حكايتى مع الكيا برايد 99

[Abo.ZiaD]

السلام عليكم اعضاء المنتدى الكرام
يسعدنى انى انضم ليكم وان يكون بداية اول مواضيعى بحكايتى مع الكيا برايد خاصة انى من مقتنيى الكيا برايد " العصفورة " من سنتبن وهى عربية جميله جدا
مميزاتها " من وجهة نظرى المتواضعه "

1- صغيرة الحجم "سهل التنقل بيها وخاصة فى الزحم الشديد بمصرنا العزيزة - اركن بها فى مكان - خفيفة ... طبعا ده ميزة وعيب فى نفس ذات الوقت .. !!
2- أعتمادية " من استهلاك بنزين - قطع غيار رخيصة نسبيا - متوفرة " طبعا عند ناس معينة " ..!!
3- تنفع تكون عائلة وخصوصا لو عائلة صغيرة زى عائلتى ..!!
4- اعطالها قليله " طبعا ده حسب الحالة .. ومدى اهتمامك بيها يعنى اول متشتكى من حاجة توديها عند دكتور" ..!!
5- سعر اعادة البيع
العيوب " طبعا برضو من اللى انا شوفته منها "
1- خفيفة على الطرق السريعه " هههه بتخاف وتترعش لما يعدى جانبها اى نقل تقيل "
2- قطع الغيار منها الصينى كتيرررررر ولو مش عارف تفرق او تلاقى تاجر امين هتحتاس زيى كده ...!!
3- مشكله طبعا عويصة فى موضوع العفشة " احتمال كبير فى عيب مش عارف اكتشفه فيها " كل فترة اغير الكبالن سواء داخليه او خارجية تقريبا الفترة من ست الى ثمان شهور او سنه حسب استخدامى ليها "
4- انى الاقى فنى فاهم ومش فتاى وبيجرب او مش نصاب " طبعا مشكلة ناس كتير " وخصوصا انى بحاول استقرب ان يكون فيه حد عندى فى مدينه نصر ..!!
5 - مشكلة طبعا انها بدون كماليات زى الباور - التكييف - والزجاج الكهرباء - والسنتر طبعا اغلب الحاجات ديا ممكن تتركب بس بصراحه الواحد مش بيكون فاضى علشان يحط حاجة مش عامله مشكله فى سير العربيه

احب فى النهاية ان احكى ما مريت به من اعطال من سيارتى الحبيبة

1- طقم شنبر .. هو اول شئ واجهنى فى بدايه التعامل معاها خصوصا ان اقل مشوار ليا مدينه نصر - اكتوبر او العاشر من رمضان . وجدت فى يوم من الايام اثناء عودتى من العمل السحب قل جدا وخصوصا فى الطريق المرتفع " المطلع " سواء ان كان كوبرى او طريق عادى سألت احد الجيران عن ميكانيكى جدا واشر على بميكانيكى اسمه " حمادة " بمساكن صقر قريش بالحى العاشر .. توجهت اليه فتفضل مشكورا بعد المعاينه وقال محتاجة طقم شنبر والتكلفة ستكون 850 جنيه شاملة "قطع الغيار -المصنعيه - الخراط واسبوع كامل حتى تستلم العربية بعد التليين وحرق بنزين تقريبا صفيحة او اقل استلمت السيارة وقطعت بيها 500 كم تليين وقمت بعدها بتغيرر الزيت وكان هذا الموقف الاول بتاريخ 2-1-2011 ..!!
2- تغيير طقم كبالن خارجى ... لوجود طقطة بالملفات وقام العفشجى بتغييرهم وتقريبا اتكلفت حوالى 350 جنيه "كبالن +مصنعية ..!!
3- تغير طقم كبالن داخلى ... لوجود صوت طقة فى السير العدل ومع نقل الغيارات .. تم تغيير الكبالن وعمل مس على المخرطة لعمود نقل الحركة بين الكبالن الداخلية والخارجية وتقريبا تكلفت نفس المبلغ
تكرر هذا العيب على نفس المنوال تقريبا مابين 4 او 8 شهور مابين كبالن داخلية او خارجية والتشخيص للبيه الاسطى انه 1- عدم فصل الحركة عن الكبالن فى الملفات
2- العمود السابق مسه يحتاج للتغيير " وطبعا دخت علشان الاقى عمود لوحده لانى كنت لسه مغير
الكبالن "
4- تغيير جوز مساعدين امامى + كوبلن داخلى + مقصات بتاريخ 11-3-2-1203 ثم تغير طقم كوبلن كامل " داخلى + خارجى + الاكس 5-2013 تكلفة تقريبا = 2250 ج
5- دهان السيارة + سمكرة بعض الاجزاء تكلفة 2000 ج
6- تغيير 4 كاوتش فاير ستون 1300 ج
7- تغيير بلى العجل لكل جانب على حدة 340ج
8- تجديد الصالون بالكامل عدا السقف والتابلوه 1300ج

