مشاكل فى نوبيرا 2001 كورى

[محمد العقابي]

معايا نوبيرا 2001 كوري اوتوماتيك الفتيس العادي ابو سيلك كيك داون .
1: امتي اغير زيت الموتور علي كام كيلو وايه افضل نوع سمعت انه موبيل وحش مع انه مكتوب علي العربيه اصلا استعمل موبيل 1 والفلتر برده .
2: امتي اغير زيت فتيس علي كام كيلو وايه برده افضل نوع والفلتر برده .
3: انا بجرب امشيها بننزين 80 وماشيه نوعا ما حلو والتسقيف مش اوي يعني ممكن احس بيه وممكن لا وعالتكييف معقول برده .
4: بحس انه استهلاك البنزين نوعا ما عالي .
5: صوت الماتور بعد محطيت 80 علي سنه بسيطه مش اوي يعني مش عامل ازعاج هل ده مشكله .
6: السحب معقول بس مع الكيك داون تاخير في التسارع يعني المفروض متهيالي مع الكيك داون تتنفض العربيه . هي بتسرع بس مش سرعه لحظيه . يعني متهيألي لو في موقف ومحتاج اسرع فورا مش حتنجزني وده خطر طبعاً .
7: ارجوكم ارجوكم لو حد ممكن يحطلي صورة فيشة الأوكتان مكانها وطريقة تعديلها يبقي كتر الف خيره بس بالصوره بالله عليك احسن فهمي بطيء .
8: عمال اسمع مصطلحات وانا طور ممكن حد يحطلي صورة القطع واساميها زي البوابه والمانيوفلد والثروتل احسن انا مش فاهم حاجه .
9: اماكن الفيوزات في اماكن للفيوزات عند الموتور ولا اللي تحت رجل السواق الشمال بس .
10 : الفلاتر ايه ممكن انضفه بايدي وايه ملعبشي فيه احسن .
11: بسمع عن تنظيف الرشاشات والايدل والبوابه ومش فاهم حاجه يعني لو في حاجه ينفع اعملها بايدي قولي بالله عليكم عشان اوفر من اشتغالات الصنايعيه ( كان معايا شاهين وكنت تقريبا بعمل حاجات كتير بنفسي وده كان بيوفرلي كتيييييييييييييييييييييير اوي ) .


اخيرا اي حد حيرد عليا ربنا يباركله والله لان انا عارف انه الاسئله كتير اوي واللي حيرد عليا حياخد وقت منه ومجهود الرد .

[YahiaAshraf]

1: امتي اغير زيت الموتور علي كام كيلو وايه افضل نوع سمعت انه موبيل وحش مع انه مكتوب
علي العربيه اصلا استعمل موبيل 1 والفلتر برده .
ج/ حسب الزيت

وسطيا 7500 كم

و يغير فلتر الزيت كل 15000 كم
2: امتي اغير زيت فتيس علي كام كيلو وايه برده افضل نوع والفلتر برده .
ج/ شوف الموضوع ده
http://masrmotors.com/vb/showthread.php?t=64435

3: انا بجرب امشيها بننزين 80 وماشيه نوعا ما حلو والتسقيف مش اوي يعني ممكن احس بيه وممكن لا وعالتكييف معقول برده .
ج/ بلاش بنزين 80 استخدم 92 افضل
4: بحس انه استهلاك البنزين نوعا ما عالي .
5: صوت الماتور بعد محطيت 80 علي سنه بسيطه مش اوي يعني مش عامل ازعاج هل ده مشكله .
ج/ طبعا مشكله استخدم 92 افضل 80 هيهلك المحرك
6: السحب معقول بس مع الكيك داون تاخير في التسارع يعني المفروض متهيالي مع الكيك داون تتنفض العربيه . هي بتسرع بس مش سرعه لحظيه . يعني متهيألي لو في موقف ومحتاج اسرع فورا مش حتنجزني وده خطر طبعاً .
ج/ السؤال ده يجاوب عليه احد من خبراء المنتدى علشان يشرحلك بالتفصيل
ج/
7: ارجوكم ارجوكم لو حد ممكن يحطلي صورة فيشة الأوكتان مكانها وطريقة تعديلها يبقي كتر الف خيره بس بالصوره بالله عليك احسن فهمي بطيء .
ج/ ده موضوع لاستاذ عصام غنايم هيفيدك هو عن اللانوس بس هيفيدك برده

