استفسار لاستاذ محمد ابيزا واصحاب الخبرة في ابيزا

[mohamed ibiza]

المشاركة الأصلية كتبت بواسطة mody777 الف شكر يا استاذ محمد فهمت حاجات كتير من معلومات القيمة ولكن استحملني معلش شوية في بعض الأستفسارات انا تقريبا كدة استقريت علي موديل 94 لان اغلب المواضيع تتكلم عن الموديل دة دون غيرى لكن عايز اسأل حضرتك بعض الأسئلة ان تكرمت موديل 94 فية منة 1000 سي سي ولا كلة نازل 1300سي سي اقل كماليات ليها اية ؟ يعني لو فاضية هيبقي فيها قزاز كهرباء مثلا ؟ وهل السعر الي هو حد اقصي 30 الف تكون اية مواصفات كماليتها ؟ واية اكتر حاجة لما اروح مع الميكانيكي او اي حد خبرة اركز عليها؟ وهل قطع غيار بتاعتها مش متوافرة ؟ وهل هي فعلا تقيلة في البيع ؟ ومش اي حد يصلحها ناس محدد فقط الي بيعرفو يتعاملو مع اي عطل فيها؟ شئ اخير لو سمحت ممكن تفيدني في شئ محتار فية بخبرة حضرتك في الأبيزا انا ميال جدا لابيزا وهيا الي نفسي اشتريها ودية اول عربية اشتريها لكن ناس كتير مخوفاني منها بسبب قطع الغيار وكما قولتلك فوق وناس كتير بتقولي اشتري اكسل او سوزوكي سويفت افضل ؟ بالنسبة لاحيتاجاتي انا هستخدمها يوميا بالكتير ساعة الي اثنين ومعنديش مشكلة اني اشتريها حالة نظيفة وكل فترة اضبط فيها حاجة لكن كل كام يوم عطلة ووقوف عن الميكانيكي مش هتنفع معايا خالص لان اغلب الوقت مش فاضي وممكن بسافر من اسكندرية للقاهرة كل شهر مرة ؟ فحضرتك شايف اية بالنسبة لاحتياجاتي والمقارنة البسيطة دية بينها وبين الأكسل والسويفت والف شكر واسف جدا لأطالة لكن من العشم بقي

94 مفيش منه 1000 كله 1300 و برا بتنزل بمواتير اكبر لحد 2000 سي سي

ال94 موديلين الاول clx و ده فاضي مفهوش ازاز كهربا و الاكصدامات بتبقي مش بلون العربية و العواكس الخلفيه بتبقي سودا مش حمرا و الجنط و الطاسه مقاسهم بيكون 13 و الموبينا بتاعتها بتبقي 3 اطراف و فيه glx و دي بتبقي ازاز كهربا امامي و سنتر هوا العربية نازله بيه و الجنط و الطاسه مقاسهم 14 و الاكصدامات بلون العربية و العواكس الخلفيه حمره و الموبينا بتاعتها بتبقي 6 اطراف

و اغلب الموجود دلوقتي متركبله تكييف و طبعا بيبقي فيه ازاز كهربا امامي و كاسيت و سنتر و انذار و هكذا

قطع غيارها مرميه في كل حته سواء استيراد او جديد بأستثناء بعض الحاجات القليلة شوية زي الموبينا لكنها موجوده برضه

مش تقيله في البيع اوي لكن اللي فاهمها هو اللي بيشتريها لان اشاعة غلاء قطع غيارها منتشره و الناس مصدقاها

اعطال الابيزا 94 قليلة طالما العربية نضيفه و مش معكوك فيها و مش عايزه اكتر من ميكانيكي بيفهم لان موتورها بسيط مفهوش تفاصيل جامده يعني


و هي تكسب المقارنة في كل حاجة لو قارناها بالسويفت و الاكسل فيما عدا نقطه اتساع العربية و الشنطة الاتنين دول يكسبوها لانها عربية شباب و هاتش باك فا طبيعي تكون اصغر منهم

مع الوضع في الاعتبار ان قطع غيارها اغلي من الاكسل و السويفت لكنها بتعيش كتييييير

[mody777]

الف شكر

استفسار اخير ابيزا94 glx فبريكة برا وجوة وتكيف يعمل بكفائة سعرها المتوسط والأقصي كام ؟ عشان لما اسمع سعر اعلي من السعر الي حضرتك هتقولة يبقي اعرف انة كتير عليها

وفية شئ اخر انا عرفت ان الابيزا 94 مفيهاش بور بس الدركسيون خفيف جدا كأنة بور ؟ هل الكلام دة صحيح ؟

واسف تعبتك معايا

[mohamed ibiza]

زي ما قلتلك اقصي سعر 30 و دي تبقي فابريقة و حالتها ممتازة

و الدركسيون مش باور هو اسكاترا مش علبة دركسيون عادية و مش خفيف كأنه باور اكيد لكن مش تقيل لو عفشتك تمام و كاوتش الهوا بتاعه تمام هيبقي ناعم معاك

[mody777]

شكرا يا باشا ياريت تقولي رأيك في العربية دية

هيا عربية صاحب واحد صحبي وشوفتها النهاردة حالتها من الخارج ممتازة ومن الداخل متوسطة او فوق المتوسطة

مو 94 طبعا

لكن فية حاجة غريبة ان موتورها 1600 سي سي .؟؟ هل دية حاجة غريبة ولا اية ياريت تقولي رأيك في الموضوع دة قبل ما اتكلم مع كلام جدي ونتوكل علي الله

وهو سعرة 29 في رأي ممكن تخلص علي 26 او 27

السلام عليكم

[mohamed ibiza]

هي نزلت برا 1600 و 1800 و 2000

لكن اغلب الظن ان ده موتور متسقط

و لو نضيفه خلص فيها في رينج ال 27 لان ال 1600 عليها اقوي كتير من ال 1300 و اداءه اعلي