اجيب الغيار ((1)) الاول لو هقف فى زحمة مثلا او الطريق هيخلينى اقف وامشى بالراحة جدا

دايما مجهز رجلى على الدبرياج بدون الضغط عليه ((تحسبا للمفاجأت)).

ز) المطبات :-

أهدى و انا داخل على المطب ((دبرياج + فرامل)) ... وانا طالع ع المطب ببدأ اشيل رجلى اليمين من على الفرامل وواحدة واحدة ارفع رجلى الشمال عن دبرياج حاجه بسيطة و اثبتها و ادوس شعرة بنزين برجلى اليمين فى نفس الوقت.

يفضل انى اخد المطب على الغيار ((1 او 2)) الاول او التانى.

لو كنت داخل على المطب على الغيار ((3 او اكبر)) يعنى بسرعة زياده ... بهدى سرعتى برضه ((بدبرياج + فرامل)) و بعدها اجيب الغيار ((2)) و اعدى المطب بنفس الطريقة ال فاتت.

طبعا اهم حاجة فى موضوع المطبات دا .... ان العربية متوقفش منى على المطب ولا تتخبط او تاكل المطب.

ح) الدوران او تحويلة او يوتيرن :-

أهدى سرعتى و انا داخل على اى دوران ((دبرياج + فرامل)).

اقف براحة و اشوف جميع الاتجاهات.

ادى اشارة للاتجاه ال هدخل فيه.

انقل الغيار على ((1)) الاول.

ابدأ اتحرك و اكسر على الواسع.

طب لو حد طلع قدامى فجأة وانا بتحرك ((سواء عربية او موتوسيكل او اى حاجة)) ..... دبرياج على الاخر + فرامل واقف لحد ما يعدى وبعدها اكمل طريقى.

دى مجرد ملاحظات اتعلمتها و طبقتها واتمنى افيد غيرى و اتعلم منكم لو فيه حاجه مفروض اعدلها ف ال كتبته
ربنا يوفقنا جميعا و يسترها معانا و يحفظنا و يحفظ اهلنا و احبابنا و بلدنا من كل سوء و شر

[ahmed_eng2001]

ربنا يوفقك ...
انت وصفت الحركات وصفا دقيقا .. و اعتقد ان حضرتك مع الخبرة حتبدا تغير فى الحركات دى حاجات بسيطة
تاخد حساسية الفرامل .. و امتى تدوس على الدبرياج و امتى متدوسش خالص
ربنا يوفقك

[zing0]

تمام يا بشمهندس أحمد
كان أستاذنا مستر أسترا بيقولب ممكن نسوق العربية المانيوال و نأخد غيارات كمان من غير دبرياج خالص!!!
لحد الآن أنا مش فاهم إزاى بس موضوع "متلازمة الدبرياج" اللى بتبقى فى الأول بتقل مع الوقت بالإحساس.
يعنى تدوس فرامل من غير دبرياج و عدد لفات المحرك يقل و قبل ميبطل تدوس دبرياج.
و على فكرة الفرامل مع غيار متعشق بتكون أقوى بكتيييييير من فرامل فقط مع فصل الغيارات بالدبرياج بالإضافة لتآكل التيل و الطنابير و اسطوانة الدبرياج بسرعة.
بس فى البداية كلنا كنا هذا الرجل. لو عاوز تشغل الإشارات أو تقلب نور ممكن تدوس دبرياج عادى
ربنا يسلم طريقنا و يحفظنا من كل سوء و إن شاء الله الأستاذ Ahmed Kabil هيبقى ليه مستقبل إحترافى كبير فى السواقة بملاحظاته الدقيقة .

[ahmed_eng2001]

المشاركة الأصلية كتبت بواسطة zing0 تمام يا بشمهندس أحمد كان أستاذنا مستر أسترا بيقولب ممكن نسوق العربية المانيوال و نأخد غيارات كمان من غير دبرياج خالص!!! لحد الآن أنا مش فاهم إزاى بس موضوع "متلازمة الدبرياج" اللى بتبقى فى الأول بتقل مع الوقت بالإحساس. يعنى تدوس فرامل من غير دبرياج و عدد لفات المحرك يقل و قبل ميبطل تدوس دبرياج. و على فكرة الفرامل مع غيار متعشق بتكون أقوى بكتيييييير من فرامل فقط مع فصل الغيارات بالدبرياج بالإضافة لتآكل التيل و الطنابير و اسطوانة الدبرياج بسرعة. بس فى البداية كلنا كنا هذا الرجل. لو عاوز تشغل الإشارات أو تقلب نور ممكن تدوس دبرياج عادى ربنا يسلم طريقنا و يحفظنا من كل سوء و إن شاء الله الأستاذ Ahmed Kabil هيبقى ليه مستقبل إحترافى كبير فى السواقة بملاحظاته الدقيقة .

بالفعل يا باشا ...
الاستاذ محمد ذكر كدة فعلا فى احد المواضيع
و فكرتنى بالواحد لما كان بيسوق جديد ..... كان بيدوس دبرياج لما يحب يفتح النور

[Ahmed Kabil]

[QUOTE=ahmed_eng2001;10027 56]ربنا يوفقك ...
انت وصفت الحركات وصفا دقيقا .. و اعتقد ان حضرتك مع الخبرة حتبدا تغير فى الحركات دى حاجات بسيطة
تاخد حساسية الفرامل .. و امتى تدوس على الدبرياج و امتى متدوسش خالص
ربنا يوفقك

انا شاكر لحضرتك جدا على تعليقك
واتمنى باذن الله اكون افضل بالممارسة و التعود
وان شاء الله زى ما حضرتك قلت ..... مع الوقت و الخبرة هعرف امتى ادوس دبرياج و امتى لا
جزاك الله كل خير يا باشمهندس احمد