استفسارات ضروري في اسرع وقت عن سوزوكي التو 2013

[BlackCat07]

السلام عليكم ورحمة الله وبركاته...
انا عضو جديد في المنتدي واللي خلاني اشترك فيه اني فعلا لقيت الناس اللي هنا فاهمه جدا وذو خبره عاليه وما شاء الله مبيبخلوش علي حد بمعلومه وحبيت وطبعا لي الشرف ابقي اخ صغير ليكم واتعلم منكم خصوصا اني دلوقتي حيران في موضوع..
يوم الاثنين بتاريخ 20.5.2013 كنت في نادي نقابة المهندسين وفوجئت ان في معرض السلع المعمره وكان من ضمن السلع في معرض سيارات وكان عارض الماروتي والتو طبعا 2013 للسيارتين...ولما سألت عن السعر وطرق التقسيط لقيت ان الماروتي ب 48 الف جنيه مصري والتو800 ب 61 الف جنيه مصري
طبعا انا شفت كده قررت اني اعجل بشراء عربيه خصوصا لما لقيت الماروتي سعرها حنين ..
وبعد ما سألت عن اسلوب التقسيط لقيت ان :
الماروتي : تدفع مقدمه 7000 جنيه والتقسيط 886 جنيه شهريا لمده 5 سنين
الالتو 800: تدفع مقدمه 9100 جنيه و التقسيط 1005 او 1050 مش فاكر بظبط لمده 5 سنين
طبعا فضلت الالتو خصوصا اني لقيت نظام الدفع قريب جدا فقررت اجيب الاحسن .
استفساراتي بعد اذنكم وارجو الرد السريع جدا جدا جدا
1- هل تكيف اللالتو قوي مع العلم اني ساكن في مدينة 6 اكتوبر والدنيا هنا شبه صحراء + ان انا طبيعة عملي في مواقع انشاء مباني سكنيه ؟؟؟!!!
2- هل السياره تستحمل السفر لمسافات طويله زي مرسي مطروح وغيرها ؟؟؟!!!
3- هل يوجد مشاكل عامه بتظهر في السياره؟؟؟!!!
4- مكان الصيانه الخاصه بيها (التوكيل) عشان الصيانات الدوريه؟؟؟!!!
5- الصيانه الاولانيه بعد كام كيلو من الاستخدام؟؟؟!!!
6- قطاع الغيار متوفره واسعرها غاليه ولا رخيصه؟؟؟!!!
7- تقييم خاص من 10 للسياره من وجهة نظرك؟؟؟!!!
8- ما هو افضل لون للسياره؟؟؟!!!
واسف علي الاطاله وارجو اني مكنش ضايقت حد

[zing0]

بص يا باشا
أنا إللى أعرفه هأقولوا , و طبعاً منتظر معاك رد أصحاب التجربه الفعليه
الماروتى: أصغر شويه بس بياعه (ليها سوق فى البيع و الشراء) أكثر من الالتو
الألتو الـ 800: أكيييييد التكييف هيأثر على كفاءة العربية لأن موتورها ضعيف, الـ 1000 أكيد هتكون أفضل شويه.
بالنسبة للسفر لمطروح ....
العربيتين أساساً للعمل داخل المدينه, السفر بيهم (مش مستحيل) بس هتأخد الطريق على مراحل و تعمل ريست كل شويه, كمان متحاولش تزود سرعتك عن الـ 100 لأن أصحاب العربيات دى بيشتكو إنها بتعوم بعد الـ 100 كم /س (لأن الـعربيه وزنها خفيف علشان يتناسب مع الموتور)

فى قطع الغيار و الصيانه, الماروتى أفضل (قطع غيار و صيانه أرخص )

ده إللى أعرفه

[BlackCat07]

المشاركة الأصلية كتبت بواسطة zing0 بص يا باشا أنا إللى أعرفه هأقولوا , و طبعاً منتظر معاك رد أصحاب التجربه الفعليه الماروتى: أصغر شويه بس بياعه (ليها سوق فى البيع و الشراء) أكثر من الالتو الألتو الـ 800: أكيييييد التكييف هيأثر على كفاءة العربية لأن موتورها ضعيف, الـ 1000 أكيد هتكون أفضل شويه. بالنسبة للسفر لمطروح .... العربيتين أساساً للعمل داخل المدينه, السفر بيهم (مش مستحيل) بس هتأخد الطريق على مراحل و تعمل ريست كل شويه, كمان متحاولش تزود سرعتك عن الـ 100 لأن أصحاب العربيات دى بيشتكو إنها بتعوم بعد الـ 100 كم /س (لأن الـعربيه وزنها خفيف علشان يتناسب مع الموتور) فى قطع الغيار و الصيانه, الماروتى أفضل (قطع غيار و صيانه أرخص ) ده إللى أعرفه

مشكور علي الرد والاهتمام...
يعني اللي افهمه من حضرتك انها مش عمليه في السفر من حيث كل حاجه لكن داخل المدينه تمام...طيب انا سمعت ان طلاما العربيه اصلا مكييفه يبقي التكيف مناسب للمتور...

