زيت الفتيس الاتوماتيك

[welywely]

مساء الخير يا شباب
ياريت تقولولي افضل زيت في السوق للفتيس الاتوماتيك للڤيرنا وسعره كام واجيب كام كيلو خاصه اني هغير فلتر زيت الفتيس كمان زي الكتاب مابيقول لاني كده ماشي على الفلتر 80000 فمعرفش هتحتاج كام كيلو
انا مجرب شيل بقاله 40000 ومش عاجبني وحاسس ان الفتيس متكتف والعربيه تقيله شوية في سحبها مع اني مغيره في التوكيل اللي في التجمع الخامس
وانا بسأل سمعت عن توتال وموبيل وكمان وولف ياريت النصيحه من الافاضل اللي جربوا ولاقوه نوع كويس للڤيرناوهل الافضل اني استعمل زيت العشره الاف 5w15للموتور لانه خفيف وبيدي سحب واستجابه احسن من الموتور ولا ايه ؟؟؟؟؟؟؟

[احمد على 1999]

زيت ماتور ال 10 تلاف مش حيدى سحب احسن لكن بيحافظ على الماتور اكتر
زيت الفتيس معرفش بس انا متابع معاك لان معايا i10 اتوماتيك و كنت ناوى اغير زيت و فلتر الفتيس فى التوكيل بس نشوف راى الناس

[mr_astra]

لو اتكلمنا عن زيت الموتور
فاللى انا متاكد منة ان نسبة كبيرة من الزيوت هى مغشوشة ومقلدة وطبعا اللى بيتقلد هى الانواع المشهورة والكبيرة فى السوق
لما جيت اغير زيت للعربية اصريت انى اغير بزيت مصنع ومعبا فى الخارج
لفيت لفة محترمة وقريت كتير عن تجارب الاعضاء
واستقريت على زيت وولف مصنع معبا فى بلجيكا
واستقريت على نوع اسمة فيتال تك VITAL TECH
لزوجة 5W-40
طبعا دة زبت تخليقى 100% واللزوجة دى هى المنصوص عليها فى مانيوال السيارة
طب اية انطباعى عنة
والكلام بدون اى مبالغة والزيت موجود بالموتور منذ اكثر من 2000 كم
اولا صوت الموتور بقى سايلانت
الدوارة الصبح كان لازم المارش يلف مرتين عشان الموتور يدور انما فى عز موجة البرد اللى فاتت نص لفة مارش والموتور يدور
استجابة الموتور والله تحس انك مفول بنزين 95
استهلاك البنزين قل بشكل ملحوظ
انا كنت عاوز اعمل موضوع منفصل لتجربة الزيت لكن الكسل بقى !!!!!!

طبعا انا غيرت فلتر الزيت مع الزيت

وطلبت منهم عبوة زيت فرامل وعلى فكرة عندهم زيت فرامل DOT5
500 مم
غيرت زيت الفرامل بالكامل والفرامل بقت قبل ما تلمسها العربية تقف
باختصار التجربة نجحة جدا
زيت الموتور 5 لتر بـ 340 جنية
زيت الفرامل 500 مم مش 350مم بـ 45 جنية

[ahmed_eng2001]

شكرا على نقل التجربة .... انا ليا بعض الاستفسارات بعد اذنك ...

انا بستخدم زيت فرامل دوت 3 ..... ايه الفرق بينه و بين الدوت 5 ... انا سمعت انه غلط انك تحط الاتنين على بعض ... صح الكلام ده ؟؟؟

[mr_astra]

اكيد غلط انك تخلطهم على بعض وعشان كدة انا فضيت خزنة الفرامل والمواسير والـ اية بى اس تمام واتاكدت ان ما فيش ولا نقطة زيت فى الدورة بالكامل
الـ dot 3 اساسة مختلف عن الـ dot5 لان الاخير اساسة سيلكون
الفرق بنهم هى درجة غليان الزيت وطبعا لصالح الـ 5
التفاعل مع مكونات دورة الفرامل وخصوصا المطاط ( جلد المساتر ) اكيد لصالح الـ5
يكفى انك تعرف ان الشاحنات الكبيرة تستخدم الـ dot5

نقطة اخيرة وهى عدم ثقتى فى معظم الانواع المنتجة لزيت الفرامل
اخر الناس المحترمين كانت البندكس لكن للاسف حياه الناس بقت لعبة وكولة بيتغش واكيد حضرت سمعت عن تيل الفرامل المغشوش واللى بالفعل كان لى تجربة شخصية معاه وبستر ربنا وحدة العربية لفت بية ومحصلش حاجة