هيونداى النترا سنة ونص اشغال شاقه - تجربة ومراجعة شاملة

[tamer.koko]

والله يا ابو نورا وقسم اتحاسب عليه
انا كانت معايا العربيه دي قعدت سنتين مشوفتش منها اي حاجه تزعل غير اني اشهدلها انها عربيه من الطراز المحترم
وعلي الاقل من وجهه نظري الشخصيه هي افضل عربيه في فئتها ومرسيدس الهيونداي والكيا بانواعها لحد السوناتا والاوبتيما ونقف
ولو رجع بيه الزمن تاني
والالنترا دي قدامي والسيراتو واللانسر والكورولا والكروز والمازدا 3 برده هختارها هي من غير تفكير

وافضل من الالنترا اللي معايا كمان ثبات ونعومه

[AbOnOrA]

انت عندك حق يا تامر كل الناس الركيبة بتقول ان الموديل القديم ده احسن من الاخير فى الثبات والعفشه عموماً وطبعاً احسن من السيراتو بس هى مشكلتها معايا كانت فى انها واطيه والمساعدين خفاف وبتحك فى المطبات غير كدة كل كلمة قولتها صح

[AbOnOrA]

المشاركة الأصلية كتبت بواسطة MANDO09 متابع ومتشوق لمعرفة التجربة ... وياريت يا ابو نورا لو كنت كاتب عن تجربتك مع البى ام تحط الرابط بس

باشا معلش مخدتش بالى من الكومنت بتاعك فى وسط المشاركات / بص يا باشا انا زى ما قولت الاول الموضوع بالطريقة ديه مكتبتوش عن اى عربيه قبل كدة لكن انا كاتب تقارير وحاكى تفاصيل فى مواضيع متفرقة عن البى ام دابليو وان شاء الله هنزل تقرير بنفس الطريقة ديه لو عجبتكم قريب

وديه روابط التقارير العادية

رسالة الماجستير فى الفئه التالتة e90 مو 2005 - 2012
http://www.masrmotors.com/vb/showthread.php?t=72199

تكاليف اصلاح مشكلة الريداتير فى الورشة
السيارة E90 320http://www.masrmotors.com/vb/showthread.php?t=85725

وهتلاقى مواضيع تانية لو بحثت بس دول اللى انا فاكرهم وتحت امرك طبعاً فى اى سؤال

[AbOnOrA]

اشكركم جميعاً على طيب المتابعة وبعتذر عن التاخير فى الكتابة بس انا قايل من الاول هكتب على مهلى :D

نراجع سريعاً على اللى فات وكنت بقول ان اى تقييم لعربيه بيختلف حسب طبيعة احتياجات واولويات اللى بيقيم العربيه واللى هيركبها علشان كدة انا شرحتلكم مشاكلى مع العربيه اللى فاتت وانى كنت محدد احتياجاتى واولوياتى للعربية عملية مصروفات تشغيلها قليله قدر الامكان وسهله فى اعادة البيع وبناء على المتطلبات والاولويات ديه بكرر تانى اخترت الالنترا مابين عربيات كتير كويسة جداً فى الفئه ديه ومش علشان هى الافضل على الاطلاق لكن علشان هى الانسب لاحتياجاتى ولترتيب الاولويات اللى انا حطيته لنفسى ودلوقتى هحكيلكم ونحسبها مع بعض ونشوف اذا كانت حسبتى كانت صح ولا لاء

تقييم وتجربه استخدام اكثر من سنة للسيارة

هيونداى النترا مو 2008 اوتوماتيك اول فئه



متعة القيادة

بأمانة ربنا احنا بنتكلم عن فئه من العربيات المتعة فيها مش عامل اساسى المفروض وكونى كنت راكب بى ام فموضوع المتعة ده مكنتش متوقع انه يكون مبهر خالص لكن بالرغم من ده بعد ما تركب العربيه هتحس بمتعة خاصة وطعم خاص هو نفسه فى رائى لمتعة سيارات المدرسة اليابانية (ارجع لموضوع بتحب انهى مدرسة فى صناعة السيارات
http://www.masrmotors.com/vb/showthread.php?p=307414

بمعنى انك حاسس بعربيه عملية بمعنى الكلمة قعدة مريحة كماليات وتصميم معقول هو مش جميل ولا تحفه بس معقول وعملى وسهل الاستخدام - مش زى الفئه السابعة اللى تدور على مكان الفتيس فيها ولو راجل تعرف تظبط حاجة فى الاى درايف لوحدك من اول مرة - بالعكس كل حاجة تصميمها لطيف وعملى وسهل الاستخدام كل ده بيديك احساس بالراحة وسهولة الاستخدام كمان على الطريق وزى ما هتكلم بالتفصيل عن الاداء هتلاقى نفس الاداء المريح ده بمزيج من الاداء الاكثر من جيد من ناحية والمريح والغير متكلف من ناحية تانية فى معادلة اجمالية ناجحة جداً

