** حصريا تغطية وصول السيات ابيزا الجديدة - الأراضي المصرية **

[Ahmed Anwer]

السلام عليكم ،،
قريت اعلان في ملحق اهرام السيارات
عن معرض سيارات متخصص يعتبر اكبر مستورد سيارات خليجي في مصر
هوا ناشيونال موتورز
انه عنده السيات ابيزا الشكل الجديد و فعلا حاطط صورتها
ناشيونال موتورز هوا اكبر مستورد سيارات خليجي و في نفس الوقت وكيل الكيا سايبا الايرانية
و عنده اوكتافيا ، جيتا ، النترا ، نيو سيراتو ، كوردوبا ،،، عربيات كتير بيجيبها خليجي
المهم مكدبتش خبر و روحت اسجل الحدث
و الحمد لله فعلا كانت واقفه و البياع بيقولي دي اخر عربية
الموتور 1400 سي سي - موتور الجولف 4
اتنين ازاز كهربا فقط - اير باجز - ايه بي اس - ام بي 3 - جنوط عادية و طاسات
تقييمي العام عن العربية نقلة كبيرة جدا للابيزا للامام
اولا الشكل الخارجي ،، اكثر رصانة و في نفس الوقت هجومي كعادة سيات
من الاخر روح البرافا و الليون و الحاجات دي
و البروفيل الجانبي و الفتحة الزجاج في الاخر قريبة اوي من الليون بس يمكن علي اشيك
مش ريكدالية اوي زي الليون ( حلوة ريكدالية دي )
و الفوانيس الخلفية قريبة من الالتيا
الحجم كبر ،،
عن الانتريور فهوا ممتاز ممتاز ممتاز بالنسبة لفئتها ،، تصميما و خامات و عملية
الجزء الاوسط الرمادي بيكون فوم طري جميل جدا ،،
و ده تطور جامد عن الجيل الاسبق اللي كان تابلوه بلاستيك ،، و التابلوه قريب اوي من الليون
الصالون من ادام واسع ، الكنبة من ورا ضيقة و دي نقطة ضعفها القوية
الميزة الجامدة بقه الجديدة ان الشنطة كبيرة بحجم كافي لاستخدام عائلي
يعني العيب الوحيد ان الكنبة اللي ورا ضيقة
نور التابلوه ابيض و مش احمر كعادة سيات
و بصراحة ده افضل النور الاحمر كان مستفذ
السعر 102 الف مانيوال خليجي
يمكن عايز ينزل شوية هيكون مناسب اكتر
بس اكيد لما الوكيل هينزلها هتضبط اكتر
تقييمي المبدأي ليها انها افضل و اكبر و اوسع و افخم و اشيك من الجيل السابق فعلا
و خطوة للأمام لمحبوبة الشباب الصغيرة الجميلة
اسيبكم مع الصور كالعادة تعبانة بالموبايل بتاعي

التابلوه


المقدمة

المؤخرة

الشنطة

الكنبة الخلفية

من الجانب


ناشوينال موتورز
42 ش الطيران - مدينة نصر
تليفون 02 24040471

[Semsem999999]

دايما يا باشا بتثبت إنك سباااااااااااااااااااااق بكل ما هو جديد دائما

ألف شكر على الموضوع مع تسجيل احترامي للماركة واعتراضي وعدم قبولي للشكل الجديد تماماااااااااا

[mohamed ibiza]

دايما سباق يا احمد باشا و العربية جميلة جدا جدا جدا و تم التثبيت و ان شاء الله اما انزل التوكيل هشوفها نزلت ولا لا و هجيب بروشورز و تفاصيل كاملة و انتظروا تغطية كاملة لموديلات سيات 2009 في مصر

[ayman abdelrazek]

تسلم يا انور بااااااااااااااااشا

بس العربيه ماشاء الله جامده جدا

وتابلوه رائع

برافو احمد انور

[Ahmed Anwer]

المشاركة الأصلية كتبت بواسطة Semsem999999 دايما يا باشا بتثبت إنك سباااااااااااااااااااااق بكل ما هو جديد دائما ألف شكر على الموضوع مع تسجيل احترامي للماركة واعتراضي وعدم قبولي للشكل الجديد تماماااااااااا

شكرا يا أ / إسلام ،،

بس ممكن علي الطبيعة تغير رأيك

زي ما عجبتك الكيا سوول

المشاركة الأصلية كتبت بواسطة mohamed ibiza دايما سباق يا احمد باشا و العربية جميلة جدا جدا جدا و تم التثبيت و ان شاء الله اما انزل التوكيل هشوفها نزلت ولا لا و هجيب بروشورز و تفاصيل كاملة و انتظروا تغطية كاملة لموديلات سيات 2009 في مصر

شكرا يا صديقي عالتثبيت

و بانتظار باقي التحريات

المشاركة الأصلية كتبت بواسطة ayman abdelrazek تسلم يا انور بااااااااااااااااشا بس العربيه ماشاء الله جامده جدا وتابلوه رائع برافو احمد انور

فعلا يا ايمن باشا

التابلوه رائع خصوصا لعربية اقتصادية

و علي النت ليه الوان تانية ماتشنج حسب لون العربية

كلمت التوكيل ،،،

عالتليفون قالي ،، هتنزل 2010 ،، و مش هتنزل دلوقتي

و هينزلوها 1600 سي سي ،، تيبترونك