حكايتى مع السيارات فى العراق !

[Dr. Bolbolan]

المهم يا محترمين بعد شهر مش 3 طلع الاستنسل بالعافيه ورحت غيرت البطاقة والباسبور الى طبيب حر ورحت أعمل التذكرة فى شركة الطيران قالولى هات التأشيرة نشوفها جبت التأشيرة أتاريها خلصت من أسبوعين ومش ممكن أسافر ليبيا !! يادهوتيييييييييييى ماذا أفعل يارب ! لاحول ولا قوة الا بالله يعنى فجأة لقيت نفسى فى شوارع المحروسه ( وأنا من المنصورة ) أمشى والدموع فى عينى ومستقيل فى أول حياتى ومافيش سفر ولا شغل ولا فلوس وأبويا الله يرحمه من سنه ! فجعلت أسير على غير هدى ولا هدف وفجأة لقيت أمامى شركة طيران الكويتية دخلتها بكل حزم وعزم وقلت للموظف الموجود ( فيه أى دولة فى العالم ممكن أسافر لها بدون تأشيرة ) فقاللى نعم العراق ! امتى ياعم قاللى بكره صباحآ ! قلت له الحقنى وفعلا تم المراد من رب العباد !وكل القصة دى علشان تعرفوا ان الانسان مسير فى طريق حياته ورزقه ولكنه مخير فى الحاجات التانيه وزى قصة الكوخ المحترق اللى أنقذ صاحبه كانت السفريه دى بداية الخيط لمشوار طويل لسه ممتد الى أن يأذن الله سبحانه وصورة لما تفعله المحروسه فى أبنائها ولكن الله فوق الجميع مهما كبروا وغدآ انشاء الله نبتدى بقه الدخول الى الكويت والعراق ونوصف لكم كل ما أذكره اذا أردتم ! أنا صحيح لسه ماتكلمتش عن السيارات قوى بس اللى جاى كتير وفيه قصص عن السيارات بتاعة زمان وفصولها وأعمالها قبل هذه الفترة كمان وربنا يقدرنا ونحكيها لكم وشكرآآآآآآ


ptmnlo123per1127 ]Dr. Bolbolan

[m.genedy]

انا متابع جيد لكا ما يحكى--
وح انتظر لما سيادتك تخلص خالص وبعدها ابداء انا
علشان ما يبقاش فى تداخل وخلط للسادة الزملاء-

[Dr. Bolbolan]

ptmnlo123per172 صباح الخير / توكلت على الله وركبت أول طياره فى حياتى وكانت جامبو وكان بداخلها مفارقات تموت من الضحك ولكن لن أطيل عليكم - نزلنا الكويت ترانزيت ومنها بالآتوبيس الى بغداد وأول حاجة شفتها فى الكويت هى سيارة بونتياك حقيقية مرفوعه من المنتصف الى ارتفاع 20-30 متر ( اعلان عن الوكيل ) وطلعنا من بره بره الى الحدود ( منطقة العبدلى ) حيث قابلنا موظفى الجوازات العراقيين ( ياساتر يارب ) بصرامة وأقسم أن رجل الجوازات كان فاتح الباسبور بتاعى بالمقلوب وهو يسألنى عن البيانات اللى فيه المهم عدينا والآوتوبيس كان مركة اللى يحب النبى والسائق كان بدوى لوش بينا تلويش عجب وتاه فى الطريق وأخذنا مسافة 500 كم فى 16 ساعة!
الطريق كان هباب -لا توجد مناظر جميله - مدن فى الطريق أقرب الى القرى - التراب فى كل مكان- الاستراحات بلدى جدآ - الحمامات تدخل تلاقى حفره وكوز ماء يشبه ااقنديل اللى بيطلع منه العفريت - ناس تتكلم لهجه غريبة ونظرات قاسية ! دا غير القصص اللى الواحد كان بيسمعها من الناس فى الآتوبيس عن القتل والخطف ( ويبدوا ان دى قصة قديمه عندهم مش حكاية أمريكا دلوقت ) - وعلى فكره كان وقتها الحرب مع ايران على أشدها - المهم وصلنا بغداد الواحده صباحا الى موقف الآتوبيسات وفضلت واقف فيه مش عارف أروح فين والساعه 5 صباحآ لقيت الناس كلها بتجرى فى كل اتجاه طبعآ حصل لى زعر وقلت ايران دخلت أنا ايه اللى جابنى هنا ! بعد فترة اكتشفت ان دى حركة عاديه هنا الناس الوافدين بيصحوا بدرى علشان يروحوا الشغل بسرعة!
الى هنا ونكمل بعد شويه كيف نصب على واحد مصرى وكيف تم القبض على وقصة هروبى من داخل سيارة الشرطة فى أول يوم !

