|
#7
13-04-2015, 10:05 PM
|
|||
|
|||
رد: زيـت الـمـحـرك الـمـنـاسـب لـ Accent RB
الموضوع ده منقول ..إقراه ..جميل بصراحه وهيفيدك
السوق فيه أنواع زيوت كتير قوي... اللي بيقعد 5000 كم، واللي يقوللك 10000 كم، واللي يقولك 25000 كم، واحنا كده كده بنغيره على 3000 كم!!!! ده غير إن كل واحد بسعر، وواحد يقلك خد الزيت ده أنا مجربه، والتاني يقوللك على نفس الزيت كلام تاني.... إيه اللخبطة دي؟؟؟؟؟؟؟؟ ولإن معظمنا مش عارف الفرق ما بين الزيوت ، فإحنا بنعتمد على عمال تغيير الزيوت والمعلومات من الميكانيكية في موضوع تغيير الزيت ده.. وبصراحة مش كل اللي بيقولوه مظبوط لإنه مش مبني على معلومات ليها أساس علمي... أهم قاعدة في اختيار الزيت هو إنك ترجع لكتالوج عربيتك... وتشوف إيه الزيت المناسب اللي يتحط في العربية... على فكرة اللي مكتوب في الكتالوج ده هو أسوأ نوع زيت مسموح إنك تحطه.. يعني مفيش مشاكل إنك تحط زيت أحسن طيب إزاي أعرف إذا كان الزيت ده كويس ولا لأ؟؟؟؟؟؟؟؟ فيه قواعد عالمية وأرقام مكتوبة على علبة الزيت.. ومنها تقدر تعرف الزيت ده مناسب لعربيتك ولا لأ أي زيت عربيات في العالم بيتعرف من حاجتين.. اللزوجة و مستوى الخدمة أولا: اللزوجة ودي بتتعرف من رقم الـSAE إيه الـSAE دي؟؟؟ دي جمعية مهندسي السيارات في أمريكا Society of Automotive Engineers وحددت طريقة تكويد تعرف منها لزوجة الزيت عن طريق أرقام... كل ما زاد الرقم.. زادت لزوجته إزاي؟؟؟ الرقم الصغير يعني زيت خفيف (0، 5، 10، 15، 20)... والرقم العالي يعني زيت تقيل (30، 35، 40، 45، 50 ....) المهم... معظم الزيت اللي بنستخدمه في معظم عربياتنا هو زيت متعدد درجات اللزوجة إزاي؟؟ يعني زيت بيديك أداء وكأن فيه خليط زيوت ..خفيف وتقيل ! ! ! ! ! ! ! ! ! ! ؟ ؟ ؟ ؟ إنما هي في الواقع زيت خفيف وعليه إضافات من البوليمرز بيسموها محسنات مؤشر اللزوجة (Viscosity Index Improvement) وهدفها إن الزيت يحتفظ بلزوجته ويخفش مع ارتفاع درجة الحرارة ليه كده؟؟؟ الغرض من الزيت متعدد اللزوجة إنه لما تيجي تشغل عربيتك وهي باردة.. الزيت بيبقى له لزوجة معينة بتخليه يوصل لأجزاء الموتور المختلفة ويبقى فيه طبقة تزييت مناسبة للتشغيل.. ولما الموتور يسخن... الطبيعي إن الزيت يبدأ يخف مع ارتفاع درجة الحرارة.. بس ده حيخلي طبقة الزيت ضعيفة، فالبوليمرز بتخلي الزيت محتفظ بنفس درجة اللزوجة لما كان بارد... الزيت في الحالة دي بيتصرف وكإن فيه زيت تقيل سخن، وده سبب وضع درجتين لزوجة على العبوة. عشان كده الزيت بيبقى مكتوب عليه درجة اللزوجة بتاعة خليط الزيوت (المفترض) مثلا: 20W-50 الزيت الخفيف درجة لزوجته 20 ... والزيت التقيل درجة لزوجته 50 5W-30 الزيت الخفيف درجة لزوجته 5 ... والزيت التقيل درجة لزوجته 30 15W-40 الزيت الخفيف درجة لزوجته 15 ... والزيت التقيل درجة لزوجته 40 الأرقام دي بتتحدد حسب حرارة الجو ....... مش درجة حرارة الموتور طب إزاي نعرف إن الزيت ده لزوجته تنفع لجو مصر؟؟؟ الجو في مصر درجة الحرارة فيه عالية نسبيا.. وفي الشتا صعب توصل لتحت الصفر (لو اتكلمنا عن الصعيد في الشتا .. فيه بعض أماكن صحراوية ممكن توصل درجة الحرارة الصغرى لحوالي صفر) زي ما مكتوب في معظم كتالوجات العربيات.. الزيوت اللي غالبا بتشتغل في مصر من غير مشاكل هي: 20W-50 20W-40 15W-40 20W-40 15W-50 ودي حتديك مجال واسع جدا... من أول 15 تحت الصفر... لحد 60 مئوية في كتالوج العربية في قسم الصيانة صفحة الزيت لازم تلاقي رسمة زي دي اضغط هنا لمشاهدة الصورة بالحجم الطبيعي. لاحظ درجات الحرارة (حرارة الجو) ومدى التشغيل بتاع كل زيت زي ما إنت شايف... مفيش زيت محدد... اشتري أقرب زيت مناسب تلاقيه في السوق يكون مناسب للجو في مصر طيب .... مادام كل الزيوت دي ممكن تشتغل ... هل فيه فرق في كفاءة التشغيل؟؟؟ ميزة الزيت الـ15w-50 عن 15w-30 مثلا ... إن الزيت الأثقل (الـ50) حيديك حماية أكبر لأجزاء الموتور وبالتالي الموتور عمره حيبقى أطول... إنما الزيت الأخف (الـ30) حيديك توفير أعلى في البنزين خلي بالك.... مفيش درجة لزوجة مناسبة لحرارة جو على الإطلاق إنما فيه درجة لزوجة مناسبة لحرارة جو في موتور معيّن لازم التلاتة مع بعض يعني لما تيجي تختار لزوجة الزيت.. اختار من الموجود في الكتالوج بس . طيب... إيه اللي بيخللي بعض الزيوت تقعد في العربية 1000.. 3000... 5000... 10000 كيلو؟؟؟؟؟؟ ده اللي بنسميه مستوى الخدمة ثانيا: مستوى الخدمة الموضوع ده متشعب شوية ... بس أهم حاجة فيه درجة الزيت نفسه ودي ليها كود ورقم بيتعرف منه نوع الزيت دي كمان؟؟؟ ... أيوه .. بس المرة دي بكذا طريقة تكويد !!! وأشهر كود مكتوب على علب الزيوت في مصر هو كود الـAPI إيه الـAPI دي؟؟ دي معهد البترول الأمريكي American Petroleum Institute وبيحدد حاجة إسمها رمز الخدمة (Service Symbol) اللي منها بيحدد عمر الخدمة بتاع الزيت ده حوالي كام كيلو وبيعمل على كل زيت رمزين...(S) للمواتير البنزين.. و(C) للمواتير الديزل (السولار) مثلا: زيت مكتوب عليه API SJ/CF يعني إيه الكلام ده؟؟؟ يعني الزيت ده مستواه (J) لمواتير البنزين... ومستواه (F) لمواتير الديزل وده كويس ولا وحش؟؟؟؟ كل ما كان الحرف اللي مكتوب متأخر في الأبجدية الانجليزية.. كان الزيت ده أحسن يعني (G) أحسن من (F)... و(M) أحسن من (L) طبعا.. كل ما كان الرمز ده أعلى ... الزيت يبقى أغلى أحسن زيت حاليا مستواه (N) لمواتير البنزين.. و(J) لمواتير الديزل مفيش حاليا أقل من SJ لمواتير البنزين... وCH لمواتير الديزل عموما... أقل زيت حاليا (SJ) مناسب للعربيات اللي اتعملت قبل سنة 2001، وكل ما كانت العربية جديدة لازم يتحط فيها زيت أعلى فيه كود تاني مهم وبقى موجود على معظم الزيوت دلوقتي.. اللي هو كود الـACEA إيه الـACEA دي كمان؟؟؟!! دي جمعية مصنعي السيارات الأوروبية (Association des Constructeurs Européens d'Automobiles) وعملت كود خاص بزيوت السيارات .. ونقدر نقول إنه مختلف تماما عن طريقة الـAPI الكود عبارة عن حرف بيعبر عن فئة السيارات اللي هتستخدم الزيت ده.. ورقم جنب منه بيعبر عن مستوى الزيت ده جوه الفئة دي. أزاي؟؟ حرف الـA لسيارات البنزين حرف الـB لسيارات الديزل الصغيرة حرف الـC لسيارات البنزين والديزل الصغيرة التي يوجد بها علبة البيئة حرف الـE لسيارات الديزل الكبيرة و ذات الاستخدام الشاق. اضغط هنا لمشاهدة الصورة بالحجم الطبيعي. المهم.. اللي يهمنا منهم هو كود A بص كويس على علبة الزيت.. لو لقيت كود A1 يبقى الزيت ده موفر في البنزين.. بس محتاج يتغير بسرعة. لو لقيت كود A3 .. يبقى الزيت ده بتاع خدمة شاقة وممكن يخدم مسافات طويلة في الموتور... بس مش موفر. لو لقيت كود A5 .. يبقى الزيت ده موفر في البنزين وبتاع خدمة شاقة .. يعني كإنه A1+A3 كود الـC يعتبر هو نفسه الـA5 بس معمول للعربيات اللي فيها علبة البيئة زي ما قلنا من شوية .. وفيه اختلافات من ناحية بعض المكونات تخليه أحيانا مش مناسب في كل العربيات. المشكلة الكبيرة في أكواد الـACEA إن مفيش كود أحسن من التاني... لإن كل كود له استخدام.. وهما منزلين تحذير إن الاستخدام الخاطئ ممكن يسبب مشاكل مع بعض المواتير. علشان كده... ممكن جدا تشتري زيت يكون كود الـAPI متناسب مع المطلوب في الكتالوج بس كود الـACEA مش مناسب.. وتلاقي الزيت ده ما ينفعش معاك ويعمل مشاكل... وما تبقاش عارف السبب. طيب... فيه حاجة كمان... إيه تاني؟؟؟ بعض شركات السيارات مش بينفع معاها الزيوت العادية.. لإن تكنولوجيا المواتير الحديثة محتاجة زيوت ليها خصائص مختلفة من ناحية سرعة السريان وتحمل الحرارة والتشتيت الحراري وحاجات تانية كتير. وعلشان كده.. الشركات دي عملت مواصفات خاصة بيها في الزيوت... وبتشترط إنك ما تحطش في مواتير عربياتها إلا الزيوت اللي توفي مواصفاتها أو تكون معتمدة منها. والشركات دي هي: مرسيدس BMW - ميني مجموعة فولزفاجن (فولزفاجن - أودي - سكودا - سيات) مجموعة فيات: (فيات - ألفا روميو - لانشيا) مجموعة فورد (فورد - ميركيوري - لينكولن) مجموعة جنرال موتورز (أوبل - شيفروليه - كاديلاك - GMC - بويك) رينو مجموعة PSA: (بيجو - سيتروين) فخلي بالك.... لو عربيتك واحدة من الماركات دي.. لازم تتأكد الأول إن الزيت اللي هتشتريه يكون معتمد من الشركة صانعة السيارة.. أو على الأقل يلبي متطلبات المواصفة. خلاصة الكلام... الزيت اللي يشتغل كويس معاك هو اللي يحقق كل متطلبات الكتالوج.... مش جزء منها بس. طيب... ليه بيبقى الزيت مكتوب عليه يقعد 10000 كيلو واحنا نغيره على 5000 بس؟؟؟ راجع أي كتالوج عربية وحتلاقيه بيقوللك.. إن لو العربية بتشتغل في ظروف الخدمة الشاقة.. يبقى لازم تغيره أسرع وظروف الخدمة الشاقة هي: * القيادة في الزحام * مشاوير قصيرة (أقل من 15 كيلو) * تدوير متكرر للسيارة على البارد خلال اليوم (تدويرها بعدما تبرد تماما) * القيادة في جو بارد جدا أو في جو حار جدا * القيادة في جو مغبر * القيادة في الرمل أو الطين * ترك السيارة على السلانسيه لمدد طويلة * أحمال عالية أو قطر سيارات أخرى * تدوير المحرك على دوران عالي لمدد طويلة أمال يعني إيه زيوت تخليقية؟؟؟؟ بالنسبة لأنواع الزيوت... ففيه نوعين من الزيوت بشكل أساسي زيت معدني... وزيت تخليقي الزيت المعدني Mineral Oil هو زيت مصدره البترول المستخرج من باطن الأرض (وده سبب تسميته "معدني" لإنه بييجي عن طريق التعدين) وبيتم تكريره وتنقيته وممكن بيتحط عليه إضافات تحسن من خواصه الزيت التخليقي Synthetic Oil هو زيت... تكوينه الكيماوي معدل في المعمل من زيوت لها خواص مختلفة عن الزيت الناتج.. (زي فكرة السمن النباتي.. هو زيت نباتي بس مهدرج وتحول إلى سمن) مش بالضرورة يكون مصدره الزيت المعدني.. فيه منه كذا نوع 1- نوع تخليقي 100% من زيوت غير معدنية.. ودي في منها كذا نوع.. بس مش عايز أصعّب الموضوع أكتر من كده. 2- نوع مصنع بطريقة تخليقية من زيوت معدنية.. وده أغلب الزيوت التخليقية الموجودة في السوق. 3- نوع شبه تخليقي عبارة عن خليط من زيوت معدنية وزيوت غير معدنية .. بحيث إن الزيوت المعدنية ماتزيدش عن 30%. لو عايز معلومات أكتر عن أنواع الزيوت التخليقية وزيوت الأساس .. تقدر ترجع للموضوع ده: http://www.**********.net/Nile/453047-a.html (الزيوت التخليقية ... هل هي تخليقية فعلا؟؟) مميزات الزيوت التخليقية: * سرعة تدفق أعلى من الزيت العادي، فيقدر يزيت الموتور أحسن * أداء أحسن في درجات الحرارة العالية قوي والمنخفضة قوي * ثبات كيماوي وفيزيائي أفضل (يعني مش بيتحلل أو يفقد لزوجته بسرعة) * معدل استهلاك أقل * مضاد للتأكسد والتحلل الحراري وتكون الرواسب، لإنه خالي من الشوائب والمواد الضارة * مش محتاج يتغير بسرعة، وده حيوفر في الفلوس ويحافظ على البيئة * موفر في الوقود لإنه بيساعد الموتور يتحرك بسهولة أكبر * بيحافظ على الموتور لما بندوره الصبح لإنه بيوصل بسرعة للأجزاء اللي ما اتزيتتش * عمر أطول للموتور في اختبارات زيت موبيل 1 على سبيل المثال.. العربية اللي كانوا بيختبروه فيها مشيت حوالي 200 ألف كيلومتر من غير ما الزيت يحصله حاجة عيوب الزيوت التخليقية * لازم يشتغل على مواتير بتستخدم بنزين خالي من الرصاص (كل البنزين 90، 92، 95 في مصر خالي من الرصاص) * غير مفضل في المواتير الرحوية أو الدوارة Rotary (ودي نادرة ومش موجودة إلا في المازدا RX-6، RX-7، RX-8) * لو العربية اللي حتستخدمه شغالة طول اليوم (زي التاكسيات والميكروباصات)، مش حيبقى فيه فرق محسوس بينه وبين الزيت العادي، لإن ميزة الزيت التخليقي الأساسية هي لما بتيجي تدور الموتور. من وجهة نظري.. الزيت التخليقي أحسن بكتير.. وممكن تغير الزيت مع الفلتر مرة واحد في السنة.. مهما كانت عدد الكيلومترات اللي بتمشيها في السنة.. مع إنه أغلى بكتير (يمكن ضعف الزيت العادي) بس كده فعلا يبقى موفر، وبيحافظ على العربية بس لو عربيتك بتاكل زيت.. انسى الموضوع ده تماما.. لإنك حترمي فلوسك على الأرض للأمانة الموضوع منقول من أحد المواقع ..يعني الكلام ده مجهود شخص آخر 
|
|
#8
21-04-2015, 02:11 PM
|
|||
|
|||
|
رد: زيـت الـمـحـرك الـمـنـاسـب لـ Accent RB
تســــــــــــــلم الايــــــــــادى
|
 |
|
|