التصميم العام

التصميم الخارجى مكدبش عليكم اول ما نزلت مكانش عاجبنى اوى وكنت شايف ان البومبيهات اوفر شوية وكان عاجبنى التصميم بتاع الالنترا اللى اقدم منها ومازلت بيعجبنى لكن بغض النظر عن تصميم الخطوط الجانبية فتصميم المقدمة ممتاز انت قاعد شايف العربيه وابعادها سهله حركة العربيه فى الاماكن الديقة وحتى مع احتكاك كدة ولا كدة بتبقى سهلة ولما بتحصل احتكاكات مبتقاش قوية نتيجة لتصميم المقدمة الانسيابى بعد الاكصدامات عن الجسم مناسب وعن تجربة الاكصدامات ممتازة فى التصادم انا واخد بيها خبطات كتير وقوية اقصى مشكلة ان الاكصدام يتزحزح شوية ولا يقشر فى حين ان نفس الخبطات فى البى ام مثلا خليتنى اغير طقم فوانيس وشبكة وشغلانة والله طبعاً كون ان التصميم لطيف او لاء هو فى رائى لطيف بس ديه حاجة نسبية كمان التصميم الخلفى لا يقل براعة عن الامامى فهتلاقى ابعاد الشنطة كويسة وواسعة وتصميم الفوانيس والاكسسوارات متناسق وجميل ومميز انا عن نفسى بعرف الالنترا خاصة من ظهرها من على بعد كيلو هو عامة التصميم جميل خارجياً ولولا ان العربيه منتشره جداً كان هيبقى تصميم مميز لكن الواحد مل شكله من كتر انتشارها بس

التصميم الداخلى بقى يتلخص فى كلمتين علشان مطولش عليكم عشره على عشره فى العملية
سته من عشره فى النواحى الجمالية وديه ازواق وسته من عشره فى الخمامات

ومش معنى كدة ان الخامات وحشة بالعكس هى عملية جداً بس عملية زيادة عن الازم

يعنى بلاستيك نظيف بس فى الاخر بلاستيك التصميم عملى ولطيف بس مفيهوش شغل ولا اهتمام بالتفاصيل يعنى ممكن تقول لو انت عينك عادية وراجل عملى هتشوفه تصميم رائع وجميل لكن لو انت مصمم وعينك بتحب الجمال والتفاصيل هتلاقيه تصميم عملى ومقبول او جميل بس بعد فترة هيبقى ممل

تقييم الاداء

قبل ما اتكلم عن تفاصيل اداء المحرك والفتيس والعفشه فيه اداء اجمالى للعربيه ميتحسش غير بالسواقة يعنى زمان الواحد كان فاكر انه بمجرد ما يقرى المواصفات الفنية للعربيه ويحسب قوة الموتور وعزمة ويقسمهم على الوزن خلاص كدة عرف ادائها ويقدر يقارن كمان ديه طريقة نظريه بس لكن بالتجربة بتحس معادلة داخل فيها كل ده زائد طبيعة جو البلد وحالة العربيه ومدى كون حالتها متماسكة مع الوقت ولا مجرد ما بتعدى 50 ولا 100 الف كيلو ادائها بيقع خالص زى ما بنشوف فى الصينى او حتى الكورى القديم

الاداء العام للالنترا فى مصر ممتاز فمثلاً درجة الحراره ثابته دائماً وعمرى ما سمحت حد اشتكى من الحرارة فى العربيه ديه اداء الموتور كمان ثابت ومبتحسش باى تغيير لو المروحة شغالة او مش شغالة الدنيا برد الدنيا حر نفس الاداء حتى التكييف مش بياثر اوى

وهنا احب انبه على ان التكييف لاى حد بيحس كويس لازم يحس بفرق مابين كونه شغال او لاء فى عزم واداء العربيه لكن طبعاً لما تبقى العربيه 1600 مش زى 1000 سى سى ولما تبقى راكب بطولك مش زى ما تكون مركب 5 ولما تبقى ماشى على مهلك مش زى ما تكون بتجرى وتاخد غرز وتشد فالنترا زى عربيات كتير حديثة الاداء مش بقع خالص مع التكييف لكنه اقرب للثبات وان كان محسوس وطبيعى يكون محسوس واضحة الحته ديه ؟