فيشة الاوكتان

عباره عن jamper او كوبرى مثل الموجود فى هارد الكومبيوتر تختلف الفائده منه بحسب طريقة توصيله للاطراف المختلفه
مع الاختلاف

الفيشه فى الانوس لها ثلاثة اوضاع مختلفه للتوصيل يتناسب كل وضع منها مع نوع البنزين المستخدم فى التشغيل ( 80 , 90 , 92 )

وطبعاٌ توصيلها الصحيح المتوافق مع نوع البنزين المستخدم يؤثر بالايجاب على اداء العربيه بصوره خياليه

طيب مكانها فين ؟

تحت الكرسى اللى جنب السواق مباشره

هنقدم الكرسى لقدام على الآخر و هنرفع فتحة الموكيت من تحته

( فى الانوس 1 هنلاقيها جنب الكومبيوتر )

( فى الانوس 2 هنلاقيها جنب الضفيره الماره تحت الكرسى )

وده الشكل بتاعها

[IMG]

..[/IMG]

طيب لقيناها شكلها ايه ؟

عباره عن فيشه داخل ليها ثلاثة اطراف ( بنى , اسود , بنى فى ابيض )

وفيشه موصوله بيها ( نصفها التانى ) موصله الطرفين ( الاسود , البنى فى ابيض ) بسلك اسود عليه ملصق مكتوب عليه 87 او 83

وده رقم الاوكتان اللى المفروض العربيه مظبوطه عليه

وطبعا ده مش موجود بمصر الحبيبه

طيب ممكن نظبطها على البنزين الموجود بمصر بأنواعه المختلفه علشان نحقق اعلى استفاده من الموتور ؟

ممكن طبعاٌ

المصممين للسياره كتر خيرهم تركولنا المجال اننا نلعب برقم الاوكتان المناسب لكل واحد فينا ( بعكس عربيات تانيه كتير ) لايوجد بها هذا الخيار ( وده من احد مميزات الدايو )

خلص الكلام النظرى

نخش بقى على العملى

قبل اى حاجه نفتح الكابوت و نفك القطاش السالب من البطاريه بمفتاح عشره

ونخش تحت الكرسى اليمين ونرفع الموكيت ونمسك الجمبر والفيشه

هنشيل نصف الفيشه الموجود به الملصق بالضغط على سوكت المنتصف مع الشد للخارج

هيطلع الجمبر فى ايدك وده شكله

[IMG]

..[/IMG]

ونظبطه تبعاٌ لنوع البنزين المستخدم فى العربيه

وليه 3 ظبطات

ونبداء بكيس التوفير ( اقصدى بنزين التوفير )

1_ ال 80

الجمبر فى ايدينا له ثلاثة فتحات اتنين متوصلين ببعض بالسلك الاسود والثالثه من غير اسلاك

[IMG]

..[/IMG] .

بكل بساطه هنوصل طرف تالت من السلك الوسطانى الى الفتحه الفاضيه ( زى متكون بتوصل شعرة فيوز بالظبط )

تمام كده

هنرجع الجامبر للفيشه تانى

ونرجعه مكانه ونغطيه بالموكيت

ونوصل كابل البطاريه السالب تانى

ونعمل ايدل ليرن بالمره علشان كومبيوتر العربيه يظبط نفسه على الوضع الجديد

و بسم الله

واطلع جرب


2 _ البنزين ال 90

هنعيد الخطوات السابقه

بس المره دى هنشيل الفيشه

وبس

يعنى مش هنوصل اى حاجه

هنسيب الفيشه فى الهواء كده ونعين الجمبر فى البيت

[IMG]

