ماهو اليوم الذى تعطلت فية سيارتك ولن تنساه؟

[khaled_sabry]

هو موقف مش قوى اوى لأن عربيتي القديمه (كورولاا 1978) و الحمد لله ماعذبتنين و ماكنتشى بتعطل بيا غير اعطال بسيطه ممكن اصلحها بايدي او اسايسها لاقرب ميكانيكي
لكن افتكر مره وقفت بيا في زحمة ميدان ابن الحكم فى الحلميه و طبعا طلعت عيني علشان ازقها على جنب و جبتلها ميكانيكي يشوفها - و فى الاخر اكتشفت ان العربيه خلصت بنزين و انا اصلا كنت واقف جنب البنزينه
ورغم انى عندى خلفيه ميكانيكيه كويسه و انى بصيت على العربيه قبل ما اجيب الميكانيكي الا معرفشى ربنا عمانى عن ادراك العيب ده و كان منظرى وحش اوى قدام الميكانيكي

و مره تانيه
كانت الكربراتير فيه مشكله انه بيشرق على السلانسيه و طبعا دى كانت مشكله فى اشارات مصر العظيمه.. ووديتها لمركز الصفا و ظبطهالى لمده اسبوعين و رجع العيب ده تانى
بعد كده بقيت اوديها للميكانيكي تتصلح لمده كام يوم و يرجع موضوع الشرقان فى السلانسيه
ده لأن الكربراتير بتاعها حساس جداا - لغايه مازهقت و قولت لو طلعلى العيب ده تانى حشتريلها كربراتير جديد و امرى لله
و قد كان شرقت تانى و انا فى عباس العقاد و رايح الشغل - فقولت خلاص حعمل المحاوله الاخيره و امرى لله
فروحت مطلع المفكات و فكيت الكربراتير و تنيت عوامة البنزين (معتقدا انها سبب المشكله) طبعا العربيه بقيت تمشى 3 متر لغايه لما تفضى حوض البنزين اللى فى الكربراتير و تقف
قولت اتنى العوامه فى الاتجاه المعاكس بقيت العربيه تدور لمده 3 دقايق لغايه لما حوض البنزين يتملى و تكب بنزين و تشرق
ادركت ساعتها انى خربت الكربراتير و انا اصلا كنت زهقت من فتى الميكانيكيه في الكربراتير ده اصلا فسبتها و و نزلت الحلميه و اشتريت كربراتير جديد و رجعت ركبته و العربيه دارت بس طبعا اخدت اليوم ده اجازه

[zing0]

أنا بقى لسه حاصل معايا الموقف ده يوم السبت إللى قبل العيد على طول
راجع من مشوار بالليل. و كانت الساعة 11 تقريباً, و مرهق جداً. و تقريباً نايم
كنت راكن العربية قبل ما أروح المشوار ده بعيد شويه.( علشان المحلات كانت شغاله و مينفعش أركن أمام باب محل), المهم راجع و بأتمنى و بأحلم باللحظة إللى هأقعد فيها داخل التوكتوكه بتاعتى و أوصل البيت بالسلامة. و فجأه .... أدور ... متدورش
لسة مفول بنزين و راجعت عالبطارية - النور بينور الحمد لله, طيب و بعدين؟؟؟
لاقيت 3 شباب ماشين, قولتلهم زقه يا رجاله, فضلوا يزقوا لما إتقطع نفسهم ييجى 200 متر و برضة التكتوكه حالفة ما تدور.
" متشكرين أوى يا جماعة نجاملكم فى الأفراح" _ و رحت نازل و بقيت أزقها لواحدى لحد ما شفتلها راكنه كويسه و قولت أشوفلها أى صنايعى.
رحت أبص على الورش_ يا جماعة أى ميكانيكى - كهربائى - ... بتاع كاوتش حتى؟ ألاقى البهوات قاعدين عالقهاوى و كل واحد حاطط فى بقه شيشة و يقولى خلاص قفلت النهارده.
قررت أقفلها و أركنها و سلمت أمرى لله و هو الحافظ.
رحت قافلها و مشيت خطوتين. و بعدين أفتكرت ورق جوا العربية, فتحت الباب تانى علشان أجيبة, و أنا بأستغفر الله,إفتكرت إن فيه (زرار فصل), قولت أفصلها بالمرة زياده تأمين.
بأحط أيدى علية لأقيت العربية مفصوله ... يااااااه دا أنا كنت فصلتها و نسيت.
شغلتها و بأدور ... الحمد لله دارت بعد حوالى ساعة من المحاولات.
مش عاوز أقولكم كنت بأجرى إزاى عالكورنيش . على قدر التعب و الإرهاق و تنطع الصنايعيه و ...... جالى هستيريا.
الحمد لله فى الأول و الآخر

