تويوتا ياريس ولا فيات جراند بونتو

[hossamhamdy]

الياريس افضل طبعا عشان:
-تويوتا
-وماركه ليها سوقها فى مصر
-اعادة بيع كويسه
-قطع متوفره و سعر معقول

الجراند بونتو:
-شكل جامد جدا
-وكيل سئ
-قطع مش متوفره لا في التوكيل و لا خارج التوكيل
- انا اتكلمت مع واحد معاه العربيه قالى ان قطع الغيار غاليه و احيانا كثير بتكون مش فى التوكيل و يبعتو يجيبوها من بره و حلينى بقى...

وربنا يوفقك للخير ان شاء الله

[mostafa2000]

الياريس طبعا افضل

[فادى]

الجراند بونتو أفضل شكلا و موضوعا :
- محرك أفضل و أعلى تكنولوجيا و أكثر تجاوبا, و أمتع فى القيادة, كعهدنا بمحركات فيات و مصمم فى فيات باور ترين (أفضل المحركات تخرج من هذا المركز التصميمى).
- شكل أفضل و برستيج أعلى.
- أمان أكبر (خمسة نجوم), و أكثر متانة و مصممة بشكل أفضل من الياريس.
- ثبات أفضل فى المنحنيات و الطرق السريعة.
- عمر افتراضى أطول.
- سيارة مميزة تميز صاحبها, عكس الياريس التى تفتقد للتميز و البريق.
- سيبك من "هسس" اليابانى و الألمانى الموجود فى مصر!
الياريس تقليدية بتصميم متخلف, هى سيارة عادية جدا, ربما ميزتها الوحيدة أنها سيدان, و هو شكل محبوب فى مصر عن الهاتشباك.
سعر اعادة البيع لا يجب أن يشكل لديك عاملا للاختيار, لأن المستعمل كله بيرخص مع شيوع أنظمة التقسيط المريحة جدا جدا, و أصبح الجميع يتجه الى شراء السيارات الزيرو, و مع انتشار و تزايد التسهيلات, أعتقد أن سعر المستعمل كله سوف ينخفض و يتقارب جدا, و خاصة انو الفترة اللى حضرتك تشير اليها ليست بالقليلة و هى 5 سنوات, محدش عارف شكل السوق هيبقى ايه ساعتها, توقعى الخاص انو المستعمل كلو جراند أو ياريس هيبقى بلا سعر, فلا تفكر فى ذلك.

[Etsh]

هاهاهاهاهاه ...والله يا فادى بيه أنا كل لما الاقى موضوع عن الفيات بدخله مخصوص عشان أشوف ردك لأنى ما رأيت فى حياتى أحد بهذا الشكل من الحب للفيات و كأنك صاحب الشركه ....هو أنا ليا رأى موضوعى شويه لأن كلامك كان فيه حاجات كتير أنا موافق عليها تماما و أخرى أخالفك فيها الرأى

1- فعلا الجراند بونتو عربيه ذات تصميم مميز و واجهه رياضيه و برستيج أعلى من الياريس .....بس ده للى عليز كده أما إذا كان المشترى مش بيفرق معاه يبقى النقطه دى بخخخخخخخ

2- مسألة الأمان الخمس نجوم حقيقه أخرى أوافقك عليه بس برضه ماحناش جوا سبق يعنى هنطير من العربيات + أن الياريس مش متشحوره و مافيهاش أمان يعنى أنما الجراند أعلى و ده لا يعيب الياريس

3- مسألة الهسس دى مش حقيقه .....لأن فعلا الألمانى أفضل وده مش كلامى ممكن نشوف مدى إنتشار السيارات الألمانيه و تنوعها المختلف فى العالم كله ....كمان اليابانى مش هسس لأن الكزس واخده أحسن عربيه فى مستوى الإعتماديه العام السابق و فى المركز الثانى هذا العام ...اليابانى ليه إحترامه برضه بس الموضوع أن الإيطالى هوا اللى مش واخد حقه و مكانته التى يستحقها فى مصر إعتمادا على مفاهيم قديمه و خاطئه

4- التيوتا مستوى اإعتماديه و نسبة الأعطال فيها أقل بكثييييييييييييييييير من الجراند ده مؤكد و قطع غيارها أقل من الجراند و أكثر توفرا

لكن فى النهايه لو هاشترى
بقلبى : الجراند ... لموافقتى أيك على نقط كثيرة بيننا مشتركة "السحب و القوة و الإتزان و البرستيج"
بعقلى : اليارس ... نسبة أعطال أقل إعادة بيع أفضل سيارة مجربه أكثر من الجراند و وكيل أفضل و عائليه عن الجراند

بس فى كلا الحالتين ....أنا مشتريش ياريس لأنها مبعجره بعجره سيئه و بالتالى يا هاشترى جراند يا أما أدور على حاجه غير الياريس لو مش هاشتريها ....طبعا لو اللى مش شايف أن الياريس مبعجرة ....يالا يديها و يتوكل...لأن دى وجهة نظر شخصيه

[pro mada]

مش عارف اقول ايه بصراحه
اول مره اعجز اني اجاوب سؤال
انت بتسافر فمينفعش الياريس في السفر و في نفس الوقت الجراند بونتو هتجيب جاااااااااااااز بعد سنتين تلاته سفر

قول ميزانيتك كام و هرشحلك عربيه مناسبه ان شاء الله