Dr. Bolbolan ptmnlo123per1127

[Dr. Bolbolan]

قابلت واحد مصرى شكله محترم وقاللى انه أستاذ فى جامعة بغداد وقلت له والنبى ياعم أنا لسه جديد هنا وعاوز أروح فندق محترم ( بس مش قوى ) فقاللى تعالى اركب معى تاكسى بالنصف وسأوصلك لفندق كويس ! ركبت معاه وعند نقطه معينه نزل من السيارة ولم يدفع ولا مليم وطار !
التكسى نزلنى عند الفندق وأخذ أجرتين لمسافتين وأخذت حجرة ونمت زى القتيل بس صحيت بعد ساعتين جعان وعاوز آكل - قلت أهى فرصة أتفرج على البلد لآنى دخلتها فى الضلمه وأول ما خرجت من الفندق حبيت أعدى للرصيف التانى وعديت فعلآ بس لاحظت واحد عسكرى بيشاورلى بصباعه ( تعالى يعنى ) رحت له بكل ثقه فقاللى معاك هويه ؟ طبعآ أنا بكل براءة وروح طيبة وسعاده طلعت له الباسبور - قام ضاربه فى جيبه وقاللى شايف الكشك الزجاج ده ! قلت له نعم قاللى روح قف فيه شويه ! ليه يا عم ؟ قاللى علشان عبرت الطريق من غير المكان المخصص لعبور المشاه ! يادى المصيبة السوده ! ياعم الشارع فاضى وما فيش عربيات ! مافيش فايده ! ياعم داحنا ميدان رمسيس ولا العتبة عندنا مليون واحد بيعبروا فى وقت واحد ! قاللى بكل فخر وعنتظه أنت فى العراق !! ماشى ياعم قلت فى نفسى عقاب ربع ساعه مش مشكلة وبعد نصف ساعه وكان الكشك ابتدى يسخن من الحر قلت له مش كفايه كده ياباشا ؟ قاللى لآ استنى شويه وهكذا لمدة ساعة ونصف وفجآة وجدت مين باص كوستر جاء والعسكرى أعطى باسبورى لشخص بالداخل وقاللى اركب يا متهم !فهمت فى الحال مع انى كنت فاكر نفسى زكى انى رايح على التخشيبة وكان السيارة بها حوالى 12 شخص مقبوض عليهم زيى وفهمت ان الغرامه 100 دينار أو أكثر وتعادل نصف كل ما معى من نقود ولا لسه أكلت ولا نمت !! وأعطونى الباسبور بس داخل السيارة - وسار المينى باص يقف كل شويه عند كشك يلم الضحايا وأنا ألعن حظى لغاية لما وصل كشك ولقيت عسكرى ماسك المره دى واحد عراقى لابس بدله بس بيتخانقوا مع بعض جامد - قام الحارس اللى معنا فى السيارة نزل علشان يساعد زميله والعملية طولت وأنا زهقت ماتودونا التخشيبة بقى وخللونا نخلص ! مافيش فايدة قمت والله نزلت من السيارة علشان أحجز بينهم ونخلص قام المخبر ضخم الجثة عيض المنكفين دفعنى فى صدرى دفعة هائله وقاللى ( مالك صالح - روح بعيد ) !! فجأة لقيت نفسى بعيد عن السيارة 10 متر وباسبورى فى جيبى - قمت مدى ضهرى للترعة وجريت كمن يجرى من الآسد
وفردة جزمة اتقلعت منى سبتها وبقيت أجرى زى أبو فصادة حتى وصلت للآمان وبعد شويه رجعت من بعيد لم أجد السيارة وأخذت فردة الجزمه وحمدت الله ولكن ربنا عوضنى خير بعدها !
للقصة بقيه لكن شوفوا حتى الدكاترة اللى بعض الناس بتحسدهم بيحصلهم ايه ! وللقارىء العزيز دا أول درس تعرفه لما توصل دولة أحنبية انسى مصر ونظامها وشوف نظامهم ايه خصوصآ المروووور


ptmnlo123per1127 Bolbolan

[m.genedy]

فى انتظار البقية--
لكن لى سؤال مش فاهمة يعنى اية الدكاترة بيتحسدوا؟