ماهو اليوم الذى تعطلت فية سيارتك ولن تنساه؟

[أيمن الروبي]

المشاركة الأصلية كتبت بواسطة أيمن الروبي اولا احب احييي اللي عمل الموضوع ده جميل جدا ممكن نستفاد من المواقف اللي بتحصل للناس وبتتحكي وكمان نوع من الفكاهه علي المواقف اللي بتحصل انا دلوقتي معايا 132 كداب الفين بقالها سنتين معايا وكان قبلها 128 قعدت حوالي 9 سنين معايا ودي بقي ليها مواقف معايا لا تعد ولاتحصي اولا ال 128 مواقفها كتير جدا ومنها علي سبيل المثال 1-كنت مسافر مع ولاد عمي وصحابي العين السخنه الكلام ده كان في 2003 وكانو طالعين بميكروباص تويوتا زيرو انا بقي خدتني الجلاله وقولتهم انا هطلع وراكو بالعربيه المهم وصلنا بالسلامه انا وصلت بعديهم بنص ساعه فوجئنا ان درجة الحراره هناك تكاد تكون معديه ال 45 والرطوبه عاليه اوي المهم جت الساعه 2 الظهر وقولتلهم انا هروح قعدو يقولولي الدنيا حر واصبر لبليل والكلام ده وصممت اني امشي وخدت اتنين صحابي معايا وطلعت الطريق مكملتش 15 كيلو لقيت العربيه سخنت والمياه فضيت طلمبة المياه فضت المياه من سخونية الجو روحت استنين شويه لما العربيه بردت وحطتلها مياه ومشيت مكملتش 10 كيلو والعربيه سخنت تاني وقفت بقي منا مبقاش معايا مياه والشمس فوقينا بتاكلنا ومحدش عاوز يقفلنا وانا وصحابي مش معانا موبايلات قولنا خلاص نستني جنب العربيه لحد ما ولاد عمي يعدوا علينا وهما مروحين بالميكروباص ناخد منهم مياه وده كان الحل الوحيد ادامنا المهم فضلنا كده من الساعه حوالي 3 لحد الساعه 7 والشمس بهدلتنا وفعلا شافونا ووقفلنا مالكارثه ملقناش معاهم غير ازازتين صغيرين المهم انا عارف اني لو استنين لحد بليل شويه لما الجو يبرد هينفع احطهم وارجع بيهم القاهره وفضلنا وقفين شويه لحد مواحد وقفلنا وادانا ازازتين مياه معدنيه كانو معاه وقولت لولاد عمي ارجعو انتو انا لما الساعه تعدي تسعه هرجع المهم سابو موبايل لينا ومشيو وفضلت انا وصحابي وجت الساعه 9.30 دورت وزودت مياه ومشيت وفعلا وصلت القاهره في ساعه ونص وبعد كده رقدت في البيت اربع ايام من ضربة الشمس وفي مواقف كتير معاها تضحك بس كتيره هحكيهالكو واحده واحده قدام بس هحكيلكو موقف حصلي مع ال 132 اول مااشتريتها تاني يوم ما اشتريتها كان عندي فرح لنسايبي في الاسماعيليه المهم طلعت من الجيزه الساعه 5 المغرب واول موصلت لبنزينة شل اللي علي اول طريق مصر اسماعيليه الصحراوي عند نزلة كوبري المطار لقيت العربيه غليت اوباااااا ده انا لسه علي اول الطريق ومعايا المدام ووالدي ووالدتي واخواتي المهم والدي شجعني قالي حطلها مياه وكان معايا جركنين مليتهم من البنزينه وقالي يلا دب واحنا ونصيبنا يا عم الحج نرجع احسن احنا لسه في القاهره قالي لا هنكمل يا عم الحج يرضيك يرضيك قالي عاوز ترجع خد مراتك وارجع وانا هكمل قولت مينفعش دول نسايبي انا اصلا طبعا المشكله ان الرادياتير اللي راكب كان حديد بتاع الفابريكا وده بيخلي العربيه تفرفر من السخونيه علاوه علي انه مخروم كذا خرم المهم طبعا كل 20 كيلو العربيه تغلي وتقف ووصلنا اسماعيليه حوالي الساعه 11.30 كان فرح كبير في الشارع وجايبين فرقة السمسميه وبيره وخمره وحشيش وبانجو وبلا ازرق المهم اقعدت ادور علي واحد بتاع رادياتير نشتري منه واحد نحاس ونركبه كلهم قافلين لقينا واحد كاتب نمرة تليفونه علي المحل كلمناه لقيناه نايم وبعد محايله قالنا خلاص جايلكو البيه جالنا حوالي 1.30 بليل قولنالو ركبلنا رادياتير جديد نحاس 3 ماسوره قالنا انا ووالدي يعني معنديش رادياتيرات جديده دلوقتي انا هلحملكو ده علشان ترجعو بيه ولما ترجعو القاهره غيروه المهم قولنالو خلاص الحمو ومع الدردشه عرف اننا جايين فرح كبير وبتاع وصمم انه مايكمل شغل في الرادياتير لحد من نجبلو ورقة بانجو من الفرح ياعم انت عبيط ورقة بانجو ايه اللي انت عاوزها ياعم رضيك يرضيك خلصنا عاوزين نمشي المهم روحت رايح لواحد في الفرح انا عرفه قولتلو عاوز ورقة بانجو راح مديلي واديتها لبتاع الردياتير وراح مظبطلي الرادياتير ومرديش ياخد فلوس اه والله العظيم مارضي ياخد فلوس شوفتو الكيف بيعمل ايه ابن الجزمه شغلنا تجار مخدرات عنده وش عاوز فلوس حلال يروح بيها لأولاده والحمد لله عملنا الردياتير وخلص الشغل حوالي 3.30 الفجر وكل ده الفرح شغال ورجعنا القاهره حوالي الساعه 8 الصبح وهحكيلكو باقي مواقف ال 128 بعدين ان شاء الله وكان في العمر بقيه