..[/IMG]


تمام كده

هنرجع الجامبر للفيشه تانى

ونرجعه مكانه ونغطيه بالموكيت

ونوصل كابل البطاريه السالب تانى

ونعمل ايدل ليرن بالمره علشان كومبيوتر العربيه يظبط نفسه على الوضع الجديد

و بسم الله

واطلع جرب


3 _ البنزين ال 92

هنعيد خطوات الفك الاولى

هنمسك الجامبر فى ايدينا ونفك الكلبسين اللى فى اطرافه بالضغط للخارج بشويش ونرجع الغطا البلاستيك للخلف

وده شكله

[IMG]

..[/IMG]

هنجيب مسمار 3 سم وندخله مع الفيشه اللى فى الطرف بالضغط لجوه

بالشكل ده

[IMG]

..[/IMG]

وبعدين نشد المسمار والسلك لبره

هيطلع السلك معانا

هندخله تانى بس الناحيه التانيه يعنى هننقله من الطرف ده الى الطرف ده مع الحفاظ على الطرف الاوسط متوصل زى ما هو

وده شكله الجديد

[IMG]

..[/IMG]


تمام كده

هنرجع الجامبر للفيشه تانى

وده شكله النهائى

[IMG]

..[/IMG]

نرجعه مكانه ونغطيه بالموكيت

ونوصل كابل البطاريه السالب تانى

ونعمل ايدل ليرن بالمره علشان كومبيوتر العربيه يظبط نفسه على الوضع الجديد

و بسم الله

واطلع جرب


انا عن نفسى جربت كل التوصيلات دى فى عربيتى قبل ما اقولكم عليها

وده للأمانه

عربيتى دلوقتى على التوصيله التالته

لانها اقواهم فى اخراج قوة الموتور القصوى

بالتجربه وبدون فشر ( من 0 الى 100 ) فى 12 ثانيه و اقصى سرعه بدون مشكله ( 180 )

ممكن ابقى انزلكم الفيديو بتاع تجربة التسارع دى ( للمتشككين )


المهم الموضوع كده خلص
--------------------------------------------------------------------------------
8: عمال اسمع مصطلحات وانا طور ممكن حد يحطلي صورة القطع واساميها زي البوابه والمانيوفلد والثروتل احسن انا مش فاهم حاجه .
ج/ دى صورة للثروتل






الثروتل هو عبارة عن بوابة تسمح بدخول الهواء ، تفتح مع الدعسة وسهل انك تنظفه بنفسك




بالنسبة للمانيوفلد المانيفولد هو نطق باللغه العربيه لكلمة manifold الأنجليزيه

ولأى محرك أحتراق داخلى (مثل محركات السيارت ) يوجد نوعين من المانيفولدات

1- مانيفولد الدخول للهواء الفرش البارد وبنسميه هندسيا intake manifold

وده اللى بيخش منه الهواء القادم من فلتر الهواء لأسطوانات الحريق بالمكنه

2- مانيفولد العادم وده بنسميه هندسيا exhaust manifold ( أى مانفولد العادم ) وبيسمى لدى الصنايعيه بفرن المكنه (نظرا لسخونته الشديده من غازات العادم الخارجه من صبابات العادم ) الى خط الشكمان

بالمناسبه

كلمة مانيفولد بتترجم إلى مشعب ( أى مخرج ذو تشعبات )
وده موضوع لتنظيف البوابة و المانيوفلد ( هو مش للنوبيرا ) بس هتاخد فكرة عنه
http://masrmotors.com/vb/showthread.php?t=91741
9: اماكن الفيوزات في اماكن للفيوزات عند الموتور ولا اللي تحت رجل السواق الشمال بس .
ج/ بالنسبة للفيوزات ده كلام منقول من زميلنا العزيز مستر استرا

