فيات جراند بونتو ولا تويوتا ياريس

[فــيــروز]

المشاركة الأصلية كتبت بواسطة Etsh الأخت العزيزة فيروز....أسأل الله أن يوفقك فى الإختيار الأمثل و الأفضل بالنسبة لإحتياجاتك العملية اليومية و من وجهة نظرى كأحد مقنى الفيات فى يوم من الأيام و لازلت أمتلك جراند بونتو إلى جانب سيارتى الرئيسية وأعتقد أن أى شخص يقبل على شراء سيارة يلتفت إلى العيوب قبل المميزات و لذلك سوف استعرض لك مميزات و عيوب كلا السيارتين عن تجربه فعليه حيث نقتنى فى أسرتنا كلا الموديلين الفيات و التويوتا 1- الجراند بونتو لو أنتى مش بتاعت شد و جرى و فرك بالعربيه .....يبق الجراند مش إختيارك لأنها عربية ذات محرك رياضى مزود بخاصية التى جيت تيربو........يعنى دفعت تمن حاجه مانتيش محتجاها ولا هاتستخدميها سعر إعادة البيع للفيات فى الأرض............ده لا جدال فيه واللى باع عربيه فيات فى يوم و ماخسرش فيها يقول و يثبت .....لأن أنا خسرت فى عرلبتين إتباعو صيانة وكيل و حاله والله ذى الزيرو أكثر من نصف ثمن السيارة فى خلال 5 سنوات فقط مميزات السيارة .......طبعا لا غبار على الفيات سيارة قوية و سحب ما شاء الله و متزنه و جميلة و برستيج .......بس حسب إستخدامك سفر 3 4 مرات أسبوعيا أعتقد أنك هاتواجهى مشاكل خصوصا فى الكهرباء ....لأن مستوى الإعتماديه فى الفيات مش عالى أوى

شكرا يا إتش على مداخلتك المفيده ..
بص أنا اخترت الجراند بونتو لأسباب قد تبدو تفاهه بس هى الحقيقه أسبابى .. أوّلا شكلها عاجبنى جدّا .. و ثانيا إنّها عربيه هاتش باك و أنا عاوزه أشترى عربيه هاتش باك و عاوزاها مش كبيره عشان أعرف أركنها و أتحكّم فيها .. فالياريس باعتبرها كبيره جدّا بالنسبه لحجم العربيه اللىّ فى بالى .. يمكن الهاتش باك منها كان عاجبنى بس ماسمعتش عنه كلام مشجّع

ماقدرش أقول إنّى هاسوق بسرعه أو أجرى بالعربيه ولا هاسافر بيها بشكل منتظم ده إن سافرت بيها أصلا .. أنا عاوزاها لمشاوير داخل المدينه و بشكل أساسى مشوار الشغل من المهندسين لآخر مصر الجديده ..

كمان مش بافكّر فى موضوع سعر إعادة البيع بشكل جدّى -رغم حديث الكثيرين عنه بشكل مطوّل- عشان مش شاريه العربيه عشان أبيعها أو أستثمر فيها و ده ممكن جدّا يكون فكر غلط بس هو تفكيرى حاليا ..

بس بردو من كتر الكلام فى الموضوع ماقدرش أنكر إنّى باعيد التفكير فى الاختيار و بقيت أفكّر فى الهيونداى جيتز .. أينعم شكلها مش جميل زى الفيات بس شكلها هتستحمل أكتر و فرق سعر مش أقل من 20 ألف جنيه .. بس كلام الناس عن سوء التوكيل مخلّينى مش قادره أحسم الاختيار لصالحها .. و بافكّر فى الكيا الريو بس أصلا إنّك تغيّر تفكيرك و تبتدى تدوّر من أول و جديد بعد ما كنت استقريت حاجه بردو مزعجه ..

على العموم أنا بادعى ربنا يوفّقنى للاختيار الصحيح و شكرا جزيلا لك على التعليق خاصة و هو عن تجربه شخصيه

[فادى]

بس بردو من كتر الكلام فى الموضوع ماقدرش أنكر إنّى باعيد التفكير فى الاختيار و بقيت أفكّر فى الهيونداى جيتز .. أينعم شكلها مش جميل زى الفيات بس شكلها هتستحمل أكتر و فرق سعر مش أقل من 20 ألف جنيه .. بس كلام الناس عن سوء التوكيل مخلّينى مش قادره أحسم الاختيار لصالحها .. و بافكّر فى الكيا الريو بس أصلا إنّك تغيّر تفكيرك و تبتدى تدوّر من أول و جديد بعد ما كنت استقريت حاجه بردو مزعجه ..