موقف آخر من مواقف ال 128
مره اول ما خلصت الجامعه من حوالي 7سنين طلعت انا وسته اصحابي اسكندريه بالعربيه وقعدنا حوالي 10 ايام احنا السبعه كل يوم نتفسح بيها انا سايق واتنين قاعدين علي الكرسي اللي جنبي واربعه ورا والعربيه فل الفل واحنا راجعين من اسكندريه بعد ما قضينا اسبوع العربيه ما اشتكتش من حاجه ورجعنا للقاهره انا من الجيزه واصحابي من جسر السويس وصلتهم وانا راجع علي الدائري واول مانزلت علي المحور هب لقيت العربيه سخنت وبطلت في الحال ونزلت ابص لقيت خرطوم في الرادياتير ضرب وطبعا كنت قبل نزلة ارض اللواء والطريق حارتين والمحور وقف ورايا (هكملكو بعدين عندي ظرف ولازم اخلع سلام

[خالد الجوكر]

السلام عليكم اولاً

ثانياً انا حصلى مواقف كتير جداً محرجه مع عربيتى الغاليه ال504

بس ده يعنى اكتر حاجه لما بفتكرها بضحك جداً

يوم فرح واحد صاحبى قولت اروح اوجب معاه ومكنش فيه ف الزفه غير 3 عربيات بعربيتى وكملت انو ركب معايا بنات
وانا طالع وحاطط ايدى على قلبى لأنى عارف ان الكربراتير تعبان وبيشرق مع السخونيه ازاى معرفش
المهم انا ماشى ع طريق ومشغل الكاسيت والحياه جميله
روحنا الاستوديو واتصور وخدنا ومشينا وبردو الحياه جميله
الطريق وقف الحياه مش جميله واحنا ف الصيف
وهنا بدأت قلقى العربيه وقفت منى اكتى من خمس مرات ف الشرقه وانا احط ايدى ع المارش مش اسيبه لازم ادور مش ينفع تقف ع طريق ومعايا بنات لغايه ما دخلنا وسط البلد ووقفت خالص وسيلت بنزين من الكربراتير
نزلت البنات وانا ف قمه الاحراج وفضل معايا واحد صاحبى والعريس كان طار اصلاً
فتحت الكبوت وبدور هوبا الكربراتير ولع انزل يلا طفى يلا محدش لحقها غيرى بواسطه النفخ واللى معايا واقف بعيد ميت من الضحك
اتصلت ع الميكانيكى جه وعملها وقالى امشى بيها ف الحديد ولا هيحصلها حاجه تانى وروح وكمل الزفه قولت ماشى
المهم انا رايح ع الفرح بتصل ع الواد لقيته لسه ف الزفه وقمت لاضم معاه بس كنت انا وصاحبى بس بقا
ماشيين ورجعنا من نفس الشارع اللى عطلت فيه وولعت و ف نفس المكان والله العظيم قامت واقفه تانى
قولت اعمل محاوله بأنى ادور تانى وانا فاتح الكبوت النار قامت ماسكه تانى وألاقى البيه اللى معايا ماسك ازازه فاضيه وبيضرب بيها النار ازاى مش عارف
طفيتها تانى مره وسبتها ومتصلتش بحد تانى بتاع تلت ساعه كده لما مؤشر الحراره نزل شويه قولت لصاحبى انا هدور قالى استنا انا هقف ف الشارع اللى جنبك ده لو دارت خير وبركه لكن لو ولعت تانى مش هتشوفنى ف الشارع المهم انا عارف انها هتدور ماهى هديت شويه من الحراره وهيه اساساً بتعانى من الحراره
دارت الحمد لله جرى اقفل الكبوت هوب نط ف العربيه هات الاول وفرك ف الشارع وطيران ع الجراش معدش فيها مشى بيها تانى
رحت ع الجراش وقمت داخل بضهرى ع الركنه على طووووول وداخل طاير وكنت هشيل 3 عربيات ف ضهرى بس ربنا ستر المهم وقفتها الحمد لله وطلعت منها واحنا ميتين على روحنا من الضحك انا وصاحبى جرينا ع الفرح لحقناه الحمد لله بس حصل مشكله تانيه ف الفرح وهوب لقينا العريس بينط من ع الكراسى وهابش ف واحد ومعوره ف رجله
والمواضيع دى كلها بتاعت العربيه حصلت ف اقل من ساعتين او تلاته بالكتير
الحمد لله يعنى الموضوع عدى على خير وعايز اقولكو من بعد الموقف ده مطلعتش الا على بتاع الردياتير غيرته وركبت واحد نحاسى وتانى مشوار للميكانيكى كشفت ع الكربراتير وغيرله جوانات وغسله وكده وقشطه يعنى

دلوقتى اخش بيها ف اى حته ولا يهمنى الهوا تدخل وتخمس وتفحط ولا الجنووووود

واسف انا طولت عليكو ودى كانت احدى المواقف اللى حصلتلى من المحروسه