العملية سهلة اوى
لو فتحت غطاء علبة الفيوزات هتلاقى كل فيوز ووظيفتة ومش مكتوب انجلش كمان لا دى رموز
يعنى مثلا فيوز الكلاكس هتلاقى مرسوم علامة الكلاكس
فيوز النور هتلاقى على العلبة رمز اللمبة
فيوز موتور المساحات هتلاقى على علبة الفيوزات رمز المساحة

وتغيير الفيوز عملية ابسط من كدة مفيش
بتشيل الفيوز وتشوف السلكة اللى جواة لو سليمة من الطرفين يبقى تمام
لو لقتها مفصولة من النص يبقى الفيوز دة عاوز يتغير
طب اغيرة باية
لو دققت النظر هتلاقى مكتوب على الفيوز الامبير بتاعة ولو مش مكتوب امبير يبقى تجيب نفس اللون 10 : الفلاتر ايه ممكن انضفه بايدي وايه ملعبشي فيه احسن .
ج/بالنسبة للفلاتر شوف الموضوع ده
http://masrmotors.com/vb/showthread.php?t=71951
11: بسمع عن تنظيف الرشاشات والايدل والبوابه ومش فاهم حاجه يعني لو في حاجه ينفع اعملها بايدي قولي بالله عليكم عشان اوفر من اشتغالات الصنايعيه ( كان معايا شاهين وكنت تقريبا بعمل حاجات كتير بنفسي وده كان بيوفرلي كتيييييييييييييييييييييير اوي ) .
ج/ ده موضوع عن الرشاشات و الحاجات دى هيفيدك
http://forum.masrmotors.com/showthread.php?t=91832&pa ge=2

********************

يارب يكون ردى المتواضع افادك

وبرده مستنين وحوش المنتدى حول ارائهم

[محمد العقابي]

مشكووووووووور جدا جدا علي تعبك يا استاذ يحي وعلي ردك السريع شكرا ليك

[محمد العقابي]

بالنسبه للزيت حضرتك مقولتليش علي نوع الزيت ايه في الفتيس او في الموتور ايه افضل الانواع في وقتنا ده وبالنسبه لبنزين 80 ليه لا في بعض الناس في مشاركات كتير قالو انهم ماشيين ب 80 عشان كده انا جربت وبالنسبه لفيشة الاوكتان انا قريت موضوع اللانوس بس انا نفسي واحد مجرب او واحد معاه عربيه زيها يقولي الفيشه فين بالظبط وياريت صوره ( عربيتي نوبيرا اوتوماتيك كوري 2001 1600سي سي ) وبالنسبه للسحب منتظر ردود الخبراء .
ومشكووور يا استاذ يحي علي تعبك ومنتظر عدة اراء .

[YahiaAshraf]

المشاركة الأصلية كتبت بواسطة محمد العقابي بالنسبه للزيت حضرتك مقولتليش علي نوع الزيت ايه في الفتيس او في الموتور ايه افضل الانواع في وقتنا ده وبالنسبه لبنزين 80 ليه لا في بعض الناس في مشاركات كتير قالو انهم ماشيين ب 80 عشان كده انا جربت وبالنسبه لفيشة الاوكتان انا قريت موضوع اللانوس بس انا نفسي واحد مجرب او واحد معاه عربيه زيها يقولي الفيشه فين بالظبط وياريت صوره ( عربيتي نوبيرا اوتوماتيك كوري 2001 1600سي سي ) وبالنسبه للسحب منتظر ردود الخبراء . ومشكووور يا استاذ يحي علي تعبك ومنتظر عدة اراء .

تحت أمرك يا باشا

انا فيه كام حاجه كده سايبها مرضيتش افتى فيها
لان ملاك السياره ادرى منى فيها


ومستنين ملاك السيارة و باذن الله هيفيدوك


بالنسبة لبنزين 80 فعلا ناس كتير شغاله بيه
بس النتيجه السلبيه بتظهر بعدين
يفضل 92

تحياتى