[AbOnOrA]

اولاً انا لو مكانك وجيب تقسيط يبقى الماروتى ابرك ميت مرة
الفرق كبير حوالى 15 الف فرق فلوس وفوائد وفى المقابل الفرق بين العربيتين مش كبير اوى
ولو انت شاطر بعد الخمس سنين دول حوش الفرق ده وساعتها تبيع اللى معاك وتكمل على تمنها وتخش فى حاجة اعلى

كمان الماروتى اكثر انتشاراً واسهل فى اعادة البيع وقطع غيارها ارخص واكثر توفراً
والقرار ليك طبعاً

واجابة اسئلتك

1- هل تكيف اللالتو قوي مع العلم اني ساكن في مدينة 6 اكتوبر والدنيا هنا شبه صحراء + ان انا طبيعة عملي في مواقع انشاء مباني سكنيه ؟؟؟!!!

لو العربيه مركونة فى مكان ضل وشغلت التكييف هيبقى كويس
لكن لو العربيه متسابه فى الشمس وشغلت التكييف هياخد وقت على ما يعادل درجة الحرارة وهيبقى مروحة بتجيب هواء ساقع اكتر منه تكييف


2- هل السياره تستحمل السفر لمسافات طويله زي مرسي مطروح وغيرها ؟؟؟!!!

يا باشا الموتسيكل اللى ماتورة اصغر ممكن يسافر مفيش مشاكل وربط الناس بين حجم الموتور والقدرة على السفر مش صحيحة
اى عربيه ممكن تسافر اى مكان وبكفائه وكمان يبقى اريح من المشى فى المدن المهم تسوق من غير قرص على الموتور وتتابع الصيانات بتاعة العربيه
وسفريات مرسى مطروح او اى مسافه اكتر من 200 - 300 كم طبيعى انت والعربيه بتحتاج تريح شويه وتطمن على كل حاجة
انا كنت بسافر سنويا مرسى مطروح بكيا برايد 1100 حصان واعرف ناس كانت بتسافر لاخر الدنيا ب 128 و 127 عادى المهم حالة العربيه وطريقة السواقة بس مش اكتر



3- هل يوجد مشاكل عامه بتظهر في السياره؟؟؟!!!

الالتو مش عارف بصراحة انصحك تراجع المنتدى وتستخدم محرك البحث وتشوف بنفسك اراء كل الناس

4- مكان الصيانه الخاصه بيها (التوكيل) عشان الصيانات الدوريه؟؟؟!!!

مودرن موتورز وهتلاقى مواضيع كتير عن مراكز الخدمة فى قسم السوزوكى

5- الصيانه الاولانيه بعد كام كيلو من الاستخدام؟؟؟!!!

ممكن بعد تانى يوم مفيش مشكلة بس المهم انت تاخد وقت كفايه تمشى بالعربيه وتشوف اذا ليك شكاوى او تعليقات على اى حاجة تعملها فى الصيانة الاولى لكن اصلاً الصيانة ديه المفروض تتعمل فى الالف كيلو الاولى

6- قطاع الغيار متوفره واسعرها غاليه ولا رخيصه؟؟؟!!!

لاء ديه معرفش بالظبط وانصحك تسأل بنفسك ولو بالتليفونات حتى وهتلاقى مواضيع عن التوكيل ومراكز الخدمة فيها التليفونات اتصل واسأل وخد فكرة بنفسك لكن غالباً هتبقى اغلى من الماروتى

7- تقييم خاص من 10 للسياره من وجهة نظرك؟؟؟!!!

مش مهم تقييم حد ومتاخدش تقييم من حد لان كل واحد ليه مطلبات مختلفة واولويات مختلفة ووجهه نظر مختلفة المهم انت تختار العربيه المناسبة لامكانيات وطبيعة استخدامك واولوياتك

8- ما هو افضل لون للسياره؟؟؟!!!
الالوان الفاتحة عموماً حلوة فى العربيات الصغيرة وعملية

[sherif_hamdy]

الماروتي ب 48 الف ؟ ازاي دي موديل 2013 ب 40 الف

والالتو كانت 50 الف هو فيه ايه يا جدعان
وال 1000 سي سي كانت ب 60 الف :O

هي العربيات غليت ولا ايه يا جدعان حد يفهمني ؟

بص يا معلم انا عايز عربيه فنفس السعر تقريبا

وكنت هجيب بي واي دي f0 هي دلوقتي ب 55 الف
بس من وجهه نظري افضل من السوزوكي مع انها صيني بس متأفله بره وده احسن حاجه فيها
بس عيبها ان سوقها قليل ومش منتشره لانها نزلت سنه ومنزلتش تاني وبعد كده نزلت السنه دي
غير ان شركه الامل مش عامله اعلانات ليها كويس
عموما اسال كويس وان شاء الله ربنا يوفقك