تجديد بيجو 505

[hazem_khidr]

المشاركة الأصلية كتبت بواسطة mercedes السلام عليكم و رحمة الله و بركاته أنا رغم قلة مشاركتى فى المنتدى هنا , الا أنى لاحظت أن المنتدى ده , ما شاء الله ولا حول ولا قوة الا بالله العلى العظيم, من المنتديات القوية و الشاملة, اللى الواحد ممكن لو بيفكر يشترى عربية معينة, يدخل و يعرف كل اللى هو عاوز يعرفه هنا و بالتالى يقدر ياخد قرار سليم. أنا المشكلة اللى عندى و هى بصراحة ان شاء الله مش مشكلة ولا حاجة, أن العربية اللى معايا بيجو 505 موديل 1980 GR و هى معانا من سنة الصنع و أنا بالتالى مابفكرش أبيعها خالص خصوصا أنى مجددها بالكامل عدا الموتور من حوالى 4 سنين و بعدها رفعت العربية و سافرت, العربية طبعا حقن عادى مش انجكشن, فلو كانت الموديلات الأعلى من ال 505 انجكشن, ممكن أقلب العربية انجكشن ازاى من غير ما أضطر أنى أغير الموتور؟؟؟؟؟ و شكرا جزيلا و آسف للاطالة MERCEDES S430

اهلا و سهلا بيك يا مرسيدس
هو انت عاوز تغير العربيه لانجكشن ليه؟؟
الموتور بتاع البيجو لا يعلي عليه و مافيش منه اي مشاكل
غير ان الانجكشن في القديم صعب صيانته لقله قطع غياره
خليك في الكاربيراتير افضل

[mercedes]

السلام عليكم و رحمة الله و بركاته

أنا متشكر ليك جدا يا أستاد حازم, بس مش الانجكشن هيخلى العربية سلسة أكتر و تجميعها أفضل و أدائها أحسن و أوفر فى البنزين, أنا كنت فاكر كده يعنى؟؟؟
شِكرا

MERCEDES S430

[HaMaDa-ToUBaR]

اهلا بيك يا مرسيدس وانا بردة بقول المنصورة دايما منورة لية
شوف يا سيدى انا عربيتى كانت موديل 80 بردة بس sr المهم البيجو بالذات مينفعش يتلعب فية لان لو هتغير حاجة يبقى تغيرها كلها على بعضها علشان تلاقى الشغل طلع صح
يعنى اديك مثال عربيتى وعربيتك الى هى العادية مش الطيارة انا لما جيت مرة اشترى كوبلن للعربية لاقيت كوبلين رفيع وكوبلن تخين سألت الفرق قالى دة عادى ودة طيارة مرضتش اشترى وقولت اتأكد الاول انت عارف كلام البايعين ملهومش حل وكتير منهم مش فاهمين قد كدة فعلا لفيت ودورت فى النت ونزلت تصميم العفشة الطيارة ولاقيت فعلا نفس الكوبلن الى هو التخين رجعتلو تانى وبصيت ع الكارونة لاقيت اختلاف بردة فى التروس سرعتة اكبر قولت الله دة كل تكنولوجيا مختلفة مع تشابة الشكل الخارجى لما روحت مغير العفشة كاملة وجبت عفشة طيارة
انا الكوبلن كان بيعد معايا سنة هو والاسكاترا والله يا مرسيدس انا من وقت ما غيرت العفشة وركب عفشة الطيارة فضلت معايا لحد ما العربية اتباعت العفشة كانت الى يشوفها يحلف بيها وبنضافتها كلها راكبة مع بعض ادائهم واحد ومضبوط لكن لو كنت ركبت كوبلن طيارة على كرونة العادية ( البطئة) كان الكوبلن هيعيش بردة لكن مكنش هيبقى فى تحسن فى الاداء فدة نفس الموضوع بالنسبة للمكنة احسن حاجة انك تسيب مكانتك على وضعها الا بقى لو عاوز تغير الكاربرتير القديم الى هو الكبير تجيب الكاربرتير المدفع دة استهلاكة اقل فى البنزين ودة بتاع موديل 83 المكنة الانجيكشن مش هتربك عندك على طول لازم تعديل فى الشاسية لان قعدتها مختلفة عن قاعدة موديل 80 انا من خمس سنين كان ودامى مكنة انجيكشن جاية فى كونتينر بس والله بدون مبالغة كانت وحش بتكيفها وبكلة كانت 10000 قول كانت هتخلص على 8000 وكنت خلاص هجيبها اخدت الميكانيكى بتاعى علشان يشوفها اتلاقها مشش هتركب على طول وفعلا شوفت الفرق فى القاعدة لاقيتة مختلف
فانت احسن حاجة ليك انك تجيب الكاربرتير المدفع لانة استهلاكة حلو احسن من الكبير وادائة جميل جوى
دة غير زى ما الاستاذ حازم قال حكاية قطع الغيار دى حاجة مهمة ولازم تحطها فى الحسبان اذا كان الواحد مش لاقى قطع غيار الحجات العادية هيلاقى حجات الانجيكشن فخليك زى ما انت احسن
وربنا يوفقك وتوصل للى فى دماغك

[mercedes]

السلام عليكم و رحمة الله و بركاته

يا باشا , ألف شكر و جزاك الله خير.

طبعا, أنا لو عايز أغير الكاربيراتير, يبقى أحسن واحد أجيب من عنده, هو عادل سراج اللى فى الحسنية, مش كده , و لا فى حد أحسن منه؟؟؟؟

و معلش لأنى بتقل عليك, أنا كان عندى سؤال تانى بعد ادنك, تعرف مين أحسن ميكانيكى فى المنصورة بيشتغل فى العربية دى.

شكرا و تحياتى ليك و لكل الأخوة الأفاضل اللى فى المنتدى كله

MERCEDES S430

[HaMaDa-ToUBaR]

عادل سراج طبعا فى قطع الغيار الجديدة مفيش بعدة فى المنصورة
لكن لو هتجيب استيراد عليك وعلى بنك الاسكان فى بورسعيد هتلاقى هناك كل الى نفسك فية واشكال والوان لان العربيات هناك بتيجى من برة وفيها حجات كتير كويسة
بالنسبة للميكانيكى بتاع العربية انا مقدرش ادلك على حد فى المنصورة لانى مش بعمل شغل العربية هنا
انا اصلا من المنصورة بس كنا عايشين فى حتة جمب المنصوة اسمها المنزلة لو تسمع عنها علشان الارض وكدة وبعيدن رجعت تانى المنصورة بس طبعا كل تعاملى بالنسبة لشغل العربية كان فى المنزلة لان اعرف الناس هناك كويس والى بعمل الشغل عندة ممتاذ وبثق فية جدا وبصراحة مأمنش لحد تانى يمد ايدة فى عربيتى
هو اكيد فى ناس احسن فى المنصورة بس مجربتش اسأل بصراحة لانى محتجتش
فاهم قصدى انا متعود على حد معين ومرتاح معاة وكلة تمام
بس اوعدكم اعرفلك مين احسن واحد بتاع بيجو فى المنصورة
وارد عليك بكرة ان شاء الله او انهاردة بالليل