المحرك والفتيس

قوة الموتور وتصميمه وادائه متناسب جداً مع العربيه ومع فراملها كمان - بالقيادة العادية طبعاً - يعنى هتلاقى معاك موتور ادائه ثابت دائماً حرارته والمؤشر مش محتاج تبص عليه وكل ما هتبص عليه هتلاقيه ثابت مهما كنت بتجرى او تشد بالعربيه والاهم هتلاقيه قوى وعزمة حلو على كل الغيارات تقريباً وده مع الفتيس الاوتوماتيك فتخيل ديه مع فتيس مانيوال ولا ستيب ترونيك هتبقى وحش كاسر لكن خير ما فعلت هيونداى باختيار فتيس بتنكولوجيا معقولة ممكن تكون قديمة شوية بس عملية زى ما هو مكتوب فى كتاب المدرسة اليابانية بالظبط والنتجية كانت فتيس عملى زيرو اعطال باداء جيد

عايز اقولكم انا فى العربيه ديه نادراً ما احتجت استخدم الكيك داون لان سحبها ممتاز دائماً ويمكن مستخدمتوش غير مع التكييف لما اكون عايز اطلع من حاجة فجاءه ولا حاجة غير كدة انت هتنساه طبعاً الفتيس نفسه بيديك امكانيه النقل من ال D للثالث على طول بحركة واحدة وديه اشبه بالتحويل لستيب ترونيك برضو لان هيبقى معاك الغيار التالت والتانى وحرف ال L وده للمطالع الصعبة يعنى اوتوماتيك بعملية الستيب ترونيك واعطال زيرو فعلاً مقارنة بالانسر او الالمانى

السرعة والتسارع

طبعاً ديه واحدة من اهم نقاط القوة فى اداء العربيه سحب ممتاز اقرب لسحب ال 2000 سى سى فى العربيات الالمانى وقوة موتور حاضرة على كل الغيارات اينعم انا مشديتش بيها اوى ولا سابقت بيها زى ما الواحد كان بيعمل بالعربيات ايام العفرته بس كتسارع وسرعة قصوى كنت حاسسها اقرب للاداء الرياضى من العادى وطبعاً ده راجع لوزن العربيه والايروديناميك

العفشه (نظام التعليم )

نقطة ضعف العربيات الاسيوية عموماً والكورية خصوصاً وهيونداى نفسها يعنى الاكسنت والاكسيل زى ماحنا عارفين موضوع الثبات ده مكانش فى دماغ المصمم اصلاً الالنترا اللى قبلها كان فيها مشاكل فى الفرامل وتحديداً الطنابير اختها السيراتو كانت ناشفه والجديدة بتقلب فاللى داخل على الكورى بيبقى شايل من دماغة موضوع العفشه ده وراضى بكونها عملية بمعنى سهله الصيانة والاصلاح وقطع غيارها رخيصة لكن الالنترا الموديل ده تحديداً افضل عفشه كورى ركبتها فى الفئه ديه وفكرتنى بالكورى النظيف القديم (الشوما والسبكترا) تحس ان العفشه مرنة بس ثابته والمرونة مش لدرجة انها تنط وتفقد السيطرة لكن معقولة

واقدر اقول انى على مدى استخدامى ليها وجريي على طرق الاستراد والدائرى ومصر الاسماعيلية واسكندرية ثباتها معقول جداً مش رائع لكن مش مراجيح ولو راكب معاك اسره مثلاً هتبقى ثابتة جداً على الارض وتقدر تجرى لحد 160 بتحكم كويس وده بالنسبة للكاوتش الستوك لكن لو عرضت الكاوتش ولعبت فى العفشه ممكن توصل لاداء افضل كمان

لكن المشكلة والعيب الاهم فى العربيه هو نفس العفشه برضو لان مرونتها وارتفاعها الطبيعى عن الارض (هى مش واطية ) بتحسها واطية خاصة لو المساعدين قدمو شوية وراكب معاك نفر ولا اتنين وزنهم زيادة شوية فانت هتحك فى كل اللى يقابلك حاطط حاجات تقيله فى الشنطة نفس الكلام لكن وانت ماشى بطولك او من غير تحميل علوها مقول جداً

الصالون والكماليات

الصالون زى مقولت قبل كدة مش رائع ولا تحفة لكن جميل وعملى ومريح سواء جوه المدينة او فى السفر سواء لوحدك او معاك عائله كاملة هيكونو مستريحين فى صالونها وده بالنسبة للصالون الستوك برضو
مساحات التخزين من اهم ميزات تصميمها عندك شنطة واسعة مساحات تخزين متعددة فى الصالون وفى الابواب والتابلوه
الكاسيت اللى بينزل معاها ظريف جداً بيشتغل اسطوانات ويواس بى ومسمتعش عن حد اشتكى منه انا بس فى الفترة الاخيرة حسيت انه تقيل فى قرايه بعض الاسطوانات غير كدة مفيش منه اى مشاكل