الهيونداى تستحمل أكتر؟
احنا عندنا عربية هيونداى و الرجل عليها أخف كتير من سيارتى الشاهين (لا بتسافر و لا بتروح مشاوير بعيدة و سواقتها هادئة تماما عكس اللى انا بعمله فى الشاهين), و النتيجة أنو الشاهين قطعت 75 الف بدون مشاكل تذكر و بالمناسبة لا مشاكل فى الكهرباء عشان الاستاذ اتش ده رغم انو الشاهين اعادة تصنيع لسيارة قديمة من فيات.
الهيونداى بقى فبعد 60 الف فقط جابت كل حاجة ممكن تجيبها, و شكلها كده داخلة على وش سلندر, و الميه بتنقص لحد دلوقتى 3 ميكانيكية و التوكيل مش عارفين منين؟! و غيرنا فيها مروحة الرادياتير و صلحنا الرادياتير مرتين و غيرنا الخراطيم و قريبا اسطوانة دبرياج.

لأن مستوى الإعتماديه فى الفيات مش عالى أوى

الكلام ده كان ممكن يتقال من 15-20 سنة على فيات, لكن حاليا فان اعتمادية فيات قفزت و تفوقت كثيرا حتى على الفرنسيين و بعض الشركات الالمانية,
مثلا الباندا صغيرة فيات حازت على سمعة ممتازة فى الاعتمادية فى المانيا (بلد المرسيدس), و ال500 ماشية على خطاها, و سيارات مثل البونتو لها سمعة جيدة جدا على صعيد الاعتمادية,
و فيات حاليا تحوز ما نسبته 10% من السوق الأوروبى.
كما تفوقت فيات على بيجو و سيتروين بمراحل فى مستوى الاعتمادية,
الحديث عن اعتمادية فيات كلام عفى عليه الزمن تماما.
على فكرة فيات و فورد شركات حسنت اعتماديتها كثيرا, بينما هناك شركات أخرى هبطت اعتماديتها, مثل فولكس و مرسيدس (عام 2005 كان عاما اسودا لمرسيدس بعد أن عانت من مشاكل بالاعتمادية), و بيجو.

سعر إعادة البيع للفيات فى الأرض............ده لا جدال فيه واللى باع عربيه فيات فى يوم و ماخسرش فيها يقول و يثبت .....لأن أنا خسرت فى عرلبتين إتباعو صيانة وكيل و حاله والله ذى الزيرو أكثر من نصف ثمن السيارة فى خلال 5 سنوات فقط

حاليا فان انظمة التقسيط المريح جعلت سعر المستعمل فى الأرض, كلو يابانى و اوروبى, و أعتقد انو بعد 5 سنوات كمان و مع ازدهار و تطور أنظمة التقسيط و اتخاذها أشكال أكثر تساهلا, فان الناس هتتوجه أكثر فأكثر الى الزيرو, و هيبقى المستعمل بلا سعر, و هتلاقى الفرق بين الياريس المستعمل و الجراند المستعمل الف أو الفين, لأن كل المستعمل هيقع.
فلا داعى للتفكير فى سعر اعادة البيع, و مش قادر أفهم ازاى ما الذى يجبرنى على تعذيب نفسى 4-5 سنوات مع عربية مش حاببها عشان اوفر الف و لا اتنين لما اجى ابيع العربية؟!!

كمان ماننساش أن الجراند بقالها فوق ال 3 سنين فى مصر و لم تثبت نفسها إلى الأن .....لكن شفت كتير أوى بيبعوها ....الله و أعلم ليه .....بس ماشوفتش اليارس بيحصل فيها كده

كيف لم تثبت نفسها؟ هل رأيت انتشارها فى الشوارع؟ قارن كده انتشارها مع الأوروبيات الأخريات من فئتها, السيارت ابيزا, البيجو 207 و الفولكس بولو (تقريبا مشفتش الموديل الجديد منها و لا مرة).