[أيمن الروبي]

اولا احب احييي اللي عمل الموضوع ده جميل جدا ممكن نستفاد من المواقف اللي بتحصل للناس وبتتحكي وكمان نوع من الفكاهه علي المواقف اللي بتحصل
انا دلوقتي معايا 132 كداب الفين بقالها سنتين معايا وكان قبلها 128 قعدت حوالي 9 سنين معايا ودي بقي ليها مواقف معايا لا تعد ولاتحصي
اولا ال 128 مواقفها كتير جدا ومنها علي سبيل المثال
1-كنت مسافر مع ولاد عمي وصحابي العين السخنه الكلام ده كان في 2003 وكانو طالعين بميكروباص تويوتا زيرو انا بقي خدتني الجلاله وقولتهم انا هطلع وراكو بالعربيه المهم وصلنا بالسلامه انا وصلت بعديهم بنص ساعه فوجئنا ان درجة الحراره هناك تكاد تكون معديه ال 45 والرطوبه عاليه اوي المهم جت الساعه 2 الظهر وقولتلهم انا هروح قعدو يقولولي الدنيا حر واصبر لبليل والكلام ده وصممت اني امشي وخدت اتنين صحابي معايا وطلعت الطريق مكملتش 15 كيلو لقيت العربيه سخنت والمياه فضيت طلمبة المياه فضت المياه من سخونية الجو روحت استنين شويه لما العربيه بردت وحطتلها مياه ومشيت مكملتش 10 كيلو والعربيه سخنت تاني وقفت بقي منا مبقاش معايا مياه والشمس فوقينا بتاكلنا ومحدش عاوز يقفلنا وانا وصحابي مش معانا موبايلات قولنا خلاص نستني جنب العربيه لحد ما ولاد عمي يعدوا علينا وهما مروحين بالميكروباص ناخد منهم مياه وده كان الحل الوحيد ادامنا المهم فضلنا كده من الساعه حوالي 3 لحد الساعه 7 والشمس بهدلتنا وفعلا شافونا ووقفلنا مالكارثه ملقناش معاهم غير ازازتين صغيرين المهم انا عارف اني لو استنين لحد بليل شويه لما الجو يبرد هينفع احطهم وارجع بيهم القاهره وفضلنا وقفين شويه لحد مواحد وقفلنا وادانا ازازتين مياه معدنيه كانو معاه وقولت لولاد عمي ارجعو انتو انا لما الساعه تعدي تسعه هرجع المهم سابو موبايل لينا ومشيو وفضلت انا وصحابي وجت الساعه 9.30 دورت وزودت مياه ومشيت وفعلا وصلت القاهره في ساعه ونص وبعد كده رقدت في البيت اربع ايام من ضربة الشمس