التكييف تلاجة بمعنى الكلمة فى عز الحر ممكن تكتفى بتانى درجة مثلاً وبالرغم من كونة تكييف عادى مش اوتوماتيك وامامى فقط لكن بيوزع الحرارة بشكل كويس على كل العربيه واللى ورا بيحس بيه تمام زى اللى قدام وبسرعة علماً بان اللى كانت معايا كان لونها كحلى غامق وبالتالى الحرارة بتبقى عاليه بس عن تجربه اكتر حاجة بتعمل مشكلة فى عملية التكييف بسرعة هى ركن العربيه فى الشمس وخاصة لو كان الفرش جلد ولونه غامق لان الجلد بيخزن حرارة عاليه وبتخلى التكييف ياخد وقت اطول عقبال ما يتمص الحرارة ديه كلها ويعادل الجو

مرايات كهرباء ظريفة جداً مشوفتش منها اى اعطال وتخبط فيها براحتك وتاخد كل خبطة وخبطه واقول مش هتشتغل تانى والقيها شغاله مريات البى ام كانت من اول رزعة فى مرايه عربيه تانية ولا واحد ماشى فى الشارع تلاقيها دلدلت

فتح الشنطة والتانك من الداخل بس مش من الريموت كل ديه حاجات ظريفة ومبتعطلش
وصلات ولاعة وشاحن واوديو وضعيه الدريكسيون والكراسى قابلين للتعديل بشكل يدوى

فى الاخر تلاقيها الحد الادمى العصرى للكماليات وكلها كماليات عملية مفيش منها اعطال وفى رائى ده احسن ما يحطو عشرين حاجة تعلى سعر العربيه وتبوظ فى الاخر غير كدة غبور افندى حنوتى زى مانتو عارفين فكويس انه تكرم وحط دول لكن بالمقارنة بالسيراتو او المازدا اكيد هتلاقيها اقل

وسائل الامان

ديه طبعاً تاخد اكبر صفر من عشره ومنه لله غبور زى ماقولت هو حانوتى فعلاً بالمعنى البخيل وبالمعنى انه متعاقد مع عزرائيل فبيحاول يقشط العربيه من اى كماليات امان علشان يجيبلو زباين ربنا يحميكم جميعاً فتقدر تقول غير حزام الامان معاك ربنا يعنى زيها زى الادا او الكيا برايد طبعاً هو فيه حاجة اسمها esp عباره عن لمبة فى التابلوه جداً مش اكتر بدون اى تاثير عملى وطبعاً ولا ايرباج واحدة وفى اعلى موديل فيه واحدة ولا اتنين بالكتير ومفيش اى انظمة تانية بس مين فى مصر بيهتم بالحاجات ديه مفيش طالما العربيه بتجرى حلو وماسكة سعر اشترى يا معلم

تقييم التكاليف ( القيمة الاجمالية وتكاليف التشغيل )


واخيراً الزتونه اللى كل الناس بتدور عليها ومحدش ابداً حسبها واجابه للسؤال الصعب العربيه كلها على بعضها ركوبتها كلفتك كام ؟؟؟

تعالو نحسبها

العربيه انا اشتريتها ب 77 الف جنية وكان فيها رخصة قعدت بيها سنة ونص لحد ما انتهت الرخصة وبعتها ب 77.5 على حالتها تقريباً ومن غير ما ارخص ولا انقل ملكية

صرفت عليها الاتى طول المدة

بطارية جديدة
فردة كاوتش واحدة
طقم مساحات
تغييره زيت xado هحيكلكم على تجربتى معاه فى موضوع منفصل

ديه كل الحاجات فعلاً اللى اتصرفت عليها بخلاف البنزين وملو الكاوتش هواء ولما تحسب كل ده هتلاقيه مش هيعدى الف الف ونص وطبعاً السعر اللى انا بايع بيه كنت ممكن ابيع اكتر منه بكتير بشغل التجار لكن انا بحب اطبق الحديث (رحم الله رجلاً سمحاً اذا باع واذا اشترى) وبالتالى الالنترا عربيه ممكن تركبها سنة واتنين ولما تبيعها تكسب فيها كمان او متخسرش فلوس وحتى لو خسرت هيبقى فى رينج انك راكب عربيه او زى ما بنقول ركبت بيهم
اكيد هى مش بمتعة البى ام ولا قيمة المرسيدس لكن بتديك متعة وراحة ممتازين واداء عملى وراحة بال كبيرة جداً وفى الاخر فلوسك زى ما هى وهى ديه الهيونداى النترا

بعتذر عن اى اطالة او تقصير واتمنى يكون الموضوع مفيد ومتحرمونيش من ردودكم وتعليقاتكم ويسعدنى الرد على استفسارات

[SUPER MARIO]

تقرير ممتاز و مستنى تقرير حضرتك مع زيت xado و تسلم ايدك تحياتى