[eng.mostafa]

انا كمان محتار نفس الحيرة بس المشكله اني عمري في حياتي ما شفت في الشارع غير 3 جراند بونتو من غير مبالغة !! وخايف جداً من الموضوع ده علشان كده محدش هيجبلها قطع غيار كتير من ناحية سعر اعادة البيع يا أستاذ فادي الكلام ده بيحصل في كل دول العالم إلا مصر! وفعلاً التويوتا بتمسك سعر جامد مع انها متستاهلش انا عايز اجيب الاوتوماتيك اللي ب96 الف ورحت شفتها في التوكيل وبصراحه مش قادر ابص لاي عربيه تانية بعدها بس المشكله الوحيده اني معرفش حد جربها ولا اعرف اعطالها مع العلم اني هجيبها بعد لانسر2006 يعني 0 اعطال وقطع غيار في كل حته وانا عايز البونتو مخصوص علشان استهلاك البنزين

[Etsh]

الأخ العزيز فادى ...أولا أنا أحب أوضحللك أن أنا مش بتكلم من فراغ سواء على الإعتمادية أو إعادة البيع ولكن عن تجربة لإقتناء و ليس سيارة واحدة بل سيارتين و من فئتين مختلفتين "برافا موديل 2002و بونتو موديل 2002"
و لو بنتكلم على مستوى الإعتماديه فا أنا أسف جدا لأن الأعطال التى تتعرض لها السيارات الفيات فى أغلب الأحوال ليست ميكانيكية و لكن كهربائية وهى من أشد الأعطال فتكا بالسيارة و كفايه أنك تيجى تدور الصبح تلاقى العربيه مش راضيه تدور رغم أنك كنت سايق إمبارح و راكن العربيه وهى ذى الفل مافيهاش مشكلة لكن صباحا تأبى أن تدور.........ثانيا مافيش موديل فيات عدى إلا و كان فى عيب صناعة فى جزء إلكترونى أو كهربائى دائم العطل و أسأل أصحاب الفيات .....وعلى سبيل المثال

البرافا....نازله بعيب تصنيع و هو الأيديال أكتلرايتور ....وحدة الكمبيوتر التى تتحكم بشكل كامل فى السيارة و تنظيم دفع الوقود و حرقه..........ودى بتبوظ كل سنه و نصف أو سنتين على الأكثر و يجب تغييرها و إلا العربيه ممكن ماتدورش أو تقطع منك طول ما انت ماشى أنا نفسى غيرتها 3 مرات خلال 3 سنوات إقتناء البرافا

المثال الثانى البونتو ....السيتى باور بيبوظ إذا كثر إستخدامه و تقريبا مافيش حد عندو بونتو مش بايظ عنده أو ماغيرهوش و نصحو فى الوكيل أنو مايستخدمهوش إلا عند الركن بس ........طب ده كلام
ناهيك عن أعطال كهربائيه عديدة....و أنا لازلت أقتنى البونتو إلى جانب سياراتى الأساسيه....

لاحظت أنك بتقارن مستوى الإعتمادية و قوته لسيارات مثيلة الباندا ........ملحوظه أنه لا وجود للموديل فى مصر و أن كان فوجوده لا يذكر.........فا إحنا بنتكلم على الموديلات فى مصر...مش بره

وبعدين يا أخت فيروز حرام عليكى أش جاب لجاب ؟؟؟؟؟؟؟؟؟؟؟؟؟؟؟؟؟؟؟حد يقارن جيتس بجراتد أو ياريس ....دا حتى اليبانين و الطلينه يزعلو منك ........جيتس أيه بس......و الجيتس تستحمل عن الأتنين التانين ....يانهار أسود.......أنا حاسس أن أنا بحلم أن فى حد يقول كده على الجيتس....دا أنا لما بشوفا قدامى على مطي صناعى بيبقى هاين عليا أنزل أشيلها و أعديها المطب؟؟؟؟!!!!!!!!! أنت كدا رحتى لسكه تانيه خااااااااااااااااااااااال ص

كمان إستحواذ فيات على 10 % من السوق الأوروبى ليست نسبه مهوله لإثبات أى شىء ...لأن ممكن نقارن ده باليابانى و الألمانى و نسب أستحواذه على السوق الأوروبى......فالأنتشار فى حد ذاته لا يعنى الجودة لأن أسباب الأنتشار عديده و منها إنخفاض السعر مثلا ودى أحد أسباب الأنتشار ....ولو أخدنا الأنتشار نقطة لأثبات الكفاءة ...فأعتقد أن العربيات الصينى هاتطلع أكثر كفاءة من الألمانى و الإيطالى فى مصر ....فا يامكتلر الصينى اللى ماشى فى شورعنا ....مش كده ولا أيه

أما بالنسبه لإعادة البيع عندك حق أن الكل هاينزل و هايتوجه للزيو خصوصا مع تطبيق قانون الجمارك و الإنخفاض السنوى بنسبة 4% .....بس ساعتها الألف و الألفين هاتفرق مع اللى هايبيع مستعمل عشان يشترى جديد مع الإحتفاظ أن من المستحيل أن إعادة البيع بين التيوتا و البونتو ممكن يكون الفرق فيه ألف و لا ألفين بس أكيد أكتلر لأن دى هاتشباك و دى سيدان ......يعنى البونتو مش هايشتريها غير شاب و الياريس هايشتريها شاب أو أسرة...أذن دى هاتتباع أسرع و أكيد بسعر أفضل

