الحُكم على سحب العربيه

[فــيــروز]

السلام عليكم و رحمة الله و بركاته

أنا عملت صيانة ال 5000 كيلو لعربيتى -نيسان تيدا- من حوالى 10 ايام فى مودرن موتورز الدقى

سألونى لو كان عندى شكوى من العربيه فقلت إنّى شايفه إن السحب ليس على ما يرام فأضافوا الملاحظه على أمر الشغل اللىّ طلع للصيانه

استلمت العربيه بعد كده من غير ما حد يقول لى كشفوا عليها ولاّ لأ و هل فيه مشكله فى السحب فعلا ولاّ لأ ..

المهم أمّا اتصلوا يسألونى عن مستوى الخدمه قلت الملاحظه دى إن محدش اعطانى اى feedback عن ملاحظتى فالمركز اتصل بيا تانى يوم .. المهم قلت لهم إنّى مش عامله شكوى و إنما ملاحظتى ان فى المرتين اللى عملت فيهم صيانه -1000 و 5000- محدش ادانى تقرير مثلا بحالة العربيه خصوصا انى فى المره التانيه كان عندى ملاحظه على ادائها و كان مفروض يبقى فيه رد

المهم موظف المركز قال لى كلام لم افهم منه بصراحه هل تم فعلا فحص العربيه و لم يجدوا فيها شئ ام لم يتم فحصها اصلا ام تم فحصها و اصلاح شئ ما فيها .. ما فهمته انهم حطوا العربيه على جهاز و قاس حاجه و تم ظبطها و هى زى الفل و مفيش فيها اى مشاكل !! فمش عارفه يعنى كان فيها مشكله و اتصلحت ولا ماكانش فيها حاجه !!

انا لسه شايفه ان اداءها غير جيد و انه ساء عن ذى قبل رغم ان زى ما قلت لكم هى مش عامله غير 6000 كيلو بس !! و بعدين انا عندى سؤال عام : هو مش من مصلحة مركز الصيانه انه يقول ان العربيه بحاله جيده حتى لو هى غير كده !! هل مركز الصيانه يعتبر حكم منصف و عادل بينى و بين الشركه المصنّعه للعربيه و هل يجب اخذ كلامه ثقه !!

و بخصوص السحب انا باحس ان العربيه بتعانى -خصوصا اما اخرج بيها الصبح- و صوتها عالى نسبيا رغم انى مش بادوس بنزين بعنف يعنى و بالاحظ ده اكتر اما يوصل تانك البنزين لنصف المؤشر و مش عارفه هل فيه علاقه بين كمية البنزين فى العربيه و ادائها و ليه اصلا العربيه اداءها يبقى افضل و التانك مليان لان دى الحاجه الوحيده اللى لاحظت انها مؤثره فى الاداء .. و ازاى كمان احكم على سحب العربيه و هل هو طبيعى ام لا عشان اقدر ارجع للمركز لانى بصراحه مش عاجبنى الموقف دلوقت

[حازم فخرى]

بصراحة يا فيروز أنا أول مرة أشوف علاقة بين كمية البنزين في التنك والسحب .. أعتقد ما فيش علاقة .. وأنا شخصيا مش بثق في مركز الصيانة .. ولكن أعتقد إنك لسة في الضمان وواجب عليهم يعالجو المشاكل دي .. روحي تاني وقابلي مهندس متخصص وعرفية مشاكلك وما تمشيش إلا لما تعرفي كل حاجة ويعالجوا كل مشاكلك وخليكي جامدة معاهم .. ده من ناحية .. ومن ناحية تانية مفيش مشكلة لما تسألي ميكانيكي متخصص خارج المركز عن مشاكلك من باب العلم فقط يمكن يقدر يدلك علي العيب فين ولما تتأكدي من أكثر من ميكانيكي روحي مركز الصيانة وقوليلهم علي العيب علشان يصلحوه .. واتمنى لك التوفيق

[s0144862631]

نصيحه جربي مركة السبع اللي في زهراء المعادي ده احسن بكتير و اوقات كتير بيعمل عروض خصومات كويسه جدا

[رياح التغيير]

ممكن تكون طرمبة البنزين عندك ضعيفة عشان كده لما مؤشر البنزين يجي عند النصف بتحسي السحب ضعف والله اعلم لو كلامي صح وهيغيروا طرمبة البنزين احتمال تكون عوامة البنزين راكبة معاها اللي بتدي اشارة لمؤشر البنزين فخدي باللك لأن احيانا عند تغيير الطرمبة يبوظوا العوامة ودي قطع غيار غالية بسيطة ان شاء الله

[حسام البورسعيدى]

اولا مبروك عليكى العربية وباذن الله المشكلة بسيطة ....

هو موضوع الصوت العالى للعربية وهيا بارده ده شئ طبيعى جدا وفى جميع العربيات الانجيكشن ..

وهتلاقى عداد RPM فوق الواحد ويبدا ينزل تدريجيا كل ما الموتور يسخن اكتر ..



اما موضوع السحب وكمية البنزين فهناك احتمال كبير ان طرمبه البنزين تكون ضعيفة وتحتاج تغيير ...

لازم حضرتك ترجعى للتوكيل تانى وكونى حاسمة الى اقصى درجة معاهم وان شاء الله خير ...