وفي مواقف كتير معاها تضحك بس كتيره هحكيهالكو واحده واحده قدام بس هحكيلكو موقف حصلي مع ال 132 اول مااشتريتها تاني يوم ما اشتريتها
كان عندي فرح لنسايبي في الاسماعيليه المهم طلعت من الجيزه الساعه 5 المغرب واول موصلت لبنزينة شل اللي علي اول طريق مصر اسماعيليه الصحراوي عند نزلة كوبري المطار لقيت العربيه غليت اوباااااا ده انا لسه علي اول الطريق ومعايا المدام ووالدي ووالدتي واخواتي
المهم والدي شجعني قالي حطلها مياه وكان معايا جركنين مليتهم من البنزينه وقالي يلا دب واحنا ونصيبنا يا عم الحج نرجع احسن احنا لسه في القاهره قالي لا هنكمل يا عم الحج يرضيك يرضيك قالي عاوز ترجع خد مراتك وارجع وانا هكمل قولت مينفعش دول نسايبي انا اصلا طبعا المشكله ان الرادياتير اللي راكب كان حديد بتاع الفابريكا وده بيخلي العربيه تفرفر من السخونيه علاوه علي انه مخروم كذا خرم المهم طبعا كل 20 كيلو العربيه تغلي وتقف ووصلنا اسماعيليه حوالي الساعه 11.30 كان فرح كبير في الشارع وجايبين فرقة السمسميه وبيره وخمره وحشيش وبانجو وبلا ازرق المهم اقعدت ادور علي واحد بتاع رادياتير نشتري منه واحد نحاس ونركبه كلهم قافلين لقينا واحد كاتب نمرة تليفونه علي المحل كلمناه لقيناه نايم وبعد محايله قالنا خلاص جايلكو البيه جالنا حوالي 1.30 بليل قولنالو ركبلنا رادياتير جديد نحاس 3 ماسوره قالنا انا ووالدي يعني معنديش رادياتيرات جديده دلوقتي انا هلحملكو ده علشان ترجعو بيه ولما ترجعو القاهره غيروه المهم قولنالو خلاص الحمو ومع الدردشه عرف اننا جايين فرح كبير وبتاع وصمم انه مايكمل شغل في الرادياتير لحد من نجبلو ورقة بانجو من الفرح ياعم انت عبيط ورقة بانجو ايه اللي انت عاوزها ياعم رضيك يرضيك خلصنا عاوزين نمشي المهم روحت رايح لواحد في الفرح انا عرفه قولتلو عاوز ورقة بانجو راح مديلي واديتها لبتاع الردياتير وراح مظبطلي الرادياتير ومرديش ياخد فلوس اه والله العظيم مارضي ياخد فلوس شوفتو الكيف بيعمل ايه ابن الجزمه شغلنا تجار مخدرات عنده وش عاوز فلوس حلال يروح بيها لأولاده والحمد لله عملنا الردياتير وخلص الشغل حوالي 3.30 الفجر وكل ده الفرح شغال ورجعنا القاهره حوالي الساعه 8 الصبح

وهحكيلكو باقي مواقف ال 128 بعدين ان شاء الله وكان في العمر بقيه

[mody112]

