لا تنس ربط حزام الأمان!

[Horsepower]

المشاركة الأصلية كتبت بواسطة احمد على 1999 باشكرك جدا على اختيارك لهذا الفيديو الراقى لعل الناس تتعظ معظم الناس عندهم مبدأ (هذا يحدث للاخرين) مع ان كل مرة تتحرك بينا العربية اصبحنا معرضين لخطر التصادم فى اى لحظة و زى ما فى الفيديو باين عنف لحظة التصادم يكفى كمثال بسيط راجل زى الى فى الفيديو وزنه 80 كجم لو عربيته ماشية 40 كم /س و حصل تصادم مع جسم ثابت (عربية متوقفة مثلا) قد تصل القوى الواقعة على جسمه للامام الى اضعاف وزنه يعنى من 200 الى 300 كجم شوفوا بقى لو كانت سرعته 80 كم /س ممكن يعدى 2 طن مستريح قيس على كده الى شايلين عيالهم على حجرهم و قاعدين بيهم فى الكرسى الى قدام جنب السواق متخيلين انهم يقدروا يمسكوهم لحظة التصادم طبعا مستحيل يعرفوا لان فجأه وزن الطفل لقدام ممكن يوصل 150 كجم فمفيش بنى ادم يقدر يمسكه و الى حيوقفه التابلوه او البرابريز او ممكن يخرم البرابريز و يكمل برضه ساعات يركب معايا واحد و ميرضاش يربط الحزام و يقولى مش مهم انا مسئول عن نفسى اقول له مهو لما تحصل حادثة حتبقى انت عامل زى البلية المحطوطة فى علبة و حتقعد تخبط فى كل حاجة (السقف و القوايم و الارض و التابلوه و فيا انا شخصيا) و ادعوكم الى مشاهدة هذا الموضوع رسالة الى السائق المتهور http://www.masrmotors.com/vb/showthread.php?t=27311

شكرا أستاذ أحمد على كلام حضرتك و موضوع "رسالة إلى السائق المتهور" ,,, إنت عارف أنا حاليا بأرفض نهائيا أتحرك بعربيتي لو فيها حد مش رابط الحزام,,, وحصل إن واحد صاحبي نزل وركب عربية تانية لما لقاني مصر على الموضوع ده,,, أي حد في عربيتي باعتبره أمانة و سلامته طول ما هو في عربيتي (بعد إرادة الله عز وجل) مسئوليتي الشخصية.
ربنا يحفظنا و يحفظ أحبائنا من شر الطريق.

[احمد على 1999]

المشاركة الأصلية كتبت بواسطة Horsepower شكرا أستاذ أحمد على كلام حضرتك و موضوع "رسالة إلى السائق المتهور" ,,, إنت عارف أنا حاليا بأرفض نهائيا أتحرك بعربيتي لو فيها حد مش رابط الحزام,,, وحصل إن واحد صاحبي نزل وركب عربية تانية لما لقاني مصر على الموضوع ده صح كده ,,, أي حد في عربيتي باعتبره أمانة و سلامته طول ما هو في عربيتي (بعد إرادة الله عز وجل) مسئوليتي الشخصية. و ربنا ياحسبنا على كده ربنا يحفظنا و يحفظ أحبائنا من شر الطريق.

العفو يا باشا انا برضه عامل زى حضرتك من ساعة ما عرفت اهمية الحزام (من سنة 98 و كان الناس بيفتكرونى بتأنعر) كنت اقف بالعربية متحركش غير و كله رابط الحزام و لما اتجوزت و خلفت كنت ساعات اقف على الصحراوى لو مراتى فكت ابننا من الكرسى بتاعه و ابنى و بنتى الصغيرة لما يجوا يركبوا مع حد من قرايبنا بيربطوا الحزام على وسطهم و قرايبى يستغربوا منهم و لما يسألوهم يردوا عليهم علشان منتعورش لو العربية اتخبطت
و فى الاخر ربنا امرنا ناخذ بالاسباب و لا نلقى بانفسنا الى التهلكة و قدر ربنا حيكون بس منبقاش مقصرين

[ayman_jaky]

فيديو روعة شكرا لك

[gehad523]

بصراحة فيديو رائع ومؤثر
يا ريت الادارة العامة للمرور بالتعاون مع التليفزيون تذيع الفيديو ده كل اسبوع مرة
علشان الناس تشوف وتتعظ
يعني بدل الاعلانات الهايفة اللي ملهاش لازمة
المشكلة ان كام واحد هيشوف الفيديو على النت !!! انما التلفزيون حاجة تانية
وبعدين سواقين النص نقل ولا الميكروباز(مقصودة) بيدخلو على النت؟؟؟
يا جماعة مصر من اعلى دول العالم في حوادث الطرق
وبعدين الحوادث اللي احنا شفناها دي في اوروبا حيث الطرق الواسعة الحرير والعربيات فيها وسائل امان قياسية مفيش عربية من غيرها
امال عندنا ممكن يحصل اييييييييييييييه !!!!!!!!!!!!!!!
حاجه تانية بتغيظني جدا, انا بقرأ في المنتدى بعض الاخوة يقولك انا كنت سايق على 190 ولا 210 !!!!!! نفسي اعرف ازاى وليه
وانهي طريق في مصر ينفع يتساق فيه بالسرعة دى , مش معنى ان الطريق فاضي انه يصلح فيه حاجه اسمها موصفات هندسية وقوة طاردة مركزية في المنحنيات اللي عندنا مش مصممة للسرعات العالي دي
حد سأل نفسه لو قابل كلب ولا قطة ولا جزء فيه عيب (كتير قوي عندنا) ولا مطب صناعي اتعمل فجأة هيعمل ايه.......... الله يرحمه ويرحم اللي حواليه