|
#1306
26-10-2010, 06:02 PM
|
||||
|
||||
رد: أدب الرحلات
اهلا بكم بعد الفاصل
معلش النت والحرارة كانوا فاصلين بالإضافة الى العربية قرفانى اليومين دول الموتور بيسرب زيت وانا ماشى وبالتالى مستوى الزيت بيقل وطبعا لما قلت اعرف سبب التسيرب كان جوان وش السلندر ضرب وطبعا الميكانيكى ساب التسريب ومسك وش السلندر وبعد محاولات وتصليحات وتغيير جوانات ( جمع جوان) الأستاذ الميكانيكى قالى انه بعد الفحص والمحص تبين ان فلتر الزيت هو اللى كان بيسرب وعلى الفور تم تغييره (الهاء تعود على الفلتر ) وغيار زيت جديد ولكن يا فرحة ما تمت التسريب لسه شغال وبعد الرجوع للأستاذ الميكانيكى مرة اخرى قالى انه اويل سيل الكرنك هو اللى مسرب وتم بالفعل تغيير الأويل سيل اول امس بس بينى وبينكم انا حاسس انه حاجه تانية اللى بتسرب ربنا يستر على العموم انا كل يوم بكشف على مستوى الزيت والناقص بزوده راجع لكم تانى ان شاء الله
__________________
د / محمد إن الله لا يصلح عمل المفسدين
|
|
#1307
26-10-2010, 06:20 PM
|
||||
|
||||
|
رد: أدب الرحلات
مطروح وأيامها اهلا بكم من جديد الطبيب لما بيتخرج بعد عناء ستة سنوات دراسة منهم ثلاث سنوات متواصلة بالإضافة الى سنة الامتياز لازم يقضى فترة تسمى التكليف والتكليف ده بيتم فى وحدات الرعاية الصحية الأساسية ( الوحدات الصحية يعنى ) وعلى حظى كان تكليفى فى محافظة مطروح انا اول ما عرفت كده قلت لازم اعمل تظلم فى وزارة الصحة لعل وعسى يجيبونى الدقهلية بس المسئول المحترم يقول لك استلم الشغل الأول وبعدين اتظلم , هو ده معقول يا عالم يعنى بعد ما الواحد يستلم الشغل ويتوزع ويشوف القرف كله امال هو بيتظلم ليه ما هو علشان ميروحش , يقوم يروح برجليه يستلم المهم انا عملت بنصيحة الأستاذ المسئول وقلت آخد شنطتى ويلا بينا على مطروح وكان فيه تلاته من زملائى هيتكلفوا فى مطروح واتفقنا مع بعضينا اننا نسافر يوم الجمعه 28/4/2000 , وبالفعل اتجمعنا فى موقف عربيات الأسكندرية فى ميدان ام كلثوم الساعة 11 بالليل وقلنا كل واحد يدفع مبلع معين ونديهم لواحد مننا علشان هو اللى يحاسب وبعدين نبقى نشوف بعد المشوار كل واحد له او عليه وصلنا اسكندرية موقف مصر اللى فى محرم بيك ومنه ركبنا عربية ميكروباس رايحة مطروح وصلنا مطروح الساعة 7 صباحا وطبعا كانت مديرية الصحة قافلة والموظفين لسه طبعا لم يحضروا وقعدنا نستناهم يتبع
__________________
د / محمد إن الله لا يصلح عمل المفسدين
|
|
#1308
26-10-2010, 06:46 PM
|
||||
|
||||
|
رد: أدب الرحلات
فتحت مديرية الصحة أبوابها ودخل الموظفين وكنا فاكرين اننا هنلاقى موظفين بدو لابسين الجلباب والغترة والعقال لكن لقينا موظفين عاديين باللبس العادى منهم اللى من اسكندرية واللى من القاهرة والبحيرة والمنصورة والشرقية وكفر الشيخ ومعظمهم عايش من فترة فى مطروح