.
.
.
هههههههههههههههههه
لا متدورش معملتش حاجة تانى الحمد لله ان باقى بس اجمع كل ماسبق واروح اقدم طلب حد يخدها ببلاش
صحيح زيادة فى الرفاهية والراحة اللى هى مريحهانى حبيت اعمل زجاج امامى كهرباء وده تكلف = 600 + 400 ثمن الزجاج لانه اتكسر باب وراء التانى
طبعا الحمد لله فى السراء والضراء والسر والعلن
فى النهاية انا نقلت لكم كل اللى مريت بيه يمكن حد يستفاد بيه او حد يقدر يقدم نصيحة ليه علشان ماكررش اخطاء وقعت فيها ..

ولكم جزيل الشكر ... دمتم بكل ود

[AbOnOrA]

موضوع رائع والله وموضوعى جداً تسلم ايدك على الافادة

متفق معاك فى كل ما ذكرته من مميزات وعيوب واسعار لانى تقريباً عملت كل ده سواء فى الايرانى او الكورى علشان كان معايا الاتنين لكن موضوع عيب الكبالن المزمن ده معداش على خالص وحاسس كدة انه عيب صنايعي انا هبعتلك دلوقتى بيانات الميكانيكى اللى كنت بتعامل معاه وتليفوناته هو حافظ البرايد والكورى القديم عموماً زى اسمه وهما اتنين صنايعية فى ورشة واحدة واحد مسلم والتانى مسيحى واحد بيعمل شغل الميكانيكا والتانى العفشه :D

2 - الورشة الكورية لاصلاح السيارات (ميكانيكا - عفشة ) اصحابها اتنين كانوا شغالين فى التوكيل القديم
محمد حنفى - 0125634933
بطرس شنودة - 0101196221
العنوان : 4 ش عبد الحليم محمود متفرع من ناصية ش الحرية خلف فيلات 23 يوليو بعد فندق السلام جسر السويس - امام محطة كهرباء هليوبليس


وهتلاقى معلومات وورش اكتر فى الموضوع الخاص برابطة ملاك الكيا برايد

http://www.masrmotors.com/vb/showthread.php?t=54002

وتحت امرك فى اى استفتسار وخلينا نتابع مع بعض لحد ما العربيه تتظبط

[Abo.ZiaD]

الله يا وائل باشا مش عارف اشكرك ازاى على ردك الرائع والسريع هههههه بهزر طبعا
ان شاء الله لما اكلمهم واظبط معاهم برضو هقولك علشان نمشى مع بعض خطوة بخطوة
ثانيا موضوع ايه اللى جميل هو يجى ايه جانب مواضيعك القنبلة
واشكرك تانى وكل عضو هنا بيحاول يساعد كل واحد هنا

[wael890610]

موضوع الكبالن بيحصل معايا برضه
وبعد فتره اكتشفت ان الكاوتشه اللى بتيجى مع الكوبلن بتتقطع كل شويه (غيرت جوز راس كولبن 3 مرات لغايه دلوقتى)
والحل حاجتين
اولا كل يوم جمعه ابص بالمرايه على جلده الكوبلن لتغيرها فورا فى حاله تلفها
ثانيا فى جلده كوبلن بتيجى فى كرتونه لوحدها ومعاها الشحم بتاعها وبتبقى طريه شويه عن جلده الكوبلن اللى بتيجى معاه وبتعيش اكتر

[Abo.ZiaD]

المشاركة الأصلية كتبت بواسطة wael890610 موضوع الكبالن بيحصل معايا برضه وبعد فتره اكتشفت ان الكاوتشه اللى بتيجى مع الكوبلن بتتقطع كل شويه (غيرت جوز راس كولبن 3 مرات لغايه دلوقتى) والحل حاجتين اولا كل يوم جمعه ابص بالمرايه على جلده الكوبلن لتغيرها فورا فى حاله تلفها ثانيا فى جلده كوبلن بتيجى فى كرتونه لوحدها ومعاها الشحم بتاعها وبتبقى طريه شويه عن جلده الكوبلن اللى بتيجى معاه وبتعيش اكتر

الف شكر على المشاركة مستر wael890610 بس هو غالبا العيب عندى مش الكاوتشة او تسرب الشحم لان كل مرة اغير فيها الكوبلن كان الكاوتش والشحم تمام
جزاك الله كل خير وربنا يصلح الحال