توكيل رينو و المقابلة

[dio]

احييكم جميعا.. ذهبت للتوكيل العبور لان الفرامل ضعيفة والعربية لسة عاملة 2600
كنت كاتب كشف للمراجعة وهي : ظبط الانوار عندي نور ارضي واحد واطي عن التاني- صوت الموتور العالي - سخونة عند الرجل- صوت صرير عند التبلوة يعصبك وانت مقفل الازاز مش قادر احدده-صوت طقطقة الصبح وانا بسخن في الموتور - الشكمان في رجة -
المهم قالولي هي كده كله اللى انت كاتبة دي مواصفاتها صح
لي سؤال فعلا هي كده بعد ماتبعتكم من ملاحظاتكم ... وشايفيين اعمل ايه معاهم
بصراحة العربية حلوة ممتازة لدرجة لما اجري واشد بيها بخاف منها بحس انها فعلا ممكن تتطير بيه ... وكفاية اساسيتها محترمة

[ringoo]

ازاى بس يا باشا فى توكيل فى الدنيا حيقول هى كدة العربية فراملها ضعيفة مع العلم ان العربية فراملها تحفة وسهل ظبطها يدوبك حيعمل رجلاش
سخونة الدواسات التوكيل بيركبلها عازل حرارى استحالة يقولك دى هى كدة
صوت الماتور عالى لانك عامل كيلو متر قليل لسة شوية علشان تحكم على صوت الماتور وشد بيه بالتدريج هو دة اللى جحيخلى صوته يهدى
صوت الصرير دة مش موجود فى العربية على سرعة 180 الا بقى اذا كان قصدك على الصوت دة داخل من الازاز او الازاز مفتوح على سرعة عالية ممكن يعمل صفارة
......................... ....
مالكش حق بصراحة تمشى من التوكيل من غير ما اى ملحوظة تتحل بالذات انك بتدخل على منتديات وبتشوف تجارب الناس

[dio]

المشاركة الأصلية كتبت بواسطة ringoo ازاى بس يا باشا فى توكيل فى الدنيا حيقول هى كدة العربية فراملها ضعيفة مع العلم ان العربية فراملها تحفة وسهل ظبطها يدوبك حيعمل رجلاش سخونة الدواسات التوكيل بيركبلها عازل حرارى استحالة يقولك دى هى كدة صوت الماتور عالى لانك عامل كيلو متر قليل لسة شوية علشان تحكم على صوت الماتور وشد بيه بالتدريج هو دة اللى جحيخلى صوته يهدى صوت الصرير دة مش موجود فى العربية على سرعة 180 الا بقى اذا كان قصدك على الصوت دة داخل من الازاز او الازاز مفتوح على سرعة عالية ممكن يعمل صفارة ......................... .... مالكش حق بصراحة تمشى من التوكيل من غير ما اى ملحوظة تتحل بالذات انك بتدخل على منتديات وبتشوف تجارب الناس

اقسم بالله هذا حدث

[سامح سيد]

معني الكلام ده ان العربية اونطي بتوكيلها
الواحد يثق بمين بس في البلد دي

[ringoo]