المهم قدمنا جواب الشغل اللى جايين بيه من وزارة الصحة الى الموظف المسئول وبعد لف على المكاتب تم استلامنا العمل وانا حظى اتوزعت فى منطقة الضبعة ( عارفينها بتاعة الطاقة النووية ,هبقى احكى لكم عليها) الموظف قالى هتروح الضبعة تستلم ولا تروح المعسكر الأول ولما تييجى من المعسكر تاخد جواب تستلم بيه هناك ايه حكاية المعسكر ده ؟؟ وزير الصحة اياميها الأسبق الدكتور اسماعيل سلام كان بيعمل معسكر تدريبى كل سنة فى بورسعيد ( فى منطقة ارض المعسكرات) للأطباء حديثى التخرج وكان المعسكر اسبوعين كل يوم الصبح من الساعة 9 ص حتى الساعة 12 ظ محاضرات عن كيفية العمل بالواحدات الصحية . المهم انا قلت يا واد روح المعسكر احسن على ما تيجى نتيجة التظلم واهو المعسكر بعد ثلاة ايام ( انا فاكر انه كان يوم 2/5/2000) واخدت الجواب منه على معسكر بور سعيد بعد ما خلصت التقيت بزملائى اللى كنا جايين مع بعض ولأن هما كانوا ليهم جيش يعنى هيتجندوا فى خلال شهر لما ييجى جواب التجنيد تم توزيعم فى حتة اسمها الكيلو 4 طبعا واحد من حضراتكم بيسأل وانت متوزعتش زيهم ليه ؟؟ والإجابة ببساطة انى معفى من التجنيد ( الأبن الوحيد) المهم هما كمان عملوا زى وخدوا الجواب على المعسكر وبدانا رحلة العودة الى ديارنا من مطروح الى الأسكندية الى المنصورة الى بلقاس الى بيتنا ورجعت بيتنا الساعة 9 باليل فى رحلة سفر 24 ساعة يتبع
__________________
د / محمد إن الله لا يصلح عمل المفسدين
|
|
#1309
26-10-2010, 07:33 PM
|
||||
|
||||
|
رد: أدب الرحلات
معسكر بور سعيد سافرت يوم الثلاثاء 2-5-2000 صباحا متوجها الى بور سعيد وبعد ما سلمنا الجواب للموظف اتوزعنا على الغرف , طبعا كان اول يوم مفيش فيه محاضرات كل يوم الصبح افطار فى المطعم وبعدين محاضرات لحد الظهر فى القاعة و الساعة 2 الغدا وخش بعد كده على السرير واديها نوم لبعد العصر كنا نصحى فى الوقت ده فى اللى يروح يلعب سلة او كرة قدم او بينج بونج وفيه اللى كان ينزل شارع التجارى والحميدى يتسوق اذكر انه فى أول يوم بالليل وكيل وزارة الصحة ببور سعيد عملنا اجتماع والراجل ركز شوية على على موضوع التسوق ده وقالنا طبعا انتوا هتنزلوا تشتروا ملابس وخلافه اول نصيحه أقولها ليكم متشتروش من اول واحد لف وشوف واحد واتنين وتلاته لحد ما تعرف سعر الحاجة وفعلا النصيحة دى كانت فى الصميم لأن لما كنا نيجى نشترى بنطلون مثلا اول واحد واحد يقول 50 جنيه وبعد شويه واحد تانى 45 جنيه لنفس البنطلون وفى الآخر يخلص على 40 جنيه المهم كنا بننزل ناخد التجارى والحميدى من أولة الى أخركام مرة لما عرفنا اسعار البضايع وطريقة التعامل مع البياعيين ازاى وكنا بنتجمع بالليل كل واحد يقول هو اشترى بكام ومنين علشان اللى عاوز يشترى نفس البضاعة ميتغلبش ومينضحكش عليه خلصوا الأسبوعين ومديرية الصحة شاكرة جابت لينا اتوبيسات تنقلنا من المعسكر الى المنصورة او طنطا او القاهرة كل حسب وجهته وجه موظفين من الجمرك يفتشوا ويخرجونا من الجمرك مباشرة - بدل الوقفة فى الجمرك - كتر خيرهم والله ومعظمنا لم يتم جمركته بس كانوا اسبوعين عسل ومن احلى الأيام اللى الواحد قضاها فى رحلات او معسكرات لأن الواحد حب مدينة بور سعيد فعلا مدينة نظيفه تحبها اول ما تدخلها وبالليل المدينة اجمل وهادية ومريحة للأعصاب الكل ملتزم باشارات المرور ( مفيش عسكرى فى معظم الاشارات تخيلوا) مش زى عندنا كله بينطح فى بعضه ياريت كل مدن مصر زيها
__________________
د / محمد إن الله لا يصلح عمل المفسدين
|
|
#1310
26-10-2010, 10:27 PM
|
||||
|
||||
|
رد: أدب الرحلات
متابعين ي ا دكتور
__________________
حـازم خـضـر
|
 |
|
|