أما بالنسبة للإنتشار ....فامتزعلش ممكن حضرتك تنزل سوق الجمعة و تشوف فى كام عربيه جراند بونتو ببتباع و هى لسه مالهاش أكتر من 3 سنوات ....وأنا والله العظيم شوفت واحد من سنه بيبعها يعنى بعد مانزلت ب2 سنه بس ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ و ماكنش فى حد بيقرب من العربيه...........ولو أنت بتقول أن أقارن فى كام بونتو ماشيه فى الشارع مقارنة بالبولو الأبيزا ...........هاقولك ده طبيعى ....لأن معظم اللى راكبنها شباب ....و التيربو واكل دماغهم طب يركب عربيه مافيهاش تيربو و فى نفس السعر أو أغلى ليه.....لكن ممكن تقول لى فى كام لينيا ماشيه فى البلد؟!!!!!!!!!!!!!

كلامى لا يعنى عدم حبر للفيات أو تقليلى من قدرات المصنع ......أنا بحب الفيات و سبق و قلت أنى من عشاقها...وأنها سيارات قوية وقدرات ماشاء الله فى الجرى و الشد و السحب ...بس ده كله على حساب حاجات تانيه

وبعدين معلش لما المصنع الألمانى بينتج سيارة و رغم عدم الأنتشار سعر السيارة مش بينزل ....أنا أعدت سنه كاملة و السيات الليون ثمنها نزل 4000 جنيه؟؟؟؟؟؟؟؟؟؟؟؟؟ فى حين أن سعر البرافو فى خلال سنه نزل من 135000 إلى 125000 ولما العربيه متباعتش نزلو التيربو فى السيارة و رفعو السعر تانى ل 135000 و نزلو موديلين أخرين فئه أعلى 150000 و 177000 عشان يبيع...و ال500 نزلت 15000 جنيه فى سنه و الينيا نزلت 20000 جنيه و الجراند نزلت 10000 ....................الوحي دة ذات السبات النيو بونتو......ليه ....سعر مناسب لكفاءة سيارة...و فى أقبال عليها

أعتقد أن المصنع الإيطالى يتتطور سريعا و له العديد من المميزات تجعله من أصحاب التفرد ...التصميم و السحب ....لكن فى المجمل العام لا أعتقد أن المصنع الإيطالى يستطيع التفوق على المصنع الألمانى بسهولة و لكن بالتأكيد يستطيع التغلب على اليابانى و الكورى بسهولة.........وكل عربيه ليها مميزاتها....ولا ننسى أن أقوى و أسرع و لأغلى سيارة فى العالم مازالت "بوجاتى فيرون" من فولكس فاجن المصنع الألمانى .....رغم أن الشكل مش حلو أوى ...وكان لازم يرحو لمصمم إيطالى أفضل

فادى باشا طبعا أنا عارف أنك من أشد المقاتلين و المدافعين عن الفيات ......كلامى لا يقلل من شأن السيارة ....وذى ما قلت كل عربيه ليها مميزات و عيوب...وأنا أحب أكتشف عيوب العربيه قبل مميزاتها...وده اللى أنا عارفه فى فيات من تجاربى مع السيارتين.........فلا تأخذ كلامى بشكل شخصى أنا عارفك بتموت فى الفيات ...بس أنا لو فى موقع الأختيار هاركب جراند عشان أشد و أجرى و شكل أجمل ....بس لو بنت أو أسرة يبق م}كد الياريس صفقه ربحيتها أعلى

[Etsh]

المشاركة الأصلية كتبت بواسطة eng.mostafa انا عايز اجيب الاوتوماتيك اللي ب96 الف ورحت شفتها في التوكيل وبصراحه مش قادر ابص لاي عربيه تانية بعدها بس المشكله الوحيده اني معرفش حد جربها ولا اعرف اعطالها مع العلم اني هجيبها بعد لانسر2006 يعني 0 اعطال وقطع غيار في كل حته وانا عايز البونتو مخصوص علشان استهلاك البنزين

أعتقد أن مجال المقارنة مع الياريس ليس الجراند بونتو و كن مع الينيا و كدة هاتكون مقارنه عادلة و فى نفس الوقت أعتقد أنك هاتقدر تبص لعربيه تانيه غير الياريس و تقريبا نفس السع تبدأ من 95000 وصولا إلى 110000 ...