المشاركة الأصلية كتبت بواسطة dio اقسم بالله هذا حدث

يا باشا انا مصدق والله من غير قسم ... وعموما خليك معاية واحدة واحدة
بالنسبة لفرامل اللوجان
مفيش شك ان فرامل اللوجان محتاجة تعود .. طيب ايه التعود اللى فيها
اهم شيئ فيها ان الدواسة بيكون فيها بوش والبوش دة موجود وبيكون حوالى ربع الدواسة (مش هواء)
اذا واجب عليك انك تكون عارف هذا الامر .. طيب نيجى نبدأ نعدى ربع الدواسة تبدأ الفرامل يكون ليها تأثير وكل ما تضغط يزيد التاثير طبعا ... وفى الفرامل الفجائية ولما بتدوس لاخر الدواسة العربية بتكلبش ولازم تسمع صريخ العجل وربنا ما يضعك فى اى موقف مشابه
مش لازم تدوس لمسة على الدواسة علشان العربية تقف لان دواسة الفرامل لو ركزت حتلاقيها عالية عن الارض وبالتالى البوش طبيعى ... لو هو اللى بتوصفه فهى فرامل اللوجان فعلا كدة
لكن كتأثير فرامل و تكون حافظ الدواسة كل نقطة فيها بتاثر على سرعة العربية ازاى فحيكون بالنسبة لك الفرامل ممتازة حتى على اعلى السرعات للعربية وحتى مع تكرار الفرملة ومع سخونة التيل
دة مجرد صورة قريبة لفرامل اللوجان اللى من وجه نظرى ممتازة ممتازة
ولكن الله اعلم ايه اللى عندك لان انا مجربتش عربيتك
حاجة بردو عايز اعرفها هل لما استلمت العربية ظبطت ضغط الاطارات لان العربية بتيجى بضغط اطارات 40 psi على الاقل ودة طبعا يضعف الفرامل لان بيكون احتكاك الكاوتش بالاسفلت قليل عموما ظبط الاطارات على 29 امامى 32 خلفى
......................... ......................... ......................... .......
سخونة الكونسول
علشان محدش يفتكر ان العربية بتولع ولا حاجة هو مجرد سخونة عادية وطبيعية وموجودة فى عربيات كتير
والسخونة دى بتكون نتيجة مرور ماسورة التكييف الساخن واللى بتكون ساخنة بغض النظر عن ان التكييف شغال ولا لأ
حصل ان الناس قلقت .. راح التوكيل حاطط عازل حرارى على هذه الماسورة علشان السخونة ما يشعرش بيها السائق ودة مجرد عزل مش حل لعيب معين
اذا التوكيل مطالب انه يركبلك العازل زى ما اى حد بيطلب انه يركب وانا مش بحس بالسخونة ومع ذلك ركبوه من غير ما اقولهم .. دة حتة عازل ب 10 جنيه مثلا
......................... ......................... ......................... .............

عندي نور ارضي واحد واطي عن التاني

النقطة دى انا مش فاهمها اوى
لكن لو تقصد ان النور الشمال مختلف قليلا عن اليمين فا دى فا كل العربيات علشان النور الشمال ما يضربش فى وش القادم امامك ... طيب
لو نورالفانوس اليمين نازل لتحت ونور الفانوس الشمال طالع لفوق شوية يمكن ضبطه طبعا ... لكن ازااااى
كل فانوس ليه واير متوصل بالبكرة اللى اسفل الدركسيون (بكرة تظبيط النور اعلى واسفل) طيب على اعتبارالفانوس اليمنين هو اللى ضارب فى الارض نعمل ايه
1- نوطى البكرة على اقل مستوى والفانوسين متوصلين بالواير طبعا
2- نفصل واير الفانوس الشمال اللى هو عالى شوية عن اليمين
3- نحرك البكرة شوية لفوق لحد ما النور اليمين يتظبط مع النور الشمال وطبعا الشمال مش بيتحرك علشان فاصلين الواير بتاعه
4- نوصل واير الفانوس الشمال وبكدة يكون اليمين والشمال فى مستوى واحد وتقدر تعاليهم عن الارض وتوطيهم من البكرة فى مستوى واحد
الحاجات دى طبعا هم عارفينها فى التوكيل لكن انت كمالك للسيارة لازم وحتما تكون فاهم على الاقل العيب اللى انت عايز تظبطه ..
......................... ......................... ......................... .............

صوت صرير عند التبلوة

طيب عايزك تجرب حاجة تبص عليها فقط
بص على بكر التكييف شوفه لو معمول على سحب الهواء من الخارج هاته الناحية التانية اللى هى ( البكرة الرصاصى اللى فى النص ) واتأكد ان مروحة التكييف مقفولة مش على واحد حتى
لو الموضوع انتهى يبقى انت حددت مكان المشكلة عند عمل تدوير الهواء من الخارج
......................... ......................... ......................... ............

صوت طقطقة الصبح وانا بسخن في الموتور

الطقطقة جاية منين بالظبط
......................... ......................... ......................... .............

الشكمان في رجة

لا دى عادى اى شكمان فى الدنيا بيترج بالذات ان انت عربيتك لسة حالتها مش مستقرة نظرا لان عربيتك لم تصل لافضل اداء ليها
الاهتزازات مع الوقت حتقل جدا .. صوت الماتور حيختلف بدل عن عن عن اللى بتسمعها حتبقى فوم فوم فوم الصوت حيتخن
......................... ......................... ......................... ............

بصراحة العربية حلوة ممتازة لدرجة لما اجري واشد بيها بخاف منها بحس انها فعلا ممكن تتطير بيه ... وكفاية اساسيتها محترمة

العربية زى الفل بس عايزة اللى يصبر عليها لحد ما تفوق لكن مافيش شك ان انت ممكن يكون عندك ملحوظة او اتنين يتحلوا فى التوكيل بس فى صيانة ال 5000 المجانية ان شاء الله ولا تقلق من شيئ