ماشى كنت راجع من اسكندرية بعربيتى ( لانوس جولييت) وكنت لسه عامل فيها شوية شغل كده وقولت اطلع اسكندرية صد رد ( والميكانيكى قالى كده بردوه ) وقد كان وانا رايح من القاهرة للاسكندرية كنت ماشى بالعربية وبجرى وبقرص ومكنتش بتقول اى وروحت وقابلت اصحابى كانوا سابقنى على هناك وفى طريق العودة سبقتهم انا حوالى الساعة 1.3 باليل كده وبعد ما عديت البوابة وركبت الطريق حسيت بحاجة مش مظبوطة فى العربية ومفيش ثوانى لقيت كل لمبات التابلوه التحذيرية بتنور ( زيت و تشيك وبطارية ) وكله يا معلم. المهم وقفت على جنب وبطلت قصدى هى بطلت لوحديها وفتحت الكابوت وقلت ابص طبعا مش شايف اى حاجة الساعة 1.3 باليل والطريق كحل يا معلم ومحدش شايف ايده انت يادوب بتسمع اصوات العربيات اللى بتعدى من جنبك ولكن مش بتلحق تشوفها . طبعا معرفتش اعمل ايه وكان معايا واحد صاحبى ولكن ابيض فى العربيات لفيت وسميت بالله وقولت ادور سمعت صوت وكانه خناقه بالحلل والصوانى جوة الموتور وصوت ترزييييييييييييع جامد جدا بطلت ودورت تانى هو هو نفس الصوت لاجل الحظ العربية وقفت على مسافة قريبة من كشك كاوتش فى وسط الصحراوى وحاطط لمبة سهارى كده زى ماتكون شمعة قلت اروح عندهم واسالهم على ميكانيكى وروحتلهم وياريتنى ما روحتلهم اشكال يا معلم مش عاوز اقولك تقطع الخميرة من البيت وتحس انهم مسجلين ( ربنا يسامحنى ) وهما كانو اتنين بس اللى قدامى وبعدين بقو اربعة طبعا مش عاوز اقولكو انا قلبى بقى فى ركبى ولكن تشجعت وسالتهم هو مفيش ميكانيكى هنا قالولى ايه المشكله قلتلهم ميكانيكى قالولى تعالى نشوف وروحنا وطبعا معرفوش اى حاجة وبعدين قالولى فى ميكانيكى ساكن قريب من هنا هنتصل بيه ( يا نهار ابيض انتو لسه هتزيدوا تانى وكمان ساكن قريب فين هنا ده يمين وشمال صحرا) وكلمو الميانيكى ومعرفش جه من اين وسمع العربية وقالى ده كرنك وبيل وشوية حاجات كده مش فاكرها ولازم العربية تبات لحد الصبح عشان مش هتعرف تمشى بيها كده قولتله تبات فين قالى عندى فى الورشة ( يا حلاوة ده انا هروح لهم برجلية ) طبعا قولتلهم مينفعش تبات هنا ومش هينفع اسيب العربية واروح قالولى متخافش وفى الحفظ والصون قولتلهم لا ممكن ابدا وفجأة جات على بالى فكرة ( ونش يا معلم ) قولتلهم انا عاوز ونش واحد قالى منهم اه منهم مهما ما شاء الله بقو حوالى سبعة حوالينا انا وصاحبى والعربية ولو فكرو يخلصو مننا ولا حد هيدرى بينا المهم قالى انا معايا نمرة الونش قولتله هات يا معلم وكلمت الونش ووانا بكلمه قالى هاخد 1000 جنيه ( يا نهار ابيض ) 1000 جنيه يا عم حرام عليك طبعا قالى يا بيه انت فى وسط الصحراوى والساعة 2 باليل وانت فاهمين بقى الاستغلال المهم من هنا لهنا اتفقنا على 800 ج وقلتله تعالى . واحنا مستنيين جيه ونش تانى غيرالاولانى ولعب فى دماغى يابيه الحق وقتك وتعالى معايا وميهمكش الفلوس ان هاخد 750 ج بينى وبينكو قولت اهم حاجة الوقت بدل الوقفة السودة دى قولتله يالا بينا والمهم حملنا العربية ع الونش وابتدينا الرحلة تقريبا من الساعة 2.3 باليل وصلت عند بيتنا الساعة 7 الصبح حد يقولى طب الونش التانى فين اقوله الونش التانى لحقنا فى الطريق وكان عاوز يعمل مشكلة بس انا نفضتله وسواق الونش اللى معانا ثبته بالطريقة . وواحد تانى يقولى طب اصحابك فين اقوله اصحابى قابلونى على الطريق برده وانا على الونش وكلمونى وهما مخضوضين قوى ( اصل كان فى حادثثة كبيرة جدا جدا على الصحراوى فى الوقت ده وتقريبا عدينا عليها فى نفس الوقت فافتكرونى كنت فى الحادثة. والحمد لله لا وقالولى مكلمنتاش ليه بينى وبينكو هما كانو طالعين بعربية واحدة وكانت يادوب عليهم وكانت لسه جديدة فاتكسفت انى ابهدل العربية الجدية فى انها تقطرنى و كده يعنى ( بس طبعا ماقولتلهمش كده ) .وبالنسبة للحادثة انا كنت نايم جوة عربيتى وهى على الونش وصحيت على الصويت وكده وكان فى جثث مرمية على جانبى الطريق والمشكله ان الدنيا طبعا كانت كحل والظلام حالك ولما اول عربيتين خبطو فى بعض كل اللى كان جاى وراهم وبسرعته ولما بيكتشفهم مش بيلحق يقف وللاسف بيلبس فيهم هو كمان والحقيقة سواق الونش وقف هناك شوية ونور الانوار العالية وكمان شغل السارينة والانتظار وكل الانوار اللى عنده لحد الاسعاف ما جت وبعدين استانفنا الرحلة ووصلنا بسلامة الله الساعة 7 الصبح والسلام عليكم ورحمة الله وبركاته.وربنا يستر طريقنا جميعا . اه فى حاجة اخيرة بعد المشوار ده غيرت موتور.http://www.masrmotors.com/vb/images/...018A1D~146.gif

[روبرت مجدي]

يوم سرقة البطارية