تعالوا شوفوا نضافة البنزين بتاعنا واللى بيعمله فى طرمبة البنزين (لسيارة بريليانس جالينا) موضوع مميز بالصور

[sayed2077]

السلام عليكم ورحمة الله وبركاته

النهارده وكعادتى دائما اذهب الى صديقى واخى الكبير الاسطى احمد الكهربائى خصوصا فى اوقات اجازاتى لاشاهد ما يفعل واتعلم منه بعض الاشياء فى الكهرباء

واثناء ما انا هناك لقيته بيفك طرمبة بنزين من عربية برييليانس جالينا (عربية جامده جدااا وواسعه جدااا جداااا ) فبسألة بتفكها ليه قالى واقفه خالص وطبعا طرمبة البنزين فى العربيه ديه بتكون فى الشنطه مش فى الكنبة وشنطتها واسعه جداااااا فوق الوصف بطريقة مذهله المهم فك الطرمبة (الطرمبة بتكون جوه علبة بلاستيك فيها المؤشر اللى بيقيس كمية البنزين اللى فى التنك ) المهم فكها من هنا ولقيته بيقولى بص الطرمبة عامله ازاى فببص بصراحه ذهلت من كمية الرواسب اللى موجوده فيها بجد فيها كمية رواسب تعطل اى طرمبة بنزين فقلتله طيب ديه ليه كده قالى علشان بيسيبوا البنزين لغاية ما اللمبة تنور ويبقى خلاص التنك قرب يفضى فالطرمبة بتسحب كل الترسبات اللى بتبقى فى القعر بتاع التانك وقالى المفروض كل ما تلاقى مافضلش غير ربع التانك تروح تفول على طوول

وخلى بالكم ان الترسبات ديه من بنزين 92 مش 80 علشان فيه ناس بيفضلوا يقولوا بنزين 92 نضيف وبنزين 80 ماليان زبالة على فكره مالهاش علاقه خالص نوع البنزين بنضافته

المهم بعد كدا طالع قلب الطرمبة من المكان بتاعها بصعوبه بالغه وورانى الترسبات اللى عليها بجد فعلا طرمبات البنزين بتاعتنا ربنا يكون فى عونها وفى الاخر نستعجب هى الطرمبات بتبوظ ليه هههههههههههههه

واسيبكم مع الصور

ديه صورة الترسيبات الجميلة اللى بتبقى فى البنزين فى الطرمبة من بره قبل الفلتر بتاع الطرمبة


وديه صورة الطرمبة من بعيد شوية بصوا كمية الرواسب اللى فى البنزين بتاعنا جميلة الصراحه

ديه صورة الاسطى احمد وهو ماسك الطرمبه قبل ما يطلع القلب منها


وده صورة قلب الطرمبة (الماتور نفسه) بصوا كمية الرواسب اللى عليه والله بجد كتر خيره اووى كدا ده احنا لما بنلاقى رملة فى العيش بندعى على اللى خبزه فما بالكم بقى ديه معدات وحاجات ميكانيكية وعلى فكرة الرواسب ديه عامله زى برادة الحديد كده على تراب على رمل على طينه كله على كله يعنى



وديه معلومات عن الاسطى احمد الكهربائى

الاسم : احمد حنفى
رقم التليفون:01065020100
العنوان : شارع التعاون بالمعادى قريبا من نادى المعادى و جامع الفتح الاسلامى و مكتب صحة المعادى
التخصص : كهرباء وتكيف لجميع انواع السيارات بمختلف انواعها وموديلاتها واكثر من ممتاز فعلا بتجربة كثير من اعضاء المنتدى سواء تكيف او كهربا بمعنى اصح محترف فى شغلة فعلاوفى نهاية الموضوع احب اشوف تعليقاتكم وعلى البنزين النضيف جدااا الصراحه فى العربيات المسكينة بتاعتنا
مع العلم ان ده بنزين 92 والعربيه ديه مكملتش سنتين على بعض
و

السلام عليكم ورحمة اله وبركاته

[mr_astra]

على فكرة المية اللى بنشربها فيها رواسب اكتر من البنزين بكتير
سيبك
كل حاجة عندنا بايظة

[sayed2077]

المشاركة الأصلية كتبت بواسطة mr_astra على فكرة المية اللى بنشربها فيها رواسب اكتر من البنزين بكتير سيبك كل حاجة عندنا بايظة

ههههههههههههههههههههههههه هههه احنا فعلا عندنا فلتر وبنلاقى فيه خيرات كتير ظلط صغير على رمل على صدا على اشياء غريبه وفى الاخر نسأل هى امراض الكلى كترت ليييه ؟ تحياتى لحضرتك استاذ محمد

[mr_astra]

استاذ سيد والله احنا شعب بنتعذب من اول ما نقوم من النوم لغاية ما ننام
اية دة !!!!!!!!!
انا مش عاوز افسد موضوعك الجميل ونحولة لغير مسارة..........بعتزرلك

[Mostafa Mohamed Abd Allah]

ده ولا بنزين 60